Амиран Какалиа

Какалиа: ацитрустә шәырқәа рааӡара ақыҭанхамҩаҿы аԥеиԥш бзиа змоу хырхарҭоуп

13
Ацитрустә шәырқәа рааӡара ҳтәылаҿы ԥеиԥш иамоу, насгьы сынтәатәи аҽаҩра ахыԥхьаӡарақәа ртәы арадио Sputnik Аԥсны аефир аҿы еиҭеиҳәеит Ақыҭанхамҩатә еилакы ахантәаҩы Амиран Какалиа.

 

"Ҵыԥх ацитрустә шәырқәа рҽаҩра бзиан, 40 нызқь тонна инареиҳаны аҳәаа иахыган. Сынтәа аҽаҩра ҩынтә еиҵоуп. Ацитрустә шәырқәа ашықәсқәа еилнахуеит, уи ауп изыхҟьазгьы сынтәатәи арбагақәа рмаҷхара. Ари ашықәс азы 17 нызқь инацны ҳазыԥшуп. Есжәамш аҳазалхратә еилакы аҟнытә иҳауеит аинформациа, ашықәс анҵәамҭазы еилкааны иҳауеит шаҟа аҳәаа иахыргахо атәы. Ақыҭанхамҩатә наплакы 2019 шықәса рзы имаҷымкәа анхаҩцәа ацхыраара рзыҟарцеит, еиҳарак амармалташьтә пты ахәшәтәразы. Уи аҿагыларазы иаҳшаз ахәшә 19 миллион инацны иартәоит. Ари аус ҭакԥхықәрала ҳазнеит, иагьынаҳагӡеит ибзиан ҳәа исыԥхьаӡоит. Аԥсны ацитрустә шәырқәа абаҳчақәа зегьы рҿыцтәуп, ақыҭанхамҩеи ҳареи ҳгәы иҭоуп аиҿцәажәара амҩаԥгара аиҭаҳатә ала ҳаиқәдыршәарц азы. Адгьыл алшара ибзианы иҭҵааны уи аус нап аркра ҳҭахуп. Ацитрустә шәырқәа рааӡара ақыҭанхамҩаҿы аԥеиԥш бзиа змоу хырхарҭаны ҳәа иԥхьаӡоуп. Иара аӡбахә хара инаӡахьеит, аҭиразгьы уадаҩра ыҟам", - ҳәа азгәеиҭеит Какалиа.

 

Инеиҵыху аиҿцәажәара иара убас шәазыӡырҩыр шәылшоит арадио Sputnik Аԥсны аефир аҿы.

13