Хра злоу ахҭысқәа: Џьапуа Очамчыра ирыԥшааз атсатә ҭоубыҭ иазкны

23
(ирҿыцуп 17:14 23.08.2021)
Аԥсуеи аурыс ҵарауаи Очамчыра ажрақәа анымҩаԥыргоз ирбеит атса иалху аҭоубыҭ. Ас еиԥш аԥшаах аҵакы атәы арадио Sputnik аефир аҟны еиҭеиҳәеит Аԥснытәи аҳәынҭқарратә музеи аҳабы Аркади Џьапуа.
Хра злоу ахҭысқәа: Џьапуа Очамчыра ирыԥшааз атсатә ҭоубыҭ иазкны

Аҭҵааҩцәа Очамчыра антикатә қалақь Гиуенос ахьыҟаз аҭыԥ аҿы здаҟам аԥшаах рԥыхьашәеит – атсалых ҭоубыҭ V-VI ашәышықәсақәа рахь иаҵанакуа. Абри атәы еиҭеиҳәеит аекспедициа алахәыла, Аԥснытәи аҳәынҭқарратә музеи аҳабы Аркади Џьапуа. "Ари иашаҵәҟьаны адунеитә археологиазгьы аҵакы змоу ԥшаахуп. Ареспублика иахьаҵанакуаз уаанӡагьы ирԥыхьашәахьан аҭоубыҭқәа, аха урҭ хаҳәлыхын. Атсарҭәа иалху аҭоубыҭ раԥхьаӡа акәны иԥшаауп", - иҳәеит археолог Џьапуа. Атсалых ҭоубыҭқәа ирҭаҵаны иржуаз ауахәама амаҵуцәа дуқәа, ауаа дырқәа, атәыла анапхгаҩцәа ракәын.

23

Раионк аԥсҭазаараҟынтә: Леԥсаиа Кындыӷтәи аԥсыӡааӡарҭа иазкны

4
(ирҿыцуп 18:26 25.09.2021)
Кындыӷ ақыҭа еиҿкаау аԥсыӡааӡарҭа аусзуҩ Лаша Леԥсаиа арадио Sputnik аефир аҟны арубрика "Раионк аԥсҭазаараҟынтә" аҳәаақәа ирҭагӡаны еиҭеиҳәеит анхамҩа шеиҿыркааз, иарбан ԥсыӡхкқәоу ирааӡо, уадаҩрас ирԥыло русураҟны.
Раионк аԥсҭазаараҟынтә: Леԥсаиа Кындыӷтәи аԥсыӡааӡарҭа иазкны

"2015 шықәсазы аҷкәынцәа ҳаидгыланы ҳамчала хәыҷы-хәыҷ хаҿуп. Сынтәа раԥхьатәи ԥышәак аҳасабала аус аҳаруит. Аԥсыӡқәа хы-хкыкны рааӡара ҳаҿуп: акалмаҳа, ақьоуқьад (осетр), ахьыԥшшәы змоу аԥҟыш (карп). Акалмаҳааӡара хәыҷык иуадаҩуп, ахатәы кәамаҵамақәа амоуп. Ақьоуқьади аԥҟыши Урыстәылантәи макьана иааҳамгацт. Ԥышәарак аҳасабала аԥҟыш аԥсыӡԥшқақәа Гәдоуҭа (Оҭҳара) аԥсыӡнхамҩаҟынтәи иааҳгеит, аӡҭарчы иҭаҳҵеит, уи уиаҟара аџьабаа унарбом, ахала ахы ааӡоит", - иҳәеит Леԥсаиа.

Иаҳа инеиҵыху аиҿцәажәара аудиофаил аҟны.

4
Лаша Габелия

Зус иазҟазоу: асахьаҭыхыҩ Габелиа апандемиа аамҭазы иусура атәы

10
(ирҿыцуп 12:00 25.09.2021)
Асахьаҭыхыҩ, аонлаин-цәыргақәҵа "Аиҟәгара – аҟазара" алахәыла Лаша Габелиа арадио Sputnik аефир аҟны еиҭеиҳәеит апандемиа аамҭа рҵаҩык иаҳасабала иусушьа ишаныԥшыз, иара убас аонлаин-цәыргақәҵаҟны иӡыригаз иусумҭақәа ртәы.
Зус иазҟазоу: асахьаҭыхыҩ Габелиа апандемиа аамҭазы иусура атәы

"Аҵараҵара аганахьала еиԥҟьарақәак ҳаман астудентцәеи ҳареи ҳусураҟны. Ҳаамҭазтәи атехнологиатә маҭәахәқәа ҳхы иархәаны адҵақәа раҳҭон. Даргьы ибзианы рхы аадырԥшит, ацәыргақәҵагьы ҟаҳҵеит, ҳдыргәырӷьеит аиашазы.

Арҿиараҿы акәзар, есымша аамҭа ҳацәмаҷуп, иааҳакәыршаны иҟоу аԥшӡара аш ахь аиагаразы. Бзиашәа аамҭа ҳаун, сҩызцәеи сареи ҳцаны аҭыԥ ԥшӡарақәа ҭаҳҵааит. Акы–ҩба убра (аонлаин-цәыргақәҵазы - азгә.) ицәырызгаз урҭ иреиуоуп. Сусумҭақәа аӡын азы иҟасҵаз роуп… Пыв ашьха ажәҩан, аеҵәақәа ҳрыҵаԥшуа абас зны ашара ҳаԥылеит.

Апандемиа лшарақәакгьы ҳнаҭеит, аха ачымазара иахҟьаны ҳҩызцәа иԥсызгьы ҟалеит, угәы еихьызшьуа ауп. Ауаҩы убраанӡа ихы неигеит, аԥсабара дазымхәыцуашәа, ишьҭахь инижьуа", - иҳәеит Габелиа.

Аицәажәара иаҳа инарҭбааны аудиофаил аҟны.

"Аиҟәгара – аҟазара" ахьӡуп аинформациатә маҵзура Sputnik, Аԥсны асахьаҭыхыҩцәа реидгылеи, Асахьаҭыхратә цәыргақәҵатә зал хадеи еицеиҿыркааз аонлаин-цәыргақәҵа. Уи иалахәуп 20-ҩык рҟынӡа аҟазацәа. Ацәыргақәҵа шәахәаԥшыр шәылшоит Sputnik асаит аҿы.

10

Аԥсны даҽа 88-ҩык акоронавирус рыдырбалеит, ҩыџьа рыԥсҭазаара иалҵит

4
Аепидемиа ҟалеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 27353-ҩык рҟынӡа инаӡеит, ргәы бзиахеит 22404-ҩык ауааԥсыра, рыԥсҭазаара иалҵит 413-ҩык.

АҞӘА, цәыббра 25 – Sputnik. Иҳаҩсыз уахыки-ҽнаки рыла COVID-19 азы атестқәа арҭеит 370-ҩык Аԥсны ауааԥсыра, урҭ рахьтә 88-ҩык рцәа акоронавирус шалаз аадырԥшит.

Урыстәылатәи арратә госпиталь аҟны акоронавирус злаз ҩыџьа апациентцәа рыԥсҭазаара иалҵит: 1958 шықәсазы ииз ахаҵеи 1936 шықәсазы ииз аԥҳәыси. 

Абыржәтәи аамҭазы Гәдоуҭатәи араионтә хәышәтәырҭа хадаҿы ишьҭоуп 42-а, рҭагылазаашьа бааԥсуп ааҩык, ибжьаратәуп - 28-ҩык. Аҟәатәи аинфекциатә хәшәтәырҭаҿы ирхәышәтәуеит акоронавирус зцәа иалоу 28-ҩык, урҭ рахьтә ааҩык апациентцәа рҭагылазаашьа уадаҩуп. Очамчыра ирхәышәтәуеит 9-ҩык, Гагратәи ахәышәтәырҭаҿы - 15-ҩык, урҭ рахьтә хҩык рҭагылазаашьа уадаҩуп. Тҟәарчалтәи ахәышәтәырҭаҿы - 8-ҩык апациентцәа. Аҟәа иҟоу амобилтә госпиталь аҿы - 64-ҩык апациентцәа, жәаҩык рҭагылазаашьа хьанҭоуп.

Аоперативтә штаб аҳәара ҟанаҵоит ауааԥсыра аҿкы рхы ацәырхьчаларц.

Акоронавирус иадҳәалоу ажәабжьқәа шәрыԥхьар ҟалоит абра>>

4
Атемақәа:
Аҿкычымазара – акоронавирус Аԥсни адунеи аҿи: иалкаау