Нхыҵ Кавказ иаҭааз Ҭырқәтәылатәи аԥсуа делегациа

Ҳаразиа: Аԥсуа-абаза жәлар ахьынхозаалак, аимадареи аусеицуреи рыбжьазароуп

109
(ирҿыцуп 10:26 11.05.2019)
Лаҵарамза 7-8 рзы Ҭырқәтәылатәи аԥсуа делегациа Нхыҵ-Кавказтәи аиашьаратә республикақәа ирҭааит.

АҞӘА, лаҵара 11 - Sputnik, Сырма Ашәԥҳа. Лаҵарамза 7-8 рзы Ҭырқәтәылатәи аԥсуа делегациа усутә визвитла Нхыҵ-Кавказтәи Ареспубликақәа - Ҟабарада-Балкариеи Ҟарачы-Черқьесиеи ирҭааит.

Аҭанур Аҟәысба
© Фото : Пресс-служба Президента Республики Абхазия

Аделегациа аилазаараҿы иҟан: Сҭампыл иеиҿкаау Аԥсуа культуратә хеидкылақәа рфедерациа аиҳабы Аҭанур Аҟәысба, Сҭампылтәи аԥсуаа рхеидкыла аиҳабы Шамил Ешба, Аԥсуа федерациа алахәыла, Адунеизегьтәи аԥсуа-абаза жәлар рконгресс Ҭырқәтәылатәи аҟәша аиҳабы ихаҭыԥуаҩ Ведаҭ Меқьер, Ҭырқәтәыла иҟоу Аԥсны ахаҭарнак Вадим Ҳаразиа, ахаҭарнак ицхырааҩ Асҭамыр Багаҭелиа.

Аделегациа Нхыҵ Кавказ рыҟазаара атәы хықәкыс иамази, уи шаԥшьгахази ртәы дазааҭгылеит Вадим Ҳаразиа.

"Аԥсуа-абаза жәлар рконгресс ҵыԥх Аԥсны ианымҩаԥысуаз еибабеит Нхыҵ-Кавказынтәи иааз ҳашьцәеи дареи. Еилыркааит Нальчики Черқьесски ахеидкыларақәа шыҟоу, урҭ реиҳабацәеи дареи еицәажәеит апҳьаҟа аимадара рыбжьарҵарц азы. Володиа Ԥшьеноков напхгара азиуеит автономтә аиҿкаара Кавказ ажәларқәа ркультуреи рҭоурыхи рыҭҵааратә центр "Абаза", Ҟабарда-Балкариа Ареспублика акультуратә фонд иахәҭаку амилаҭтә культуратә центр "Аԥсны" еиҳабыс дамоуп Қацәба-Куҷаԥшьева Инга, Черқьесск ақалақь аҿы аԥсуа-абаза жәлар рыҿиара иазку Жәларбжьаратәи аидгылара "Алашара" напхгара аиҭоит Мураҭ Муков", - иҳәеит Вадим Ҳаразиа.

Ҭырқәтәыла иҟоу аԥсуа хеидкылақәеи Нхыҵ-Кавказтәи ахеидкылақәеи аусуреи, аиҩызареи, аиашьара аҳәаақәа рырҭбаареи рзы аиқәшаҳаҭра рыбжьарҵарц аицәажәара мҩаԥыргеит.

"Сара мызкы аԥхьа Нальчики Черқьесски сыҟан, аилацәажәара арыцхә азгәаҭан усҟан лаҵарамза 7-8 рзы ҳәа. Наҟгьы-арахьгьы аимадара бжьаҵаны, аиқәшаҳаҭра хбызшәакны - аԥсышәала, урысшәала, ҭырқәшәала иахәаԥшны, иҭҵааны, аус адуланы еиқәыршәан", - иҳәеит Ҳаразиа.

Ҟабарда-Балкариа иҟоу Кавказ ажәларқәа ркультуреи рҭоурыхи рыҭҵаара ацентр "Абаза" анапхгаҩы Владимир Ԥшенокови, Ҟабарда-Балкариа Ареспублика акультуратә фонд иахәҭаку амилаҭтә культуратә центр "Аԥсны" анапхгаҩы Инга Қацәба-Куҷаԥшьевеи, Ҭырқәыла иҟоу Аԥсуа Федерациа аиҳабы Аҭанур Аҟәысбеи аусеицуреи аиҩызареи рзы аиқәшаҳаҭра рнапы аҵарҩит.

© Foto / предоставлено Вадимом Харазия
Аҭанур Аҟәысбеи, Инга Қацәба-Куҷаԥшьевеи, Владимир Ԥшенокови Аиҩызареи аусеицуреи рзы аиқәшаҳаҭра рнапы аҵарҩит.

 

Адырҩаҽны, Черқьесск ақалақь аҿы аԥсуа-абаза жәлар рыҿиара иазку Жәларбжьаратәи аидгылара "Алашара" анапхгаҩы Мураҭ Мукови Ҭырқәтәыла иеиҿкаау Аԥсуа федерациа аиҳабы Аҭанур Аҟәысбеи убри аҩыза аиқәшаҳаҭра рнапы аҵарҩит.

© Foto / предоставлено Вадимом Харазия
Мураҭ Мукови Аҭанур Аҟәысбеи Аиҩызареи аусеицуреи рзы аиқәшаҳаҭра анапаҵаҩраан.

"Ҭырқәтәылеи Нхыҵ Кавкази иҟоу ҳажәларқәа рыбжьара аимадара абжьаҵара, аусеицура арӷәӷәара, аԥсуа-абаза жәлар ркультура адырра, адгылара, арҵаулара, асоциалтә етнос ахьчара уҳәа аиқәшаҳаҭраҿы иану азгәаҭақәа маҷым. Зегь раԥхьа иргыланы аҿар реибабара, аспорт, акультура, аҵарадырра уҳәа иззааҭгылоу азҵаарақәа рацәоуп, хымԥада аԥхьаҟа уи аҿиара аиуроуп. Иааидкыланы ахәҭаҷқәа жәаба ыҟоуп, гәахәарыла ирыдкылан, ажәлар рацәа еизеит, ныҳәа ҳасабла имҩаԥысит Нальчикгьы, Черқьесскгьы", - азгәеиҭеит Вадим Ҳаразиа.

Амҷыԥҳа: аԥсуааи, абазақәеи, адыгақәеи адунеиаҿ шаҟаҩ ыҟоу аилкаара ҳашьҭоуп>>

Ҭырқәтәылантәи инеиз аделегациа Нальчик иҟаз ацентрқәа зегьы ирыдыркылеит. Иара убас, Черқьесскҟа ианцоз иаҭааит Аԥсны Афырхаҵа, аинрал Сулҭан Сосналиев иҳаҭгәын. Ельбурган араион аҟны еицырдыруа абаза поет Кьерим Мыхца 70 шықәса ихыҵра иазкыз агәаларшәаратә хәылԥазы иалахәын.

© Foto / предоставлено Вадимом Харазия
Ҭырқәтәылатәи аԥсуа делегациа ҳашьцәа абазақәа ахьынхо Ельбурган иаҭааит.

 

"Уаҵәы, лаҵара 12 рзы, Сҭампыл еиҿкаахоит Аԥсуа Федерациа аилатәара. Саргьы ааԥхьара сымоуп, салахәхоит, ҳазлацәажәаша, иҳәаақәаҳҵаша аусқәа ҳамоуп. Нхыҵ-Кавказынтәи аделегациа Ҭырқәтәылаҟа ааԥхьара рымоуп, зыӡбахә сҳәаз ахеидкылақәа реиҳабацәа ҳарзыԥшуп, инарҭбааны ҳаилацәажәаны, аус аԥхьаҟа ацҵара ҳгәы иҭоуп", - азгәеиҭеит Вадим Ҳаразиа.

Аҟәысба Ҭырқәтәыла акультуратә центр ҿыц азы: адиаспора еиднакылоит>>

Нхыҵи-аахыҵи, нырцәи-аарцәи инхо ҳаиашьаратә жәларқәа реигәныҩра, реимадара, русеицура, хымԥада, алҵшәа бзиа аимурц залшом. Жәытә аахыс ишьҭаҵаз ауасхыр аҽахьарӷәӷәо зеиӷьыҟам ауп. Агәыӷра ыҟоуп, аилацәажәарақәа цоит, адунеи аҿы иҟоу аԥсуа-абаза жәлар рхылҵшьҭрақәа ахьынхо атәылақәа зегьы рахь аимадаратә цҳақәа бжьаҵахап ҳәа.

109

Шьади Баӷба: "Мчык исыҵанаҳәон, гәыӷрак сыман Аԥсныҟа сшаауаз"

41
(ирҿыцуп 18:18 11.10.2020)
Шьамтәылантәи зҭоурыхтә ԥсадгьыл иазыхынҳәыз Шьади Баӷба диҿцажәеит ажурналист Сырма Ашәԥҳа.

Сырма Ашәԥҳа, Sputnik

Быжьшықәса раԥхьа Шьамтәылантәи зҭоурыхтә ԥсадгьыл ахь нхара ҳәа ихынҳәыз ҳџьынџьуаа ргәыԥ аҿы дыҟан Шьади Баӷба. Шьади Аԥсныҟа ицны иааит иани иашьеиҵбы Фадии. Шьади Баӷба иӡбахә саҳаит ааигәа, мышқәак раԥхьа Маҷара аҳаблаҿы ҳџьынџьуаа срыҿцәажәарц санырҭаа. Адәаҿы машәыршәа исықәшәаз аԥсшәа засҳәаз Шьади иан лакәзаарын. Бызшәала рацәак ҳанзеилибамкаа лареи сареи, ҳаицәажәара заҳауаз хаҵак иазгәеиҭеит лԥацәа аԥсшәагьы аурысшәагьы шырҳәо, урҭ рыла ҳаибабарц шыҟало. Лԥацәа руаӡәк аус ахьиуаз ансарҳәа, иааигәан, аҽныҵәҟьа дсыԥшааит. Аиаша шәасҳәоит, Шьади аԥсышәала ицәажәара акыр сыхнахит, иагьџьасшьеит.

"Шьамтәылантәи арахь санааз уиаҟара схатәы бызшәала сцәажәартә сыҟамызт, уажәгьы ишысҭаху исзымҳәозаргьы, сызлацәажәо еиҳарак аԥсышәалоуп. Санхәыҷыз сандуи сабдуи (сан лганахьала) еснагь аԥсышәала еицәажәон, исаҳауаз еиҳарак уи абызшәа акәын. Сан Қәышьԥҳауп Муна лыхьӡуп, саб Џьамал ихьӡуп, уажәы иара Германиа дыҟоуп", - абас ҳаиҿцәажәара нхацҳаркит Шьадии сареи.

Шьадии Баӷба Дамаск ақалақь аҿы дынхон Аԥсныҟа даанӡа. Аха иара иабшьҭрагьы ианшьҭрагьы ажәытә иахьынхоз Голантәи аҳаракырақәа рҿы акәын, уаҟа инхоз аԥсуаа аӡәырҩы ыҟан, аҭоурых еиԥхьнарттеит умҳәозар.

"Саб иан дадыгьан, Назира лыхьӡын, Ӷашь лыжәлан. Сабду Маҳмуҭ ихьӡын. Сан лангьы дадыгьан, Садие Сҭашә, сан лаб Салиҳ ихьӡын. Шьамтәыла инхо Абаӷбақәа рхыԥхьаӡара егьмаҷым, Қәышьбақәагьы ҭаацәарақәак нхон", - ихәеит Шьади Баӷба.

Аԥсыуаҵасла иааӡоу, ҟазшьала иҭынчу, зхы-зҿы ачча ақәыхх ицәажәо Шьади иеиҳабацәа рҟынтә иидыруа ажәабжьқәа маҷым. Иара излаиҳәо ала, атәымџьара иизаргьы, ршьа-рда аԥсуа шьа алоуп, уи еицакра зақәлараны иҟам.

"Аиаша шәасҳәоит, аԥсуара ҳзымдыруа ауп ишаҳҵаз. Ишԥа ҳәа шәсазҵаар, аҭакгьы сызшәаҳәом. Избанзар, Анцәа ҳаԥсыуаны ҳаишеит. Ҳанхәыҷыз аахыс аиҳаби аиҵби рҭыԥ ҳдыруан, сасык даҳзааиргьы итәарҭа-игыларҭа шхазыз ҳдыруан, ҳхымҩаԥгара аԥсуа цәа аҟәнызар акәын, даҽакала ҟалашьа амамызт", - ҳәа азгәеиҭоит Шьади Баӷба.

Шьади Баӷба Аԥсныҟа данаауаз 23 шықәса ихыҵуан. Иара Дамаск ақалақь аҟны иреиҳау аҵараиурҭа дҭан, англыз бызшәа аҟәшаҿы аҵара иҵон, убри инаваргыланы егьырҭ абызшәақәагьы дрызҿлымҳан. Ара дахьааизгьы Аԥснытәи Аҳәынҭқарратә университет дҭалеит. Уижьҭеи иԥсҭазаараҟны зҽызыԥсахыз акыр ирацәоуп. Зегьы ирыцкуп игәы каршәны, ихы-игәы дақәгәырӷьо Аԥсны дахьынхо.

"Сара саншьцәа Маҳмуҭи Аҳмеҭи Аԥсны инхоижьҭеи акрааҵуеит. Аибашьра ҟалаанӡа Маҳмуҭ ара дыҟан, Аԥснытәи аҳәынҭқарратә университет аҿы аҵара иҵон, аибашьра аамҭазы иҩызцәа дрывагыланы иԥсадгьыл бџьаршьҭыхла ихьчеит, уи сара акыр сазгәыдууп. Уажәы саншьцәа Пицунда инхоит. Шьамтәыла ҳаныҟаз урҭ рыла иҳаҳауаз ахабарқәа рацәан", - иҳәоит Шьади Баӷба.

Шьади Баӷба иандуи иабдуи Аԥсныҟа изныкымкәа иаахьан, рԥацәа илырхыз аԥсҭазааратә мҩа иазыразын. Шьади иабду араҟа иԥсҭазаара далҵит, Бзыԥ анышә дамадоуп, ианду Шьамтәыла дынхоит.

"Сара Аԥсныҟа сааижьҭеи уажәшьҭа шықәсқәак ҵуеит, абра сизшәа-сааӡазшәа схы збоит. Аразҟы ҳаман ҭаацәала ҳәа сыԥхьаӡоит ҳаԥсадгьыл ахь ахынҳәра ахьаҳқәашьхаз. Аус зуеит аргыларатә наплакаҿы, аҩызцәа сымоуп, аԥсыуак Аԥсны дшынхо еиԥш схы ныҟәызгоит. Мчык еснагь исыҵанаҳәон, гәыӷрак сыман Аԥсныҟа сшаауаз", - ҳәа азгәеиҭоит Шьади Баӷба.

Шьадии сареи ҳаиҿцәажәараҟны иазгәеиҭеит ателехәаԥшратә дырраҭарақәа рыла сшидырыз, Шьамтәыла саныҟазтәи анҵамҭақәа дрылацәажәеит, уи сгәы акыр иахәеит. Шьади Баӷба абызшәақәа рҵара акырӡа ицааиуеит, иидыруа атәым бызшәақәа иреиуоуп: аурысшәа, аҭырқәшәа, англыз бызшәа, араб бызшәа. Аха, зегь реиҳа иԥшӡоуп ҳәа иԥхьаӡоит аԥсшәа.

"Ҳара ҳаҩны - Аԥсноуп, аԥсуароуп абрагь ҳаидызкылаз, иаҳхашҭыр ҟалаӡом, ҳбызшәа ҳдыруазароуп, иаҳҵароуп. Сара издыруаз аԥсшәа аихаҳара лыбзоура ду алоуп Наала Басариаԥҳа, аԥсуа бызшәа арҵараҿы ацхыраара ду ҳалҭеит, ҭабуп ҳәагьы ласҳәоит. 23 шықәса Шьамтәыла сынхон сара, "уара уарабуп" ҳәа аӡәгьы исаимҳәаӡеит, зегьы ирдыруан Кавказаа ҳшырхылҵшьҭраз", - ҳәа азгәеиҭоит Шьади Баӷба.

Шьади Баӷба ижәлантәқәеи иареи еибабалоит, еиҳарак аҳтнықалақь аҿы иҟақәоу роуп иидыруа. Игәы иҭоуп Аҟәа налҵ иашьцәа дырҭаарц, аимадара бзиа рыбжьаларц.

"Изларҳәо ала, ҳара ҳажәлантәқәа Гәбаадәы инхон амҳаџьырра рыхьӡаанӡа. Иҟоуп Ҭырқәтәылаҟа, Нхыҵ-Кавказҟа иагақәаз. Сабду иабду Самсун дыхон, сабду иабгьы Самсун диит, иашьа арантә дҭыҵит, уа дахьнеиз арра дыргеит. Ашьҭахь, Шьамтәылантәи Баӷ ҳәа еиҳабык днеин Ҭырқәтәылантәи Шьамҟа дигеит", - иҳәеит Шьади Баӷба.

Аамҭеиҭасра ҭаха знамҭоз ҳџьынџьуаа изҭашәаз аҭагылазаашьа акыр икыднаҟьеит, тәылак аҟынтә даҽа тәылак ахь ахҵәара, уаҟа ҩаԥхьа анхара-анҵыра уҳәа шаҟа џьамыӷәа цәгьа рхыргазеи? Ҳажәлар агәаӷь ду рызҭоуп, ахыларҟәреи агәкажьреи раҭәам. Уи ус шакәу шьақәнарӷәӷәоит зыԥсадгьыл ахь ихынҳәыз ҳхылҵшьҭрақәа рыгәаӷьра, рычҳара, рҟәыӷара, рхымҩаԥгара.

Шьади Баӷба иакәзар изеиӷьасшьоит аманшәалара игәҭакқәа зегьы рынагӡараҿы. Ҳаиҿцәажәараҿы ишазгәеиҭаз еиԥш, ауаҩы гәыӷрада дзынхом, аԥхьаҟагьы игәыӷрақәа еиҩымжьааит!

41

Ҳақан Гочуа: ҳаиҳабацәа иаҳдырбаз амҩа ҳанызар ҳҭахуп

31
Ҭырқәтәылантәи зыԥсадгьыл аҿы инхо ҳџьынџьуаҩ, ашәуа Ҳақан Гочуа (Ҟочу) иҭоурых ажурналист Сырма Ашәԥҳа ланҵамҭаҿы.

Сырма Ашәԥҳа, Sputnik

Ианармза 20, 1994 шықәса рзы, Ҭырқәтәылантәи раԥхьаӡа акәны Аԥсныҟа иааз ҳџьынџьуаҩ Ҳақан Гочуа иахьа иҭоурыхтә ԥсадгьыл аҿы ихы дахамышшаауа дынхоит. Аԥсны Аџьынџьтәылатә еибашьра аамҭазы Чорум иреиҳау аҵараиурҭа дҭан, анџьныр-механик изаанаҭ ала аҵара иҵон. Иара излаиҳәо ала, Аԥсныҟа аара еснагь игәы иҭан, аха дызлаара амҩа издыруамызт.

"Сҭампыл инхоз Раҳми Ашәба ҳәа хаҵаки сареи ҳаибадырит. Иахәҭаз адокументқәа реиқәыршәаҿы ацхыраара сиҭеит, иара идунеи иԥсаххьеит, џьанаҭ гыларҭас иоуааит. Абасала, Раҳми сареи ҳаицны Аԥсныҟа ҳааит, уижьҭеи сҭаацәа рбаразы сымцозар Ҭырқәтәылаҟа, ара сынхоит", - иҳәеит Ҳақан Гочуа.

Ҳџьынџьуаҩ Ҳақан Гочуа Аԥсныҟа данаа, ҩышықәса ааҵауаны ҿыц иаадыртыз Башаран-коллеџь аҿы ҭырџьманс аусура далагеит, аратәи аԥсҭазаара лассы иҽаиршьцылеит. Усҟан дызхысыз ахҭысқәа иахьа ихәыцраҿы иаанхаз гәалашәарақәоуп.

"Раԥхьа асасааирҭа "Аиҭар" аҿы сынхон, анаҩс Кәыдреҭ Чагьам ҳәа Ҭырқәтәылантәи Аԥсны инхоз сҩыза ааԥхьара сиҭан, хымз сисасын, ҭабуп ҳәагьы иасҳәоит. Ашьҭахь, Алашарбага аҳаблаҿы сҩызцәеи сареи ҳаицынхон. Арҭқәа зегьы зысгәаласыршәо, акырӡа аҵанакуеит гәаартыла, рхы-рҿы ачча ақәыхх ауаа ануԥыло, угәалаҟазаара анышьҭырхуа", - ҳәа азгәеиҭеит Ҳақан, Аԥсныҟа иаара игәаларшәауа.

Ҳақан Аԥснытәи аҳәынҭқарратә университет аҿы иҵара иациҵеит, афилологиатә факультет англыз бызшәа аҟәша далгеит, аҩызцәа ирҳаит, иидыруаз аԥсуа бызшәа акәзар, акыр еихеиҳаит.

"Абар, уажәшьҭа аашықәса инареиҳауп схатә усқәа аартны исымоижьҭеи, амашьынақәа аҳәаанырцәынтәи иаахәан исҭиуеит, иара убас Гагра ауҭраҭыхааӡарҭатә наплакы еиҿкааны исымоуп, схы сахашшаауа сыҟам, изласылшо ала акы саҿуп", - иҳәеит ҳаиҿцәажәараҿы Ҳақан Гочуа.

Ҳақан Гочуа иабацәа урҭ рабацәа рҭоурых аилкаара аҭҵаара бзиа ибоит. Амҳаџьырра ҳауаажәлар зықәнаршәаз аџьамыӷәа цәгьа Ҳақан иабшьҭрагь иркьымсырц залыршамхеит.

"Сабду иабду Аҳмеҭ Гочуа (Ҟочу) Черқьесск, Ҭрамқыҭ ҳәа иахьашьҭаз дынхон. Иара иԥа Сулеиман уа диит, нас амҳаџьырра Ҭырқәтәылаҟа дагеит, уа дҭаацәарахеит, дагьыҿиеит. Амшыннырцәҟа ианнанага, аҭырқәа еиҳабыра нхарҭаҭыԥс иддырбаз аҭыԥ ргәамԥхеит, акырӡа иҳаракыран, ишьхаран, аӡынра цәгьан, иӡбаарраны иҟан. Ашьҭахь, дара рхала иргәаԥханы маҷк илаҟәыраны иалырхыз аҭыԥ рырҭеит, ахьшьцәа рыцырхырааны илбааит", - иҳәеит Ҳақан Гочуа.

© Foto / предоставлено Хаканом Гочуа
Ҭырқәтәыла иҟоу Арасаӡыхь ақыҭа

Иара иабшьҭра анхара нап ахьаларкыз ақыҭа Ҭоқаҭ ақалақь иаҵанакуа Фындыџьақ ақыҭаҿоуп, аԥсышәала ари ақыҭа Арасаӡыхь ахьӡуп. Ақыҭа иаакәыршаны арасақәа ыҟоуп, аӡыхь ыҵхәраа ицоит.

  • Абхазское село Арасадзыхь в Турции
    © Foto / предоставлено Хаканом Гочуа
  • Абхазское село Арасадзыхь в Турции
    © Foto / предоставлено Хаканом Гочуа
  • Абхазское село Арасадзыхь в Турции
    © Foto / предоставлено Хаканом Гочуа
  • Абхазское село Арасадзыхь в Турции
    © Foto / предоставлено Хаканом Гочуа
  • Абхазское село Арасадзыхь в Турции
    © Foto / предоставлено Хаканом Гочуа
1 / 5
© Foto / предоставлено Хаканом Гочуа
Абхазское село Арасадзыхь в Турции

"Арасаӡыхь ҳәа иахьашьҭоу ақыҭаҿы ашәуақәа роуп инхо, 50 ҭӡы инарзынаԥшуа иҟоуп. Сҭампылынтәи машьынала 11-12 сааҭ бжьоуп, Чоруми Сиваси рыбжьара ишьҭоуп ҳара ҳқыҭа. Ҭырқәтәылатәи Арасаӡыхь ақыҭаҟынтә ҳазҭагылоу аамҭазы сара сымала соуп иҟоу Аԥсны. Аибашьра ашьҭахьҵәҟьа иаақәаз ҭаацәарак ыҟан, аха еиуеиԥшым амзызқәа ирхырҟьаны рышьҭахьҟа ихынҳәит", - иҳәеит Ҳақан Гочуа.

Ҭырқәтәылаҟа ихырҵәаз ҳџьынџьуаа аԥсҭазаара уадаҩ иҭагылан, аибашьрақәа, адгьылҵысрақәа, ачымазара бааԥсқәа уҳәа ирхырымгаз акыҟам. Ҳақан иаб иаҭымла дааӡан, дшыхәыҷыз иаб дыԥсхьан (Ҳақан иабду).

"Саб иан Молла Медиҳа дашәыуа ҭыԥҳан, сан лан сан даниз дыԥсит, сан ланду дедыгьан, сангьы аедыгьа бызшәа бзианы илҳәон. Саб иабду Риза ақыҭа деиҳабын, иажәа акрылнадо дыҟан. Ҳаиҳабацәа иаҳдырбаз апатуеиқәҵара ҳаԥсы ахьынӡаҭоу иҳацзар ҳҭахуп", - иҳәеит Ҳақан, аԥсуара аӡбахә дазааҭгыло.

Ҳақан Гочуа излаиԥҳьаӡо ала, аԥсҭазаара уара унапала иурԥшӡароуп, аҭаацәара рыҩнуҵҟаҿы рхатә усқәа дара-дара шалацәажәо еиԥш, аҳәынҭқаррагьы ажәлар рхатәымчқәа рыла рыхшыҩ еилаҵаны иныҟәыргароуп, анаҩс ауп анаԥшцәагьы ҳаҭырла ианҳазныҟәо.

"Ҳҳәынҭқарра иамоу алшарақәа еихаҳҳароуп, уи злашьақәгылоу амахәҭақәа ҳарӷәӷәароуп, азакәанқәа аԥхьа инаргыланы, уи сара сгәаанагароуп. Аҳәаанырцәынтәи иаауа ҳашьцәа гәыла-ԥсыла ирҭахны иаароуп, рылшарақәа ирықәгәыӷуазароуп, аҳәынҭқарра азхаҵгылара рынаҭозаргьы, уи иахьыԥшны имтәароуп, рнапаҟынтә иааиуа ҟарҵароуп. Ҳазегьы ҳҳәоу еиқәшәаны ҳаныҟала, амҩа иаша ҳанымлар залшом", - иҳәеит Ҳақан Гочуа.

Ҳақан Гочуа ихатә харџьала Бзыԥ анхарҭаҩны ааихәахьан, аха иусура аганахьала Аҟәаҟа аара аниҭахха, иааихәахьаз аҩны арепатриациа иаиҭеит, уи ахаҭыԥан Маҷара ҳџьынџьуаа реиланхарҭа аҭыԥ аҿы ауадақәа ирҭеит, еиҭнырыԥсахлеит.

© Foto / предоставлено Сырмой Ашуба
Маҷара ақыҭан ҳџьынџьуаа рзы идыргылаз анхарҭаҩнқәа

Ҳақан Гочуа дҭаацәароуп, иԥшәма Ӷәада ақыҭа деиуоуп, Жьиԥҳауп. Анцәа иҳәааит Ҳақан Гочуа иԥсадгьыл аҿы аизҳара иоуа, игәҭакқәа зегьы нагӡахо!

31

Уахыки-ҽнаки рыла 106-ҩык акоронавирус шрылаз аадырԥшит Аԥсны

14
Аепидемиа иалагеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 4058-ҩык ыҟоуп. Урҭ рахьтә ргәы бзиахеит 2071-ҩык, рыԥсҭазаара иалҵит 36-ҩык.

АҞӘА, жьҭаара 28 - Sputnik. Иҳаҩсыз уахыки-ҽнаки рыла COVID-19 зцәа иалоу реилкааразы атестқәа 458 ҟаҵан, урҭ рахьтә акоронавирус аарԥшын 106 тест рҟны ҳәа аанацҳауеит Ауааԥсыра COVID-19 рацәыхьчаразы аоперативтә штаб.

Абыржәтәи аамҭазы Гәдоуҭатәи араионтә хәышәтәырҭа хадаҿы ишьҭоуп 137-ҩык ауааԥсыра, урҭ рахьтә 118-ҩык акоронавирус адиагноз рзышьақәырӷәӷәоуп, рҭагылазаашьа бааԥсуп 26-ҩык, ибжьаратәуп - 40-ҩык, илҩаауп 15-ҩык апациентцәа. Гәдоуҭатәи агоспиталь иҭашәеит жәҩык ачымазцәа.

Аҟәа асасааирҭа "Аиҭар" ашҭаҿы иаадыртыз амобилтә госпиталь аҟны ишьҭоуп акоронавирус зыдбалоу 51-ҩык апациентцәа. 47-ҩык рҭагылазаашьа бжьаратәуп ҳәа иԥхьаӡоуп, ԥшьҩык рҭагылазаашьа бааԥсуп. Амобилтә госпиталь аҟынтәи илҩаауп быжьҩык.

Ауааԥсыра COVID-19 рацәыхьчаразы аоперативтә штаб ажәлар рахь ааԥхьара ҟанаҵоит ачымазара ҿкы рымкырц азы иахәҭоу аԥҟарақәа зегьы ирықәныҟәаларц.

Акоронавирус иазку ажәабжьқәа зегьы шәрыԥхьар ҟалоит абра>>

14
Атемақәа:
Ачымазара ҿкы – акоронавирус Аԥсни адунеи аҿи: иалкаау