Аԥсуа ҳәынҭқарратә драматә театр актиорцәа Кьасоу Ҳагба, Ҭемраз Чамагәуа, Роза Дбар "Адыгатәи ареспублика зҽаԥсазтәыз артист" ҳәа ахьӡқәа ранашьан атеатралтә ҟазара аҿиараҟны рлагалазы, ажьырныҳәа 30 рзы аспектакль "Кавказтәи амелтә гежь" аԥхьарабара Маиҟәаԥ ианымҩаԥыс ашьҭахь. Ақәыргыламҭаҟны х-бызшәакны ицәажәон: аԥсуа, абаза, адыга бызшәақәа рыла.
Адыгатәи Амилаҭҭә театр иҳаҩсыз ашықәс цәыббрамзазы Аԥсуа драматә театр асценаҟны ахәаԥшцәа иднарбахьан атеатр анапхгҩаы, арежиссиор Ҟасеи Хачегогу иқәыргыламҭа "Кавказтәи амелтә гежь". Уи аҟны ихәмаруан аԥсуа актиорцәагьы.
"Ҳаешьаратә жәларқәеи ҳареи иахьа бызшәала ҳзеилибакаауам, уи зхы иазырхәо рацәоуп. Ҟасеи ари апроект аныҟаиҵоз аԥсуаа ҳалархәны иҟаиҵеит, аԥхьаҟа аҟабардацәа, анаҩс ачерқьесцәа, иара убас ауааԥсаа алархәны иҟаиҵар иҭахуп. Иара хықәкыс иҟаиҵо - Кавказ адыгцәа, аибаркыра агьежь ҳажәларқәа доуҳала ргәы шьҭызхуаз ашәарҭараан, культны, ныҳәараны ирымаз, абри ҳаидызкыло ауп ҳәа. Аспектакль аҟны ус еиԥш ажәақәагьы ыҟоуп ҳаиқәзырхо ҳаӡәыкны ҳаҟазаара ауп ҳәа. Ҳаибаркыра аннымха, абри анапыргьежьраан "уцәгьа-мыцәгьа згааит" ҳәа зҵазкуа, ашыла аазышьҭуаз алу агежьра аума, зқьышқәсала ҳдоуҳа еиқәзырхаз абарҭ аҷыдарақәа анаҳхашҭ, аӡәаӡәала досу ҳниаӡӡаауеит, ҳбызшәагьы ҟалом. Убри аҟынтә абри апроект иалагӡаны иара аԥсуаа адыга бызшәа дирҵеит, даргьы ирҵеит, х-бызшәакны ҳахәмаруан. Ҳажәларқәа зҭаху иззааигәоу наганы идирбар иҭахуп, ҳықәкыс иамоуп абызшәа аҭагылазаашьа аиӷьтәра. Адыга театр урыс бызшәала ихәмаруа ианалага уи милаҭтә театрӡам, иԥсит, убас ауп аԥсуаа ҳҟынгьы, абызшәа проблема дууп. Мчыла аԥсуа абызшәа зурҵаз имҳәар иаҳа еиӷьуп, ус адоуҳатә бызшәа зеиқәхаӡом", - ҳәа азгәеиҭеит Ҳагба.
Инеиҵыху аицәажәара шәазыӡырҩыр шәылшоит арадио Sputnik Аԥсны аефир аҿы.
