Владимир Занҭариа

Занҭариа Владислав изку иажәеинраала ҿыц азы: қәыԥсычҳарак ала иит

67
(ирҿыцуп 12:24 14.05.2019)
Апоет, ажурналист Владимир Занҭариа арадио Sputnik аефир аҟны даԥхьеит ҳаамҭазтәи аԥсуа ҳәынҭқарра ашьаҭаркҩы Владислав Арӡынба изикыз иажәеинраала ҿыц, еиҭеиҳәеит иара идҳәалоу игәалашәарақәа.

Иахьа, лаҵара 14 рзы 74 шықәса ҵит Аԥсны Раԥхьатәи ахада, аҵарауаҩ ду, аԥсуа жәлар рԥыза, Аԥсны Афырхаҵа Владислав Григори-иԥа Арӡынба диижьҭеи.

Занҭариа Владислав изку иажәеинраала ҿыц азы: қәыԥсычҳарак ала иит

"Унадыххыланы ажәеинраала узыҩӡом, ҩнуҵҟала акы уеиланаршыроуп. Иацы, иахьа схы дҭагьежьуан, иҟалап иира мшы иадҳәалазаргьы. Ажәеинраала изыскхьан 1989–тәи ашықәс азы имҩаԥысуаз ахҭысқәа раан ироль ӷәӷәа инадҳәаланы. Аха уи аахижьҭеи акыр ҵхьеит. Ариабжьарак исгәалашәон корреспондентк иаҳасабала Москваҟа ҳганы, аккредитациа шаҳзиуз. Анатоли Маланиа операторс дсыцын. СССР Иреиҳаӡоу Ахеилак аҟны Кремль аус дуқәа ахьеилашуаз ауаа рҿахәы рҿаҳхуа, ахҭысқәа ааҳарԥшуа алшара ҳаман. Иаргьы деигәырӷьон ахәыҷқәа реиԥш Аԥсуа телехәаԥшра аҟынтәи ҳахьицыз, уахынла дааны ҳкамера алакҭа дҭаԥшны игәеиҭон ианаҳҵаз. Ҩ-нызқьи ҩышәҩык адепутатцәа ахьыҟаз иара даарылукаартә дҟазҵаз ибаҩхатәра, игәаӷьра ауп. Жәлар рдепутатцәа Актәи реизара ду аҟны Владислав ицәырҵра аума аҵанакуан, убри арҭ амшқәа рзы исгәалашәан, самырцәеит, қәыԥсычҳарак ала иит абри ажәеинраала", - иҳәеит Занҭариа.

Владимир Занҭариа аефир аҟны даԥхьеит иажәеинраала ҿыц.

Дцәажәоит Владислав акаҩ-акаҩ ҳәа!..

В.Г. Арӡынба Москва, Жәлар Рдепутатцәа Актәи Реизара ду аҿы ииҳәаз ажәа иазкны

Абар, абар дахьнеиуа ашацаҳәа,
Ахьшьыцба даҩызоуп, ахьшьыцба! –
Атрибунаҿы даацәырҵит аҕьараҳәа,
Иаацәыригоит Аԥсны аӡбахә лабҿаба!

Ииҳәо ажәа - абырҵкал икылхуп,
Ииҳәо ажәа - Аԥснынӡа инаӡоит!
Ииҳәо ажәа - аԥсуа жәлар рыгәҭыхоуп,
Амца икуп, аша-еҵәеиҧш длашоит!

Ибжьы ҩныҩуеит Кремль акаҩ-акаҩ ҳәа,
Аҧхӡы хьшәашәа рықәҭәоит ҳаҕацәа,
Дцәажәоит Владислав – аҕьеҩ-аҕьеҩ ҳәа,
Анцәа Дуӡӡа, дҳамоуп, о, Анцәа!

Абасҟаамҭа ихәаҽын ҳа Ҳиаша,
Абасҟаамҭа иҵәахын ҳҭоурых!
Абар даацәырҵит ҳара ҳҵабырг зҳәаша,
Иҳәоит, иҳәоит уи ҳхаҭыӡшәа неиҵых!

Дцәажәоит Владислав! Иӡырҩуеит зықьҩык уа,
Иҳәоит аргама ишҳамырхуаз ҳбызшәа,
Иҳәоит аргама, ишыршьаҟьауаз ҳзинқәа,
Азал ӡырҩуеит... Ирбоит уи оумашәа...

Иҳәоит, абар, ишҳамырхуаз Ҳҳәынҭқарра,
Ишҳабашьуаз, ҳанырхырцаз ашәҟәы!
Маӡа-аргама ишҳадырҵоз ахара,
Ҳдашьхәа аныхраз ишԥырымкуаз акы...

Ибжьы зыҩныҩуа Аизарақәа Рханоуп,
Еицакра ақәым иажәақәа рҵакы!

Уажәы-уажә дахәаҧшуеит исааҭ Лукианов,
Арегламент гәеиҭоит, иҭынчым иара игәы...

Ақырҭқәа гәамҵуеит! Иргәаԥхом аиаша,
Аинфарктқәа днархьуеит ираҳауа!
Башаӡа иуалыуашоит урҭ, баша, –
Акымзаракгьы рымам – иҿадырхьуа!

Дцәажәоит Владислав! Аҕьеҩ-аҕьеҩ ҳәа!
Ихыҵуеит Аԥсынтәыла иху ашәшьы!
Дцәажәоит Владислав! Акаҩ-акаҩ ҳәа!
Саркьалҵас Кремль иҩныҩуеит иара ибжьы!

Ашәышықәсагь ааҭгылеит еиқәышьшьы...

 

Шәазыӡырҩы аудио. Иаҳа инеиҵыху анҵамҭа шәаҳар шәылшоит арадио Sputnik Аԥсны аефир аҟны.

67
Демур Какалия

Какалиа Кәтол асоциалтә проектқәа рынагӡаразы: ақалақь ахь нхара ицо рхыԥхьаӡара маҷхоит

97
(ирҿыцуп 16:34 06.06.2020)
Агәыҳалалратә фонд "Кәтол ақыҭа аҿиара ацхыраара" анапхгаҩы Демур Какалиа арадио Sputnik аефир аҟны арубрика "Раионк аԥсҭазаараҟынтә" аҿы еиҭеиҳәеит ақыҭаҟны ашьапылампыл маҷ адәы аргылара шаԥшьыргаз, рфонд ахықәкы атәы.
Раионк аԥсҭазаараҟынтә: Какалиа Кәтол ашьапылампылтә дәы аргылара иазкны

"Афонд алахәылацәа ақыҭаҟны инхо аҷкәынцәа роуп зегьы: Џьон Тапаӷәуа, Авҭандил Шьенгьелиа, Гена Ҵлаииа. Еиду амилаҭқәа реиҿкаара Аҿиара апрограмма асоциалтә проектқәа ирыдҳәалоу ахь ашәҟәы алаҳҵеит. Астадион аргыларазы ҳапроект ргәаԥхеит, ирҳәеит аԥара шәаҳҭоит ҳәа. Аргылара ҳалагеит, иаагозар, иацы ахаҳә ҭаҳаԥсон астадион иахьаҵанакуа. Ацхыраара ҳарҭоит ҳқыҭа иалахәу аҷкәынцәа. Аӡәы абылтәы ҳаиҭоит, ҽаӡәы - аԥара, досу ишилшо еиԥш. Апроект анагӡаразы аԥара аноурыжьуаз Еиду амилаҭқәа реиҿкаара Аҿиара апрограммала иҳарҳәеит ахә зегьы шахырымшәаауа. Ҳара иаҳҳәеит иазымхо аԥара, аргыларатә материалқәа роума, ишҳалҳаршо. Ахаҳә акәзар, Тамшьтәи аҵхырҭаҟынтәи иҳаиҭеит ҳқыҭаҟны инхо Асҭамыр Саӡба, иара ибзоурала иахәҭаз ҭаҳаԥсеит", - иҳәеит Какалиа.

Иара иажәақәа рыла, Кәтол ақыҭа аҿиаразы афонд аԥҵан жәабранмзазы, хықәкыс ирымоуп еиуеиԥшым асоциалтә проектқәа аԥсҭазаара раларҵәара.

"Зегьы ижәдыруеит ақыҭақәа рҟны аҭагылазаашьа зеиԥшроу, иҟаӡам иақәнагоу аспорттә ҽазыҟаҵарҭақәа, еиуеиԥшым асекциақәа. Ҳәарада, арҭқәа зегьы зныкала иҳалшаӡом аҟаҵара, аха шьаҿа-шьаҿала ҳамч ақәхоит ҳәа сгәы иаанагоит", - иҳәеит Какалиа.

Иара иазгәеиҭеит ақыҭақәа рҟны еиуеиԥшым асоциалтә проектқәа зынагӡахар, ақалақь ахь нхара ицо рхыԥхьаӡара иаҳа имаҷхон ҳәа.

Иара убас шәаԥхьар ҟалоит:

97
Мушни Ласурия

Лашәриа Анатоли Аџьынџьал изы: зхатә ҩышьа, зхатә сахьа башьа змаз иакәын

13
Иахьа 90 шықәса ҵит диижьҭеи апоет-алирик, апрозаик, аиҭагаҩ, Аԥсны Ашәҟәыҩҩцәа реидгыла алахәыла Анатоли Ҭархәына–иԥа Аџьынџьал. Уи арадио Sputnik аефир аҟны дигәалаиршәеит Аԥсны Жәлар рпоет Мушьни Лашәриа.

Иара дравторуп жәаба инацны апоезиатә шәҟәқәеи апрозатә шәҟәқәа ҩбеи. Иажәеинраалақәа анылеит "Аԥсуа поезиа антологиа". Анатоли Аџьынџьал аԥсшәахь еиҭеигахьан аурыс, аукраин, абаза, ачеркес, ауаԥс шәҟәыҩҩцәа ражәеинраалақәеи ражәабжьқәеи. Иара иажәеинраалақәа реизгакәа  ҩба аурысшәахь еиҭагоуп: "Улья" (Аҟәа, 1967 ш.), "Белая земля" (Москва, 1975 ш.). Анатоли Аџьынџьал иԥсҭазаара далҵит 1977 шықәсазы.

 

 

Лашәриа Анатоли Аџьынџьал изы: аԥсуа поезиаҿы раԥхьаӡа аметафоратә дунеибашьа иазҟазаз рҿиаҩын

 

"Анатоли Ҭархәына-иԥа Кәтол ақыҭан диит. Иара ҳпоезиа аҭоурых аҟны даанхеит зхатә ҩышьа, зхатә сахьа башьа змаз иакәны, амилаҭтә поезиаҟны раԥхьаӡа акәны аметафоратә дунеи адкылашьа, адунеибашьа ирызҟазаз рҿиаҩны. Уи зегьы ираҭәам, ирынасыԥым. Убас иҟан иара илаԥшбашьа. Изааигәаз ауаа саргьы среиуан. Ицәажәара ҳшымгәыӷӡоз ашьха џьара ахы ирхон, лаԥшҵашәарақәак иоуан, апоетцәа адуқәа шыҟаз дыҟан уи аганахьала. Иара зышьҭабжь ахара игоз аестрадатә поетцәа дреиуамызт, ихаан ҳара ҳҟынгьы ус еиԥш иҟан. Иҵегьы ахӡыргара имандаз, иҵегьы активра иландаз уҳәартә еиԥш дыҟан иара, аха урҭқәа гәхьаас имамызт, иҩышьа иҿыцыз цахак еснагь иадиҵон, акы алеигалон, ирҵаулон, убри ԥсҭазаарас иман. Иара заа иԥсҭазаара ҿахҵәеит, ҩынҩажәи быжьба шықәса дшырҭагылаз, гәыблыла ҳауаажәлар днаскьаргеит. Ԥшрала–сахьала анцәахша иакәын, убас деибыҭан, днаӡаааӡан, иалкааз уаҩын", - иҳәеит Лашәриа.

 

Са исҭахуп адгьыл еиԥш ачҳара сымазарц,
Амаҷ азыҳәа сыҵҟьо сҟамларц.
Са исҭахуп адгьыл еиԥш аразра сылазарц,
Сгәы ҟьаҟьаӡа еиҵыхны ауаа рзы инхарц.
Анатоли Аџьынџьал

Шәазыӡырҩы аудио. Иаҳа инеиҵыху анҵамҭа шәаҳар шәылшоит арадио Sputnik Аԥсны аефир аҟны.

Иара убас шәаԥхьар ҟалоит:

13

Акоронавирустә инфекциа даҽа курсантк ицәа иалоуп ҳәа ишьақәырӷәӷәоуп

5
(ирҿыцуп 00:35 07.06.2020)
Иҳаҩсыз уахыки-ҽнаки рыла акоронавирустә инфекциа рылоу ирыламу агәаҭаразы атестқәа ирхыжьын 45-ҩык Аԥсны атәылауаа.

АҞӘА, рашәара 6 - Sputnik. Акоронавирустә инфекциа даҽа курсантк ицәа иалоуп ҳәа ишьақәырӷәӷәоуп, иара Гәдоуҭатәи ахәышәтәырҭахь днагахоит, абри атәы аанацҳауеит COVID-19 ауааԥсыра рацәыхьчаразы Аԥсны аоперативтә штаб.

Иҳаҩсыз уахыки-ҽнаки рыла "Аиҭар" аҟнытә иоушьҭын зкарантинтә аамҭа нҵәаз акурсантцәа: ААР аганахьала ҩыџьа, жәаҩык АҶА акурсантцәа.

Зынӡа апандемиа ааҟалеижьҭеи Аԥсны иахьаҵанакуа акоронавирус рыхьхьеит 36-ҩык ауааԥсыра. Урҭ рахьтә 27-ҩык ргәы бзиахахьеит, аӡәы лыԥсҭазаара далҵит.

Раԥхьаӡа акәны Аԥсны акоронавирус мшаԥымзазы ирыхьит Гагра атәылауаа хҩык, лаҵарамзазы Урыстәылантәи ихынҳәыз аԥсуа курсантцәеи иара убас Москвантәии Шәачантәии ихынҳәыз ҳтәылауааки ирыдбалан COVID-19. 

Даҽа быжьҩык акоронавирус рыдбалан рашәара 3 рзы.

Акоронавирус иадҳәалоу ажәабжьқәа шәрыԥхьар ҟалоит абра>>

5
Атемақәа:
Ачымазара ҿкы – акоронавирус Аԥсни адунеи аҿи: иалкаау