Аҳәба: Аԥсны адгьылҳәазарақәа рацәоуп, аҩны аргыларазы аҭҵаарақәа мҩаԥгатәуп

23
(ирҿыцуп 20:13 19.02.2021)
Адгьылхархәареи акадастри рзы аусбарҭа аиҳабы Адамыр Аҳәба арадио Sputnik аефир аҟны еиҭеиҳәеит Тҟәарчал араион аҟны адгьылҳәазара зыхҟьаз, иазгәеиҭеит уи аанкыларазы Аԥсны адагьы Урыстәыла алшара рымамзар ҟалоит ҳәа.

Аԥсны аԥыза-министр ихаҭыԥуаҩ, аекономика аминистр Кристина Озганԥҳа жәабран 16 рзы ақыҭа Бедиа ду даҭааит. Тҟәарчал араион ахада Исидор Дочиа, Бедиа ду ахада Џьумбер Харчлаа, Акапиталтә ргылара аусбарҭа аиҳабы Ҭемыр Агрба, "Аҟәарахьчара" аиҳабы Гәырам Ҳаразиа аминистр илыцны адгьыл ахьҳәазаз аҭыԥ иаҭааит. Аԥсны Акапиталтә ргылараз аусбарҭеи Агеологиа, агеодезиеи, акартографиеи русбарҭа анапы ианылҵеит Тҟәарчал адгьылҳәазара урыстәылатәи аҟазауаа радрыԥхьалара азҵаара аус адыруларц.

Аҳәба: Аԥсны адгьылҳәазарақәа рацәоуп, аҩны аргыларазы аҭҵаарақәа мҩаԥгатәуп

"Ари аҭагылазаашьа агеологиатә процесс ауп изыхҟьаз. Ҩба-хԥа ӡыхь ыҵыҵуеит уи аҭыԥ аҟны, насгьы маиҟәаԥтәи анышәаԥшь ҳәа изышьҭоу уаҟа иҟоуп. Уи аӡы алалаӡом. Анышәи иареи ахьеиқәу ианыбааӡалак имҵәырыр ауӡом. Уи ауп адгьылҳәазарагьы зыхҟьо. Адгьылҳәазара аамҭа-аамҭала ахылаԥшра аҭахуп. Аԥсны ирацәоуп адгьыл ахьыҳәазо: Аҟәа араион Ешыра, Гәдоуҭа Мгәыӡырхәа иахьаҵанакуа, ирацәоуп ус еиԥш аҭыпқәа ахьыҟоу… Уажәы ара иццакны усурақәак рымҩаԥгара залшаӡом, иагьаԥсам. Аӡы авгатәуп раԥхьа, арӷәӷәагақәа ҟаҵатәуп. Урҭ Аԥсны акәым, Урыстәылагьы иаламшар ҟалап, избанзар аҟаҵатәы рацәоуп… Ауаа анхара, аҩны аргылара иалагаанӡа агеологиа-нџьныртә ҭҵаарақәа мҩаԥгалатәуп. Аԥсуаа хәыҷык иаҳцәымӷуп проектла акы аҟаҵара, аҭҵаарақәа", - иҳәеит Аҳәба.

Ажьырныҳәа 15 рзы Тҟәарчал араион аҿы иҳәазаз амҩа еиднакылоит Тҟәарчал ақалақьи ақыҭақәа Бедиа дуи, Агәы-Бедиеи, Бедиеи. Аҭаацәарақәа ҩба хыҵакырҭада иаанхеит, аҩнқәа даҽа ҩба ашәарҭара иҭагылоуп.

Иара убас шәаԥхьар ҟалоит:

23

Миқаа Гал аус зуа агәрагаратә кәалаԥқәа рзы: иарбанзаалак қьаадк иамыԥхьаӡакәа иаанымхацт

11
Гал араион ахадара апресс-маҵзура аиҳабы Ерик Миқаа арадио Sputnik аефир аҿы еиҭеиҳәеит ақалақь аҩныҵҟа иқәшыргылоу агәрагаратә кәалаԥқәа аус шыруа атәы.
Раионк аԥсҭазаараҟынтә: Миқаа Гал иҟоу агәрагаратә кәалаԥқәа рзы

"Хымз раԥхьа Кәасҭа Ԥлиеи уи ихаҭыԥуаҩ Игорь Аҩӡбеи ражәалагалала ақалақь аҿы иқәыргылан акәалаԥқәа. Аилибамкаара ҟамларцаз, ажәла мҳәакәа, ахьӡ азгәамҭакәа, акәалаԥқәа кнаҳҳаит аџьармыкьа уахьынҭало, Гал араион ахадара аҩналарҭа аԥхьа. Аинформациатә дырраҭарақәа рыла ажәлар ирылаҳҳәоит агәрагаратә кәалаԥқәа шыҟоу, дарбанзаалакгьы џьара ажәалагалак змоу, араион аҿы иҳахәаша, ма дара иргәамԥхо, ргәы еихьызшьуа акыр ыҟазар, ражәалагала азыӡырҩра, ҳшазыхиоу. Мчыбжьык ахь знык араион ахадеи сареи ҳцаны ақьаадқәа ҭганы иааҳгоит, Кәасҭа Ԥлиа даԥхьоит, анаҩс доусы инаигӡаша аусмҩаԥгатәқәа риҭоит. Иарбанзаалакгьы қьаадк аанымхацт иамыԥхьаӡакәа. Акәалаԥқәа русура иабзоураны галтәи аџьармыкьа аусқәа ҳаӡбахьеит. Амҩақәа рыҟаҵара, абаҳчақәа рҿы атәарҭақәа ахьыргылатәу уҳәа иҟаҳҵахьо маҷым. Иҳәатәуп, ари аус адгылара шаиуз ауааԥсыра рҟынтә, даара ибзиан аус ауеит аимадара", - ҳәа еиҭеиҳәеит Миқаа.

Иаҳа инеиҵыху аиҿцәажәара шәазыӡырҩыр шәылшоит аудио аҿы.

Иара убас шәаԥхьар ҟалоит:

11

Џьынџьал аӡынра аӡҭаларазы: исгәазырԥхаз сыздырӡом

11
Шәарах Ԥачалиа ихьӡ зху Тҟәарчалтәи акомедиатә театр актиор Нур Џьынџьал арадио Sputnik аефир аҿы еиҭеиҳәеит аӡынразы аӡҭалара дшалагаз, насгьы уи есыҽнытәи иԥсҭазаара иахәҭакны ишыҟалаз.
Ҳазлацәажәаша ҳамоуп: Џьынџьал аӡынразы аӡҭалара иазкны

"Хәбаҟа шықәса ҵуеит аӡыршы закәу сымбеижьҭеи. Аӡӡаахра амш аҽны урыстәылатәи ателехәаԥшра санахәаԥшуа, аҵаа ҭаԥҽны ауаа аӡы ианҭало саргьы убра срыландаз аасгәахәуеит. Аӡынра аҩнаҭаҿы арԥхагақәа аҿаскӡом. Аӡиасқәа сырҭалоит, сҽыскәабоит. Раԥхьаӡа акәны 17 шықәса ракәын исхыҵуаз Тҟәарчал аӡыхьшәашәа саҵагылан аӡын сҽаныскәаба, иара исгәазырԥхазгьы сыздырӡом", - ҳәа еиҭеиҳәеит Џьынџьал.

Актиор иҳәеит дааизар, макьана ахәышәтәырҭахь дышнанамгац, еиҭеиҳәеит аӡыхьшәашәа изацу абзиабара иахылҿиааз алафқәа ртәы.

Иаҳа инеиҵыху аиҿцәажәара шәазыӡырҩыр шәылшоит аудио аҿы.

11