Ҳазлацәажәаша ҳамоуп: Беиаԥҳа Џьопуеи "Аҵх амузеи" аҿы иазкны

13
(ирҿыцуп 17:21 18.05.2021)
Амузеиқәа иахьатәи русушьеи, насгьы рныҳәа шазгәарҭои атәы арадио Sputnik аефир аҿы еиҭарҳәеит Аԥснытәи аҳәынҭқарратә музеи аиҳабы Аркади Џьопуеи Аибашьратә фырхаҵара Ахьӡ-аԥша Аҳәынҭқарратә музеи аиҳабы Мзиа Беиаԥҳаи.
Ҳазлацәажәаша ҳамоуп: Беиаԥҳаи Џьопуеи "Аҵх амузеи аҟны" иазкны

"Аԥхьа акциа "Аҵх амузеи аҟны" ҳмузеи аҿоуп иахьалагаз. Уи ашьҭахь егьырҭ амузеиқәагьы адгылара арҭеит. Есышықәса ҳажәҩахыр ааибыҭаны аус аауеит. Ари амш анааигәахо азы иҟаҳҵо еиԥшымкәаны ҳазнеиуеит. Ҳмузеи ҳҭоурых ганрацәалатәи аԥсуаа иҳамоу, иахьынӡазалшо иҵауланы, иҭбааны, иахьатәи аамҭа иақәшәо ауаа ирызнаҳгарц ҳҭахуп", - ҳәа еиҭеиҳәеит Џьопуа.

Беиаԥҳа илҳәеит ари амш азы амузеи ауаа рацәаны ишаҭаауа атәы.

"Уажәазы ишыҟало сыздыруам, апандемиа аамҭазы, аха уаанӡа ари акциа азҿлымҳара арҭон ауааԥсыра. Уи ҳаигәырӷьоит даара, избанзар, хықәкыс иҳамоу, ҳмузеи збаша, изаҳаша ҳауаажәлар мааиуазар, усҟан инаныгӡо аусурагьы башахоит", - ҳәа лҳәеит Беиаԥҳа.

Есышықәса лаҵара 18 рзы адунеи аҟны амузеиқәа Жәларбжьаратәи рымш азгәарҭоит. Абри амш аныҳәатә гәалаҟара аҭараз атәылақәа ркультуреи, рҭоурыхи рабадырраз еиҿыркаауа иалагеит акциа "Аҵх амузеи аҟны" ҳәа. Раԥхьатәи акциа мҩаԥысит Берлин ақалақь аҿы, 24 шықәса раԥхьа. Урыстәыла акәзар, 14 шықәса раахыижьҭеи имҩаԥысуеит, Аԥсны - фышықәса роуп иҵуа.

Иаҳа инеиҵыху аиҿцәажәара шәазыӡырҩыр шәылшоит аудиофаил аҿы, мамзаргьы арадио Sputnik аефир аҿы.

13

Хра злоу ахҭысқәа: Ҳашыги Ҷолокәуеи атәыла ахада инашьҭымҭа иазкны

4
(ирҿыцуп 16:15 12.06.2021)
Аԥсны ахада иҿы иҟоу аинформациатә хархәагақәа рымадаразы аусбарҭа аиҳабы Алхас Ҷолокәуеи, ажурналист, агазеҭ "Чегемскаиа правда" аредактор хада Инал Ҳашыги иалацәажәеит атәыла ахада инашьҭымҭа аҵакы, уи абжьажьра азакәан ахьынӡеиланаго.
Хра злоу ахҭысқәа: Ҳашыги Ҷолокәуеи атәыла ахада инашьҭымҭа иазкны

Атәыла ахада апарламент ахь инашьҭымҭа - хықәкыс иамоузеи ари апроцедура? Иара абжьажьра азакәан абанӡеиланаго? Аԥсны ахада апарламент ахь инашьҭымҭа ари ашықәс азы иарбоума, уи аҟны иалкаахо ахырхарҭа хадақәа, анашьҭымҭа аҵакы, адунеитә ԥышәа уҳәа азҵаарақәа ирылацәажәеит арадио Sputnik аефир аҟны Аԥсны ахада иҿы иҟоу аинформациатә хархәагақәа рымадаразы аусбарҭа аиҳабы Алхас Ҷолокәуа, ажурналист, агазеҭ "Чегемскаиа правда" аредактор хада Инал Ҳашыг.

"…Аԥсны аҳәынҭқарра ахада анапхгарахь даннеи, ԥшьымзгьы ахылахьан ашықәс, ачымазара ҿыц анцәырҵыз акәын. Ҳазхиаӡамызт аҭагылазаашьа, иҟалараны иҟазгьы аҳәара уадаҩын, амч-алша, ахшыҩ зегьы уи аус иазкын. Насгьы ԥҟаралагьы Аԥсны ауаа рацәа алархәны аиԥыларақәа, аизарақәа рымҩаԥгара аанкылан… уи ауп изызку анашьҭымҭа аҟамзаара, аха уи инаваргыланы исҳәар сҭахуп аҳәынҭқарра ахада изныкымкәа апарламент аҟны аиԥыларақәа шимаз, уаҟа Аԥсны аҩнуҵҟатәи адәныҟатәи аполитика далацәажәеит. Аԥсны аҭагылазаашьазы аҳәынҭқарра ахада ипланқәа ауаа рахь ицәыргамызт ҳәа аҳәарагьы иашам… Акызаҵәык, исҳәар исҭаху, анашьҭымҭа ҟалоит, амала ианыҟало абри амш ауп ҳәа макьана аҳәара сазхиам", - ҳәа азгәеиҭеит Ҷолокәуа.

Арҭ ашықәсқәа рзы аҳәынҭқарра ахада апарламент ахь инашьҭымҭа ритуалтә традициак аҳасабала ҳахәаԥшуан, инарҵауланы адокумент ҭҵааны, иҟаҳҵо шыҟаҳҵо атәы уиаҟара ҳазхәыцуамызт ҳәа агәаанагара ааирԥшит ажурналист Инал Ҳашыг.

Инеиҵыху аицәажәара шәазыӡырҩы аудиофаил аҟны.

4
Абессалом Кварчия

Хра злоу ахҭысқәа: Кәарҷиа афатәи абылтәи рыхәқәа рыцҵара иазкны

3
Афатә, ауҭраҭых хкқәак рыхә ацлара, абылтәы ахә аиҭакразы ишьақәгылаз аҭагылазаашьазы арадио Sputnik аефир аҟны игәаанагара иҳәеит Ауаажәларратә палата алахәыла, аусдкылаҩ Абессалом Кәарҷиа.
Хра злоу ахҭысқәа: Кәарҷиа афатәи абылтәи рыхәқәа рыцҵара иазкны

"Аҳәынҭқарраҟны мчыла ахә узышьақәыргылаӡом. Ахә шьақәзыргыло аџьармыкьа ауп. Сара иахьа аԥсыцәгьара аарԥшны џьара хә-мааҭк ахә иацланы схы иархәаны жәа мааҭк иацысҵар, уи збо иалоу феида шыҳараку анибо, иаргьы далагоит. Аӡәы имацара ахә изацҵом, дмонополистны дыҟамзар, иара ида аӡәгьы имамзар. Еибыҳәаны иҟарҵо атәы акәзар, Аԥсны уиаҟара амч, аԥышәа рымаӡам, аӡәгьы игәы иалымсааит, аха уи азы ҷыдала аилкаара рымаӡам рҽеидкыланы иазнеиртә еиԥш. Ус еиԥш апрактика Аԥсны исымбацт. Аҳәынҭқарра дуқәа рҿы ус еиԥш ҟамларц еиҿкааны ирымоуп амонополиа иаҿагылоу аилак. Ауаа рхы еидкыланы, еилацәажәаны ак ҟарымҵарц азы ахараԥсақәа ҳаракуп, уи иацәшәоит. Иҟоуп егьа закәан шьақәургыларгьы, ацәцашьа, ахыҵәахышьа, аха ус ишабалак ахә ашьҭыхра аҵаҵӷәы амамзар, иуадаҩуп", - иԥхьаӡоит Кәарҷиа.

Иара иазгәеиҭеит атәылазы афатә шәарҭадара апрограмма аҵакы атәы, ианамуӡах, 30 процент рҟынӡа Аԥсны ирфо араҟа иаадрыхлар ауп ҳәа.

Аицәажәара инарҭабааны аудиофаил аҟны ишәаҳәар шәылшоит.

Иара убас шәаԥхьар ҟалоит:

3

Аԥсны акоронавирус зыхьуа даҽа 45-ҩык рыцлеит иҳаҩсыз уахыки-ҽнаки рыла

3
(ирҿыцуп 22:57 12.06.2021)
Аепидемиа иалагеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 15756-ҩык ыҟоуп, ргәы бзиахеит 15069-ҩык, рыԥсҭазаара иалҵит 238-ҩык.

АҞӘА, рашәара 12 – Sputnik. Иҳаҩсыз уахыки-ҽнаки рыла COVID-19 рылоу ирыламу аилкааразы 177-ҩык атестқәа рзыҟаҵан, урҭ рахьтә 45-ҩык рцәа акоронавирус шалаз аадырԥшит ҳәа аанацҳауеит Ауааԥсыра COVID-19 рацәыхьчаразы аоперативтә штаб.

Абыржәтәи аамҭазы Гәдоуҭатәи араионтә хәышәтәырҭа хадаҿы ишьҭоуп 38-ҩык, урҭ рахьтә 37-ҩык акоронавирус адиагноз рзышьақәыргылоуп, рҭагылазаашьа бааԥсуп 12-ҩык, ибжьаратәуп - 26-ҩык.

Аҟәатәи аинфекциатә хәышәтәырҭаҿы ирхәышәтәуеит акоронавирус зцәа иалоу 40-ҩык апациентцәа, урҭ рахьтә ааҩык рҭагылазаашьа уадаҩуп. Очамчыра ирхәышәтәуеит 10-ҩык, Гагратәи ахәышәтәырҭаҿы - 15-ҩык, Тҟәарчалтәи ахәышәтәырҭаҿы - ааҩык апациентцәа.

Акоронавирус иазку ажәабжьқәа зегьы шәрыԥхьар ҟалоит абра>>

3
Атемақәа:
Аҿкычымазара – акоронавирус Аԥсни адунеи аҿи: иалкаау