Џьапуа инапала иҟаиҵаз аԥсуа ԥхьарцазы: ажәытә бжьы ахоуп
(ирҿыцуп 17:34 28.12.2020)
Асахьаҭыхыҩ Баҭал Џьапуа арадио Sputnik аефир аҿы еиҭеиҳәеит ажәытәан аԥсуаа иркыз, иҟарҵоз аԥхьарца аиԥш зеиԥшу аҟаҵара шилшаз, насгьы уи ҷыдарақәас иамоу атәы. Џьапуа: аҿатәтәи арҳәагақәа, аиашазы, сылахь иааиӡом
"Аҿатәтәи арҳагақәа, аиашазы, сылахь иааиӡом, урҭ иаҳа рыбжьы бзиазар ауеит, аха сахьахәаԥшуа, иԥхьарцаӡам. Уи аҩыза атенденциа ҳашьцәа адыгақәа рҿгьы иҟоуп, ирыԥсахит аԥшра. Инна Аҳашба илҩыз ашәҟәы "Аԥсуа музыкатә инструментқәа", убра аԥсуаа ҳтәы зегьы ануп. Аԥхьарца ашәагазагақәагьы ануп, убри сахәаԥшны, иара снапаҟны иаазгьы саахәаԥшны, аформа ҟасҵап сгәахәит. Аформа аныҟасҵа, абжьгьы ҟалеит. Саҳәшьаԥа Алмасхан Марколиа далахәмарит, даара игәаԥхеит, руакгьы ҳамҭас исҭеит, иҵар иҭахуп азы. Абжьы иахоу ажәытә бжьуп. Иахьатәи акәӡам. Иахьа аструнақәа аҿарҵоит, урҭ ажәытәтәи иреиԥшым. Иҟасҵаз иаҿоуп аҽы аҵыхәа. Ажәытәан уи ҟарҵон, нас арахәыцқәа ҟарҵон ауаса акьатеи иалхны. Аԥхьарца ахаҭа ал иалхуп. Ажәытәан аԥхьарцақәа реиҳаракгьы еиқәаҵәан, иршәуан қардуанла, мамзаргьы алҩақ адырсуан. Саргьы сыла иабахьоу ажәытәтәиқәа зегьы еиқәаҵәан, уажәтәи амода ҽакуп, иҩеижьӡа иҟарҵоит, иԥшӡоуп, еилкаауп, аха иаратәыҵәҟьа еиқәаҵәазаруп", - ҳәа еиҭеиҳәеит Џьапуа.
Иаҳа инеиҵыху аиҿцәажәара шәазыӡырҩыр шәылшоит арадио Sputnik Аԥсны аефир аҿы, мамзаргьы аудиофаил аҿы.
Иара убас шәаԥхьар ҟалоит:
- Арухаа аԥсуа жәлар рарҳәагақәа рыҟаҵаразы: еиқәырхатәыс исыдушәа збоит
-
Аҩымаа, ахымаа, аԥхьарца: аԥсуа жәлар ринструментқәа рыбжьы агашьа
Река ақыҭа афельдшер: ажәлар рзы даара иуадаҩу аҭагылазаашьа шьақәгылеит
(ирҿыцуп 23:02 19.01.2021)
Река ақыҭа афельдшер Ламара Ҳашԥҳа-Қәычбериа арадио Sputnik аефир аҿы еиҭалҳәеит аҿкычымазара змоу ауаа рҭагылазаашьа атәы, насгьы илҳәеит ақыҭақәа рҿы амбулатортә ҭыԥқәа раартра азҵаара ишазхәыцтәу. Река ақыҭа афельдшер: ажәлар рзы даара иуадаҩу аҭагылазаашьа шьақәгылеит
"Ақыҭаҿы уажәазы 14-ҩык инарзынаԥшуа ачымазцәа ыҟоуп. Зегьы аҿкы рыхьны иҟоуп ҳәа ишьақәыргыланы иҟам, аха асимптоматикала иароуп уҳәар алшоит. Ахәшәқәагьы аиура цәгьахеит. Рыхәқәагьы еиҳахеит. Абри ачымазара ҟалеижьҭеи ахәшә 10 мааҭк иаԥсазҭгьы, 30 рҟынӡа инеит. Ажәлар рзы даара иуадаҩу аҭагылазаашьа шьақәгылеит. Ачымазаҩцәа рҟны мнеишьа сымаӡам, аҩны аҟара бжьазаргьы снеироуп, иага ихаразаргьы ус. Мышкы иалагӡаны 9-ҩык ауаа акапельница рзықәсыргылоит. Урҭ шьҭа мчыбжьык ҵуеит ирзыҟасҵоижьҭеи, дара алгар, нас еиҭа иззыҟаҵатәу ҟалоит. Река ақыҭа адагьы, Бедиа, Патрахәыҵа, уҳәа еиҭа ақыҭа ссақәа рҿгьы ачымазаҩцәа сымоуп. Ачымазара шысхызгахьоугьы, сҽацәысахьчоит, ҳәарада. Иаҭаху зегьы ҟасҵоит, сықәра злаҟоу ала еиҭа исыхьыргьы ауеит, еиҭа ачымазара ӷәӷәақәа схызгахьеит, абарҭ зегьы снарҿыԥшны зынӡа сзашьҭоузеи ҳәа схы сзыҟаҵом. Иара иааиуа зегьы ишахәҭоу иааиуеит. Ҳара ҳашшәо еиԥш даргьы шәоит", - ҳәа еиҭалҳәеит афельдшер.
Ламара Ҳашԥҳа-Қәычбериа илҳәеит ажьырныҳәамза мацара иалагӡаны 226-ҩык ауааԥсыра шлыдылкылахьо, урҭ рыбжаҩык атәым қыҭақәа рҟнытә иаауеит.
"Иҟоуп аҭагылазаашьақәа схала иаҭаху анрасҳәо, избанзар зегьы ақалақь аҟынӡа изцаӡом", - ҳәа азгәалҭеит афельдшер.
Иаҳа инеиҵыху аиҿцәажәара шәазыӡырҩыр шәылшоит арадио Sputnik Аԥсны аефир аҿы, мамзаргьы аудиофаил аҿы.
Акоронавирус иазку ажәабжьқәа зегьы шәрыԥхьар ҟалоит абра>>
Ҳанагәуа: афермақәа аҿыхуп, аха рыуа-рҭахы рахь ишаны аҩнқәа рҿы иахьдыргылаз ыҟоуп
(ирҿыцуп 17:19 19.01.2021)
Гәылрыԥшь араион "Амшынеиқәафымцамч" афилиал аиҳабы Зураб Ҳанагәуа арадио Sputnik аефир аҿы еиҭеиҳәеит араион аҿы амаинингқәа рҿыхразы имҩаԥырго аусура атәы.Раионк аԥсҭазаараҟынтә: Ҳанагәуа Гәылрыԥшь амаинингқәа рзы
"Афермақәа ахьаҟәырхыз рыуа-рҭынха рахь ишаны аҩнқәа рҿы иахьдыргылаз ыҟоуп. Уи проблеманы иҟоуп атәыла зегьы аҿы. Ҳраион аҿы афермақәа иаҿыхны, еимыхны иҟоуп. Ҳара есыҽны агәаҭарақәа мҩаԥаагоит. Трансформаторк аҿы аӡәы днеины акы аԥишьыр, ихаҳҵәоит, ҳрацәажәоит. Иҟоуп ахҭысқәа ихҵәаны нас еиҭа имҵаа иахьаԥыршьуа, аха урҭ анаҩс еиҭа иаҿаҳхуеит. Аусутәқәа зегьы мҩаԥгахар, ҳаргьы ԥсеивгарак ҳауеит ҳәа сақәгәыӷуеит ", - ҳәа еиҭеиҳәеит Ҳанагәуа.
Иаҳа инеиҵыху аиҿцәажәара шәазыӡырҩыр шәылшоит арадио Sputnik Аԥсны аефир аҿы, мамзаргьы аудиофаил аҿы.
Иара убас шәаԥхьар ҟалоит:
- Бараҭелиа: "сгәыла амаининг изықәгылоуп" ҳәа аӡәгьы иҳәараны дыҟам
-
Аминистрцәа Реилазаара аҳәынҭобиектқәа рҿы амаинингқәа рықәыргылара азин ҟанаҵом
Атемақәа:
Аԥсны COVID-19 рыдырбалеит даҽа 176-ҩык ауааԥсыра
АҞӘА, ажьырныҳәа 18 – Sputnik. Иҳаҩсыз уахыки-ҽнаки рыла COVID-19 рылоу ирыламу аилкааразы 544-ҩык атестқәа рзыҟаҵан, урҭ рахьтә 176-ҩык акоронавирус рцәа ишалаз аадырԥшит ҳәа аанацҳауеит Ауааԥсыра COVID-19 рацәыхьчаразы аоперативтә штаб.
Абыржәтәи аамҭазы Гәдоуҭатәи араионтә хәышәтәырҭа хадаҿы ишьҭоуп 120-ҩык, урҭ рахьтә 105-ҩык акоронавирус адиагноз рзышьақәырӷәӷәоуп, рҭагылазаашьа бааԥсуп 26-ҩык, ибжьаратәуп - 35-ҩык.
Аҟәатәи аинфекциатә хәышәтәырҭаҿы ирхәышәтәуеит акоронавирус зцәа иалоу 37-ҩык апациентцәа, Очамчыра ирхәышәтәуеит 20-ҩык, Тҟәарчалтәи ахәышәтәырҭаҿы - 15-ҩык, Гагратәи ахәышәтәырҭаҿы - 24-ҩык, Аҟәатәи амобилтә госпиталь аҟны ишьҭоуп акоронавирус зыдбалоу 60-ҩык апациентцәа.
Акоронавирус иазку ажәабжьқәа зегьы шәрыԥхьар ҟалоит абра>>