Валерий Касланӡиа

Аԥсны еицырдыруа ахьыӡқәа: Касланӡиа Рауль Лашәриа изкны

24
(ирҿыцуп 15:43 20.05.2020)
Апоет, адраматург Валери Касланӡиа арадио Sputnik Аԥсны иаиҭаз аинтервиу аҿы иҳәеит Рауль Лашәриа поетк иаҳасабала ибжьы егьырҭ аԥсуа поетцәа ишрыламҩашьоз.
Аԥсны еицырдыруа ахьыӡқәа: Касланӡиа Рауль Лашәриа изкны

Лаҵара 20 рзы иԥсы ҭазҭгьы 75 шықәса ихыҵуазаарын апоет, аиҭагаҩ, апублицист Рауль Лашәриа.

"Рауль поетк иаҳасабала дрыдыскылоит аԥсуа поет гәлымҵәахқәа Анатоли Аџьынџьал, Таиф Аџьба, Витали Амаршьан. Ҳәарада, иара ихатә бжьы иман. Иҩымҭақәа игәцаракны ирыԥхьоз ирымбар залшом ихәыцра ҵаулақәа, иуаҩра ду, ипатриотизм. Иара ибаҩхатәра анаҩсгьы аҵара бзиа иман. Акымкәа атәым бызшәақәа идыруан, аха иара илыжжуаз аԥсуара акәын. Уи иҩымҭақәа рҿы абжеиҳарак иубо аԥсуа қыҭа аԥсҭазаароуп. Игәараҭа агәхьаагара, аԥеиԥш азхәыцра, лахьынҵас иамоу. Рауль иџьабаа рацәоуп ажурналистикаҿы, акыр шықәса Аԥсуа телехәаԥшраҿы аус иухьан. Аурысшәаҟнытә аԥсшәахь иара ишеиҭеигоз џьашьатәын, аурыс текст дахәаԥшны, аԥсышәала даԥхьон. Иара дызлыҵыз иҭаацәара, ихәышҭаара - абри акәын аиҳарак хьаас имаз, аха убри убас иҟаиҵон, уара уанаԥхьоз уаргьы иузааигәахон иара ихьаақәа", - ҳәа иҳәеит Касланӡиа.

Иаҳа инеиҵыху аиҿцәажәара шәазыӡырҩы арадио Sputnik Аԥсны аефир аҿы.

Иара убас шәаԥхьар ҟалоит:

24

Арышԥҳа ашкол аушьҭымҭацәа ҩымчыбжьатәи рҵаразы: аԥышәарақәа рҽырзыҟарҵароуп

4
(ирҿыцуп 20:01 03.06.2020)
Тҟәарчал араион аҵара аҟәша аиҳабы Манана Арышԥҳа арадио Sputnik арубрика "Раионк аԥсҭазаараҟынтә" аҳәаақәа ирҭагӡаны еиҭалҳәеит ашколқәа роушьҭымҭацәа рзы ихацыркыз аҵаратә процесс шымҩаԥысуа.
Раионк аԥсҭазаараҟынтә: Арышԥҳа аушьҭымҭацәа ҩымчыбжьатәи рҵара иазкны

Аԥснытәи ашколқәа роушьҭымҭацәа рзы аҵаратә процесс хацыркын рашәара 2 рзы, уи мҩаԥыслоит ҩымчыбжьа рыҩнуҵҟа. 1-10 аклассқәа рҵаҩцәа рҵараамҭа хыркәшахеит лаҵара 13 рзы акоронавирус иадҳәалоу аҭагылазаашьа иахҟьаны.

"Амза ҩба инаркны ажәеизатәи аклассқәа рҵаҩцәа иацырҵеит рҵара, аха уи иаанагом апрограмма зегьы ҩымчыбжьа ирҭагӡаны иалгоит ҳәа. Еиҳарак ари зызку ахәыҷқәа аԥышәарақәа разыҟаҵара ауп. Ашколқәа зегьы адезинфекциа рызун. Аԥҟарақәа инарықәыршәаны ашколқәа рҿаԥхьа еиҿкаауп амедпункт, ашоура шәаны ашколқәа рахь инарышьҭуеит, аклассқәа рҟны аӡәаӡәала итәоуп.
Сынтәа ашкол иалго араион аҟны 128-ҩык ыҟоуп, ақалақь аҟны 45-ҩык аушьҭымҭацәа ҳамоуп", - лҳәеит Арышԥҳа.

Лара иазгәалҭеит араионтә аолимпиада иалахәыз аушьҭымҭацәа рыбжьара алҵшәа бзиақәа змаз шыҟоу, урҭ иреиҳаӡоу аҵараиурҭақәа ирҭалартә еиԥш алшара ҟалап ҳәа агәыӷра шлымоу.

Шәазыӡырҩы аудио. Иаҳа инеиҵыху анҵамҭа шәаҳар шәылшоит арадио Sputnik Аԥсны аефир аҟны.

Иара убас шәаԥхьар ҟалоит:

4

Аҩӡԥҳа Еиду аштатқәа рҟны ишьақәгылаз аҭагылазаашьазы: уацәшәаратәы избом

8
(ирҿыцуп 20:06 03.06.2020)
25 шықәса инареиҳаны Ниу-Иорк инхо ҳџьынџьуаҩ Лариса Аҩӡԥҳа арадио Sputnik аефир аҿы еиҭалҳәеит Еиду Америкатәи аштатқәа рҟны аҭагылазаашьа зеиԥшроу, уи дшазыҟоу атәы.
Аҩӡԥҳа Еиду аштатқәа рҟны ишьақәгылаз аҭагылазаашьазы: уацәшәаратәы избом

Еиду Америкатәи аштатқәа рҟны мчыбжьык ҵуеит аҿагыларатә қәгыларақәа цоижьҭеи. Аполициа аусзуҩцәа Миннеаполис афроамерикауаҩ Џьорџь Флоид даныршь, аԥхьа аҭынчратә ҟазшьа змаз ақәгыларақәа цон, анаҩс аимҵәара, аидысларақәа рахь икылсит жәабала ақалақь дуқәа рҟны. Урҭ рыбжьара иҟоуп Америкатәи аштатқәа раҳҭнықалақь Вашингтонгьы, иара убас Ниу-Иорк ақалақь.

"Иахьа Америка иҟоу аҭагылазаашьа, сара сахьахәаԥшуа ала, уацәшәартә иҟам. Ииашоуп, амилициа аусзуҩ даара агха ҟаиҵеит. Азакәан ала уи ауаҩы дидгыланы дихьчозароуп, ихаразар - азакәан ала дизныҟәароуп. Уи иахҟьаны аҿарацәа аҿагыларатә қәгыларақәа ирылагеит, аха иахадырҟьацәеит. Урҭқәа зхароу рыԥшаауеит, азакәан инақәыршәаны ирызныҟәоит. Сара сахьахәаԥшуа, ари хара инеиуа усым, иааныркылоит. Сгәаанагарала, ари аҭагылазаашьа аполитика адҳәалара аҭахым, аҿар аҩны итәан мызкы-ҩымз, адреналин рхы иасын ирбалак ҟаҵо идәықәлеит. Изхароу зегьы азакәан ала ирызныҟәоит", - лҳәеит Аҩӡԥҳа.

Шәазыӡырҩы аудио. Иаҳа инеиҵыху анҵамҭа шәаҳар шәылшоит арадио Sputnik Аԥсны аефир аҟны.

8