Ануа Аԥсны архәҭақәа ргәаҭара алҵшәазы: ҳамч зқәымхо ҳәа акгьы ҳамбеит

26
(ирҿыцуп 17:34 10.03.2021)
Аԥсны атәылахьчара аминистрра анапхгара Аԥсны архәҭақәа ргәаҭара хнаркәшеит. Урҭ рылҵшәақәа ртәы арадио Sputnik Аԥсны аефир аҿы еиҭеиҳәеит атәылахьчара аминистр Владимир Ануа.
Атәылауаҩи аиҳабыреи: Ануа Аԥсны архәҭақәа ргәаҭара иазкны

"Архәҭақәа рҿы ҳахьыҟаз иагыз, ацхыраара ахьаҭахыз, иаразнак уа аҭыԥан ианҳарҽеиуаз ыҟан. Аруаа рыфатә-рыжәтә, ртәарҭа-ргыларҭа, рыԥхарра, афымцалашарала реиқәыршәара уҳәа ауаҩы иԥсҭазаараҿы ииҭаху еиԥш архәҭақәа рҿы аҭагылазаашьагьы ыҟазароуп. Ҳныҟәараҿы уаҩы имч зқәымхо ҳәа акгьы ҳамбаӡеит. Иҟоуп архәҭақәа архьшәашәагақәа ахьажәыз, урҭ рыԥсахра ҳалҳаршартә ҳаҟоуп. Иҟоуп агаз ала афатә ахьыҟарҵо, иҟоуп фымцалашарала иахьыҟарҵогьы. Афатәҟаҵаратә маругақәа ахьажәызгьы ҳаԥсахыртә ҳаҟоуп, дук хара имгакәа урҭгьы рҭыԥ аҿы инеиуеит. Аруаа рымаҭәа-рҩыҭәа акәзар, шықәсыбжак иалагӡаны иԥсаххоит. Уи Урыстәылантәи иаауеит. Ахә зшәо ҳара ҳауп", - ҳәа иҳәеит Ануа.

Архәҭақәа ргәаҭарақәа, урҭ реибыҭашьа аррахь ацара аҭаххара ишаныԥшуа атәы далацәажәауа, атәылахьчара аминистр иҳәеит аидеологиа шмаҷу.

"Аресур ҳамаӡам ҳәа аӡәгьы имҳәароуп. Иҳамоуп. Иаадыруеит ахыԥхьаӡарагьы. Доусы дахьыҟоугьы аадыруеит. Аха имаҷуп аидеологиа, аҭаацәа рҿы ахәыҷбаҳчақәа, ашколқәа рҿы иҟазароуп аррахь, рыԥсадгьыл ахь абзиабара атәы рылазааӡо. Ԥыхьа аҳәынҭқарра ду аныҟази, уажәы, аибашьрашьҭахьтәи иҟоу аидеологиа еиԥшым. Усҟан гәацԥыҳәарыла ицон аррахь. Иахьа аҷкәын аҵара иҵоит, уи ашьҭахь даҽак ациҵоит, аусура далагоит, даҽаӡәы дыспортсменуп, иаанхо - анхаҩы иҷкәын иоуп. Аибашьраҿы ишыҟаз еиԥш ауп иахьагьы ишыҟоу. Анхаҩы иԥа изы архәҭаҿы иҟоу зегьы маншәалоуп, егьырҭ ракәзар, арраҿы иҟоу апроблемақәа рдыруеит, убри лабҿаба иагьырымбацт", - ҳәа иазгәаиҭеит Ануа.

Иаҳа инеиҵыху аиҿцәажәара шәазыӡырҩыр шәылшоит аудио аҿы.

26

Қорсаиа: ҳашцо ҳцалар, иааиуа аӡын азы ҳенергетика ҳалгоит

5
(ирҿыцуп 10:16 14.04.2021)
Аԥсны аенергетика аганахьала ишьақәгылаз аҭагылазаашьази, амаинингқәа ҳтәылаҿы ԥеиԥшс ирымоуи рзы игәаанагара арадио Sputnik аефир аҿы иҳәеит 40 шықәса анџьнырс аус зуа Даур Қорсаиа.
Хра злоу ахҭысқәа: Қорсаиа Аԥсны аенергетика иазкны

"Уажәы аус шцо ицалар, амаининг фермақәа ҳарцәошәа, аха ииашаҵәҟьаны уи ус акәымкәа, жәаҳәарада ЕгрыГЕС аныҟарҵалакгьы акгьы иҳахәаӡом, избанзар, иалагеижьҭеи иаҳагьы иацлеит, ауаа ишаархәац иаархәоит, уи иахҟьаны еиҭа аӷьычрақәа цәырҵит, аӡәы иҟынтә аӡәы иӷьычуеит, урҭ рҟнытә даҽа шьоукы, апроцесс уажәгьы иаҿуп. Макьана ахықә аҟынӡа имнеиӡац, ари аанкылашьа амаӡам, избанзар, акриптовалиута ахә ацлара иаҿуп, ауаа знык аԥара агьама збаз, уи имариаӡаны изырҳауа, аанкылаша мчы ҳамаӡам", - азгәеиҭеит иара.

Қорсаиа иажәақәа рыла ас еиԥш ҳашцо ҳцалар, иааиуа аӡын азы ҳенергетика ҳалгоит.

"Иаанхаз атраснформаторқәа акакала, ҩба-ҩбала ибжьыслоит, ас еиԥш ақәыӷәӷәара рзычҳаӡом, иҳауа алашара ҳазхаӡом, аҭагылазаашьа еиҳагьы еицәахоит, ауаа еиҭа иархәалоит амаинингқәа, ирыԥшаалоит излаарго амҩақәа, аха убри аан амаининг аԥхьаҟатәи аԥеиԥш амоуп. Уи ахылаԥшра ӷәӷәа амазароуп аҳәынҭқарра аганахьала, иҟазароуп аԥҟарақәа. "Амшынеиқәафымцамч" атехникатә ҭагылазашьа изаԥнаҵароуп уи зҽазызкыр зҭаху изы, азин ылхны, ашәахтә акәҵаны, алашара ахә ақәҵаны, насгьы, ҭыԥла Гал араион ада афермақәа рыргылара азин ыҟамзароуп. Усҟан ацәаҳәақәа ақәыӷәӷәара роуӡом, уа алашара убыллар, иаҳа иныухуа алашарагьы маҷхоит",- агәаанагара ааирԥшит Қорсаиа.

Иаҳа инеиҵыху аиҿцәажәара шәазыӡырҩыр шәылшоит арадио Sputnik Аԥсны аефир аҿы.

5
Атемақәа:
Аԥсны аенергетика апроблемақәа

Џьугьелиа Рамадан аурычра аԥҟарақәа рзы: ҳгәабзиара иазеицәоу Ҳазшаз иҳадиҵом

9
(ирҿыцуп 18:29 13.04.2021)
Аԥсылманцәа рзы иԥшьоу амза Рамадан сынтәа иалагоит мшаԥымза 13 инаркны. Аԥсны аԥсылманцәа рдоуҳатә усбарҭа ахада ихаҭыԥуаҩ Абдураҳман Џьугьелиа арадио Sputnik аефир аҿы еиҭеиҳәеит аурычра аԥҟарақәа ртәы.
Џьугьелиа: ҳаныхәыҷыз амзаҿа ангыло аԥхьа иаабар, ҳамҭак ҳарҭоит ҳәа, аҵла ҳхалан ҳаԥшуан

"Ҳазшаз игәра зго зегьы џьанаҭ ҳақәгәыӷуеит, уахь ақәшәаразы иаҳа имаҷны агәнаҳа умазароуп, ибзиоу аусқәа ныҟәугозароуп. Сара иаха амзаҿа ангыла, ҳәарада, сеигәырӷьеит. Ацәылаҷҷара иалгаанӡа, уажәы асааҭ 4 рзы ацәылаҷҷара иалагоит, убраанӡа жәа-минуҭк шыбжьоу ауаҩы акрифароуп, нас акрыфара аанкыланы амра ҭашәаанӡа иԥшоит. Саргьы убас сналагеит иахьатәи сымш. Ауаҩы игәабзиара иазеицәоу Ҳазшаз ԥҟарак ҳара иҳадиҵаӡом, абри аурычрагьы убас ауп ишыҟоу. Ахәыҷы ари идцалаӡам, уныҟәугартә уаныҟалак аамҭа инаркны иахьынӡаулшо иныҟәугоит. Иахьазы ҳаҩнаҭаҿы сыҷкәын дыурычуеит, сара, сан шьҭа лгәыбзиара иауӡом", -  еиҭеиҳәеит Џьугьелиа.

Иаҳа инеиҵыху аиҿцәажәара шәазыӡырҩыр шәылшоит арадио Sputnik Аԥсны аефир аҿы, мамзаргьы аудиофаил аҿы.

Иара убас шәаԥхьар ҟалоит:

9

Ахра Аҩӡба лаҵара 5 рҟынӡа дшыбаандаҩыц даанхоит

3
(ирҿыцуп 13:20 14.04.2021)
Мшаԥы 2 рзы Аҟәатәи ақалақьтә ӡбарҭа Ахра Аҩӡба лаҵара 5 рҟынӡа ибаандаҩра аҿҳәара иацнаҵеит.

АҞӘА, мшаԥы 14– Sputnik, Асмаҭ Ҵәыџьԥҳа. Аԥсны Иреиҳаӡоу аӡбарҭа ахашшааратә коллегиа Аҟәатәи ақалақьтә еизара Ахра Аҩӡба лаҵара 5 рҟынӡа ибаандаҩра аҿҳәара иахьацнаҵаз азы ахьчаратә ган Иреиҳаӡоу аӡбарҭахь инанашьҭыз ашшыԥхьыӡ иақәшаҳаҭымхеит.

Ахра Аҩӡба даанкылан хәажәкыра 4 рзы. Азинхьчаратә усбарҭақәа русзуҩцәа хәажәкыра 4 рзы Ахра Аҩӡба дахьынхоз аҩнаҟны иаадырԥшит иҵәахыз абџьар, аџьаԥҳаны, ахархәага ҷыдақәа, арадиодырраҭара мҩаԥызго ашьақәгылақәа. Ашьаус хацыркын уаанӡа еиқәшаҳаҭханы абџьари аџьаԥҳани азакәаншьаҭа рымамкәа раахәара, рыҵәахра, рымҩангара, рныҟәгара ахьымҩаԥыргоз азы.

Хәажәкыра 7 рзы Аҟәатәи ақалақьтә ӡбарҭа Ахра Аҩӡбеи ихьчаҩцәа: Талех Гасанов, Аслана Гуатижев, Андреи Локтионов, Станислав Культа мызкы – мшаԥы 5 рҟынӡа ҭакрала ирхыргарц аӡбамҭа аднакылеит.

Мшаԥы 1 азы Аҟәатәи ақалақьтә ӡбарҭа Станислав Культа, Андреи Локтионов, Аслан Гуатижев рырбаандаҩратә ҿҳәара аҽа мызкы ацнаҵеит, 2021 шықәса лаҵара 4 аҟынӡа. Убри аан аус аҽа лахәылак – Талех Гасанов иганахь ала Апрокуратура хада азыҳәа иақәшаҳаҭымхеит.

Мшаԥы 2 рзы Аҟәатәи ақалақьтә ӡбарҭа Ахра Аҩӡба лаҵара 5 рҟынӡа ибаандаҩра аҿҳәара иацнаҵеит.

3
Атемақәа:
Ахра Аҩӡба иаанкылара