Даур Аршба. Архивное фото

Аршба: "Ахьтәы ҭагалан-2018" аҿы аԥсуа стенд ахәшьара бзиа амоуп

9
Мoсква аус зуа агро-ааглыхратә цәыргақәҵа "Ахьтәы ҭагалан-2018" актәи амш шымҩаԥысыз атәы арадио Sputnik Аԥсны Москвантә ҭелла иаиҭаз аинтервиу аҿы еиҭеиҳәеит Аԥснытәи аделегациа напхгара азҭо аԥыза-министр ихаҭыԥуаҩ Даур Аршба.

"Аԥсуа стенд ахәшьара бзиа амоуп. Ицәыргақәҵан иҟаз ахкқәа, даара ирацәан, ҵыпх иҟаз аҵкыс сынтәа акырӡа еиҳауп. Ажәлар зхәаԥшыша рацәоуп, ҳаалыҵ збазгьы рацәоуп.  Ҳақәгәыӷуеит аноминациақәа рҿгьы ҳаалыҵ аԥхьахәқәа агап ҳәа. Сара сгәаанагарала, ҳаалыҵ ас еиԥш ацәыргакәҵаҿы иахьӡыргоу мацарала ҳа ҳзы еихьӡара дууп ҳәа", — азгәеиҭеит Аршба.

Урыстәылатәи агроааглыхратә цәыргақәҵа  "Ахьтәы ҭагалан-2018"  ("Золотая осень-2018") аус ауеит Москва, жьҭаара 10 — 13 рзы. Ацәыргақәҵа еиҿнакаауеит Урыстәылатәи Афедерациа ақыҭанхамҩа аминистрра. Аԥснытәи анаплакқәа ари ауснагӡатә бжьынтәуп иалахәхоижьҭеи. Сынтәа ацәыргақәҵа иалахәуп Урыстәыла арегионқәа 60, аҳәаанырцәтәи атәылақәа 15. Ацәыргақәҵа девизны иазыҟоуп "Ҳәаа змам алшарақәа".

9