Омар Хагəышь: Аԥсныҟа саара илабҿабахаз аԥхыӡ исзаҩызахеит

131
(ирҿыцуп 20:12 08.06.2020)
Быжьшықəса зыԥсадгьыл аҿы инхо, Шьамтəылантəи Аԥсныҟа иааз ҳџьынџьуаҩ Омар Хагəышь иҭоурых дазааҭгылоит Сырма Ашәԥҳа.

Сырма Ашәԥҳа, Sputnik

2013 шықəса рзы Шьамтəылантəи зҭоурыхтə ԥсадгьыл ахь нхара ҳəа иааз ҳџьынџьуаҩ Омар Хагəышь 20 шықəса ихыҵуан иабдуцəа рыдгьыл ишьапы анықəиргыла. Уижьҭеи иҵит быжьшықəса, акыр аҽаҧсахит Омар идунеихəаԥшышьа, иара убас иԥсҭазааратə мҩа. Омар Хагəышь диит Шьамтəыла аҳҭнықалақь Дамаск, анаҩс шықəсқəак ааҵуаны ҭаацəала нхара ииасит Голлантəи аҳаракырақəа рахь, ианшьцəа рқыҭахь - Мударие. Мударие ақыҭаҿы инхо еиҳарак адыгьақəоуп, иҟоуп ирыланхо аԥсуаагьы. Иааидкыланы иуҳəозар, уи ақыҭаҿы инхо ҳџьынџьуаа шəы-ҭӡык инарзынаԥшуеит.

"Сара сан дадыгьоуп, Шорох лыжəлоуп. Сан лбызшəа саргьы ицəгьамкəа исҳəоит. Аԥсныҟа сааижьҭеи, хымԥада схатəы бызшəа аҵара сазҿлымҳауп, ибзианы еилыскаауеит, атəым бызшəақəа рылагьы сцəажəоит, иаҳҳəозар: араб, англыз, аурыс бызшəақəа уҳəа. Аха, ухатəы бызшəа даҽа гьамак амоуп, иссиру ашьҭыбжьқəа ахылҵуеит, уи уара иуциз ауп. Аха, сара саниҵəҟьаз слымҳа иҭамсыз бызшəахеит, Анцəа иџьшьаны, алшара соуит сбызшəа ахьиз, аԥсы ахьҭоу стəылахь аара",- абас ҳаицəажəара хацҳаркит Омар Хагəышьи сареи.

Омар Хагəышь Аԥсныҟа данаауаз Шьамтəылантəи еицааз агəыԥ иалаз рхыԥхьаӡара маҷмызт, 150-ҩык рҟынӡа инаӡон. Усҟан арахь еицааит Омар иҭаацəеи иареи, иан Римма, иаб Муҳаммад, иашьеиҵбы Муаз. Иаҳəшьа Тулин лакəзар - дҭаацəароуп, Ҟабарда-Балкариа дынхоит. Омар Хагəышь дазыгəдууны еиҭеиҳəон Аԥсны аӡбахə, араҟа рынхара-рынҵыра шышьақəгылоу атəы.

"Шьамтəылантəи ҳанаа бжьымзы инарзынаԥшуа Гəдоуҭа асасааирҭаҿы ҳанхон еицааз зегьы. Анаҩс, араҟатəи аԥсҭазаара ҳҽаҳаршьцыло ҳалагеит, аиаша шəасҳəоит, зныкгьы схы сахашшаауа сҟамлац уижьҭеи. Ужəлар бзиа иубар, даргьы ҽакала иузыҟалаӡом. Убриаҟара гəыблыла иаҳԥылеит, ҳрыдыркылеит ҳашьцəа аԥсуаа, еиҭаҳəашьа сзаҭом. Сара занааҭла сфилолагуп, сҵара ахыркəшара смаӡацкəа ауп Аԥсныҟа сшааз, аҩбатəи акурс аҿы стəан. Иарбан усзаалак схы ансырнаалоит, исыцааиуазшəа збар сызҿу аус, исҭахны исыдыскылоит",-дҳацəажəон Омар Хагəышь.

Омар Ҳагəышь иахьа аус иуеит Аԥснытəи аҳəынҭқарратə телерадиоеилахəыраҿы, анџьныр-техник изаанаҭ ала. Ари аусхк дадзыԥхьалаз, насгьы ишицааиуа атəы ҳаилиркааит ҳаиҿцəажəараҟны.

"Аԥсуа телерадиоеилахəыраҿы аус иуан Шьамтəылантəи иааз сҩыза Саер Ҳаџьыберзеқь. Иара исеиҳəеит ателехəаԥшраҿы анџьныр дшырҭахыз, аҭыԥ шыҟоу. Саргьы иажəа ҩбамтəкəа ателахəаԥшра анапхгара рышҟа снеит, ргəы иахəеит Шьамтəылантəи сахьааз, араҟа сахьынхо, алшара сырҭеит схы ԥысшəарц, аусура салагарц. Уижьҭеи иҵит хышықəса, Аԥсуа телехəаҧшра астудиаҿы анџьныр изаанаҭ ала аус суеижьҭеи. Даара сара сзы аинтерес аҵоуп снапы злаку аус, аҭыхрақəа реиҿкаашьа, реиқəыршəашьа, амонтаж аус адулашьа уҳəа, сара сзы иҿыцу аартрақəа рацəахеит", - иҳəеит Омар Хагəышь.

  • Омар Хагәышь иусураҿы
    © Foto / предоставлено Омаром Хагуш
  • Омар Хагәышь иусураҿы
    © Foto / предоставлено Омаром Хагуш
  • Омар Хагәышь иусураҿы
    © Foto / предоставлено Омаром Хагуш
1 / 3
© Foto / предоставлено Омаром Хагуш
Омар Хагәышь иусураҿы

Омар Хагəышь иазгəеиҭеит, аус ахьиуа арҿиаратə еилазаара даара пату-ҳаҭырла ишизыҟоу, аҩызцəа ширҳаз, иаамҭа гəахəала ишихиго.

"Сусура уажəшьҭа сара сыԥсҭазаара иахəҭакны иҟалеит. Аус зцызуа зегьы сара сзы ҭаацəарак еиднакыло реиԥш сырзыҟоуп, ҳаизыҟазаашьақəа бзиоуп. Аусураҿы аҳəоуеиқəшəара зегьы ирыцкуп, нас уус алҵшəа маиурц залшом", - иҳəеит Омар Хагəышь.

Омар Хагəышь Аԥсны аҭоурых дазҿлымҳауп, ахҵəара ду иақəшəаз ҳаауажəлар рлахьынҵа Омар иабашьҭрагьы зацəымцеит. Акыр икыднаҟьеит изықəшəаз аҭагылазаашьа, аха рхы андырнаалар акəхеит.

"Сара сгəы иалоуп сабашьҭра ирхыргаз аҭоурых ииашаҵəҟьаны ишьақəыргыланы иахьыҟам. Сеиҳабацəа изларҳəо ала, Хагəышьаа Калдахəарантə ахҵəара иақəшəаз роуп. Ишəымбои, аамҭа шаҟа хҭыс цəырнаго? Иахьа, сашьцəа Хагəшьааи сареи ҳаибабоит, ҳажəлантəқəа реизара еснагь салахəуп, ааԥхьара ҳарҭоит ҭаацəала, уи сара сгəы шьҭызхуа ауп. Шьамтəыла инхо ҳажəлантəқəа Ҳагəышьаа рхыҧхьаӡара маҷым. Аха, исҭахуп ҳаԥсадгьыл аҿы ҳаизҳарц, ҳаҿиарц", - игəҭахəыцрақəа ҳацеиҩишон Омар Хагəышь.

Ҳџьынџьуаҩ Омар Ҳагəышь дхəыҷаахыс Аԥсны аӡбахə иаҳауан, агəыбылра иман. Шьамтəыла дара ахьынхоз ақыҭаҿы еиҿкааны ирымаз адыга культуратə хеидкылахь дныҟəон, уа иибаз иаҳаз иаԥхьаҟатəи иԥсҭазаараҟны акыр ицхыраагӡахеит. Аԥсны Аџьынџьтəылатə еибашьра иазкыз авидеоҭыхымҭақəа ибахьан Шьамтəыла даныҟаз, аха Аԥсдгьыл аԥшӡара иазкыз аҭыхымҭақəа машəыршақə ауп дышрыхҭыгəлаз.

"Аҩны сшыҟаз ателехəаԥшрала афранцызцəа ирышьҭыз Аԥсны иазкыз афильм машəыршақə сақəшəеит. Убасҟан ауп сара ианеилыскааҵəҟьа ҳаҧсадгьыл закəытə џьанаҭу, исхамшҭуа кадрқəоуп Аҟəа ақалақь амшын аԥшаҳəа, ашьхақəа, аԥсабара аиаҵəара, иара убас аԥсуа қыҭа аԥсҭазаара атәы зҳəоз анҵамҭақəа. Урҭ зегьы уажəы лабҿаба сахьрылаԥшуа сара сзы акраҵанакуеит, илабҿабахаз аԥхыӡ исзаҩызоуп", - игəҭахəыцрақəа ҳацеиҩишон ҳџьынџьуаҩ.

Омар ианду (иаб иан) Арҩыҭааԥҳан, Аԥсны даахьан, илбахьан. Лмоҭа излаиҳəо ала, аԥсшəагьы цəгьамкəа илдыруан. Лара лаҳəшьаԥа иоуп Аԥсны Аџьынџьтəылатə еибашьраҿы иҭахаз Зиуар Чычба. Зашьа ишьа иурц Шьамтəылантəи иааз Зиуар иашьа Заур Чычба идунеи араҟа иԥсахит. Аишьцəа аҩыџьагьы анышə иамадоуп Аҷандара ақыҭан. Ари ахҭыс Омар ҳаиҿцəажəараҟны дазааҭгылеит. Хаҭала, Чычбақəа рҭаацəеи сареи ҳаибадыруеит, ианду лаҳəшьа Неџьиҳа Арҩыҭааԥҳа лакəзар, Шьамтəыла ҳаибадырхьан. Анҵамҭа аҩра сахьаҿу, уи аԥҳəыс ҟəымшəышə лԥацəа рзы икалыԥсоз лылаӷырӡқəа сгəы иҭынҵəом, Шьаамтəылатəи сныҟəарақəа аасызҿыцхеит. Шаҟа ииашангьы иҳəазеи аамҭаказы ҳџьынџьуаҩ, ҳпоет ду Омар Беигəаа: "Аԥсуа Анцəа дшаны адəы дзықəиҵаз, дԥишəаларц ауп", - ҳәа.

Омар Хагəышьи сареи ҳаибадыруеижьҭеи акрааҵуеит, еснагь зхы-зҿы ҳалалу, ачча зҿықəыхху арԥысуп, ахӡыргара илаӡам. Анҵамҭа изыскырц шысҭахыз аниасҳəа, дааԥышəарччеит, избеит дшацəыԥхашьаз, аха мап сцəимкит. Шаҟа хҭыси, шаҟа жəабжьи цəырнагазеи ҳаиҿцəажəара, уажəазы араҟа иҟаҳҵаз лкаақəак роуп. Омар Хагəышь дҭаацəароуп, иԥшəамԥҳəыс Шьамтəылатəуп, адыгьа ҭыԥҳауп, Ҭау лыжəлоуп, лан даԥсыуоуп, Ануаԥҳауп. Омар Ҳагəышь иԥсадгьыл аҟны дышəҩыкхааит, деизҳааит. Аԥсынтəыла еизҳазыӷьалааит ҳџьынџьуаа рыла!

Иара убас шәаԥхьар ҟалоит:

131

Аисель Агрԥҳа: Шьамтəыла сынхоны схаҿгьы исзаагом

99
Сахьалеи гəаҭалеи иԥшӡоу Шьамтəылантəи иааны зыԥсадгьыл аҿы инхо ҳџьынџьуаҩ Аисель Агрԥҳа длыҿцәажәеит ажурналист Сырма Ашəԥҳа.

Сырма Ашəԥҳа, Sputnik

Ҳазҭагылоу аамҭазы агəахəара ду унамҭарц залшом аҳəаанырцəынтəи зҭаацəа ирыцны наунагӡа зџьынџь дгьыл ахь нхара ҳəа иааз аҿар рыӡбахə ануаҳауа. Аҭыԥантəи рҩызцəеи дареи рҳəоу еиқəшəаны, ахəыҷбаҳчақəеи ашколқəеи рҟны арҵаҩцəеи ааӡаҩцəеи ирыбзоураны рхатəы бызшəа рҵоит, уи ҳəарада аԥсҭазаараҿы даара анырра бзиа рнаҭоит. Убас еиԥш, хатəгəаԥхарала ҳџьынџьуаа рынхарҭа ҭыԥқəа санырҭаауа ыҟоуп, срыҿцəажəоит аиҳабацəа, иара убас рыхшара. Уимоу, иҟоуп ахəыҷқəа рҭаацəа аҭырџьманра анырзыруа, уи сусура акыр иацхраауеит.

Убас еиԥш, ааигəа ссасны сызҭаз Аграа рҭаацəара рыхшара акыр иҿырԥшыгоуп, акыр сыхнахит раԥсшəаҳəашьа, рхымҩаԥгара. Раб сиҿцəажəонаҵы, ҿымҭкəа иҳадтəаланы иаҳзыӡырҩруан, аиҭагара аганахьала џьара ак ҳҭаххар, иҳацхраауан. Аиҳəшьцəа реиҳабы Аисель лакəзар, зегьы азҿлымҳара рылҭон, лхаҭа дызхасазҵаауаз рацəан, лыԥси-лыԥси еихьымӡо дгəырӷьаҵəа иазгəалҭон Аԥсныҟа лҭаацəа дрыцны нхара ҳəа раара залыршамхар, Шьамтəыла лыԥсҭазаара лхаҿы ишылзаамгоз. Лхəыцрақəа дыргəыларԥшуа лҿанаалха, ҳаҭыр зқəу аԥхьаҩцəа, шəара шəҿынӡагьы лыбзарӡы назгарц сҭаххеит.

"Сара аашықəса ракəын исхыҵуаз Аԥсныҟа санааз. Аԥсшəагьы аурысшəагьы ак сыздыруамызт, араб бызшəа ада. "Иҭабуп", "Аԥсны", "аԥсуа" - абас еиԥш иҟаз аԥсышəала имариаз ажəақəа сҳəон, избанзар саб Шьамтəыла ҳанынхоз исирҵахьан. Ҳара ҭаацəала Аԥсныҟа ҳанааз, ӡынран, ҳаԥсадгьыл аԥшӡара атəы зҳəоз асахьақəеи ажəабжьқəеи саб иеиҭаҳəамҭақəа рыла иаҳдыруан, схəыҷын, аха агəра ганы сыҟан ишысгəаԥхоз", - абасала ҳаиҿцəажəара ҳацҳаркит Аисели сареи.

Аисель Агрԥҳа Баграт Шьынқəба ихьӡ зху Аҟəатəи актəи абжьаратə школ аҟны аҵара лҵон, ахəбатəи акласс аҿы ддыртəеит. Лара излалҳəо ала, даара илцəыуадаҩын аҽаршьцылара, уаҩ длыздыруамызт, абызшəа лызҳəомызт, аха аамҭа цацыԥхьаӡа иубарҭан аҭагылазаашьа абзиара аганахьала аҽшаԥсахуаз.

"Сҩызцəа зегьы сџьашьаны исыхəаԥшуан, дареи сареи бызшəала ҳахьзеилыбамкаауаз ҳаицəыхаразшəа сзааиуан. Хəыҷы-ҳəыҷла абызшəақəа рҵара салагеит, анаҩс избарҭахеит сҩызцəеи сареи аԥхарра шҳабжьалаз, агəрагьы згеит, сҿаԥхьагьы ахықəкы ықəсыргылеит абызшəа адырра шхымԥадатəиу. Аурысшəа еиҳа имарианы исыцааиуан, аԥсуа бызшəа аҵаразы иҷыдоу акурсқəа сырхысуан, Анцəа иџьшьаны, қəҿиарала 11-тəи акласс асыркит", - ҳəа азгəалҭеит Аисель Агрԥҳа.

Аисель иаҳəшьаки иашьаки лымоуп. Урҭгьы лара дызҭаз ашкол аҿы аҵара рҵон. Лаҳəшьа хəыҷы ҿыц ашкол ахь данца, даара ахаҵгылара лырҭон, лурокқəа рыҟаҵара илыцхраауан, џьара аӡəы диргəаар руӡомызт, абаагəареиԥш илыдгылан.

"Сашьа ажəбатəи акласс даналга ашьҭахь, асахьаркыратə ҵараиурҭа дҭалеит, қəҿиаралагьы далгеит. Сара афилологиатə факультет алысхит, Аԥснытəи аҳəынҭқарратə университет аҿы аҵара сҵоит. Даара сҩызцəеи сареи ҳаинаалоит. Аиаша шəасҳəоит, Аԥсны сара сзы ихазыноуп, убас еиԥшҵəҟьа сырзыҟоуп аԥсуаа. Шьамтəыла ҳаныҟаз саб иаҳзеиҭаиҳəалоз ажəабжьқəа лабҿаба ҳрықəшəаҵəҟьама ҳəа агəра анысзымго ыҟоуп", - лгәы хыҭхыҭуа дҳацәажәон Аисель Агрԥҳа.

© Foto / Сырма Ашуба
Аисель Агрԥҳа лҭаацәеи лареи

Ауаҩытəыҩса иԥсҭазаара аԥхыӡ еиԥш ианымҩасуа ыҟоуп. Аисель лҿырԥшала иубарҭоуп, агəрагьы угоит угəыӷрақəа анынаӡо еиҳау насыԥ шыҟам.

"Сара саб Аԥсадгьыл ахьчара дахьалахəыз сгəы дууп. Урҭ ртəы зҳəо асахьақəеи ианашьоу аҳəынҭқарратə ҳамҭақəеи лассы-лассы ицəырганы ҳрыхəаԥшуеит, ҳаҟара ҳацнаҵоит. Сабгьы игəы иахəоит ус ҳхы анымҩаԥааго. Сан дарабуп, аха саб иалихыз амҩа дацəхьамҵӡеит, лхы анрааланы, дарӷьажəҩаны дивагылоуп. Маҷара ҳахьынхо ҳгəылацəеи ҳареи ҳаизыразуп. Сан араб чысқəа рыҟаҵара бзиа илбоит, ҳгəылацəа еснагь агьама дҳарбоит, даргьы бысҭак рур, ҳхəы аарҭиуеит. Аԥсуа чысқəа рыҟаҵашьа аҵара саҿуп, ҭаацəала бзиа иаҳбоит", - лҳəеит Аисель Агрԥҳа.

Аисель Агрԥҳа излалҳəо ала, лыжəлантəқəеи дареи аимадара рыбжьоуп, аҵара ахьылҵо ауниверситет аҿы еиҳагьы еибаԥшааит, лассы-лассы еибабоит. Аисель ҟазшьала даара еилыҷҷоу, зегьы рдырра иашьҭоу аӡə лоуп. Ауаа рацəажəара, рабадырра бзиа илбоит.

"Ауаҩытəыҩса шаҟа гəыла-ԥсыла бзиа дубо, убриаҟара уаргьы ҩнуҵҟала улашоит. Дара рызегьы еиуеиԥшым - дыҟоуп аӡəы хьаала иҭəу, дыҟоуп гəырӷьарыла имҩасуа. Убарҭ зегьы рҭагылазаашьа еилкааны уанрывагылоу, ухаҭа уамеигəырӷьарц залшом", - ҳəа азгəалҭоит Аисель Агрԥҳа.

Аисель Агрԥҳа, Аԥсныдгьыл лара лҭоурыхтə ԥсадгьылны илыԥхьаӡоит, Шьамтəыла акəзаргьы, зымҩа инлыжьуам, избанзар уаҟа диит, лхəыҷра ашықəсқəа уаҟа илхылгеит.

"Сара сабдуцəа рабдуцəа араҟа анышə иамадоуп. Сара урҭ ирхылҵыз аӡə сакəны Аԥсны сынхартə сахьыҟалаз Анцəа ҭабуп ҳəа иасҳəоит. Убас еиԥш, сан, ҳара ҳаԥсадгьыл Аԥсны шакəыз еилкааны, адгылара ахьҳалҭаз лҿаԥхьа схырхəоит. Сан лҭаацəара дууп, дара ԥшьҩык аишьцəеи, ԥшьҩык аиҳəшьцəеи ыҟоуп. Ианыгəхьаалго, аҭел ала драцəажəоит, аха иҟоуп аимадара аныбзиамгьы. Сан ахаан лылахь еиҵымхкəа дҳамбац, еснагь деихаччоит, уи ҳара даара ҳгəы ҭнагоит", - лҳəеит Аисель Агрԥҳа.

Аисель илыбзоураны, Шьамтəыла инхо лҩызцəа Аԥсны аӡбахə рдыруеит, асахьақəа рзылышьҭуеит, агəаҳəара рымоуп Аԥсныҟа аара. Аԥхьаҟа лгəы иҭоуп Аԥсны иазку авидеонҵамҭақəа ҭыхны аинтернет аҭаҵара.

Аисель Агрԥҳа Аԥсны имҩаԥысуа аҿар злахəу аусмҩаԥгатəқəа дрылахəуп. Гəаҭала дшыԥшӡоу еиԥш, дыԥшӡоуп ҭеиҭыԥшлагьы. Аҭыԥҳацəа ԥшӡақəа реицлабра "Королева Абхазии" далахəын, " авице-королева" (раԥхьатəи) ҳəа ахьӡ даԥсахеит.

© Foto / предоставлено Аисель Агрба
Аисель Агрба

Убри инаҷыданы, Аисель Агрԥҳа Аԥсны имҩаԥысуа асериалқəа рҭыхрахь ааԥхьара лырҭоит, иара убас амодақəа рырбарахь. Ажəакала, лыԥсҭазаара шəыга ԥшӡала еиларсуп.

Иара убас шәаԥхьар ҟалоит:

99

Дани Агрба: аҭоурыхтә аамҭа ҳазҭанаргылаз рацәоуп, алҵшьа ҳақәшәароуп

243
Шьамтәылантәи зҭоурыхтә ԥсадгьыл аҿы зҭаацәа зманы инхо Аԥсны Аџьынџьтәылатә еибашьра аветеран Дани Агрба иҭоурых ажурналист Сырма Ашәԥҳа ланҵамҭаҿы.

Сырма Ашәԥҳа, Sputnik

Аԥсны Аџьынџьтәылатә еибашьра аветеран, Леон иорден занашьоу, Шьамтәылантәи зҭоурыхтә ԥсадгьыл ахь зҭаацәа зманы ихынҳәыз Дани Агрба дынхоит Гәылрыԥшь араион Маҷара аҳаблаҿы. Хымԥада, исаҳахьан Дани Агрба иӡбахә, аха лабҿаба ҳаицәажәартә еиԥш аҭагылазаашьа смоуцызт. Зегьы ҿҳәарак-ҿҳәарак рымоуп, иааит уи аамҭагьы.

Маҷара агәаҿы, ахадара ахыбра анаҩсҵәҟьа, ҳџьынџьуаа рзы аҳәынҭқарра ахарџь ала аҩнеихагыла еиҭашьақәыргылан шықәсқәак раԥхьа. Ҳазҭагылоу аамҭазы уи ашҭа ушынҭалалак угәалаҟазаара еиӷьымхарц залшом, ахьхьа-аџьџьаҳәа аҳәыҷқәа рышьҭыбжь уаҳауеит, еихагылацыԥхьаӡа иубарҭоуп ауаа шынхо. Аиаша шәасҳәоит, лымкаала исыздыруамызт аҽнышьыбжьон аҩны исықәшәоз ауаа зусҭцәаз, ашә снасыр иаадыртып ҳәа гәҭакыс иҟаҵаноуп уажәтәи сныҟәарагьы Маҷараҟа ишхацсыркыз.

Актәи аихагылаҿы ашә асбжьы заҳаз ҭыԥҳа хәыҷык иаалыртит. Аԥсшәа наласҳәан, слазҵааит: "Аҳәаанырцәынтәи иаақәаз ҳџьынџьуаа шәреиуоума?" - ҳәа. Сылдыруазшәаҵәҟьа дааԥышәырччан: "Ааи, ҳара Шьамтәылантәи иаақәаз аԥсацәоуп, Агрбақәоуп, шәааи аҩныҟа", - лҳәеит. Исаҳаз аҭак аасызхеит, лҭаацәа аҩны ишыҟаз ансалҳәа, азин аарымсхын, сныҩналеит. Аҩнаҭа аԥшәмацәа убриаҟара гәыблыла срыдыркылеит, анаҩс сааҭла ҳзеиԥырымҵуа ҳаицәажәон. Ааи, зыӡбахә сымоу аҩнаҭа аԥшәма Дани Агрба иоуп.

Абар, уажәшьҭа аашықәса раахыс инхоит Аԥсны. Иԥшәмаԥҳәыс Маиса Алнаџьар дараб ҭыԥҳауп. Хҩык ахшара рымоуп, ҩыџьа аҭыԥҳацәа Аисели Сидреи, иара убас арԥыски, Иуксель. Арԥыс аусура дыҟан, еьырҭ зегьы аҩны исықәшәеит. Ҳаиҿцәажәаргьы хацҳаркит Шьамтәыла иахьынхоз аҭыԥ аӡбахә ала.

© Foto / Сырма Ашуба
Дани Агрба иԥҳацәа Аисели Сидреи

"Сҭаацәеи сареи Аԥсныҟа ҳаанӡа Берҳаџьам ақыҭаҿы ҳанхон, Голлантәи аҳаракырақәа ирзааигәоуп ҳқыҭа, еиҳарак инхо аедыгьақәеи аҟабардақәеи роуп, ҩ-ҭӡык аԥсуаа ҳрыланхон, ҳара ҳҭаацәеи, Ӡыӷәиԥацәеи (Гагәылиа). Сара сани саби Дамаск инхон, ақалақь ахь нхара ҳәа ииасаанӡа Кунеитра иахьаҵанакуа аԥсуаа рацәаҩны иахьынхоз Мумсиа ақыҭаҿы инхон. Уаҟа иуԥылон ажәлақәа: Маршьан, Гьечба, Чқәуа, Кәыџба, Маан, Агрба, Қәышьба уҳәа", - ажәабжьқәа сзеиҭеиҳәон Дани Агрба.

1948 шықәса рзы Палестинеи Израили реибашьраҿы Дани Агрба иабду Абдульӷани дҭахоит. Абдульӷани Агрба иабду иакәзар, Кавказаа ргәыԥ злахәыз еидысларак аҿы дҭахоит 1868 шықәса рзы. Усҟан иара иԥшәмаԥҳәыс Ҳалбадԥҳа (лыхьӡ еилкаам) лцәалтәымкәа дыҟан, Салиҳ захьӡыз ҷкәына хәыҷыкгьы длыман. Ҳалбадԥҳа лыԥшәма заа илаиҳәахьан, дҭахоны дҟалозар, Ҭырқәтәылаҟа лыхшара лыманы дцарц.

© Foto / Сырма Ашуба
Дани Агрба иабду Абдульӷан Агрба (арыӷьарахь игылоу)

"Ҳалбадԥҳа ус иагьыҟалҵеит. Лыҷкәын хәыҷы даашьҭыхны Ҭырқәтәылаҟа дцеит, лашьагьы длыцын. Уа дахьнеиз Абдуль Азиз Агрба диит. Лара лыхшара лыманы дынхон Кунеитра, аеҭымцәа рзы иргылаз аҩнаҟны. Абасала, ҳара ҳабшьҭра Аԥснынтә ихырҵәан Ҭырқәтәылаҟа, уантә Шьамтәылаҟа. Иаҳзымдыруа ирхыргаз аҭоурых рацәоуп", - иҳәеит Дани Агрба.

Дани иаб Фаруқ Агрбеи иԥшәмаԥҳәыс (дҟабардоуп) Леила Жьалаҳыжьи фҩык ахшара рааӡеит - хҩык аԥацәеи, хҩык аԥҳацәеи. Дани иҭаацәеи иашьцәа руаӡәки нхоит Аԥсны, егьырҭ Шьамтәыла. Иаб иԥсҭазаара далҵхьеит, иан лыԥсы ҭоуп. Ҳаиҿцәажәараҟны Дани еиҭеиҳәеит раԥхьаӡа Аԥсныҟа данааз атәы.

"Аԥсныҟа сааит аибашьра аҟалара мызқәак шагыз, 1992 шықәса рзы, араҟа ауниверситет сҭалеит. Ус, Аԥсны Аџьынџьтәылатә еибашьра иалагеит. Раԥхьа Пицундатәи аибашьцәа ргәыԥ салан, анаҩс Шьамтәылатәи арԥарцәа Маҳмуҭ Қәышьба, Недаль Агрба, сара уҳәа Гәдоуҭа апартизанцәа еидызкылоз агәыԥ ахь ҳцеит, ҩыџьа адаӷьысҭанцәеи ҩыџьа аерманцәеи ҳацын аԥсуаа иреиуамыз, Гәырам Дапуа еиҳабыс дҳаман. Гагра ақалақь ахы ианақәиҭха ашьҭахь, Ибрагим Иаганов дҵаҟаҵаҩыс дызмаз аҟабардақәа ргәыԥ ҳалалеит", - иҳәеит Леон иорден занашьоу Дани Агрба.

Дани Агрба иҩызцәа аибашьцәа аӡәырҩы реиԥш, имаҷмызт дзықәшәаз ахҭысқәа, иҟан аԥсра абла данҭаԥшхьаз аамҭагьы. Аха уи аӡыргара ахәҭам ҳәа ԥхьаӡаны, рацәак иҽалаигаломызт, нас, ахӡыргара аибашьҩы иҟазшьамзар акәхап. Егьа ус акәзаргьы, исҭахын аибашьра иадҳәалаз игәалашәарақәа дырзааҭгыларц.

© Foto / Сырма Ашуба
Аԥсны Аџьынџьтәылатә еибашьра далахәын Дани Агрба.

"Аҟабардақәа ргәыԥ ахь ҳаиасит быжьҩык. Очамчыра иӡхыҵран иҟаз адесант ҳрыланы, ӷбала амш ҳхын 14 сааҭ. Аха усҟан изалыршамхеит аоперациа ашьақәырӷәӷәара, иҟалаз ацәқәырԥа бааԥсы иахырҟьаны. Шроматәи ажәылараҿы аснаипер сшьапы ихәит, еицыз ҳахьтә ахәрақәа иҵегьы изауқәаз ҟалеит. Ԥшьҩык еиҳа ӷәӷәала ихәқәаз Нальчикҟа ҳдәықәырҵеит. Мызкы ааҵуаны еиԥш, ҩаԥхьа Аԥсныҟа сааит, аха сыхәра иауамызт, Москвала Дамаскҟа сдәықәырҵеит, уахьгьы аамҭала", - дцәажәон аибашьра аветеран.

Шьамтәыла ахәышәтәырҭа рацәак дҭамхакәа Дани Агрба иҩыза аҟабарда ҷкәын Гассан Џьарқаси иареи Аԥсныҟа еицааит, "Шьараҭын" агәыԥ ашҟа ицеит. Гассан Џьарқас Гәымсҭатәи ажәылараҿы дҭахоит.

© Foto / Сырма Ашуба
Аԥсны Аџьынџьтәылатә еибашьра далахәын Дани Агрба.

"Иашьа гәакьак иеиԥш сихәаԥшуан Гассан Џьарқас, даара ҳаиҩызцәа бзиақәан. Иара идыруазшәа, ицәа иалашәахьан дышҭахоз, асалам шәҟәы ҩны иаанижьхьан. Сҭаацәа ираҳаит Аԥсныҟа еибашьра исыцааз сҩыза дышҭахаз, акыр саргьы схьаарго иалагеит. Гассан Џьарқас исалам шәҟәқәеи имаҭәақәеи аашьҭыхны, насгьы сҭаацәа ааргәыбзыӷны сеиҭаап Аԥсныҟа ҳәа гәҭакыс иҟаҵаны сеиҭацеит Шьамтәылаҟа, акыр иуадаҩын сара сзы уи аҩыза амҩа ақәлара, аха аҭагылазаашьа сақәнаршәеит", - луанытә дқәыԥсычҳауа игәҭыхақәа еиҭеиҳәон Дани Агрба.

Дани Агрба дхәыҷаахыс Аԥсны аӡбахә иаҳауан, уарла-шәарла акәзаргьы, усҟантәи аамҭазы иҟаз аиҭанеиааирақәа ирыбзоураны иидыруаз маҷмызт. Акыр дазгәыдууны игәалаиршәеит апоетесса Нелли Ҭарԥҳа Шьамтәыла даныҟаз, дара рыҩнаҭаҟны мышқәак дшынхоз, ҳамҭасгьы лышәҟәы шилҭахьаз. Адоуҳамч ӷәӷәоуп, Аԥсадгьыл аҵакы дууп, уи шьахәла ирныруеит зыԥсадгьыл иаҟәыгоу ҳауаажәлар.

Дани Агрба ихшара рхы-ргәы иақәгәырӷьо Аԥсны инхоит, рыхҩыкгьы Баграт Шьынқәба ихьӡ зху Аҟәатәи актәи абжьаратә школ иҭан. Уажәы уаҟа аҵара лҵоит зегьы иреиҵбу Сидра, аабатәи акласс аҿы дтәоуп. Аҷкәын асахьаҭыхратә ҵараиурҭа далгахьеит, афилологиатә факультет аҩбатәи акурс аҿы дтәоуп Аисель. Аисель илҭаххеит Аԥснытәи лыԥсҭазаара нарҭбааны далацәажәарц, илыԥгылаз ауадаҩрақәа, урҭ дшыриааиз, абызшәақәа шылҵаз, аҩызцәа шлырҳаз, аԥхьаҟатәи лыгәҭакқәа ртәы уҳәа. Хымԥада, инарҭбаау ҳаиҿцәажәара анаҩстәи анҵамҭазы иазсырхиоит.

Абасала, Дани Агрба иҭаацәа ҿырԥшык аҳасабала узыхцәажәаша аԥсыуа ҭаацәароуп. Аҽынтәи сгәалаҟазаара, насгьы Аграаи сареи ҳаибадырра иахылҵыз аԥхарра издыруаз рыжәлантәқәа ирзеиҭасҳәеит, изласылшоз ала еимадарак рыбжьасҵеит, сгәы иаанагоит уи аимадара амҽхак аҽарӷәӷәап ҳәа.

Иара убас шәаԥхьар ҟалоит:

 

243

Ҷедиа ачарақәа раанкыларазы: ажәлар ахьцо-иахьаауа рзеилымкаауа иҟалеит

0
(ирҿыцуп 20:13 19.09.2020)
Ачарақәа рура аамҭа ахыгахоит иааиуа амзазы. Ас еиԥш аҭагылазаашьа ачараурҭатә хыбрақәа рыԥшәмацәеи ачара аҿҳәара ԥызҵәахьоу ауааи зҭанаргыло ауадаҩрақәа ртәы арадио Sputnik аефир аҟны еиҭеиҳәеит абанкеттә зал аиҳабы Авҭандил Ҷедиа.
Ҷедиа ачарақәа раанкыларазы: ажәлар ахьцо-иахьаауа рзеилымкаауа иҟалеит

Аҳәынҭқарра ахада Аслан Бжьаниа аусԥҟа ҭижьит "Аԥсны Аҳәынҭқарра ауааԥсыра ргәабзиара акоронавирустә инфекциа COVID-19 ацәыхьчаразы хаз игоу уснагӡатәқәак рышьақәыргыларазы" ҳәа. Аԥкрақәа азинмчы роуеит жьҭаара 5 инаркны. Урҭ инарықәыршәаны, ачарақәа рымҩаԥгара аанкылатәхоит.

"Ашықәс нҵәаанӡа 20-25 чара ҳәа ашәҟәы ианҵаны иҳамоуп. Аԥарагьы ԥароуп, аха ачымазара ыҟазар, аҳәынҭқарра ахада иҭижьыз аусԥҟа ажәлар ацныҟәоит ҳәа ауп ишыздыруа, ус ауп ишеилыскаауа. Ажәлар чмазаҩхар, ирыцҳашьатәуп. Ауаа кредитла аԥара ргеит, ачара иазыԥшын, аха иҟауҵои. Ачара ахьыруа ахыбрақәа рҟны 40-45 рҟынӡа ҽнак иҭыҵуа ауаа аус руеит… Ачарақәа рыҿҳәара ԥҵәоуп. Октиабр азы ашәҟы ианыз сентиабр ахь рҽанырҵар рҭаххеит, агәыҭҟьара иҟоу збоит, аҩашагьы ачарақәа ҟарҵо иалагеит", - иҳәеит Ҷедиа.

Шәазыӡырҩы аудио. Иаҳа инеиҵыху анҵамҭа шәаҳар шәылшоит арадио Sputnik аефир аҟны.

Иара убас шәаԥхьар ҟалоит:

0