Аркадий Джинджия

Џьынџьиа аалыҵ аҳәаа ахыгараҿы аԥҟара ҿыцқәа рзы: ҳаиҵанархеит, аха анхацәа ирыхәеит

19
Акарантин азы аҳәынҭқарратә инспекциа аиҳабы Аркади Џьынџьиа арадио Sputnik аефир аҿы еиҭеиҳәеит сынтәа ҳтәылаҿы иҟаз аҽаҩра бзиа аҳәаа ахыгара аус арманшәаларазы иаԥҵаз аҭагылазаашьақәа ртәы.

Ақыҭанхамҩа аминистр Беслан Џьапуа акарантин азы аҳәынҭқарратә инспекциа ахаҭарнакцәеи иареи реиԥылараҿы иалацәажәеит Аԥсны аҩнуҵҟатәии адәахьтәии афитосанитартә гәаҭарақәа рзы апунктқәа русура атәы, насгьы уи аус анаҩс еиҳагьы еиӷьхартә еиԥш иҟаҵатәу.

Атәылауаҩи аиҳабыреи: Џьынџьиа ацитрустәқәа аҳәаа рахыгаразы иалагалаз аԥсахрақәа ирызкны

"Сынтәеиԥш аҽаҩра беиа егьырҭ ашықәса рзы иҟаӡамызт. Аҳәаа ахыгара апроблемақәа ҟамларцаз, уаанӡа адәахьтәи акарантин аҿы аус зуаз ҩыџьа-хҩык ракәын. Аха сынтәа аҽаҩра анбеиаха, ажәлар агәаран иқәымгыларцаз, атехника ҿыц иаахәаны аусзуҩцәа рҭыԥ иацҵан. Уи даара иманшәалахеит Аԥснынтәи аалыҵ аҳәаа ахыгараҿы. Усҟантәи ашықәсқәа рзы аҳәаа ахыгарааан 12 мааҭ ршәон ацитрустә шәырқәа рзы. Сынтәа ахә лаҟәхеит ф-мааҭк рҟынӡа. Сынтәа 100-200 кьыла зго рзыҳәан акарантинтә сертификаттә ахәԥса ларҟәын 300 мааҭ рҟынтәи 25 мааҭ рахь. Ари даара ирыхәеит анхацәа. Ԥасатәи ақәҵарала 100 кьылак згоз ишәар акәын 1200 мааҭ. Уажәы, ҿыцтәи ақәҵарала изтәоит 100 мааҭк. Ҳара ҳаҩнуҵҟа ари хәыҷык ҳаиҵанарӷәӷәеит, аха ажәлар хәарҭас ироуит", - ҳәа еиҭеиҳәеит Џьинџьиа.

Иаҳа инеиҵыху аиҿцәажәара шәазыӡырҩы аудиофаил аҿы.

Иара убас шәаԥхьар ҟалоит:

19

Гыцба аҭыԥантәи алхрақәа рзы: асиақәа рганахьала ауадаҩрақәа цәырҵлоит

14
Гагра араион алхратә комиссиа алахәыла Гарри Гыцба арадио Sputnik аефир аҟны арубрика "Раионк аԥсҭазаараҟынтә" аҳәаақәа ирҭагӡаны еиҭеиҳәеит аҭыԥантәи ахаланапхгараҭаратә усбарҭақәа рахь алхрақәа рахь аҽазыҟаҵарақәа шцо, уадаҩрас ирԥыло.

Аԥсны аҭыԥантәи ахаланапхгараҭаратә усбарҭақәа рахь алхрақәа мҩаԥысраны иҟоуп мшаԥы 11 рзы. Хәажәкыра ҩба рзы акандидатцәа рҭаҩра иалагеит.

 

Раионк аԥсҭазаараҟынтә: Гыцба алхрақәа рыҽшырзыҟарҵо атәы

"Аиаша уҳәозар, хәыҷык ауадаҩрақәа ыҟоуп уи аганахьала (алхыҩцәа рсиазы - аред.), избанзар ауаа ԥсуеит, иҟоуп 18 шықәса зхыҵыз, шьҭа қәрала абжьыҭарахь инеир зылшо. Абри аиҿкаара уадаҩуп (асиазы - аред.), избанзар акомиссиаҿы зегьы ирҭахым аусура, ҳаҭыргьы амам уи ҳәа сгәы иаанагоит. Аиашазы, адепутатцәа иалырхуагьы, ианнеиуа аҭыԥаҟны, рнапы ианырҵо ишахәҭоу ирзынагӡом. Уи даҽа зҵаароуп, аха алхрақәа анааиуа ауп зегьы ҳаҩуа ҳанрышьҭало. Еиқәҳаршәоит асиақәа, аха агхақәа рацәаны ианрымоу ыҟоуп. Исҭахын изахәҭоу зегьы алхрақәа рҟны инеиларц… Есымша ауадаҩрақәа цәырҵлоит ақыҭақәа рҟны алхратә комиссиақәа реиқәыршәаразы. Уи аамҭа агоит… Алхрақәа раан асиақәа рызҵаара есымша ицәырҵоит", - ҳәа азгәеиҭеит Гыцба.

 

Иара игәаанагарала алхратә комиссиақәа рхантәаҩцәа ҿҳәарак рыҭаны иарҭозҭгьы, аҭагылазаашьа иаҳа еиӷьхон.

Шәазыӡырҩы аудио.

Иара убас шәаԥхьар ҟалоит:

14

Амобилтә госпиталь аҵыхәтәантәи ачымазаҩ: аҳақьымцәа рҿыԥшылара мацара акыр иаԥсан

45
(ирҿыцуп 18:07 04.03.2021)
Жьҭаара 20 2020 шықәса рзы Аҟәа иаатыз урыстәылатәи амобилтә госпиталь аус ауан хәажәкыра 1-нӡа. Ари аамҭа иалагӡаны 500-ҩык ачымазцәа рыдыркылеит. Аҵыхәтәантәи апациент Оҭар Делба арадио Sputnik аефир аҿы еиҭеиҳәеит уи дшырхәышәтәуаз, аурыс ҳақьымцәа русура шеиҿкааз.

 

Амобилтә госпиталь аҵыхәтәантәи ачымазаҩ: аҳақьымцәа рҿыԥшылара мацара акыр иаԥсан

"Тҟәарчалынтә Аҟәаҟа ҳаарышьҭит. Арратә госпиталь аҿы ибзиан ҳрыдыркылеит. Аҳақьымцәа ихааны, иԥшӡаны иҳаҿцәажәон. Ҳҳақьым Фатима Баширова ҳахьышьҭаз даныҩналалак мацара лҿыԥшылара акыр иаԥсан, убысҟак дыбзиан. Сыԥшәмеи сареи ҳашьҭан 11 мшы Аҟәа, анаҩс дара мцар ауамызт, ианцоз иахәҭаз зегьы ҳзыҟарҵеит. Ахәшәқәа ҳзылырҩааит, анаҩс еиҭа ҳанцозгьы ԥыҭк ҳарҭеит, урҭ иахьагьы иҳадаҳкылоит. Даара иӷәӷәаны иаҳхаҵгылеит. Зегьы хәыда-ԥсада иаҳзыҟарҵеит. Уахык убас еиԥш аҭагылазаашьа шьақәгылеит, сыԥшәма данеимҳәоз ашьа лҿыҵуан, убасҟан лара илзыҟарҵеит гәыр ӷәӷәак, уи азы аӡәгьы аԥара ҳамимхит. Убасҟан илзыҟарымҵазҭгьы, ауха дыԥсуан", - ҳәа еиҭеиҳәеит Делба.

 

Иаҳа инеиҵыху аиҿцәажәара шәазыӡырҩыр шәылшоит аудио аҿы.

Иара убас шәаԥхьар ҟалоит:

45

Бжьаниа Гәдоуҭа араион ахадас Боџьгәуа икандидатура еиҭа инаишьҭит

3
(ирҿыцуп 09:29 05.03.2021)
Гәдоуҭа араионтә еизара адепутатцәа Баграт Боџьгәуа араион ахадас дшьақәыдмырӷәӷәеит ажьырныҳәа 29 рзы имҩаԥысыз аилатәараҿы.

АҞӘА, хәажәкыра 5 – Sputnik, Бадри Есиава. Аԥсны ахада Аслан Бжьаниа Гәдоуҭатәи араионтә еизарахь ашәҟәқәа неишьҭит араион ахадас Баграт Боџьгәуа икандидатура ахәаԥшразы ҳәа аанацҳауеит ахада ипресс-маҵзура.

Апресс-маҵзураҿы ишырҳәаз ала адокумент анапы аҵаҩын жәабран 26 рзы.

Баграт Боџьгәуа Гәдоуҭа араион ахада инапынҵақәа назыгӡо ҳәа дҟаҵан Аԥсны ахада Аслан Бжьаниа идҵала 2020 шықәса, лаҵарамзазы. Боџьгәуа ари аҭыԥ аҿы диԥсахит Руслан Ладариа.

Гәдоуҭа араионтә еизара адепутатцәа Боџьгәуа араион ахадас дшьақәыдмырӷәӷәеит ажьырныҳәа 29 азтәи реилатәараҿы. Уи азы бжьык игхеит.

Аконституциатә процедура инақәыршәаны атәыла ахада азин имоуп 30 мшы рыҩныҵҟа аҽазныкгьы Боџьгәуа икандидатура адепутатцәа ирыдигалар, мамзаргьы аҽа кандидатурак рыдигалар.

Аизараҿы ақалақь, араион ахадас зыӡбахә ҳәо икандидатура рыдрымкылар, атәыла ахада азин имоуп аамҭала анапынҵақәа назыгӡо иаҭара.

Араион, Аҟәа ақалақь, аҳабла, ақыҭа ахадас дҟалар илшоит Аԥсны атәылауаҩ, 30 шықәса ирҭысхьоу, 5 шықәса еиҵамкәа аџьатә ԥышәа змоу.

3