Џьопуа Аԥсны ателемедицина аиҿкааразы иаагаз амашьынақәа ахархәара зырмоуз иҳәеит

17
(ирҿыцуп 18:40 24.03.2021)
Аҟәа ақалақь амедициантә цхыраара лас аҳақьым хада Аслан Џьопуа арадио Sputnik аефир аҿы иҳәеит аҿкы чымазара аихсыӷьра русура ишаныԥшыз, насгьы ацхыраара ласы амашьынақәа рзы ирымоу ауадаҩрақәа ртәы.
Џьопуа еиҭеиҳәеит Аԥсны ателемедицина аиҿкааразы иаагаз амашьынақәа хархәарас ироуз атәы

"Ҳус хәыҷык ҳәарада, иагхеит, аԥсеивгаха ҳауит, аха ачымазара ҳаиааит, ҳаилгахьеит ҳәа уҳәар ҟалом. Сгәаанагарала, ачымазара зхызгахьо маҷӡам, дара зегьы аамҭалатәи иммунитетк рымоуп, уи ауп аҿкы иааԥкны изымҿио, аха мызқәак аныиаслак, изхызгаз риммунитет анԥсыҽхалак, ҿыцны ирыхьыр ауеит. Ачымазарагьы ҿыцны иҵысыр ауеит. Макьана ачымазара аҽацәыхьчара аҭахуп, ари иатәамбаӡакәа азныҟәара ауӡом. Ачымазара ҳаиааит уҳәар ҟалоит уаҳа ахы азмырҵысуа имыҿио ианыҟалак ашьҭахь", - ҳәа иҳәеит Џьопуа.

Аҟәатәи ацхыраара ласы аҳақьым хада иҳәеит избан 2018 шықәса рзы Аԥсныҟа иаагаз ателемедицина аусуразы амашьынақәа рхы иадырхәартә еиԥш изыҟамла.

"Ателемедицина ҳәа изышьҭоу иадҳәаланы иаагаз амашьынақәеи уа ирҭагылоу атехникеи ацхыраара ӷәӷәа ҳанамҭеит, избанзар раионцыԥхьаӡа машьынак-машьынак роуит. Амашьана техникала еиқәыршәаны иааганы иургылеит ҳәа ателемедицина аус ауӡом. Иҟалар акәын амашьынақәа русура зегьы еидызҳәало центрк. Убри ашьҭахь амашьынақәа рҿы аимадара шьықәыргыланы онлианла амашьынеи ацентри еидҳәаланы ианыҟалалак, усҟан акәын аусура алҵшәа аманы ианыҟалоз, аха ус еиԥш залмыршахеит, избан - сара исызшәаҳәом", - ҳәа еиҭеиҳәеит Џьопуа.

Иаҳа инеиҵыху аиҿцәажәара шәазыӡырҩыр шәылшоит арадио Sputnik Аԥсны аефир аҿы, мамзаргьы аудиофаил аҿы.

17

Қорсаиа: ҳашцо ҳцалар, иааиуа аӡын азы ҳенергетика ҳалгоит

5
(ирҿыцуп 10:16 14.04.2021)
Аԥсны аенергетика аганахьала ишьақәгылаз аҭагылазаашьази, амаинингқәа ҳтәылаҿы ԥеиԥшс ирымоуи рзы игәаанагара арадио Sputnik аефир аҿы иҳәеит 40 шықәса анџьнырс аус зуа Даур Қорсаиа.
Хра злоу ахҭысқәа: Қорсаиа Аԥсны аенергетика иазкны

"Уажәы аус шцо ицалар, амаининг фермақәа ҳарцәошәа, аха ииашаҵәҟьаны уи ус акәымкәа, жәаҳәарада ЕгрыГЕС аныҟарҵалакгьы акгьы иҳахәаӡом, избанзар, иалагеижьҭеи иаҳагьы иацлеит, ауаа ишаархәац иаархәоит, уи иахҟьаны еиҭа аӷьычрақәа цәырҵит, аӡәы иҟынтә аӡәы иӷьычуеит, урҭ рҟнытә даҽа шьоукы, апроцесс уажәгьы иаҿуп. Макьана ахықә аҟынӡа имнеиӡац, ари аанкылашьа амаӡам, избанзар, акриптовалиута ахә ацлара иаҿуп, ауаа знык аԥара агьама збаз, уи имариаӡаны изырҳауа, аанкылаша мчы ҳамаӡам", - азгәеиҭеит иара.

Қорсаиа иажәақәа рыла ас еиԥш ҳашцо ҳцалар, иааиуа аӡын азы ҳенергетика ҳалгоит.

"Иаанхаз атраснформаторқәа акакала, ҩба-ҩбала ибжьыслоит, ас еиԥш ақәыӷәӷәара рзычҳаӡом, иҳауа алашара ҳазхаӡом, аҭагылазаашьа еиҳагьы еицәахоит, ауаа еиҭа иархәалоит амаинингқәа, ирыԥшаалоит излаарго амҩақәа, аха убри аан амаининг аԥхьаҟатәи аԥеиԥш амоуп. Уи ахылаԥшра ӷәӷәа амазароуп аҳәынҭқарра аганахьала, иҟазароуп аԥҟарақәа. "Амшынеиқәафымцамч" атехникатә ҭагылазашьа изаԥнаҵароуп уи зҽазызкыр зҭаху изы, азин ылхны, ашәахтә акәҵаны, алашара ахә ақәҵаны, насгьы, ҭыԥла Гал араион ада афермақәа рыргылара азин ыҟамзароуп. Усҟан ацәаҳәақәа ақәыӷәӷәара роуӡом, уа алашара убыллар, иаҳа иныухуа алашарагьы маҷхоит",- агәаанагара ааирԥшит Қорсаиа.

Иаҳа инеиҵыху аиҿцәажәара шәазыӡырҩыр шәылшоит арадио Sputnik Аԥсны аефир аҿы.

5
Атемақәа:
Аԥсны аенергетика апроблемақәа

Џьугьелиа Рамадан аурычра аԥҟарақәа рзы: ҳгәабзиара иазеицәоу Ҳазшаз иҳадиҵом

9
(ирҿыцуп 18:29 13.04.2021)
Аԥсылманцәа рзы иԥшьоу амза Рамадан сынтәа иалагоит мшаԥымза 13 инаркны. Аԥсны аԥсылманцәа рдоуҳатә усбарҭа ахада ихаҭыԥуаҩ Абдураҳман Џьугьелиа арадио Sputnik аефир аҿы еиҭеиҳәеит аурычра аԥҟарақәа ртәы.
Џьугьелиа: ҳаныхәыҷыз амзаҿа ангыло аԥхьа иаабар, ҳамҭак ҳарҭоит ҳәа, аҵла ҳхалан ҳаԥшуан

"Ҳазшаз игәра зго зегьы џьанаҭ ҳақәгәыӷуеит, уахь ақәшәаразы иаҳа имаҷны агәнаҳа умазароуп, ибзиоу аусқәа ныҟәугозароуп. Сара иаха амзаҿа ангыла, ҳәарада, сеигәырӷьеит. Ацәылаҷҷара иалгаанӡа, уажәы асааҭ 4 рзы ацәылаҷҷара иалагоит, убраанӡа жәа-минуҭк шыбжьоу ауаҩы акрифароуп, нас акрыфара аанкыланы амра ҭашәаанӡа иԥшоит. Саргьы убас сналагеит иахьатәи сымш. Ауаҩы игәабзиара иазеицәоу Ҳазшаз ԥҟарак ҳара иҳадиҵаӡом, абри аурычрагьы убас ауп ишыҟоу. Ахәыҷы ари идцалаӡам, уныҟәугартә уаныҟалак аамҭа инаркны иахьынӡаулшо иныҟәугоит. Иахьазы ҳаҩнаҭаҿы сыҷкәын дыурычуеит, сара, сан шьҭа лгәыбзиара иауӡом", -  еиҭеиҳәеит Џьугьелиа.

Иаҳа инеиҵыху аиҿцәажәара шәазыӡырҩыр шәылшоит арадио Sputnik Аԥсны аефир аҿы, мамзаргьы аудиофаил аҿы.

Иара убас шәаԥхьар ҟалоит:

9

Ахра Аҩӡба лаҵара 5 рҟынӡа дшыбаандаҩыц даанхоит

3
(ирҿыцуп 13:20 14.04.2021)
Мшаԥы 2 рзы Аҟәатәи ақалақьтә ӡбарҭа Ахра Аҩӡба лаҵара 5 рҟынӡа ибаандаҩра аҿҳәара иацнаҵеит.

АҞӘА, мшаԥы 14– Sputnik, Асмаҭ Ҵәыџьԥҳа. Аԥсны Иреиҳаӡоу аӡбарҭа ахашшааратә коллегиа Аҟәатәи ақалақьтә еизара Ахра Аҩӡба лаҵара 5 рҟынӡа ибаандаҩра аҿҳәара иахьацнаҵаз азы ахьчаратә ган Иреиҳаӡоу аӡбарҭахь инанашьҭыз ашшыԥхьыӡ иақәшаҳаҭымхеит.

Ахра Аҩӡба даанкылан хәажәкыра 4 рзы. Азинхьчаратә усбарҭақәа русзуҩцәа хәажәкыра 4 рзы Ахра Аҩӡба дахьынхоз аҩнаҟны иаадырԥшит иҵәахыз абџьар, аџьаԥҳаны, ахархәага ҷыдақәа, арадиодырраҭара мҩаԥызго ашьақәгылақәа. Ашьаус хацыркын уаанӡа еиқәшаҳаҭханы абџьари аџьаԥҳани азакәаншьаҭа рымамкәа раахәара, рыҵәахра, рымҩангара, рныҟәгара ахьымҩаԥыргоз азы.

Хәажәкыра 7 рзы Аҟәатәи ақалақьтә ӡбарҭа Ахра Аҩӡбеи ихьчаҩцәа: Талех Гасанов, Аслана Гуатижев, Андреи Локтионов, Станислав Культа мызкы – мшаԥы 5 рҟынӡа ҭакрала ирхыргарц аӡбамҭа аднакылеит.

Мшаԥы 1 азы Аҟәатәи ақалақьтә ӡбарҭа Станислав Культа, Андреи Локтионов, Аслан Гуатижев рырбаандаҩратә ҿҳәара аҽа мызкы ацнаҵеит, 2021 шықәса лаҵара 4 аҟынӡа. Убри аан аус аҽа лахәылак – Талех Гасанов иганахь ала Апрокуратура хада азыҳәа иақәшаҳаҭымхеит.

Мшаԥы 2 рзы Аҟәатәи ақалақьтә ӡбарҭа Ахра Аҩӡба лаҵара 5 рҟынӡа ибаандаҩра аҿҳәара иацнаҵеит.

3
Атемақәа:
Ахра Аҩӡба иаанкылара