Ҭамер Ешба: ҳахдырра аныҟала, ҳзыцәхьаҵуа аус ҳаԥхьа ишьҭалаӡом

196
Ҳџьынџьуаҩ Ҭамер Ешба иҭоурыхтә ԥсадгьыл аҿы инхара-инҵыра шыҟоу, инапы злаку, иԥсадгьыл ахь имоу игәҭахәыцрақәа уҳәа ажурналист Сырма Ашәԥҳа ланҵамҭаҿы.

Сырма Ашәԥҳа, Sputnik

Аҳәаанырцәынтәи зҭоурыхтә ԥсадгьыл ахь нхара ҳәа ихынҳәуа ҳџьынџьуаа рыӡбахә анҳаҳауа, акырӡа ҳаигәырӷьоит. Еиҳагьы ҳгәы шьҭнахуеит урҭ рхы-ргәы иақәгәырӷьо, аԥсҭазаара иахамышшаауа ианаҳԥыло, рыҵәҩаншьап араҟа ианадырсуа, аҭаацәарақәа анаԥырҵо.

Ҭырқәтәыла, Ҳендеқь араион иаҵанакуа Ҭагәареқь ақыҭаҿы инхоз ҳџьынџьуаҩ Ҭамер Ешба абар уажәшьҭа фышықәса инарзынаԥшуеит Аԥсныҟа нхара дааижьҭеи. Иӡбахә саҳахьан, аха иааигәаны дсыздыруамызт. Мышқәак раԥхьа аҭагылазаашьа соуит ҳаибабартә, ҳаицәажәартә, иԥсадгьыл ахь имоу игәҭахәыцрақәа еилыскаартә еиԥш. Ауаҩы аамысҭашәа, мыцхәы ацәажәара зҟазшьам, заԥсуара заԥхьа игылоу ари арԥыс иԥсадгьыл аҿы, хымԥада, даԥшәыманы ихы ибоит, дҭаацәароуп, ҩыџьа ахшара Еимени Дефнеи драбуп.

"Сара сабшьҭра Гәбаадәынтә Дали Ҵабали рахь илбаақәаз иреиуоуп. Сабду иаб Џьаргьеҭ иоуп Ҭырқәтәылаҟа ахҵәара зықәшәаз. Иара иахьынӡауаз Аԥсны дыҟан, амҳаџьырра раԥхьатәи ацәқәырԥақәа иргаз дреиуам, аха ашьҭахь дзықәшәаз аҭагылазаашьа ихы анираалар акәхеит, дыхҵәеит", - дҳацәажәон Ҭамер Ешба.

© Foto / Предоставлено Тамером Ешба
Ҭамер Ешба иабду Неџьиԥ

Ҭырқәтәыла еиуеиԥшым ақалақьқәеи ақыҭақәеи рҟны инхо Ешаа рхыԥхьаӡара маҷым, Аԥсны инхақәо реиҳа акырынтә еиҳауп. Аҭоурыхтә мзызқәа еиҟәыршаз рашьцәеи дареи аимадара рыбжьало иалагеит 30 шықәса раԥхьа. Ҭамер игәалаиршәоит иара иаб иашьа раԥхьаӡа акәны иабдуцәа зныҵыз адгьыл данаҭаа, усҟан иара дхәыҷын, аха еиҭеиҳәоз Аԥсны иадҳәалаз ажәабжьқәа ихы-игәаҿы иаанхеит.

Илҳан Аҩӡба
© Фото : Сырма Ашәԥҳа лархив аҟынтә

"Саб иашьа Наиль Аԥсныҟа даахьан Аԥсны Аџьынџьтәылатә еибашьра аԥхьа. Усҟан иара Гәдоуҭа инхоз иашьцәа Ешбақәа рҿы дынхон. Аԥсны иибаз-иаҳаз, дзықәшәаз аԥсуаа, гәыблыла дыздызкылаз ижәлантәқәа рыӡбахә еснагь далацәажәон. Иҳәон Аԥсны аԥшӡареи ахаареи мбакәа зыԥсҭазаара иалҵыз аиҳабацәа рыгәнаҳа шыцәгьоу, игылоу аҿар аамҭа бзиак рзылԥхар Аԥсныҟа ихынҳәыр шакәу", - игәалашәарақәа ҳацеиҩишон Ҭамер Ешба.

Ишдыру еиԥш, ахҵәара зықәшәаз ҳауаажәлар иахьнанагаз атәылақәа рҿы анхара рцәыуадаҩхеит. Аԥсыӡ аӡы зҵабаз иаҩызаны рхы рыԥхьаӡон. Ԥсҿыхгас ирымаз Аԥсны иахьынхоз ақыҭақәа рцәаара зхыркаауаз аҭыԥқәа ԥшааны анхара ҿыц рнапы ахьадыркуаз акәын.

"Сара сабду Неџьиԥ иаб Џьаргьеҭ Аԥснынтә Ҭырқәтәылаҟа дыхҵәар анакәха, раԥхьа Калиак ақыҭаҿы анхара далагеит. Аха анаҩс Ҳендеқь иахьаҵанакуа Ҭагәареқь ахьӡҵаны ақыҭа шьақәиргылеит, ҳаблак еиднакыло раҟара аԥсуаа нхоит уажәгьы. Иаҳҳәозар: Аӡынаа, Ашәаа, Жьиаа, Қапаа, Ешаа уҳәа, 25-30 ҭӡы инарзынаԥшуеит. Араҟа аԥсы ҭоуп аԥсуара, убас еиԥш игоит аԥсуа бызшәа ашьҭыбжьгьы. Сара аԥсышәала ицәгьамкәа сцәажәоит, уи зыбзоуроу, ҳәарада сандуцәеи сабдуцәеи роуп, аҩны еснагь излацәажәоз аԥсышәала акәын", - ҳәа азгәеиҭоит Ҭамер Ешба.

© Foto / Предоставлено Тамером Ешба
Ҭамер Ешба ианду Ԥлиаԥҳа Иԥеқь

Ҭамер Ешба дызхылҵыз рышьҭа ҵаулоуп, рдаракәац ӷәӷәоуп. Иан Чкокԥҳауп, Ҭиульаи лыхьӡуп, уи лан Ԥлиаԥҳан, Иԥеқь лыхьӡын. Иаб Џьемиль иан Арӡынԥҳан, заа лыԥсҭазаара далҵхьан. Урҭ ирааӡамҭоу иоуп ҳара ҳзыҿцәажәоз Ҭамер Ешба.

"Сара раԥхьаӡа акәны Аԥсныҟа сааит 2014 шықәса рзы, Аиааира амш ныҳәа аназгәаҳҭоз. Мчыбжьык Аԥсны саанхеит, схы-сгәы иҭалеит. Ҭырқәтәылаҟа сгьежьны санца, џьарак сакуамызт, арахь сызлаара сашьҭалеит. Убас еиԥш слахьынҵа сыцныҟәеит, ҩымз ааҵуаны Аԥсныҟа саартә еиԥш. Сҩызцәеи сареи ҳаицәажәаны адәқьан маҷ "Через" ааҳартит, Ҭырқәтәылатәи ачысхаақәа ахьырҭиуа. Уиижьҭеи Аԥсны сыҟоуп, сҭаацәа аныгәхьаазго сцалоит-саалоит", - иҳәеит Ҭамер Ешба.

Ҭамер иани иаби ҩыџьа ахшара рхылҵит, иара димоуп аиаҳәшьа, Ҭырқәтәыла аҭаацәара далоуп, ҩыџьа ахшара дрануп. Рԥазаҵә Аԥсныҟа аара анаԥшьига, иҭаацәа азыразхеит, дныҳәаныԥхьаны амҩа дықәырҵеит.

© Foto / Предоставлено Тамером Ешба
Ҭамер Ешба иаб Џьемили уи иашьцәеи

Ҭамер занааҭла декономиступ, Есқьишьеҳиртәи ауниверситет аекономикатә факультет далгахьеит. Иара излазгәаиҭо ала, Аԥсны аекономикатә ҭагылазаашьа раԥхьа данаа еиҳа еиӷьын, уажәы маҷк иԥсыҽхазшәа изаауеит.

"Ҳара џьанаҭдгьыл аҿы ҳанхоит. Ҳмаашьакәа ҳмахәҿа аус аҳарур, ҳадгьыл чашә иалымҵуа егьыҟам. Атуризм ахырхарҭала акәзар, ижәдыруеит ҳҭагылазаашьа зеиԥшроу, ҳамшын, ҳашьхақәа, ҳаԥсабара, абарҭқәа зегьы аԥсшьаҩцәа зыршанхо ауп. Аҳәынҭқарратә программақәа аус руроуп, азакәан амч амазароуп. Ауаҩы гәыла-ԥсыла инапаҟынтә иааиуа аус еснагь алҵшәа амоуп. Ҳарҭ егьырҭ атәым милаҭ ҳазларылукаауа ҳҟазшьа аҷыдарақәа рыла ауп. Ҳара ҳаԥхьа иҳаргылоит ҳаламыс, ҳаԥхашьара, ҳахдырра аныҟала, ҳзыцәхьаҵуа аус ҳаԥхьа ишьҭалаӡом", - игәҭахәыцрақәа ҳацеиҩишон Ҭамер Ешба.

Изҳәо-изуа здыруа, ахӡыргара иашьҭам, ауаҩы деилызкаауа, зхымҩаԥгара ҿырԥшыгоу Ҭамер Ешба дынхоит Аҟәа ақалақь аҿы, макьаназы қьырала ауадақәа дрыҩноуп. Азныказы ус шакәыз аҳәара иҭахымхеит, аха сызҵаара ҭакда изаанмыжьит. Ҭамер Ешба иҭаацәара рышьҭамҭа еиҵыҵааит Аԥсныдгьыл аҿы, забдуцәа рџьынџь дгьыл ахь ихнымҳәыц аԥсуаа рзы иҿырԥшыганы иҟалааит ҳзыҿцәажәоз ҳџьынџьуаҩ ихымҩаԥгара.

© Foto / Предоставлено Тамером Ешба
Ҭамер Ешба Ҭырқәтәыла иҭаацәа ахьынхо ақыҭа Ҭагәареқь

Иазгәасҭарц сҭахуп, иара иаб иашьа иԥа Шамиль Ешба Аԥсны Аџьынџьтәылатә еибашьра дшалахәыз, иԥсадгьыли иуаажәлари бџьаршьҭыхла ишихьчаз, ишихьчаз ҳхақәиҭра, аҭынч ԥсҭазаараҟны ҳанхарц-ҳанҵырц, ҳаԥсадгьыл аԥсуаа рыла иҭырҭәааны иҟаларц азы.

Иара убас шәаԥхьар ҟалоит:

196

Ҳақан Папба: сыԥсадгьыл аҿоуп сыԥсы ахьҭоу, суаҩынаӡаны схы ахьызбо

26
Ҳџьынџьуаҩ Ҳақан Папба иҭоурыхтə ԥсадгьыл ахь ихынҳəреи игəҭахəыцрақəеи ирызку анҵамҭа ажурналист Сырма Ашəԥҳа ланҵамҭаҿы.

Сырма Ашәԥҳа, Sputnik

Ҭырқəтəыла, Белеџьықь иаҵанакуа Сарынч ақыҭаҿы инхон забдуцəа рџьынџь ахь ихынҳəыз Ҳақан Папба иеиҳабацəа. Ҳақан иабшьҭра Ҭырқəтəыла даара зыхьӡ нагаз уаан. Дара усҟантəи аамҭазы Ҭырқəтəылатəи аҳəынҭқарра напхгара азҭоз Қьемал-Мысҭафа Аҭаҭиурк идгылаҩцəан, ихьӡ зху амедалқəагьы ранашьан, ражəа акрыԥхылнадон, иуаа нагақəан.

© Foto / Ҳақан Папба иархив
Ҳақан Папба иабду Мураҭ Папба

"Сара сабдуцəа Аԥсны Ҵабал иҭыҵқəаз иреиуоуп. Изларҳəо ала, Аԥснынтə усҟан Папбақəа Ҭырқəтəылаҟа ирыцыхҵəаз аԥсуаа рхыԥхьаӡара 500-ҩык инареиҳауп. Усҟан ақыҭа ахьӡ азҭазгьы ишьақəзыргылазгьы сара сабду иаб иоуп. Иара Сулеиман ихьӡын, 123 шықəса ниҵит, даара дшəарыцаҩ бзиан, зхымҭа камшəақəоз дреиуан", - ҳəа ажəабжьҳəара дналагеит Ҳақан Папба.

Ҳақан Папба ихаҭа диит Анкара ақалақь аҿы. Иаб Гази Папба иусура аганахьала иқыҭа ааныжьны уахь диасыр акəхеит. Ҳақан иан Арӡынԥҳауп, Леман лыхьӡуп, лыԥшəмеи лареи аҵарадырра ҳаракы змоу ахшара рацəа рааӡеит.

© Foto / Ҳақан Папба иархив
Ҳақан Папба иаб Гази Папба

"Ҳара ҳҭаацəара дууп, фҩык аишьцəеи хҩык аиҳəшьцəеи ҳаҟоуп, хашьцəа руаӡəк дҳаԥхахьеит. Ҳани ҳаби аҵарақəа ҳдырҵеит, еиуеиԥшым азаанаҭқəа ҳнапы рылакуп, иҟоуп азиндырратə усбарҭаҿы аус зуа, аҳақьым изаанаҭ змоу, аекономика аус иаҿу уҳəа. Саҳəшьцəа руаӡəк Англиа дынхоит, уаҟа аҭаацəара далоуп, лыԥшəма дҟабардоуп. Саб иԥсҭазаара далҵхьеит, сан лыԥсы ҭоуп, лықəрагьы такəы инаскьахьеит", - дҳацəажəон ҳџьынџьуаҩ.

Ҳақан Папба занааҭла механик-нџьныруп, абар уажəшьҭа шықəсқəак инарзынаԥшуеит Очамчыра ақалақь арацəа аус ахьадыруло афирмаҿы аус иуеижьҭеи.

"Сара зныкгьы сгəы меиҭасӡац Аԥсныҟа сахьааз. Сыззыԥшыз ари ахҭыс ҟалеит 2013 шықəса рзы. Ҩыџьа арԥарцəа сымоуп, руаӡəк Аҟəатəи аҩбатəи ашкол далгахьеит, Аԥснытəи аҳəынҭқарратə университет жəларбжьаратəи аизыҟазаашьақəа рҿы аҵара иҵоит, аиҵбы макьана ашкол дҭоуп, аабатəи акласс аҿы аҵара иҵоит. Аолимпиадақəа рҿы изныкымкəа аԥхьахəқəа игахьеит сԥа еиҳабы, даара сгəы еизнарҳауеит уи", - ҳəа азгəеиҭоит Ҳақан Папба.

Ҳақан Папба иԥшəмаԥҳəыс Ҟрымтəуп, ҭаҭар ҭыԥҳауп, аԥсуара аҵасқəа бзиа ибаны издызкылаз ԥҳəызбоуп, ԥсыуа ҭацак ишлықəнаго еиԥш лхы мҩаԥылгоит. Лысасдкылара зеиԥшраз иаразнак избарҭахеит уи аҽны дара ахьынхоз Маҷара аҳабла санаҭаа, лхы-лҿы еихаччо лчеиџьыка лнапы иқəыргыланы данысԥыла.

© Foto / Ҳақан Папба иархив
Ҳақан Папба иабдуи иашьцәеи: Мураҭ, Шьуаԥ, Еҭым Папаа

"Сара шьала-дала сшаԥсыуаз еиҳагьы агəра згеит сыԥсадгьыл ахь санаа амш инаркны. Саб иан Фаҳриа лыхьӡын, Беиаԥҳан. Сан лан Кəыџԥҳан, Хьымараса лыхьӡын. Урҭ рхаан иҟаз аамҭа даҽа аамҭан, хааралеи бзиабаралеи еибаркын, ргəы-рыԥсы иахылҵуаз раԥсшəа агьама хазын, урҭ аамҭақəа цəгьа ихьаазгоит. Ихьаазгоит иара убас сгəы ишаҭаху еиԥш аԥсышəала сахьзымцəажəо, избанзар ақалақь ду аҿы исызҳауан, рацəак аԥсшəа ахьумаҳауаз", - иҳəеит Ҳақан Папба.

Ҳџьынџьуаҩ Ҳақан Папба акыр дазгəыдуны иазгəеиҭеит ишьыжьшара Аԥсынтəыла иахьалаго, ихəларагьы убас. Адоуҳамч ду инаҭоит Ҵабал ашьхақəа дырҿаԥшуа дахьынхо.

"Сыԥсадгьыл аҿоуп сыԥсы ахьҭоу, суаҩынаӡаны схы ахьызбо. Сара сусура аганахьала атəым тəылақəа рҿы аус зухьеит, атəым милаҭ срыланхахьеит. Узбекисҭан 23 шықəса сыҟан, убас еиԥш Ҟазахсҭангьы. Ашьыжьтəи аҳауа араҟа даҽакуп. Хəыцрашəкы санеимарымкуа ыҟаӡам. Зны-зынла сыхшыҩ аҟны иааиуа асахьақəа лабҿабоушəа исыдыскылоит. Издыруада сандуцəа сабдуцəа абни аҭыԥ аҿы инхозҭгьы, издыруада урҭ рыҽқəа ирықəтəаны абнаҟа имҩасуазҭгьы, издыруада рмаҵураҭаҭыԥ абнаҟа иҟазҭгьы, рылҩаҵə уантəи иҩеиуазҭгьы, издыруада?.." - игəҭахəыцрақəа ҳацеиҩишон Ҳақан Папба.

Иара зегь раԥхьа иргыланы иҭахуп ихшара ԥсыуа ҵасла иааӡазарц, рхатəы бызшəа рдыруазарц, араҟа рышьаҭа еиздырҳарц. Убри аҟынтə иазиӡбеит наӡаӡа иԥсадгьыл ахь иҭаацəа иманы даарц, иагьыҟаиҵеит. Дынхоит Гəылрыԥшь араион Маҷара аҳаблан, ҳҳəынҭқарра ахарџь ала ҷыдала ҳџьынџьуаа рзы идыргылаз анхарҭаҩнқəа руак аҿы.

Ҳазҭагылоу аамҭазы Гəылрыԥшь араион аҿы иҟоуп ф-ҳаблак ҳџьынџьуаа хьынхо, иааидкыланы дара 360 ҭӡы ыҟоуп. Маҷара аҳаблан акəзар, иҟоу аҩнқəа инарҷыданы, даҽа хыҩнык рыргылара иаҿуп, 150-ҭӡы ҳџьынџьуаа ахьынхаша. Уажəазы Маҷара иҟоу анхарҭа ҩнқəа рҿы 55 ҭӡы ыҟоуп.

"Сашьцəеи сареи ҳаибадырит, аибабара ҳабжьоуп. Ҳабдуцəа ирыхҭысыз шьарда ыҟоуп, иаҳдыруа аасҭа иаҳзымдыруа еиҳауп. Аҭоурых дыртəуп, иҭҵаалатəуп, уи уаҵəтəи ҳара ҳԥеиԥш ауп", - ҳəа азгəеиҭеит Ҳақан Папба ҳаиҿцəажəараҟны.

Аҳəаанырцə инхо ҳџьынџьуаа рзы Ҳақан Папба ииҳəо акоуп - зегь раԥхьаӡа иргыланы ирымазароуп агəаԥхара, анаҩс ицəырҵуа азҵаарақəа рыӡбара еиҳа имариоуп. Аԥсныдгьыл знык зшьапы ықəзыргылаз, знык араҟа аӡы иаҿыхəаз наӡаӡа датəнатəуеит, уи ус шакəу агəра игоит ҳџьынџьуаҩ Ҳақан Папба.

26

Маха Кəыџба: Аԥсны сара схьаауп, сгəыӷроуп, слахьынҵоуп

38
2013 шықəса рзы Шьамтəылантəи зҭоурыхтə ҧсадгьыл ахь нхара ҳəа ихынҳəыз Маха Кəыџба лҭоурых ажурналист Сырма Ашəҧҳа ланҵамҭаҿы.

Сырма Ашәԥҳа, Sputnik

Шықəсқəак раԥхьа Шьамтəылантəи зҭоурыхтə ԥсадгьыл ахь ихынҳəыз ҳџьынџьуаа рхыԥхьаӡараҿы иҟоуп Маха Кəыџба лҭаацəа. Лыԥшəма шаԥсыӷуп, Маруан Ҳаӷбаџь-Сафарбеқь. Дара ҩыџьа ахшара рымоуп.

Зыӡбахə сымоу аҭаацəеи сареи ҳаибадырра џьашьатəшəа иҟалеит. Уи аҽны Маҷара аҳаблаҿы инхо ҳџьынџьуаа снарыҿцəажəарц сцеит. Урҭ рахьтə иҟан издырқəоз, иҟан ҿыц сзабадырқəаз. Адəаҿы ҳаидгыланы аицəажəара ҳшаҿыз, ҩыџьа аҷкəынцəа хəыҷқəа наҳавсит, нас иааҭгыланы иҳахəаԥшуа иалагеит.

"Шəызусҭцəада шəара?" - сҳəан снаразҵааит.

"Сара Шьамтəылантəи сааит,-иҳəеит руаӡəк, егьи: - Нхыҵ-Кавказынтə", -иҳəеит.

Шьамтəылатəи ҳаԥсуа ҳəыҷы иҩыза қəрала маҷк диеиҳабын, "аҩныҟа ҳара ҳахь шəымнеиӡои, аҩны сани саҳəшьеи ыҟоуп" иҳəеит урыс бызшəала. Саргьы ажəа исҭеит рыҩныҟа ҳамҩахымҵкəа сшымгьежьуаз.    "Ус акəзар араҟа сышəзыԥшуеит", - иҳəан, иикыз ицыгə хəыҷы аауишьҭын, сааигəара дааины даагылт. 

Адəаҿы сусқəа санрылга, аҷқəын хəыҷы снаицны иҩныҟа сынхалеит. Ашə снасит, аԥшəмаԥҳəыс Маха дҿаԥха-ҿаччо дааҳԥылеит. Заа сзабадырхьаз лԥа хəыҷы иналеиҳəеит сызусҭаз, нас иаразнак дыҩны изыԥшыз иҩыза хəыҷы иахь дылбааит. Аԥсшəақəа анааибаҳҳəа, ҳаиҿцəажəарагьы ҳналагеит. Лара лгəы иаланы иазгəалҭеит лхатəы бызшəала дахьзымцəажəо, аха аҵара дшаҿу.

"Шьамтəыла аԥсуаа рацəаҩны иахьынхоз Берҳаџьам ақыҭаҿы инхон сара сҭаацəа. Аибашьра иахҟьаны ҳаҩнқəа зегьы ҟəыбаса еилажьуп. Аԥсныҟа ҳанаауаз иаҳшəыз ҳцəамаҭəа ада аҩны акагьы ҳзалымгаӡеит. Сара сан Мазоҳ Асрие дедыгьын, араб бызшəа инаваргыланы ҳаҩнаҭаҟны иаҳҳəоз аедыгь бызшəа акəын, убри аҟынтə саԥсшəа хьысҳауп", - лҳəеит Маха. 

Маха Кəыџба ҟазшьала даара иҭынчу, згəы ҭбаау, агəлара-азлара пату зқəу ԥҳəызбоуп. Аҩнтəи аусқəа акыр игəцаракны, лыхшара рнапы рыдкыланы дынхоит лыԥсадгьыл аҿы.

"Иҟалап, Аԥсныҟа ҳаара аибашьра иахҟьазар. Знык ҳаԥсадгьыл ҳшьапы анықəҳаргыла нахыс уажəаԥхьа абра ҳашԥанымхоз ҳəа хəыцра жəпакы сызцəырҵуа иалагеит. Аԥсадгьыл змам ауаҩы дхəаҽуп, уи  еиҳагьы ианеилыскааз уажəоуп. Ҳазҭагылоу аамҭазы сҭаацəеи сареи ҳгəырӷьаҵəа ҳанхоит, ҳанаауаз икаҳҭəаз алаӷырӡ наунагӡа ҳахəаҽуаз џьысшьон, аха ус акəымхеит", - ҳəа азгəалҭоит ҳџьынџьуаҩ.

Маҷара аҳаблаҿы Маха Кəыџба лҭаацəеи лареи нхарҭа ҭыԥла реиқəыршəара ахахьы иагеит ҳџьынџьуаа рыԥсадгьыл ахь рырхынҳəразы Аҳəынҭқарратə еилакы.

"Ауаҩы ауаҩы изы дыхəшəуп. Ҳаԥсадгьыл аҿы инхо ҳауаажəлар убриаҟара ԥхаррала иаҳԥылеит, ҳхьаақəа зегьы ҳхадыршҭит. Ҳаигəылара бзиоуп, ҳаихаҵгылоит, досу излаҳалшо ала аус ҳуеит. Схəыҷқəа духеит, исыцхраауеит, аӡӷаб еиҳабы Ламар 14 шықəса лхыҵуеит, аҷкəын Омар  3-тəи акласс аҿы аҵара иҵоит, Аҟəатəи ашкол интернат дҭоуп", - лҳəеит Маха, аратəи рыԥсҭазаара дахцəажəауа.

Ииашаҵəҟьаны, Махеи сареи ҳаиҿцəажəара ҭырџьманра азызуаз лыԥҳа еиҳабы лакəын. Атəым бызшəақəа акыр дрызҟазоуп, лхатəы бызшəа акəзар, хымԥада аҭыԥ ҷыда ааннакылоит, есааира ицқьаны илҵарц дацклаԥшуеит. Аҩнаҭа аԥшəма иакəзар, аҽны дсықəымшəеит, аусура дыҟан. 

"Ҳара Шьамтəыла ҳанынхоз иҟалап ҳаиҳабацəа ирхыргаз аҭоурых уиаҟара хырҩа аҳамҭозҭгьы. Уажəы уи акыр хьаас иҳамоуп, абазақəа ҳəа иҳашьҭан уаҟа зегьы. Уимоу, "Абаза" рыхьӡырҵон ииуаз асабицəагьы. Убриала атəым милаҭ ҳрылаӡҩарц ҳҭахымызт", - ҳəа азгəалҭеит Маха Кəыџба.

Маха Кəыџба дахьиз аҭаацəараҿы ахшара рацəа ирызҳауан. Быжьҩык аиҳəшьцəеи иашьаки ыҟан.  Аԥсҭазаара убас еиԥш иҳəаақəнаҵеит, рызегьы атəым ҳəынҭқаррақəа рҿы инхоит. Иаҳҳəозар: Италиа, Германиа, Ҭырқəтəыла, Шьамтəыла. Урҭ зегьы иахьа излеигəныҩуа аҭелтə еимадара алоуп. Маха Кəыџба лоуп разҟыс изауз лабдуцəа рџьынџь ахь ахынҳəра. Агəыӷра лымоуп лаҳəшьцəеи лашьеи Аԥсныҟа иаартə еиԥш аҭагылазаашьа роуп ҳəа, насгьы урҭ рахьтə аӡəы идамхаргьы араҟа дынхартə-дынҵыртə дҟалап ҳəа.

Маха ажəа сылҭеит лхатəы бызшəа бзианы ишылҵалак лыгəҭахəыцрақəа еиҳа инарҭбааны исзеиҭалҳəарц. Аха, урҭ зегьы еидкыланы ирхылҵуа акоуп: "Аԥсны - сара сыгəҭыхоуп, сгəырӷьароуп, схьаауп, слахьынҵоуп", - лҳəеит. 

Уи аҽны имҩаԥызгаз аиҿцəажəарақəа ирхылҵыз аԥхарра акыраамҭа исыцуп. Ҩаԥхьа ҳџьынџьуаа рҭоурых зҳəо адаҟьақəа ҿыц еихсыршəшəаанӡа. Маха Кəыџба лҭаацəеи лареи ирзеиӷьаҳшьоит аихьӡарақəа, рыԥсадгьыл аҟны аиҵыҵра, аизҳазыӷьара!

 

38

Емырхәба еиҭеиҳәеит Алакәымҳара ақыҭаҟны имҩаԥысуа аусурақәа ртәы

0
(ирҿыцуп 21:21 23.11.2020)
Гал араион ахада ихаҭыԥуаҩ Беслан Емырхәба арадио Sputnik арубрика "Раионк аԥсҭазаараҟынтә" аҿы еиҭеиҳәеит Алакәымҳара ақыҭаҟны ицо аиҭашьақәыргыларатә усурақәа ртәы.
Раионк аԥсҭазаараҟынтә: Емырхәба Гал араион аҟны аиҭашьақәыргыларатә усурақәа ртәы

"Алакәымҳара ашкол аҟны аусурақәа мҩаԥгатәны иҟоуижьҭеи акыр шықәса ҵуеит. Иҳәынҭқарратәым аиҿкаара ацхыраарала ахыб ԥсахуп, аиҭашьақәыргыларатә усурақәа мҩаԥысуеит ахыбра аҩныҵҟагьы. Быжь-километрак инацны амҩа аҟаҵара азгәаҭоуп Аберқыҭеи Алакәымҳареи рыбжьара, машьынала амҩасра уадаҩуп", - иҳәеит Емырхәба.

Шәазыӡырҩа аудио. Иаҳа инеиҵыху анҵамҭа шәаҳар шәылшоит арадио Sputnik аефир аҟны.

Иара убас шәаԥхьар ҟалоит:

0