Аӡынԥҳа еиҭалҳәеит аԥсуа тәылауаҩра аиуразы аԥышәарақәа шымҩаԥысуа

149
(ирҿыцуп 21:14 30.04.2021)
Милаҭла иаԥсыуаам, аха Аԥсны нхарҭа ҭыԥс иалызххьоу атәылауаҩшәҟәы роурц азы Аҵареи абызшәатә политикеи рминистрраҿы аԥсуа бызшәа аԥышәара иахысроуп. Атәылауаҩшәҟәы аиураз аԥышәарақәа ркомиссиа алахәыла Гәында Аӡынԥҳа арадио Sputnik аҟны еиҭалҳәеит уи иацу ауадаҩрақәа.
Аӡынԥҳа аԥсуа тәылауаҩра аиуразы аԥышәаразы: ашьҭахь, ҩымш хымш ҳшьара ҳақәӡам

Есымза аҵареи абызшәатә политикеи рминистрраҿы аҧсуа бызшәа аҧышәара мҩаԥысуеит милаҭла иаԥсыуаам, ҳтәыла иатәылауаам, аха Аԥсны нхарҭа ҭыԥс иалызххьоу атәылауаҩшәҟәы роурц азы.

"Даара агәыԥжәара ҳхаҳгоит аиашазы, аԥышәара ашьҭахь, ҩымш хымш ҳшьара ҳақәӡам, избан акәзар, реиҳа изыумҭаша ауаа ирыцны иаауа аԥсуаа роуп, ишцәажәоугьы даара угәы унархьыртә иҟоуп. 27 шықәса заҵәык роуп иҵхьоу, аԥсуа ҷкәынцәа, аԥсуа ҿар абриаҟа аибашьра зхызгаз рхашҭны, дара ринтересқәа рзы, иахьатәи аамҭа иашьашәалоу, аԥара арҳаразы, ишакәхалак атәылауаҩра ҳазраҭандаз ҳәа рхатәы интересқәа ирышьҭоуп, иазхәыцӡом уи наҟ-наҟ иахылҿиаар зылшо. Сара изныкымкәа исҳәахьеит, егьырҭ амилаҭқәа изышәымҵои ҳәа анраҳҳәалак, "ҳа ҳакәым, шәара ишәҳәаӡом, зны шәара шәара шәҭқәа рҵааит, нас ҳара иаҳҵоит" ҳәа иааҳҿаркуеит. Нас ԥыҭрак ашьҭахь ҳанырзаслак, шьҭа шәазыхиазар, шәааи аԥышәара аҭара ҳәа, "шәхы шәмыргәаҟын, ҳара иҳарҭахьеит атәылауаҩра" ҳәа аҭак ҳарҭоит", - азгәалҭеит Аӡынԥҳа.

Иаҳа инеиҵыху аиҿцәажәара шәазыӡырҩыр шәылшоит арадио Sputnik Аԥсны аефир аҿы, мамзаргьы аудиофаил аҿы.

149

Ҩардан акоронавирус аҟынтәи алаҵазы: изҭаху раасҭа изҭахым рацәоушәа сгәы иабоит

5
(ирҿыцуп 11:54 12.05.2021)
Агәабзиарахьчара аминистр ихаҭыԥуаҩ Вахтанг Ҩардан арадио Sputnik аефир аҟны иҳәеит акоронавирус аҟынтәи алаҵа аҟаҵара ианалаго, иахьыҟарҵо, уи раԥхьа иргыланы иззыҟаҵахо.

Аԥсны атәылауаа COVID-19 хызҽуа алаҵа "Спутник V" рзыҟаҵара иалагоит лаҵара 12 рзы.

Ҩардан акоронавирус аҟынтәи алаҵазы: изҭаху раасҭа изҭахым рацәоушәа сгәы иабоит

"Аԥсны араионқәа зегьы рҿы ахәышәтәырҭақәа рхыбрақәа рҿы ауадақәа аартуп алаҵа ахьыҟарҵо. Аҟәа ус еиԥш хыџьара иҟоуп. Ақалақьтәи ахәышәтәырҭаҟны алаҵа ҟарҵоит уа аус зуа амедицина аусзуҩцәа рзы мацара, 300-ҩык рҟынӡа ыҟоуп. Ареспубликатә хәышәтәырҭаҟынгьы раԥхьа авакцина роуеит амедицинатә усзуҩцәа. Насгьы иҟоуп иаҳа ихадоу ҳәа иԥхьаӡоу ақалақьтә поликлиника. Уа ашьыжь аусзуҩцәа ирзыҟарҵоит алаҵа, нас ақалақьуаа, авакцина аҟаҵара зыхәҭоу рзы иҟаҵахоит. Амедицина аусзуҩцәа рышьҭахь алаҵа рзыҟаҵахоит ажәлар рҟны аус зуа: арҵаҩцәа, ауаа рацәа ныҟәызго амашьына аныҟәцаҩцәа уҳәа егьырҭ… Алаҵа ахьыҟарҵо апунктқәа рҟны аҳақьымцәа ауаа иразҵаалоит ргәабзиара шыҟоу, игәарҭоит, изԥырхагахар ҟало ҳәа ззырԥхьаӡо ирыларҵаӡом", - иҳәеит Ҩардан.

Аԥсны агәабзиарахьчара аминистр ихаҭыԥуаҩ игәаанагарала, макьаназы алаҵаҟаҵаразы агәацԥыҳәара аазырԥшуа атәылауаа раасҭа, изҭахым еиҳауп.

"Изҭаху ыҟоуп, даара изҭаху, аха изҭахым иаҳа ирацәоушәа сгәы иабоит. Ҳаԥшып ишыҟало. Насгьы ари хатәгәаԥхарала ауп акәымзар, иҟауҵароуп ҳәа аӡәгьы идцалара азин ыҟам", - азгәеиҭеит Ҩардан.

Шәазыӡырҩы аудио.

Иара убас шәаԥхьар ҟалоит:

5
Атемақәа:
Аҿкычымазара – акоронавирус Аԥсни адунеи аҿи: иалкаау

Џьонуа Кәыдры аҩхааҟны инхо рзы: рхыԥхьаӡара есышықәса аҽаԥсахуеит

11
(ирҿыцуп 12:04 12.05.2021)
Гәылрыԥшь араион Ажара акыҭа ахада Сергеи Џьонуа арадио Sputnik аефир аҟны арубрика "Раионк аԥсҭазаараҟынтә" аҳәаақәа ирҭагӡаны еиҭеиҳәеит Кәыдры аҩхааҟны инхо ирымоу ауадаҩрақәа, ирыбзазшьоу атәы.
Раионк аԥсҭазаараҟынтә: Џьонуа Ажара инхо иахьатәи рыбзазашьа иазкны

"…Аизара ыҟан, уаа 60-ҩык анхацәа алахәын. Аҳәынҭқарра ахада ихьӡала, апарламент ахьӡала, ауаҩы изинқәа зыхьчо лыхьӡала ақьаадқәа ҳашьҭит ара инхо ауаа рыхьӡ зҳәо ашәҟәқәа рырҭарц. Макьана иҟало ҳаздыруам, ҩымчыбжьаҟа ҵоит. Ҳзыҳәо - анхаразы ашәҟәы рырҭарц ауп. Азакәан ус еиԥш ианыҟарҵоз Гали Тҟәарчали инхо рыда егьырҭ араионқәа рҟны инхо аҵанакӡом. Ириашатәуп уи, аха ишыҟало сыздыруам…Ара инхо иҟоуп Қырҭтәыла иатәылауаау, иатәылауаам, ажәытә ҳаибашьра ҟалаанӡа ирымаз апаспортқәа роуп, уаҳа акгьы змам ыҟоуп", - иҳәеит Џьонуа.

Иара иазгәеиҭеит Кәыдрытәи аҩхааҟны инхо рхыԥхьаӡара есышықәса аҽшаԥсахуа, шықәсык ҩба-хԥа ҭаацәа ықәҵны Қырҭтәылаҟа ишцо.

Шәазыӡырҩы аудио.

11

Урыстәылатәи адукат Ахра Аҩӡба изинқәа ихьчалоит

2
(ирҿыцуп 14:12 12.05.2021)
Гәылрыԥшьтәи араионтә ӡбарҭаҿы лаҵара 12 рзы иаатит Ахра Аҩӡбеи дзыхьчоз ԥшьҩыки рганахь ала аӡбаҩцәа реилатәара.

АҞӘА, лаҵара 12 - Sputnik, Асмаҭ Ҵәыџьԥҳа. Гәылрыԥшьтәи араионтә ӡбарҭа аӡбаҩ Игор Агәмаа Ахра Аҩӡба иҳәарала аус аҽа хьчаҩык иадгалара дақәшаҳаҭхеит.

Уаанӡа Ахра Аҩӡба иус ахәаԥшра урыстәылатәи адукат Сергеи Белиак иалахәхаразы азыҳәа ҟаиҵеит. Аӡбамҭа адкыларазы аӡбаҩцәа аилацәажәаратә уадахь инеиит.

Уаанӡа Ахра Аҩӡба иинтересқәа лыхьчон адукат Инга Габилаиаԥҳа.

Гәылрыԥшьтәи араионтә ӡбарҭаҿы Ахра Аҩӡбеи иара идгылаҩцәеи рус азы аилатәара хацдыркит. Дара ахара рыдҵоуп абџьари аџьаԥҳани закәаншьаҭа рымамкәа раахәара, рыҵәахра, рымҩангара, рныҟәгара ахьымҩаԥигоз азы.

Ари аҩыза аумҭазы ахәҭаҷ иазыԥхьагәанаҭоит ҩышықәса инаркны фышықәсанӡа ҭакрала ахыгара.

2
Атемақәа:
Аҿкычымазара – акоронавирус Аԥсни адунеи аҿи: иалкаау