"Атурнир командала аиааира згаз ҳәа иҳамаӡамызт, зегьы хаҭалатәи рықәгыларала ироуит аԥхьахәқәа. Ахәыҷқәа ирыхәаԥшуан атехника аганахьала зегьы иреиӷьыз ҳәа. Актәи аҭыԥқәа аанызкылаз иранашьан аԥхьахәқәа. Аспортсменцәа зегьы рхы бзиан иаадырԥшит. Сынтәатәи атурнир ибзиан имҩасит ҳәа азыуԥхьаӡартә иҟоуп", — ҳәа азгәеиҭеит Ҵәыӡба.
Европеи СССРи рчемпион, жәларбжьаратәи акласс аспорт азҟаза Рашь Хәытаба ихьӡ зху XXV-тәи жәларбжьаратәи атурнир иалахәуп Аԥсны ақалақьқәеи араионқәеи рҟынтәи аспортсменцәа.
Атурнир иалахәын Гагра, Тҟәарчал, Аҟәа, Гал, Очамчыра, Гәдоуҭа, Нхыҵ-Кавказ, Тула, Краснодар, Ахыҵ Уаԥстәыла, Шәача, Адыгатәыла ркомандақәа. Алахәылацәа рыкапан 65 — 125 кьыла инаӡоит.
Рашь Хәытаба ихьӡ зху раԥхьатәи атурнир мҩаԥысит 1992-1993 шықәсқәа рызтәи Аԥсны Аџьынџьтәылатә еибашьра ашьҭахь. Нас маҷ-маҷ иара аҽарҭбаауа иалагеит.
Европеи СССРи рчемпион, жәларбжьаратәи акласс аспорт азҟаза Рашь Хәытаба иахьа Аԥсны зых иақәиҭу аиқәԥаразы Афедерациа дахагылоуп.
