Аҭанур Аҟəысба

Аҭанур Аҟəысба: ҳаԥсадгьыл иахәаша апрограммақәа системак иазааҳгоит

54
(ирҿыцуп 16:51 13.06.2019)
Ҭырқəтəыла еиҿкаау Аԥсуа Федерациа аиҳабы Аҭанур Аҟəысба дазааҭгылоит иара напхгара зиҭо аусбарҭа ҳазҭагылоу аамҭазы изхаҵгыло, аус здыруло азҵаарақəа ртəы.

Сырма Ашәԥҳа, Sputnik

- Мышқəак раԥхьа Ҭырқəтəыла Амшын Еиқəа иаԥну ақалақьқəа рҿы инхоз аԥсуаа рыӡбахə шəаҳаит, хаҭала шəырҭааит. Иабанӡацҵо ари аус иахьазы?

Аҭанур Аҟәысба
© Фото : Пресс-служба Президента Республики Абхазия

- Ааи, Амшын Еиқəа аганахь аныҟəарақəа мҩаԥаҳгеит. Аиԥыларақəеи аилацəажəарақəеи ҳаман, аибадырратə ҟазшьа змаз аизарақəа еиҿкаан. Акыр ҳазҿлымҳан урҭ рлеишəа, рқьабз, рбызшəа ахьынӡардыруа, иахьынӡамҩаԥыргауа. Убарҭ рызегьы аус рыдаҳулеит, иҭаҳҵааит. Анаҩс, офицалла еиҿыркааит ахеидкылақəа, иааиуа ԥхынгəымзазы ҩаԥхьа ҳарҭаауеит, ҳаибабоит, аԥхьаҟатəи аусқəа ҳəаақəаҳҵоит, реиҿкаарақəа ҳфедерациа иаҵанакуа иҟаҳҵоит, убас еиԥш апрограмма еиҿкааны иҳамоуп, излауа ала ҳақəныҟəоит.

- Мраҭашəара аган иқəынхо ҳауаажəлар рҭагылазаашьа зеиԥшрои, еидызкыло аиҿкаарақəа рымоума?

- Мраҭашəара аганахьала Ҭырқəтəыла иҟоу ақалақьқəа рҿы аиԥыларақəа ҳамоуп. Мышқəак рнаҩс уахь ҳцараны ҳаҟоуп. Уаҟагьы еиҿаҳкаараны иҟоу ахеидкылақəа азгəаҭаны иҳамоуп. Уахь иқəынхо ҳауаажəлар реидкыларазы уи акыр ицхыраагӡахоит. Мызқəак рыла урҭ аиҿкаарақəа шьақəҳарӷəӷəоит ҳəа агəаанагара сымоуп.

- Ааигəа, иара убас, Нхыҵ-Кавказтəи ҳаиашьаратə жəларқəа шəырҭааит, аицəажəарақəа, аиқəшаҳаҭрақəа мҩаԥыжəгеит, рылҵшəа зеиԥшрои?

- Ҳашьцəеи ҳареи акыр гəаартыла ҳаицəажəеит, реиҿкаарақəеи ҳареи аусеицуразы аиқәшаҳаҭрақəа ҳабжьаҳҵеит, зегь раԥхьаӡа иргыланы ҳаимадара аусқəа зырӷəӷəо. Ҭырқəтəыла иҟоу ҳдиаспора, уа инхо ҳашьцəа ашəуақəа реимадара ацҵаразы иарбан цхыраароу иҟаҵатəу аусқəа еиҳа инарҭбааны ҳарзааҭгылеит. Уахь дҳацын Ҭырқəтəыла иҟоу Аԥсны ахаҭарнак Вадим Ҳаразиа. Уаҟа еиҿкаау аԥсуаа ашəуаа рфондқəа рыла аимадарақəа ирызку аиқəшаҳаҭрақəа ҳабжьаҳҵеит. Ҭырқəтəыла иқəынхо ҳашьцəа рахьтə иҟоуп ашəуа диалект зҳəо, ашьхаруа диалект зҳəо, рхатəы бызшəа ахьчаразы арҵаҩцəа рыԥшаара акəзааит, акурсқəа реиҿкаара акəзааит, ҳарҭгьы ара иҳалшо ала, еиҳарак ашьхарыуа ҳашьцəа ахьынхо ҳхеидкылақəа ахьеиҿкаау абызшəазы имҩаԥыргараны иҟоу акурсқəа рымҩаԥгара ҳацхраауеит. Наҟ-ааҟгьы ҳнапаҟынтə иааиуа аусқəа ҟаҳҵароуп. Аиԥыларақəа алҵшəа бзиақəа аарышьҭып ҳəа сгəы иаанагоит аԥхьаҟагьы.

- Ҳџьынџьуаа рҭоурыхтə ԥсадгьыл ахь рырхынҳəразы агəҭак ҿыцқəа, ауснагӡатəқəа шəнапы злаку арбақəан?

- Ауниверситет аҿы аҵарадырра зауа аҿар налакны апрограмма аус адулара ҳҭахуп. Арепатриациеи ҳареи ҳаилахəны аус ԥхьаҟа ишымҩақəаҳҵаша, Ҭырқəтəыла аганахьала уанахəаԥшлак, иамаҭəахəхаша азнеишьақəа нарбаны аус еиҿаҳкаароуп. Атəанчара ашҟа ицақəаз рзы программак, ақыҭанхамҩа аус иазку азы даҽа программак, абизнес аганахьала, ауниверситет аҿы аҵара зҭаху, уа инеиуа рзы даҽа программак, алшара змоу анхара аазхəартə еиԥш иҟоу рзы даҽа программак зҳəазеиԥш еихшаны иҭаҳҵаауеит, аус адаҳулоит. Ҳаԥхьаҟазы аус здаҳулаша мҩак, системак азхəыцра ҳаҿуп, еиқəыршəаны ҳҳəынҭқаррахь ишьҭны, урҭ ргəаанагарқəа азгəаҭаны, уск алаҳхырц агəаҳəара ҳамоуп. Мызқəак ирылагӡаны иҳархиап ҳəа агəыӷра сымоуп.

- Имҩаԥысраны иҟоу Аԥсны Аҳəынҭқарра Ахада иалхрақəа рзы шəгəаанагара?

- Уи азҵаара акыр ҳалацəажəоит, иахьымҩаԥаҳгаша, иахьеиҿаҳкааша азҵаарақəа ҳарзааҭгылоит. Аԥсуа тəылауаҩшəҟəы ҿыцқəа змоу роуп зыбжьы зҭиуа. Ара, Ҭырқəтəыла Аԥсны атəылауаҩшəҟəы змоу, аха аҿыц ҟазымҵац рхыԥхьаӡара иаамаҷумшьартəы аҟара ирацəоуп. Урҭ рыбжьы рҭиироуп ҳəа агəаанагара ҳамоуп. Иахьырыԥсахуа аҭыԥ ҳамаӡам, Аԥсны ацара-аара зегьы ирылшартə иҟаӡам, ахаҭарнакраҿы урҭ аршаҳаҭгақəа, атəылауаҩшəҟəқəа рыԥсахыртə алшара рымаӡам, убри азы аҳəарақəа ҳамоуп. Апаспорт имамкəа, ажəытəтəи аиаҵəа тəылауаҩшəҟəы змоу, аҳəаанырцəтəи апаспортқəа змақəоу ыҟоуп, абжьыҭираҿы атəылауаҩшəҟəы змоу рызегьы рыхəҭаа, ирҳақу ныҟəыргар ҳҭахуп убри аганахьала. Ааԥхьара ҟаҳҵеит ашəҟəы ианҵаны, Аԥсны Жəлар Реизара ашҟа инаҳашьҭит, иахьынӡалшо ала ҳауаажəлар ирызхəыцыр ҳҭахуп, уи адагьы алхрақəа ҟаҳҵашт, убри аус адаҳулоит. Ишыжəбо еиԥш, ҳусқəа рацəоуп.  Ҳамчи, ҳахшыҩи, ҳдыррақəеи еилаҵаны акы ҳазкылсроуп.

54

Шьади Баӷба: "Мчык исыҵанаҳәон, гәыӷрак сыман Аԥсныҟа сшаауаз"

40
(ирҿыцуп 18:18 11.10.2020)
Шьамтәылантәи зҭоурыхтә ԥсадгьыл иазыхынҳәыз Шьади Баӷба диҿцажәеит ажурналист Сырма Ашәԥҳа.

Сырма Ашәԥҳа, Sputnik

Быжьшықәса раԥхьа Шьамтәылантәи зҭоурыхтә ԥсадгьыл ахь нхара ҳәа ихынҳәыз ҳџьынџьуаа ргәыԥ аҿы дыҟан Шьади Баӷба. Шьади Аԥсныҟа ицны иааит иани иашьеиҵбы Фадии. Шьади Баӷба иӡбахә саҳаит ааигәа, мышқәак раԥхьа Маҷара аҳаблаҿы ҳџьынџьуаа срыҿцәажәарц санырҭаа. Адәаҿы машәыршәа исықәшәаз аԥсшәа засҳәаз Шьади иан лакәзаарын. Бызшәала рацәак ҳанзеилибамкаа лареи сареи, ҳаицәажәара заҳауаз хаҵак иазгәеиҭеит лԥацәа аԥсшәагьы аурысшәагьы шырҳәо, урҭ рыла ҳаибабарц шыҟало. Лԥацәа руаӡәк аус ахьиуаз ансарҳәа, иааигәан, аҽныҵәҟьа дсыԥшааит. Аиаша шәасҳәоит, Шьади аԥсышәала ицәажәара акыр сыхнахит, иагьџьасшьеит.

"Шьамтәылантәи арахь санааз уиаҟара схатәы бызшәала сцәажәартә сыҟамызт, уажәгьы ишысҭаху исзымҳәозаргьы, сызлацәажәо еиҳарак аԥсышәалоуп. Санхәыҷыз сандуи сабдуи (сан лганахьала) еснагь аԥсышәала еицәажәон, исаҳауаз еиҳарак уи абызшәа акәын. Сан Қәышьԥҳауп Муна лыхьӡуп, саб Џьамал ихьӡуп, уажәы иара Германиа дыҟоуп", - абас ҳаиҿцәажәара нхацҳаркит Шьадии сареи.

Шьадии Баӷба Дамаск ақалақь аҿы дынхон Аԥсныҟа даанӡа. Аха иара иабшьҭрагьы ианшьҭрагьы ажәытә иахьынхоз Голантәи аҳаракырақәа рҿы акәын, уаҟа инхоз аԥсуаа аӡәырҩы ыҟан, аҭоурых еиԥхьнарттеит умҳәозар.

"Саб иан дадыгьан, Назира лыхьӡын, Ӷашь лыжәлан. Сабду Маҳмуҭ ихьӡын. Сан лангьы дадыгьан, Садие Сҭашә, сан лаб Салиҳ ихьӡын. Шьамтәыла инхо Абаӷбақәа рхыԥхьаӡара егьмаҷым, Қәышьбақәагьы ҭаацәарақәак нхон", - ихәеит Шьади Баӷба.

Аԥсыуаҵасла иааӡоу, ҟазшьала иҭынчу, зхы-зҿы ачча ақәыхх ицәажәо Шьади иеиҳабацәа рҟынтә иидыруа ажәабжьқәа маҷым. Иара излаиҳәо ала, атәымџьара иизаргьы, ршьа-рда аԥсуа шьа алоуп, уи еицакра зақәлараны иҟам.

"Аиаша шәасҳәоит, аԥсуара ҳзымдыруа ауп ишаҳҵаз. Ишԥа ҳәа шәсазҵаар, аҭакгьы сызшәаҳәом. Избанзар, Анцәа ҳаԥсыуаны ҳаишеит. Ҳанхәыҷыз аахыс аиҳаби аиҵби рҭыԥ ҳдыруан, сасык даҳзааиргьы итәарҭа-игыларҭа шхазыз ҳдыруан, ҳхымҩаԥгара аԥсуа цәа аҟәнызар акәын, даҽакала ҟалашьа амамызт", - ҳәа азгәеиҭоит Шьади Баӷба.

Шьади Баӷба Аԥсныҟа данаауаз 23 шықәса ихыҵуан. Иара Дамаск ақалақь аҟны иреиҳау аҵараиурҭа дҭан, англыз бызшәа аҟәшаҿы аҵара иҵон, убри инаваргыланы егьырҭ абызшәақәагьы дрызҿлымҳан. Ара дахьааизгьы Аԥснытәи Аҳәынҭқарратә университет дҭалеит. Уижьҭеи иԥсҭазаараҟны зҽызыԥсахыз акыр ирацәоуп. Зегьы ирыцкуп игәы каршәны, ихы-игәы дақәгәырӷьо Аԥсны дахьынхо.

"Сара саншьцәа Маҳмуҭи Аҳмеҭи Аԥсны инхоижьҭеи акрааҵуеит. Аибашьра ҟалаанӡа Маҳмуҭ ара дыҟан, Аԥснытәи аҳәынҭқарратә университет аҿы аҵара иҵон, аибашьра аамҭазы иҩызцәа дрывагыланы иԥсадгьыл бџьаршьҭыхла ихьчеит, уи сара акыр сазгәыдууп. Уажәы саншьцәа Пицунда инхоит. Шьамтәыла ҳаныҟаз урҭ рыла иҳаҳауаз ахабарқәа рацәан", - иҳәоит Шьади Баӷба.

Шьади Баӷба иандуи иабдуи Аԥсныҟа изныкымкәа иаахьан, рԥацәа илырхыз аԥсҭазааратә мҩа иазыразын. Шьади иабду араҟа иԥсҭазаара далҵит, Бзыԥ анышә дамадоуп, ианду Шьамтәыла дынхоит.

"Сара Аԥсныҟа сааижьҭеи уажәшьҭа шықәсқәак ҵуеит, абра сизшәа-сааӡазшәа схы збоит. Аразҟы ҳаман ҭаацәала ҳәа сыԥхьаӡоит ҳаԥсадгьыл ахь ахынҳәра ахьаҳқәашьхаз. Аус зуеит аргыларатә наплакаҿы, аҩызцәа сымоуп, аԥсыуак Аԥсны дшынхо еиԥш схы ныҟәызгоит. Мчык еснагь исыҵанаҳәон, гәыӷрак сыман Аԥсныҟа сшаауаз", - ҳәа азгәеиҭоит Шьади Баӷба.

Шьадии сареи ҳаиҿцәажәараҟны иазгәеиҭеит ателехәаԥшратә дырраҭарақәа рыла сшидырыз, Шьамтәыла саныҟазтәи анҵамҭақәа дрылацәажәеит, уи сгәы акыр иахәеит. Шьади Баӷба абызшәақәа рҵара акырӡа ицааиуеит, иидыруа атәым бызшәақәа иреиуоуп: аурысшәа, аҭырқәшәа, англыз бызшәа, араб бызшәа. Аха, зегь реиҳа иԥшӡоуп ҳәа иԥхьаӡоит аԥсшәа.

"Ҳара ҳаҩны - Аԥсноуп, аԥсуароуп абрагь ҳаидызкылаз, иаҳхашҭыр ҟалаӡом, ҳбызшәа ҳдыруазароуп, иаҳҵароуп. Сара издыруаз аԥсшәа аихаҳара лыбзоура ду алоуп Наала Басариаԥҳа, аԥсуа бызшәа арҵараҿы ацхыраара ду ҳалҭеит, ҭабуп ҳәагьы ласҳәоит. 23 шықәса Шьамтәыла сынхон сара, "уара уарабуп" ҳәа аӡәгьы исаимҳәаӡеит, зегьы ирдыруан Кавказаа ҳшырхылҵшьҭраз", - ҳәа азгәеиҭоит Шьади Баӷба.

Шьади Баӷба ижәлантәқәеи иареи еибабалоит, еиҳарак аҳтнықалақь аҿы иҟақәоу роуп иидыруа. Игәы иҭоуп Аҟәа налҵ иашьцәа дырҭаарц, аимадара бзиа рыбжьаларц.

"Изларҳәо ала, ҳара ҳажәлантәқәа Гәбаадәы инхон амҳаџьырра рыхьӡаанӡа. Иҟоуп Ҭырқәтәылаҟа, Нхыҵ-Кавказҟа иагақәаз. Сабду иабду Самсун дыхон, сабду иабгьы Самсун диит, иашьа арантә дҭыҵит, уа дахьнеиз арра дыргеит. Ашьҭахь, Шьамтәылантәи Баӷ ҳәа еиҳабык днеин Ҭырқәтәылантәи Шьамҟа дигеит", - иҳәеит Шьади Баӷба.

Аамҭеиҭасра ҭаха знамҭоз ҳџьынџьуаа изҭашәаз аҭагылазаашьа акыр икыднаҟьеит, тәылак аҟынтә даҽа тәылак ахь ахҵәара, уаҟа ҩаԥхьа анхара-анҵыра уҳәа шаҟа џьамыӷәа цәгьа рхыргазеи? Ҳажәлар агәаӷь ду рызҭоуп, ахыларҟәреи агәкажьреи раҭәам. Уи ус шакәу шьақәнарӷәӷәоит зыԥсадгьыл ахь ихынҳәыз ҳхылҵшьҭрақәа рыгәаӷьра, рычҳара, рҟәыӷара, рхымҩаԥгара.

Шьади Баӷба иакәзар изеиӷьасшьоит аманшәалара игәҭакқәа зегьы рынагӡараҿы. Ҳаиҿцәажәараҿы ишазгәеиҭаз еиԥш, ауаҩы гәыӷрада дзынхом, аԥхьаҟагьы игәыӷрақәа еиҩымжьааит!

40

Ҳақан Гочуа: ҳаиҳабацәа иаҳдырбаз амҩа ҳанызар ҳҭахуп

29
Ҭырқәтәылантәи зыԥсадгьыл аҿы инхо ҳџьынџьуаҩ, ашәуа Ҳақан Гочуа (Ҟочу) иҭоурых ажурналист Сырма Ашәԥҳа ланҵамҭаҿы.

Сырма Ашәԥҳа, Sputnik

Ианармза 20, 1994 шықәса рзы, Ҭырқәтәылантәи раԥхьаӡа акәны Аԥсныҟа иааз ҳџьынџьуаҩ Ҳақан Гочуа иахьа иҭоурыхтә ԥсадгьыл аҿы ихы дахамышшаауа дынхоит. Аԥсны Аџьынџьтәылатә еибашьра аамҭазы Чорум иреиҳау аҵараиурҭа дҭан, анџьныр-механик изаанаҭ ала аҵара иҵон. Иара излаиҳәо ала, Аԥсныҟа аара еснагь игәы иҭан, аха дызлаара амҩа издыруамызт.

"Сҭампыл инхоз Раҳми Ашәба ҳәа хаҵаки сареи ҳаибадырит. Иахәҭаз адокументқәа реиқәыршәаҿы ацхыраара сиҭеит, иара идунеи иԥсаххьеит, џьанаҭ гыларҭас иоуааит. Абасала, Раҳми сареи ҳаицны Аԥсныҟа ҳааит, уижьҭеи сҭаацәа рбаразы сымцозар Ҭырқәтәылаҟа, ара сынхоит", - иҳәеит Ҳақан Гочуа.

Ҳџьынџьуаҩ Ҳақан Гочуа Аԥсныҟа данаа, ҩышықәса ааҵауаны ҿыц иаадыртыз Башаран-коллеџь аҿы ҭырџьманс аусура далагеит, аратәи аԥсҭазаара лассы иҽаиршьцылеит. Усҟан дызхысыз ахҭысқәа иахьа ихәыцраҿы иаанхаз гәалашәарақәоуп.

"Раԥхьа асасааирҭа "Аиҭар" аҿы сынхон, анаҩс Кәыдреҭ Чагьам ҳәа Ҭырқәтәылантәи Аԥсны инхоз сҩыза ааԥхьара сиҭан, хымз сисасын, ҭабуп ҳәагьы иасҳәоит. Ашьҭахь, Алашарбага аҳаблаҿы сҩызцәеи сареи ҳаицынхон. Арҭқәа зегьы зысгәаласыршәо, акырӡа аҵанакуеит гәаартыла, рхы-рҿы ачча ақәыхх ауаа ануԥыло, угәалаҟазаара анышьҭырхуа", - ҳәа азгәеиҭеит Ҳақан, Аԥсныҟа иаара игәаларшәауа.

Ҳақан Аԥснытәи аҳәынҭқарратә университет аҿы иҵара иациҵеит, афилологиатә факультет англыз бызшәа аҟәша далгеит, аҩызцәа ирҳаит, иидыруаз аԥсуа бызшәа акәзар, акыр еихеиҳаит.

"Абар, уажәшьҭа аашықәса инареиҳауп схатә усқәа аартны исымоижьҭеи, амашьынақәа аҳәаанырцәынтәи иаахәан исҭиуеит, иара убас Гагра ауҭраҭыхааӡарҭатә наплакы еиҿкааны исымоуп, схы сахашшаауа сыҟам, изласылшо ала акы саҿуп", - иҳәеит ҳаиҿцәажәараҿы Ҳақан Гочуа.

Ҳақан Гочуа иабацәа урҭ рабацәа рҭоурых аилкаара аҭҵаара бзиа ибоит. Амҳаџьырра ҳауаажәлар зықәнаршәаз аџьамыӷәа цәгьа Ҳақан иабшьҭрагь иркьымсырц залыршамхеит.

"Сабду иабду Аҳмеҭ Гочуа (Ҟочу) Черқьесск, Ҭрамқыҭ ҳәа иахьашьҭаз дынхон. Иара иԥа Сулеиман уа диит, нас амҳаџьырра Ҭырқәтәылаҟа дагеит, уа дҭаацәарахеит, дагьыҿиеит. Амшыннырцәҟа ианнанага, аҭырқәа еиҳабыра нхарҭаҭыԥс иддырбаз аҭыԥ ргәамԥхеит, акырӡа иҳаракыран, ишьхаран, аӡынра цәгьан, иӡбаарраны иҟан. Ашьҭахь, дара рхала иргәаԥханы маҷк илаҟәыраны иалырхыз аҭыԥ рырҭеит, ахьшьцәа рыцырхырааны илбааит", - иҳәеит Ҳақан Гочуа.

© Foto / предоставлено Хаканом Гочуа
Ҭырқәтәыла иҟоу Арасаӡыхь ақыҭа

Иара иабшьҭра анхара нап ахьаларкыз ақыҭа Ҭоқаҭ ақалақь иаҵанакуа Фындыџьақ ақыҭаҿоуп, аԥсышәала ари ақыҭа Арасаӡыхь ахьӡуп. Ақыҭа иаакәыршаны арасақәа ыҟоуп, аӡыхь ыҵхәраа ицоит.

  • Абхазское село Арасадзыхь в Турции
    © Foto / предоставлено Хаканом Гочуа
  • Абхазское село Арасадзыхь в Турции
    © Foto / предоставлено Хаканом Гочуа
  • Абхазское село Арасадзыхь в Турции
    © Foto / предоставлено Хаканом Гочуа
  • Абхазское село Арасадзыхь в Турции
    © Foto / предоставлено Хаканом Гочуа
  • Абхазское село Арасадзыхь в Турции
    © Foto / предоставлено Хаканом Гочуа
1 / 5
© Foto / предоставлено Хаканом Гочуа
Абхазское село Арасадзыхь в Турции

"Арасаӡыхь ҳәа иахьашьҭоу ақыҭаҿы ашәуақәа роуп инхо, 50 ҭӡы инарзынаԥшуа иҟоуп. Сҭампылынтәи машьынала 11-12 сааҭ бжьоуп, Чоруми Сиваси рыбжьара ишьҭоуп ҳара ҳқыҭа. Ҭырқәтәылатәи Арасаӡыхь ақыҭаҟынтә ҳазҭагылоу аамҭазы сара сымала соуп иҟоу Аԥсны. Аибашьра ашьҭахьҵәҟьа иаақәаз ҭаацәарак ыҟан, аха еиуеиԥшым амзызқәа ирхырҟьаны рышьҭахьҟа ихынҳәит", - иҳәеит Ҳақан Гочуа.

Ҭырқәтәылаҟа ихырҵәаз ҳџьынџьуаа аԥсҭазаара уадаҩ иҭагылан, аибашьрақәа, адгьылҵысрақәа, ачымазара бааԥсқәа уҳәа ирхырымгаз акыҟам. Ҳақан иаб иаҭымла дааӡан, дшыхәыҷыз иаб дыԥсхьан (Ҳақан иабду).

"Саб иан Молла Медиҳа дашәыуа ҭыԥҳан, сан лан сан даниз дыԥсит, сан ланду дедыгьан, сангьы аедыгьа бызшәа бзианы илҳәон. Саб иабду Риза ақыҭа деиҳабын, иажәа акрылнадо дыҟан. Ҳаиҳабацәа иаҳдырбаз апатуеиқәҵара ҳаԥсы ахьынӡаҭоу иҳацзар ҳҭахуп", - иҳәеит Ҳақан, аԥсуара аӡбахә дазааҭгыло.

Ҳақан Гочуа излаиԥҳьаӡо ала, аԥсҭазаара уара унапала иурԥшӡароуп, аҭаацәара рыҩнуҵҟаҿы рхатә усқәа дара-дара шалацәажәо еиԥш, аҳәынҭқаррагьы ажәлар рхатәымчқәа рыла рыхшыҩ еилаҵаны иныҟәыргароуп, анаҩс ауп анаԥшцәагьы ҳаҭырла ианҳазныҟәо.

"Ҳҳәынҭқарра иамоу алшарақәа еихаҳҳароуп, уи злашьақәгылоу амахәҭақәа ҳарӷәӷәароуп, азакәанқәа аԥхьа инаргыланы, уи сара сгәаанагароуп. Аҳәаанырцәынтәи иаауа ҳашьцәа гәыла-ԥсыла ирҭахны иаароуп, рылшарақәа ирықәгәыӷуазароуп, аҳәынҭқарра азхаҵгылара рынаҭозаргьы, уи иахьыԥшны имтәароуп, рнапаҟынтә иааиуа ҟарҵароуп. Ҳазегьы ҳҳәоу еиқәшәаны ҳаныҟала, амҩа иаша ҳанымлар залшом", - иҳәеит Ҳақан Гочуа.

Ҳақан Гочуа ихатә харџьала Бзыԥ анхарҭаҩны ааихәахьан, аха иусура аганахьала Аҟәаҟа аара аниҭахха, иааихәахьаз аҩны арепатриациа иаиҭеит, уи ахаҭыԥан Маҷара ҳџьынџьуаа реиланхарҭа аҭыԥ аҿы ауадақәа ирҭеит, еиҭнырыԥсахлеит.

© Foto / предоставлено Сырмой Ашуба
Маҷара ақыҭан ҳџьынџьуаа рзы идыргылаз анхарҭаҩнқәа

Ҳақан Гочуа дҭаацәароуп, иԥшәма Ӷәада ақыҭа деиуоуп, Жьиԥҳауп. Анцәа иҳәааит Ҳақан Гочуа иԥсадгьыл аҿы аизҳара иоуа, игәҭакқәа зегьы нагӡахо!

29

COVID-19 Аԥсны: 172-ҩык аҿкы рыдырбалеит, ҩыџьа рыԥсҭазаара иалҵит

8
(ирҿыцуп 23:22 25.10.2020)
Аепидемиа иалагеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 3739-ҩык ыҟоуп. Урҭ рахьтә ргәы бзиахеит 1462ҩык, рыԥсҭазаара иалҵит 35-ҩык.

АҞӘА, жьҭаара 25 - Sputnik. Иҳаҩсыз уахыки-ҽнаки рыла COVID-19 зцәа иалоу реилкааразы атестқәа 480 ҟаҵан, урҭ рахьтә акоронавирус аарԥшын 172 тест рҟны ҳәа аанацҳауеит Ауааԥсыра COVID-19 рацәыхьчаразы аоперативтә штаб.

Аоперштаб иара убас иаанацҳаит жьҭаара 25 рзы Гәдоуҭатәи агоспиталь аҿы рыԥсҭазаара ишалҵыз ҩыџьа апациентцәа.

1944 шықәсазы ииз апациент, иара ареанимациа аҟәша дҭашәеит цәыббрамза 28 рзы иԥсыԥ лагаҩагара акыр ицәыцәгьаны, ҩганктәи агәыҵәкра иманы.  Иақәнагаз атерапиа шизымҩаԥыргозгьы, жьҭаара 25 рзы иԥсҭазаара далҵит.

1939 шықәсазы ииз ахаҵа, иара ареанимациа аҟәша дҭашәеит жьҭаара 20 рзы рзы иԥсыԥ лагаҩагара акыр ицәыцәгьаны, ҩганктәи агәыҵәкра иманы.  Иақәнагаз атерапиа шизымҩаԥыргозгьы, жьҭаара 24 рзы иԥсҭазаара далҵит.

Абыржәтәи аамҭазы Гәдоуҭатәи араионтә хәышәтәырҭа хадаҿы ишьҭоуп 148-ҩык ауааԥсыра, урҭ рахьтә 141-ҩык акоронавирус адиагноз рзышьақәырӷәӷәоуп, рҭагылазаашьа бааԥсуп 27-ҩык, ибжьаратәуп - 51-ҩык, илҩаауп 8-ҩык апациентцәа. Гәдоуҭатәи агоспиталь иҭашәеит жәҩык ачымазцәа.

Аҟәа асасааирҭа "Аиҭар" ашҭаҿы иаадыртыз амобилтә госпиталь аҟны ишьҭоуп акоронавирус зыдбалоу 42-ҩык апациентцәа. 39-ҩык рҭагылазаашьа бжьаратәуп ҳәа иԥхьаӡоуп, хҩык рҭагылазаашьа бааԥсуп.

Ауааԥсыра COVID-19 рацәыхьчаразы аоперативтә штаб ажәлар рахь ааԥхьара ҟанаҵоит ачымазара ҿкы рымкырц азы иахәҭоу аԥҟарақәа зегьы ирықәныҟәаларц.

Акоронавирус иазку ажәабжьқәа зегьы шәрыԥхьар ҟалоит абра>>

8
Атемақәа:
Ачымазара ҿкы – акоронавирус Аԥсни адунеи аҿи: иалкаау