Џьергениа еиҭеиҳәеит Риҵаҟа ицо амҩа аҭагылазаашьа зеиԥшроу
(ирҿыцуп 11:19 23.11.2020)
Риҵатәи амилаҭтә ҳәарԥсарра абнахылаԥшҩы аиҳабы Ҭенгиз Џьергениа арадио Sputnik аефир аҿы еиҭеиҳәеит аӡиахьы уназго амҩа аҭагылазаашьа зеиԥшроу атәы.Ҳазлацәажәаша ҳамоуп: Џьергьениа Риҵа асы алеира иазкны
"Арҭ амшқәа рзы илеиз асы иахҟьаны аӡәырҩы рмашьынақәа ирнамҭеит аӡиахьы ахалара. Аушьҭырҭатә ҭыԥқәа рҿы игылоу есымша ираҳҭоит адырра амш зеиԥшроу атәы азы, змашьынақәа еиқәшәам урҭ аурышьҭӡом. Асы леит ҳәа анраҳалак ауаа узаанкылаӡом, ихалоит ахәыҷқәа рыман. Уажә иаарласны асы зыршәуа амашьына амҩа арыцқьаразы иаараны иҟоуп, ҳазыԥшуп. Егьырҭ иҳамо атехникагьы еиқәшәаны игылоуп, аусура иазыхиоуп, ас дук леиргьы излаҳрыцқьо ҳамоуп. Амҩақәа еснагь ҳархылаԥшуеит, иаҳрыцқьоит, аӡын Риҵаҟа иаар зҭаху рзы ус еиԥш аҭагылазаашьа рзаԥҵахоит", - еиҭеиҳәеит Џьергениа.
Иаҳа инеиҵыху аиҿцәажәара шәазыӡырҩыр шәылшоит арадио Sputnik Аԥсны аефир аҿы, мамзаргьы аудиофаил аҿы.
Қәаранӡиа: ауаа алашаразы аҭагылазаашьа шыцәгьахоз дырны, заа мҿыла рҽеиқәдыршәеит
(ирҿыцуп 19:51 24.01.2021)
Сынтәа даҽа аамҭанык еиԥшымкәа амҿы зҭаху рхыԥхьаӡара рацәоуп, ҭелла заа аҿаҵа ҟарҵоит, абри атәы арадио Sputnik аефир аҟны иҳәеит Кәҭол ақыҭан инхо амҿылхҩы Енвер Қәаранӡиа.Қәаранӡиа: сынтәа ауаа алашаразы аҭагылазаашьа шыцәгьахоз дырны, мҿыла заа рҽеиқәдыршәон
"Сусура абжьааԥны еиԥшымкәа иацлеит, аха уи уаргәырӷьартә иҟам, амҿы ҳҭииндаз ҳәа мацара акәым ҳшыҟоу, аԥсабара ахьчарагьы ҳуалуп. Алашара ҵыԥхгьы ибзиамызт, аха сынтәа аҭагылазаашьа еиҳагьы еицәахеит, ауаагьы уи апроблема шыҟалоз дырны заа аӡынра рыҽдырхеит. Сынтәа цәыббрамза инаркны амҿы аҿаҵара иалагахьан хыԥхьаӡара рацәала. Сара схала амҿы аиқәыршәара саҿуп. Аҭел исзасуеит ишырҭаху, шаҟа рҭаху рҳәоит. Еиҳарак ауаа ирҭаху ахьацоуп, уи ибзиан ибылуеит, аршьшьарагьы усҟак ицәгьам. Ашәгьы иазҵаауа дыҟоуп, ал усҟак ирҭахым. Амҿы ылысхуеит Кәтол абнақәа рҿы. Ажәытәан Кәачара ауаа ахьынхоз уажәы иахьҭацәу абнақәа ахиааны иҟоуп. Ҿыц игылоу аҵла ԥаҳҟаӡом, иажәхьоу роуп. Ахьаца ашьапы хаҳҵәаӡом, ажәытәан еиԥш икаҳҿоит хыхь-хыхь, нас амахәҭақәа ҿыцқәа аауеит, анаҩс 3-4 шықәса рышьҭахь еиҭа иԥаҳҟартә иҟалоит. Еиҳарак амҿы Аҟәа ақалақь аҿы инхо роуп иаҿазҵо", - ҳәа еиҭеиҳәеит Енвер Қәаранӡиа.
Иаҳа инеиҵыху аиҿцәажәара шәазыӡырҩыр шәылшоит арадио Sputnik Аԥсны аефир аҿы, мамзаргьы аудиофаил аҿы.
Аҭоурых иагәылаҵәаху: Шамԥҳа амузеи аҿы ицәыргоу аԥсуа иашҭа амакет иазкны
(ирҿыцуп 14:15 24.01.2021)
Аԥсуа ҳәынҭқарратә музеи аетнологиа аҟәша аҭҵаарадырратә усзуҩ еиҳабы Инга Шамԥҳа арадио Sputnik аефир аҿы еиҭалҳәеит амузеи аҿы иӡыргоу, аҭааҩцәа акыр азҿлымҳара зырҭоу аԥсуа иашҭа амакет аиқәыршәаразы аусурақәа шцо атәы. Аҭоурых иагәылаҵәаху: Шамԥҳа амузеи аҿы ицәыргоу аԥсуа иашҭа амакет иазкны
Шәазыӡырҩла арубрика "Аҭоурых иагәылаҵәаху" есмҽыша арадио Sputnik Аԥсны аефир аҿы.