Воуԥҳа Аҟәа аепидемиологиатә ҭагылазаашьазы: ауаа аԥҟарақәа рықәныҟәара ишаҟәыҵыз убоит

25
Аҟәа ақалақь ахадара агәабзиарахьчаратә усбарҭа аиҳабы Ирма Воуԥҳа арадио Sputnik аефир аҿы аҳҭнықалақь аепидемиологиатә ҭагылазаашьа ахҳәаа алҭеит.
Хра злоу ахҭысқәа: Воуԥҳа Аҟәа аепидемиологиатә ҭагылазаашьа иазкны

"Аепидемиологиатә ҭагылазаашьа аҽарцәгьеит. Уажәаԥхьа иаҳа иҭынчран. Ауаа аԥҟарақәа рықәныҟәара ишаҟәыҵыз убаратәы иҟоуп. Сара иахьынӡеилыскаауа, иааԥсазар акәхап, аха ачымазара нҵәаанӡа ҳхы ҳахәаԥшыр ауп, аԥҟарақәа рықәныҟәара аҭахуп иахьынӡа рылшо. Ачымазара нҵәаанӡа иаҭахуп еснагь асабрадақәа рныҟәгара, ҳнапқәа уажәы-уажәы ирыцқьалатәуп. Иахьала ақалақь аҿы ачымазаҩцәа рхыԥхьаӡара 2771-ҩык ыҟоуп. Ҿыцны ачымазара зыхьны иҟоу 608-ҩык ыҟоуп, урҭ рахьынтә 35-ҩык хәыҷқәоуп. Убри аан ақалақь аҿы 2000 инареиҳаны рҽырхәышәтәхьеит, ари арбага уаигәырӷьартә иҟоуп", - ҳәа еиҭалҳәеит Воуԥҳа.

Аҟәа ақалақь ахадара агәабзиарахьчаратә усбарҭа аиҳабы илҳәеит ПЦР анализ аҭаразы аҳақьымцәа зынио ауадаҩрақәа ртәы.

"Ауаа изыҟарҵо ҳзеилкаауам, аха игәаҳҭеит, шьоукы ПЦР анализ ҳәа изышьҭоу еиуеиԥшым аҭыԥқәа рҿы ишарҭо. Абраҟа иҳәатәуп, анализқәа зегьы дарбанзаалакгьы иахьаиҭазаалакгьы еизганы иаку алабораториахь шаарго, абраҟа еилкаахоит ауаҩы ҭыԥк аҿы акәымкәа, еиуеиԥшым аҭыԥқәа рҿы анализ шаиҭаз, ари ииашам. Анализ агаразы уи инихуа амаҭәашьарқәа егьырҭ рзы ихәарҭоуп", - ҳәа азгәалҭеит Воуԥҳа.

Иаҳа инеиҵыху аиҿцәажәара шәазыӡырҩыр шәылшоит арадио Sputnik Аԥсны аефир аҿы, мамзаргьы аудиофаил аҿы.

Иара убас шәаԥхьар ҟалоит:

25

Камкьиа: Миха Лакрба иҩымҭақәа, иновеллақәа сыԥсҭазаараҿы мҩақәҵагак исзаҩызоуп

0
(ирҿыцуп 14:26 19.01.2021)
120 шықәса раԥхьа диит ашәҟәыҩҩы Миха Лакрба. Аҿартә театр актиор Саид Камкьиа арадио Sputnik аефир аҿы иҳәеит аламыс азышәаҳәаҩ, Миха Лакрба иԥсҭазаараҿы иааникыло аҭыԥ.
Аԥсны еицырдыруа ахьыӡқәа: Камкьиа Миха Лакрба иаԥҵамҭақәа ирызкны

"Миха Лакрба иҩымҭақәа, иновеллақәа сыԥсҭазаараҿы мҩақәҵагак исзаҩызоуп. Иара нагарҭа амаӡамкәа ҳҵас, ҳқьабзқәа ааирԥшуеит. Саргьы сыԥсҭазаараҿгьы абас сыҟандаз, абри еиԥш схы мҩаԥызгандаз ҳәа сгәы ианаанаго ыҟоуп. Миха Лакрба ихьӡ аҿар ираҳахьеит, аха шамахамзар, урҭ ашәҟәыԥхьара рҭахым, иҟалаз асоциалтә ҳақәа ирхырҟьаны. Иара иновеллақәа ашколтә программаҿы иҟоуп, убасҟан ауп ухы-угәаҿы ианаанхо, анаҩс уаныҩеидаслак, еиҭа саԥхьандаз ҳәа агәазыҳәара узцәырыргоит. Атеатр аҿгьы зны-зынла ҳанааидтәалалак, иаҳгәалашәоит урҭ ановеллақәа. Убасҟантәи аамҭаз иара ифырхаҵа абас иҟаиҵеит, аха иахьазы уи ус ауама ҳәа еилҳаргоит. Ановеллақәа рыла иҭыху афильм кьаҿқәагьы акырӡа ибзиоуп, урҭ зегьы аинтернет аҿы иузыԥшаауам, аха иҟоу иахәаԥшхьоу рҟынтә исаҳахьеит ишыргәаԥхаз ала", - ҳәа еиҭеиҳәеит Камкиа.

Иаҳа инеиҵыху аиҿцәажәара шәазыӡырҩыр шәылшоит арадио Sputnik Аԥсны аефир аҿы, мамзаргьы аудиофаил аҿы.

0

Река ақыҭа афельдшер: ажәлар рзы даара иуадаҩу аҭагылазаашьа шьақәгылеит

6
(ирҿыцуп 09:22 19.01.2021)
Река ақыҭа афельдшер Ламара Ҳашԥҳа-Қәычбериа арадио Sputnik аефир аҿы еиҭалҳәеит аҿкычымазара змоу ауаа рҭагылазаашьа атәы, насгьы илҳәеит ақыҭақәа рҿы амбулатортә ҭыԥқәа раартра азҵаара ишазхәыцтәу.
Река ақыҭа афельдшер: ажәлар рзы даара иуадаҩу аҭагылазаашьа шьақәгылеит

"Ақыҭаҿы уажәазы 14-ҩык инарзынаԥшуа ачымазцәа ыҟоуп. Зегьы аҿкы рыхьны иҟоуп ҳәа ишьақәыргыланы иҟам, аха асимптоматикала иароуп уҳәар алшоит. Ахәшәқәагьы аиура цәгьахеит. Рыхәқәагьы еиҳахеит. Абри ачымазара ҟалеижьҭеи ахәшә 10 мааҭк иаԥсазҭгьы, 30 рҟынӡа инеит. Ажәлар рзы даара иуадаҩу аҭагылазаашьа шьақәгылеит. Ачымазаҩцәа рҟны мнеишьа сымаӡам, аҩны аҟара бжьазаргьы снеироуп, иага ихаразаргьы ус. Мышкы иалагӡаны 9-ҩык ауаа акапельница рзықәсыргылоит. Урҭ шьҭа мчыбжьык ҵуеит ирзыҟасҵоижьҭеи, дара алгар, нас еиҭа иззыҟаҵатәу ҟалоит. Река ақыҭа адагьы, Бедиа, Патрахәыҵа, уҳәа еиҭа ақыҭа ссақәа рҿгьы ачымазаҩцәа сымоуп. Ачымазара шысхызгахьоугьы, сҽацәысахьчоит, ҳәарада. Иаҭаху зегьы ҟасҵоит, сықәра злаҟоу ала еиҭа исыхьыргьы ауеит, еиҭа ачымазара ӷәӷәақәа схызгахьеит, абарҭ зегьы снарҿыԥшны зынӡа сзашьҭоузеи ҳәа схы сзыҟаҵом. Иара иааиуа зегьы ишахәҭоу иааиуеит. Ҳара ҳашшәо еиԥш даргьы шәоит", - ҳәа еиҭалҳәеит афельдшер.

Ламара Ҳашԥҳа-Қәычбериа илҳәеит ажьырныҳәамза мацара иалагӡаны 226-ҩык ауааԥсыра шлыдылкылахьо, урҭ рыбжаҩык атәым қыҭақәа рҟнытә иаауеит.

"Иҟоуп аҭагылазаашьақәа схала иаҭаху анрасҳәо, избанзар зегьы ақалақь аҟынӡа изцаӡом", - ҳәа азгәалҭеит афельдшер.

Иаҳа инеиҵыху аиҿцәажәара шәазыӡырҩыр шәылшоит арадио Sputnik Аԥсны аефир аҿы, мамзаргьы аудиофаил аҿы.

Акоронавирус иазку ажәабжьқәа зегьы шәрыԥхьар ҟалоит абра>>

6