Хра злоу ахҭысқәа: Ахбеи Логәуеи атурист ихымҩаԥгашьа иадҳәалоу азҵаарақәа ирызкны

8
(ирҿыцуп 11:08 08.05.2021)
Атурист Аԥсны иҟазаара аамҭазы ҳмилаҭтә ҷыдара иацәыхароу ихымҩаԥгашьа апроблемазы арадио Sputnik аефир аҿы ргәаанагарақәа рҳәеит Атәыла ахада акультуреи аҭҵаарадыреи рызҵаарақәа рзы аштатнҭыҵтәи иабжьгаҩ Нугзар Логәуеи, Аԥсны отельерцәа ргильдиа ахада Асҭамыр Ахбеи.
Хра злоу ахҭысқәа: Ахбеи Логәуеи атурист ихымҩаԥгашьа иадҳәалоу азҵаарақәа ирызкны

Арҭ амшқәа рзы асоциалтә ҳақәа рҿы ицәырҵит афотосахьа, атәыла иаҭааз атуристцәа ран ишаалыхшаз амшын иахьҭалоз.

"Ихадоу азҵаарақәа аамҭа ицәырнагаз ахьынӡаҳаӡбоз, ари азҵаарақәа хәыҷык ихьысҳахазар ҟалоит, уи закәанла ахылаԥшра аганахьалагьы, атуризм знапы алаку рыбзоуралагьы атурист илеишәа лымкаала иазнеитәуп. Хылаԥшра азҭогьы ыҟазароуп, аҩнуҵҟатәи аусқәа аминистрра русзуҩцәа рганахьала. Атәым ҳәынҭқаррақәа рҿы иҟоуп "полиция нравов" ҳәа ззырҳәо, дара атурист изинқәа рыхьчара иадгылоит, абжьагарақәагьы рырҭоит, ихымҩаԥгашьа зеиԥшрахашазар ахәҭоу деилдыркаауеит. Ари иаанагаӡом ирџьбаратәуп аԥҟарақәа атурист Аԥсны иҟазаара аамаҭа иалагӡаны дзықәныҟәаша убас, атурист дацәшәаратәы. Иҳәатәуп, иара аԥсшьаҩы иаҳзаауа иара Урыстәыла иахьаҵанакуа дыҟоушәа игәы иабоит, аинформациа аганахьала хәыҷык ҳкәадазаргьы ауеит. Амшын иахьҭало аҭыԥқәа шьақәыргылан иҟазароуп, уа аинформациа аганахьала ихадоу аԥҟарақәа кыдзароуп. Уи ҟазҵаша аԥшаҳәа ахархәарахь изго, ус еиԥш ақалақь ахадара ирыдырҵароуп", - иҳәеит Ахба.

Атәыла ахада акультуреи аҭҵаарадыреи рызҵаарақәа рзы аштатнҭыҵтәи иабжьгаҩ Нугзар Логәуа игәаанагарала, атурист атәым милаҭ аҿы ихымҩаԥгашьа мҩақәызҵаша апропаганда ыҟазароуп.

"Аанда ахьылаҟәу ауп иахьахыҵуа. Сгәанала, апропаганда аганахьала аус утәуп. Атуризм аекономика шьҭызхуа хырхарҭаны ианыҳаԥхьаӡа, игәцарактәуп азакәан аганахьала, уи анагӡара аус аҟынгьы", - еиҭеиҳәеит Логәуа.

Иаҳа инеиҵыху аиҿцәажәара шәазыӡырҩыр шәылшоит арадио Sputnik Аԥсны аефир аҿы, мамзаргьы аудиофаил аҿы.

8

Раионк аԥсҭазаараҟынтә: Кәарҷиаԥҳа Галтәи аколлеџь аҟны аскаи-клуб иазкны

4
(ирҿыцуп 20:21 21.06.2021)
Галтәи агуманитартә коллеџь аиҳабы Гәында Кәарҷиаԥҳа арадио Sputnik аефир аҟны еиҭалҳәеит аколлеџь ахыбраҟны аус зуаз аскаи–клуб аҟны аҿарацәа иддырҵоз, урҭ рдыррақәа ԥхьаҟа рхы иадырхәар ахьрылшо атәы.
Раионк аԥсҭазаараҟынтә: Кәарҷиаԥҳа Галтәи аколлеџь аҟны аскаи-клуб иазкны

"Иформалтәым аҵараҟны иҿыцуи ааӡара иаҵанакуа азнеишьақәеи" апроект алҵшәақәа еихыршьалеит мышқәак раԥхьа Гал. Уи рхы аладырхәит Гали Тҟәарчали араионқәа рхадацәа.

"Аколлеџь ахыбраҟны ҩышықәса инарзынаԥшуа аскаи-клуб ыҟан. Уи аҿарацәа еиднакылон, ҳастудентцәагьы иргәаԥхан иалалаз ыҟоуп. Еицәажәон, ихәмаруан, имҩаԥыргон еиуеиԥшым аныҳәақәа, уи адагьы аҵара ахьырҵаша, аусурҭа шырԥшааша, абизнес-планқәа рыҩра уҳәа рзы ицхыраагӡан. Уи аамҭазы ҳара ҳколлеџь аҟны ахәыҟаҵаҩ изанааҭ ала акурсқәа еиҿаҳкаауан, аклуб аҟынтәи быжьҩык аҿарацәа ааргеит… Мчыбжьык ауп инхаз, шықәсык аҵара зҵоз ауҳажьырц азы. Аусурҭа атәы ҳҳәозар, заанаҵы ҳрацәажәан, иҟоуп Гагра, Риҵа ицо, иҟоуп Гал ақаҳуажәырҭаҟны, ачаӡырҭаҟны аус зуа", - лҳәеит Кәарҷиаԥҳа.

Шәазыӡырҩы аудио.

Иара убас шәаԥхьар ҟалоит:

4

Кәарҷиа аиога азы: анапы еиҿаршәны атәара мацара акәым иаанаго, уи мҩоуп

7
(ирҿыцуп 18:19 21.06.2021)
Рашәара 21 аиога иамшуп. Ауаажәларратә усзуҩ Абессалом Кәарҷиа арадио Sputnik аефир аҟны далацәажәеит аиога аҵакы.
Кәарҷиа аиога азы: анапы еиҿаршәны атәара мацара акәым иаанаго, уи мҩоуп

Аиога Жәларбжьаратәи амш азгәарҭоит рашәара 21 азы. Аашықәса раԥхьа Еиду Амилаҭқәа реиҿкаара Ассамблеиа Хада Индиа аԥыза-министр Нарендра Моди лажәалагалала арезолиуциа аднакылеит аиога амш азы. Ари амш машәыршақә иалрымхит, рашәара 21 ашықәсан зегь раасҭа иауу мшуп, анаҩс амш агхара иалагоит.

"…Аиога Индиа ицәырҵит, аҭоурых даара иҵаулоуп, ҳашықәсԥхьаӡара ҟалаанӡа ҩышә шықәса раԥхьа Патанджали ҳәа дыҟан аиог ду, убри иҟаиҵеит асистема. Аиога аԥҟарақәа инарықәыршәаны зхы мҩаԥызго даара доуҳала, леишәала аԥсабара иазааигәоу уаҩуп. Ҳазшаз иԥҟарала аԥсабара азнеишьа, ахымҩаԥгароуп ҵакыс иамоу аиога. Цәаныррала иудыруа иаҳа ирацәахоит, иаҳа иузымариахоит аԥсҭазаараҟны ахымҩаԥгара, анхара… Ауаҩы иԥсы ахьынӡаҭоу ихы шымҩаԥигаша аԥсабара аҿаԥхьа, иуаажәлар, иқыҭа, иуа-излацәа, иҭаацәа рҿы, абри амҩа дахьықәу ихы шымҩаԥигаша аҵанакуеит… Аԥсуаа ҳҟны аԥси ацәеижьи еидыганы ирыхцәажәоит… аԥсуаа ҳҟны ирҳәалоит "Ҳазшаз дисасуп" ҳәа, аԥсҭазаараҟны ҳара ҳсасцәоуп, убри аҟынтә сасцәаҵас ҳхы мҩаԥаагароуп. Ииашаны ухы мҩаԥугарц азы аиога аҟны аа-ҩаӡарак ыҟоуп. Аԥхьатәи аҟны ауаҩы ибызшәа ирыцқьароуп, аиакәым имҳәароуп, анаҩс ихәыцрақәа ирыцқьароуп, уи ашьҭахь убаҩ арҵәра уалагоит… Аиога анапы еиҿаршәны атәара мацара акәым, уи ахымҩаԥгашьа иаша, ауаҩы шаҟа аԥсабара дазааигәахо, Ҳазшаз деиликаартә, цәаныррала дгәеиҭартә даназааигәахо аиога ауп…Аиога уи амҩа ауп, Ҳазшази уареи шаҟа шәеизааигәахо ауп", - иҳәеит Кәарҷиа.

Иаҳа инеиҵыхны аицәажәара аудиофаил аҟны.

7

Акоронавирус злаз ҩыџьа рыԥсҭазаара иалҵит, шәҩык инареиҳаны ирыдырбалеит Аԥсны

6
(ирҿыцуп 00:14 22.06.2021)
Аепидемиа иалагеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 16367-ҩык ыҟоуп, ргәы бзиахеит 15269-ҩык, рыԥсҭазаара иалҵит 243-ҩык.

АҞӘА, рашәара 21– Sputnik. Иҳаҩсыз уахыки-ҽнаки рыла COVID-19 рылоу ирыламу аилкааразы 378-ҩык атестқәа рзыҟаҵан, урҭ рахьтә 108-ҩык рцәа акоронавирус шалаз аадырԥшит ҳәа аанацҳауеит Ауааԥсыра COVID-19 рацәыхьчаразы аоперативтә штаб.

Гәдоуҭатәи ахәышәтәырҭаҿы рыԥсҭазаара иалҵит ҩыџьа апациентцәа, 84 шықәса зхыҵуаз ахаҵеи 1940 шықәсазы ииз аԥҳәыси.

Абыржәтәи аамҭазы Гәдоуҭатәи араионтә хәышәтәырҭа хадаҿы ишьҭоуп 61-ы, урҭ рахьтә 61-ы акоронавирус адиагноз рзышьақәыргылоуп, рҭагылазаашьа бааԥсуп 14-ҩык, ибжьаратәуп - 31-ҩык.

Аҟәатәи аинфекциатә хәышәтәырҭаҿы ирхәышәтәуеит акоронавирус зцәа иалоу 40-ҩык апациентцәа, урҭ рахьтә жәаҩык рҭагылазаашьа уадаҩуп. Очамчыра ирхәышәтәуеит 22-ҩык, Гагратәи ахәышәтәырҭаҿы - 19-ҩык, Тҟәарчалтәи ахәышәтәырҭаҿы - 14-ҩык апациентцәа.

Акоронавирус иазку ажәабжьқәа зегьы шәрыԥхьар ҟалоит абра>>

6
Атемақәа:
Аҿкычымазара – акоронавирус Аԥсни адунеи аҿи: иалкаау