Сечиль Аӡынԥҳа

Сечиль Аӡынԥҳа: Аԥсны махəык нхьыдышьшьыргьы Ҭырқəтəыла ргəы днархьуеит

61
(ирҿыцуп 09:59 16.08.2020)
Шықəсқəак раԥхьа Ҭырқəтəылантəи зыԥсадгьыл ахь ихынҳəыз Сечиль Аӡынԥҳа лҭоурых ажурналист Сырма Ашəԥҳа ланҵамҭаҿы.

Сырма Ашәԥҳа, Sputnik

Абар уажəшьҭа фышықəса ҵуеит Сечиль Аӡынԥҳа Ҭырқəтəылантəи Аԥсныҟа нхара дааижьҭеи. Арантə ахҵəара иақəшəаз лабшьҭра Дузџьа иаҵанакуа Амҷқеҩ (Амҷаа рқыҭа) аҟны анхара иалагеит. Аԥсуа шьа иалҵыз, аԥсуара аԥҟарақəа ирықəныҟəо, ҳҵасқəа реиқəырхара акырӡа иазҿлымҳау Сечиль Аӡынԥҳа лаԥсшəа акырӡа ицқьоуп, уи хымԥада изыбзоуроу дхəыҷаахыс ақыҭаҿы дахьеизҳауаз ауп.

"Сара саб иан Саӷариаԥҳан, Селиме лыхьӡын, сан лан Емине лыхьӡын, Ҟарачԥҳан, сара Неџьмеҭҭин Аӡынба сиԥҳауп, сан Кадрие лыхьӡын, Ҟəуруаԥҳан. Ишыббо еиԥш схəыҷы, сызлыҵыз зегьы аԥсацəоуп, аԥсшəа сымҳəар ԥхашьарами", - ҳəа азгəалҭеит Сельчин Аӡынԥҳа илдыруаз аԥсшəа џьашьахəыла саназнеи.

Сечиль дҭаацəароуп, лыԥшəма Аҩӡбоуп. Раԥхьа Аԥсныҟа иааз лыҷкəын иоуп, иара араҟа ахəыҷы даниоу лмаҭа дылбаразы дааит, нас Ҭырқəтəылаҟа уск азы деиҭацеит, ашьҭахь зынӡа нхаразы иааит лыԥшəма Мемдыхə Аҩӡбеи лареи.

"Сыҷкəын иҭаацəа иманы Ҭырқəтəылаҟа дхынҳəит. Арахь данаауаз ус гəҭакыс имамызт, аха Аԥсны иҽеимыз аҭагылазаашьақəа дрықəшəеит, иахьысҳəо ԥхашьаразаргьы аԥсра дахыԥеит, бааԥсыла дрыпҟеит, ахəышəтəырҭагьы дҭашəеит, ара адəқьан аҟны аус иуан. Ашəарҭадара азҵаара еиԥш, азакәанқəа аус руроуп, Аԥсны ԥхьаҟа ицароуп, абааԥсы. Уи азы ҳаԥсадгьыл ҳацəгəаар ҟалома, уадаҩрак ҟалазаргьы аҭыԥ иқəлап, ҳара еилаҳкаароуп Аԥсны ҳара ҳаԥсадгьыл шакəу, иқəынхо ауаа ҳара ҳауаажəлар шракəу", - лҳəеит Сечиль Аӡынԥҳа.

Ҭырқəтəыла Сечиль дахьынхоз ақыҭа Амҷқеҩ иара ахьӡ ишаҳəо еиҧш, ишьақəзыргылаз Амҷаа роуп, инхо аҧсуа жəлақəагы маҷым. Даара рхатəы бызшəа бзианы ирдыруеит аиҳабацəа, аҿаргьы ирдыруа аԥсуа бызшəа ҟəнушьартə иҟам.

"Сқыҭа дааара иԥшӡоуп, сара схəыҷра зегьы уа исхызгеит. Сыԥшəма Гəыма деиуоуп. Ҳанду аҭырқəа бызшəа ҳҳəар луӡомызт, ҳалшьуан, аԥсышəа мацарала ҳцəажəон. Сара саҳəшьа ашкол ахь дцаанӡа аҭырқəшəа лыздырӡомызт зынӡак, ашкол даналга илхыччон аҭырқəшəа ахьылымҳəоз. Ҳанду рыцҳа аԥсыуала ҳлыркəашон, даара лнапы ҟазан, даашьаӡомызт, дықəҵон, дхахон, дԥон, иаалзымдыруаз акы ыҟамызт. Лыҩнтəи лусқəеи лнапҟазареи еидылбалон, агəамҵра захьӡыз лааигəа иҟамызт", - дҳацəажəон Сечиль Аӡынԥҳа.

Сечиль Аӡынԥҳа излалҳəо ала, ландуцəеи лабдуцəеи Аԥсны аӡбахə еснагь иалацəажəалон, рыхшареи рмаҭацəеи ашҭырқəцəам, ишаԥсацəоу рарҳəон. Амҳаџьырра аамҭазы Аԥсны ихырҵəаз аԥсуаа ишыруаӡəкыз рзеиҭарҳəон, акыр аџьабаа шырхыргаз атəы иазааҭгылон.

"Дара еиҭарҳəон, ҳара ҳарзыӡырҩуан, аха лакəҵас акəын ишҳадаҳкылоз. Ҳдухар Аԥсныҟа ҳцоит ҳҳəон, аха аиаша шəасҳəап, досу иара ихатə насыԥ имазаап, мчыла акагьы узыҟаҵом. "Аԥсныҟа баара шԥаҟалеи?" - ҳəа бнасазҵаар, ишаԥшьызгазгьы сызбаҳəом. Ҩыџьа аԥацəа сымоуп, Енгини Ермани, сгəыӷуеит ргəы хьаԥссаны ишԥамаари ҳəа. Знык аратəи аԥшӡара ихнахыз дмаар иуӡом", - лыгəҭахəыцрақəа дырзааҭгылон Сечиль Аӡынԥҳа.

Аԥсны имҩаԥысуа ахҭысқəа аҳəаанырцə инхо аԥсуаа еснагь ирызҿлымҳауп. Араҟа ҵлак амахə хьыдышьшьыргьы уаҟа ргəы днамырхьырц залшом. Атəымџьара ахеиқəырхара акыр ишыуадаҩугьы, ҳџьынџьуаа ирылдыршеит амилаҭтə хдырра аиҷаҳара.

"Аԥсуа чеиџьыка ҳахьцалак иҳацын. Ишыжəдыруа еиҧш, уа еиҿкааны иҳамоуп ҳкультуратə хəышҭаарақəа. Аҭырқəцəагь анҳазнеиуаз ыҟан, ирбааит, ирҵааит иҟаҳҵақəо ҳəа. Аҭырқəцəа аԥсуаа даара пату ҳақəырҵоит, ҳарҭ ҳгəаӷь ӷəӷəами, иагьҳацəшəоит, ҳажəа ус баша ишкаҳмыршəуа рдыруеит. Ҳаԥсуара ҳара пату ақəҵаны иҳамоуп, аҭырқəцəагьы пату ақəырҵоит", - лҳəеит Сечиль Аӡынԥҳа.

Сечильи сареи ҳаиҿцəажəара акыр ажəытə аамҭахь ҳхьанаршит. Лара гəыблыла илгəалалыршəон дызхааныз аиҳабацəа рхымҩаԥгара, урҭ анааидтəалоз ахьхьа-џьџьаҳəа реицəажəара.

"Санду Ҟараҷԥҳа Емине даара амырзакан бзианы иалырҳəон, агəаҟ ашəақəа анылымҳəоз ыҟаӡамызт лылаӷырӡқəа лҿаҳəҳəы. "Бзырҵəыуозеи нанду?" - ҳəа ҳлыдгьежьылон. "Еҳ, шəара шəхəыҷқəоуп, нас шəдухар еилышəкаара шəыҟоуп", - лҳəалон. Сара сабду иаб иоуп Аԥснынтə ихҵəаз. Сабду иаб Гьаргь ихьӡын, абзыԥқəа рҟынтə ауп дышцаз ҳəа иаҳдыруа, хықəкыла иарбан қыҭоу дызлыҵыз сыздыруам. Ҭырқəтəыла, Амҷқеҩ инанагеит, уаҟа анхара иалагеит", - ҳəа азгəалҭеит Сечиль Аӡынԥҳа.

Ҭырқəтəылаҟа ихырҵəаз аԥсуаа егьа џьамыӷəа цəгьа рхыргазаргьы, ашықəсқəа анца, аамҭақəа рҽанеиҭарк аҵарадыррахь рхы дырхеит, аусурҭа бзиақəа рҟны аусура иалагеит. Ҭырқəтəылатəи Ареспублика аполитикатəи ауаажəларратəи ԥсҭазаараҿы зыхьӡ нагоу, зажəа акрыԥхылнадо ракəны иҟалеит. Уи ус шакəу арҵабыргуеит хаҭала ҳара ҳазԥылахьоу ҳзыҿцəажəахьоу ауаа.

"Аԥсуара ҳахьцалак иҳацуп. Сара сани саби сабду дахьыҟаз зынӡагьы ицəырымҵӡеит, сан сабду димацəажəаӡакəа дыԥсит сабду, сан данажəгьы сабду иҟны аҭацара ҟалҵон. Ҳарҭгьы иаҳбаз ауп иҟаҳцоз ҳазланагалаз аҭаацəа рҿы. Санхəа лааигəара стəаны акаҳуа зжəит захьӡузеи, уи қьафуроуп ҳəа иԥхьаӡоуп, иԥхашьароуп. Сабхəа иҟны стəаӡомызт, сиацəажəаӡомызт, ҳаиҳабацəа ус ҟарҵон, ирҿаҳҵааз акəын ҳарҭгьы иныҟəаҳгоз. Уи акыр уарԥшӡоит", - лҳəеит Сечиль Аӡынԥҳа.

Досу иара ихатə усқəа имоуп, аибабаразы аамҭа маҷуп. Аха, егьа ус акəзаргьы, Сечиль излалҳəо ала, рыжəлантəқəеи дареи еибабоит, еидтəалоит, еидгылоит. Хымԥада, иарбан усзаалак аҳəынҭқарратə ҟазшьа амазароуп. Зыԥсадгьыл ахь ахынҳəра зҭаху аҿар маҷҩым, аха ишахəҭоу еиԥш иҳəаақəҵатəуп, азакəанқəа аус руроуп.

Сечиль Аӡынԥҳа аус луеит Аӡҩыбжьа ақыҭаҿы ауҭраҭыхааӡарҭа "Фруктис" аҟны директор хадас. Лус бзианы илыцааиуеит, аҭыԥантəи аԥсуааи лареи рҳəоу еиқəшəаны аус еицыруеит. Зегьы ирыцкуп лыԥсадгьыл аҿы бзиа ибаны дахьыҟоу, араҟа лхатə ҭыԥ ахьылыԥшааз.

61

Гәыла-ԥсыла Аԥсны иамадаз: Џьамалеҭҭин Арӡынба игәалашәара иазкны

78
(ирҿыцуп 13:42 01.10.2020)
Ҭырқәтәыла инхоз ҳџьынџьуаҩ, зыԥсадгьыл аҿаԥхьа зылшамҭақәа ҳараку Џьамалеҭҭин Арӡынба игәалашәара аҳаҭыразы ажурналист Сырма Ашәԥҳа диҿцәажәеит ауаажәларратә усзуҩ Октаи Ҷкотуа.

Сырма Ашәԥҳа, Sputnik

Џыр иԥацәа ирхылҵшьҭроу, амҳаџьырра аамҭазы забацәа Аԥснынтә Ҭырқәтәылаҟа ихырҵәаз Џьамалеҭҭин Арӡынба аԥсҭазаара гәылырҭәааны дахысыртә еиԥш ҳазшаз Анцәа иаҭәеишьеит. Зажәеи зуси еибагаз, зыхшыҩҵак ҵаулаз, ҳажәлар рыцәгьеи рыбзиеи зхьааз, ҭоурыхтә хҭыск зыбжьы ақәыргамкәа иаанызмыжьуаз, Аԥсни Ҭырқәтәылеи реимадара аус аҿы зџьабаа ӷәӷәаз ауаҩы лаша дахьҳагхаз даараӡа ихьаауп. Аԥсабара иланаҵаз аҟәыӷара инаваргыланы, абаҩхатәразгьы дхәыдамнатәит, зеиӷьыҟамыз ҳақьымын, даара уаҩы аамысҭашәан.

Хаҭала ибзианы исгәалашәоит Џьамалеҭҭин Арӡынба аҭоурыхтә хҭысқәа ирыдҳәалаз аизарақәа рҿы иқәгыларақәа, аԥсышәа цқьала ицәажәара. Убас еиԥш, шықәсқәак раԥхьа ҳтәылаҿы имҩаԥысуаз Адунеизегьтәи аԥсуа-абаза жәлар рконгресс аҟны Џьамалеҭҭин Арӡынба иуаажәлар рҿаԥхьа абас еиԥш иҟаз ахшыҩҵак ааирԥшит:

"Иахьа абра ҳаизызгаз амч, Аԥсназы аԥсуаразы ҳгәы иҭоу агәыбылра иахылҵуа амцабз ауп. Анцәа ду убас сазиҳәоит, абри ҳазлоу аԥсабара еилабгаанӡа ҳгәы иҭоу абри агәыбылра амцабз ҿымцәааит. Аԥсни аԥсуааи еигымхааит, еиԥымхааит. Аԥсуа иԥсҭазаара мҩаԥигарц абри аԥсабараҿы дгьылс имоу Аԥсноуп, убри азы иахьа уажәраанӡеиԥш, уажәы нахысгьы аԥсуа иԥсадгьыл иԥсы ақәҵаны ихьчеит, ихьчараны дыҟоуп, дахыбаамхааит", - ҳәа азгәеиҭеит Џьамалеҭҭин Арӡынба.

Забацәа забдуцәа зныҵыз Аԥсадгьыл аԥеиԥш еснагь гәыҵхас измаз, уи аизҳазыӷьара еснагь иазықәԥоз, еиҵагылоз абиԥарақәа забжьгарақәа рымаздоз Џьамалеҭҭин Арӡынба ҳҭоурых ишьҭа азынижьит, иааԥсара шьарда ыҟоуп.

© Foto / Ахмет Хапат
Рушьбеи Смыр, Џьамалеҭҭин Арӡынба, Аҳмеҭ Ҳапат, Сҭампылтәи аԥсуа культуратә хеилак ахыбраҿы

"Аԥсуа, аԥсабараҿы иқәынхоз зегьы ауаҩра дирбеит. Аԥсуа даҽа фырхаҵаракгьы ҟаиҵеит. Аҳәаанӡа даннеигьы, аԥсуа шьаҿак аҳәаа дахымсӡеит. Избанзар, аԥсуа иԥсадгьыл ӡакы аӡәы ииҭар шиҭахым еиԥш, тәым дгьыл ӡакы иара егьиҭахым. Аԥсуа иԥсадгьыл иара изхоит", - абас еиԥш ихәыцрақәа ҳзынижьит Џьамалеҭҭин Арӡынба.

"Жәытә-натә аахыс ҳажәлар раԥхьа игылаз аиҳабацәа дыруаӡәкуп. Аԥсны Аџьынџьтәылатә еибашьра ианалага, Аԥсны адгыларазы Кавказтәи акомитет анаԥырҵа, убра активла далахәын. Усҟан напхгара азҭоз Аҭаи Ацәышба инаҩс, иара иакәын аиҳабра азызуаз. Арҭқәа зегьы машәыршақә иҟалаӡом, ҳмилаҭ рҟазшьа аҷыдарақәа ҳамдыруеи, уаԥсамзар, иухәҭамзар, уи аҩыза аҭыԥқәа рҿы уала-ҭахыла узнеиӡом, уи уаԥсазароуп. Шамиль ифонд ҳәа иаԥҵазгьы акыршықәса еиҳабыс даман, аԥсуа-адыгьақәа еидызкылоз хеидкылоуп", - иҳәеит аиҳаб ду дигәаларшәауа Октаи Ҷкотуа.

Џьамалеҭҭин Арӡынба Аԥсны гәыла-ԥсыла дамадан. Иқәгыларақәа, ицәажәарақәа, инапы иҵиххьаз аусумҭақәа акырӡа рҵакы дууп, уи умбарц зылшом.

"Аԥсуа зны ақәылара дақәшәеит, аԥсуа хыԥхьаӡарала дмаҷын. Абџьар имамызт, амаҭәахә имамызт, аибашьра дазыҟаҵаӡамызт. Ҳаӷагьы убри дақәгәыӷны ауп дызҳақәла. Аха, ҳаӷа изымдыруаз аԥсуа бџьар дук иман - ҳаԥсадгьыл агәыбылра. Аԥсуа убри амч ихы иархәаны иаӷа диҿагылеит, ишьамхы арсны диабашьит. Нхыҵ-Кавказаа ҳашьцәа, иара убас егьырҭ аҳәынҭқаррақәа рҟынтәи ацхыраара ҳарҭеит, иҭабуп ҳәа раҳҳәоит. Убарҭ рҟынтәи иҭахақәаз ҟалеит, рызегьы рахраҭ бзиахааит, хашҭра рықәӡам", - ҳәа азгәеиҭахьан Џьамалеҭҭин Арӡынба иқәгыларақәа руак аҿы.

© Foto / Ахмет Хапат
Џьамалеҭҭин Арӡынба Сҭампылтәи аԥсуа культуратә хеилак ахыбраҿы

"Аԥсуара нарҵауланы идыруан, дҟәыӷан, аҵара ду иман, еицырдыруаз ҳақьымын. Ииҳәашаз идыруан, иажәа наӡон, убри азы ҳажәлар есымша раԥхьа ддыргылон. Ҟазшьала зегьы дырзааигәан, ахәыҷы ила дхәыҷхон, аҿар дрыдтәаларгьы дара ртәы аҳәашьа дақәшәон, аиҳабацәа усгьы дырҩызан, ажәакала зегьы дырнаалон. Цәыӡ дууп даараӡа дахьҳагхаз абас еиԥш иҟаз ауаҩы лаша", - ҳәа азгәеиҭеит Џьамалеҭҭин Арӡынба ибзианы дыздыруаз Октаи Ҷкотуа.

Октаи Ҷкотуа излаиҳәо ала, Џьамалеҭҭин Арӡынба еиԥш иҟоу ауаа изыԥсоу нагӡаны еилаҳкаанӡа, ирылоу ҳазрылхаанӡа инаҳампыҵаӡаа ицоит абас. Џьыр иԥацәа рхылҵшьҭра Ԥсхәы иҭыҵқәаз роуп, аԥсуа гәаӷь зызҭоу, зыламыс ҳараку уаауп.

"Џьамалеҭҭин Арӡынба ихылҵшьҭра еихазҳаша аҵеира имоуп. Ҳазшаз илахь ианиҵаз ашықәсынҵыра ԥшӡаны ихигеит, даԥсыуаҵәҟьан. Ҭырқәтәыла, Гәыма ақыҭахь уанхало аԥсыуа қыҭак ыҟоуп, Џьамалеҭҭин Арӡынба иабду иакәын иаԥызҵахьаз, ажәытә уаҟа акәын иахьынхоз", - иҳәеит Октаи Ҷкотуа.

Ауаҩ хатәра, ауаҩ нага, зыхьӡи-зыԥшеи ҳаракыз Џьамалеҭҭин Арӡынба еснагь аныҳәаԥхьыӡқәа ицын, икәгыларақәа рҟны ҳажәлари ҳаԥсадгьыли рԥеиԥш дақәныҳәон, Аԥсадгьыл ҳаиднакыларц гәаҳәарас иман, уи иԥсҭазаара иагәылсуаз цәаҳәаҟаԥшьын.

Џьамалеҭҭин Арӡынба
© Фото : Ahmet Hapat Ceylan
Џьамалеҭҭин Арӡынба

"Ҳара ҳшамкәа ҳазшаз, ацәгьеи абзиеи, аԥшӡеи агәымхеи еиԥшны иаҳзызшаз, еиӷьу иԥшӡоу алхны аныҟәгаразы ахи ахшыҩи ҳазҭаз Анцәа ду, уажәынахыс, ҳажәҩахыр ааидкыланы ҳамч еибаҳҭо, ҳхы еидкыланы ҳгәаанагарақәа еимаҳдо, гәала ҳаманы ҳгәыхь ҳаламцәажәо, гәахәа ҳаманы ҳгәырӷьарақәа еиҩаҳшо, ҳаагәыдибакыланы ҳаибабара Анцәа ду ҳразҟы иалеиҵааит. Хаигымхааит, ҳаиԥымхааит!", - абас еиԥш Џьамалеҭҭин Арӡынба иныҳәаԥхьыӡ ҳара ҳҟынӡагьы иааӡеит.

Аԥсуа патриот ду Џьамалеҭҭин Арӡынба идунеи иԥсахит 88 шықәса дшырҭагылаз. Анышә дамардеит Ҭырқәтәыла, Дузџьа иахьаҵанакуа. Аԥсадгьыл аҿаԥхьа илшамҭақәа наунагӡа хашҭра рықәымкәа иаанхоит, игәалашәара лаша ҳацзаауеит.

Иара убас шәаԥхьар ҟалоит:

78

Аисель Агрԥҳа: Шьамтəыла сынхоны схаҿгьы исзаагом

111
Сахьалеи гəаҭалеи иԥшӡоу Шьамтəылантəи иааны зыԥсадгьыл аҿы инхо ҳџьынџьуаҩ Аисель Агрԥҳа длыҿцәажәеит ажурналист Сырма Ашəԥҳа.

Сырма Ашəԥҳа, Sputnik

Ҳазҭагылоу аамҭазы агəахəара ду унамҭарц залшом аҳəаанырцəынтəи зҭаацəа ирыцны наунагӡа зџьынџь дгьыл ахь нхара ҳəа иааз аҿар рыӡбахə ануаҳауа. Аҭыԥантəи рҩызцəеи дареи рҳəоу еиқəшəаны, ахəыҷбаҳчақəеи ашколқəеи рҟны арҵаҩцəеи ааӡаҩцəеи ирыбзоураны рхатəы бызшəа рҵоит, уи ҳəарада аԥсҭазаараҿы даара анырра бзиа рнаҭоит. Убас еиԥш, хатəгəаԥхарала ҳџьынџьуаа рынхарҭа ҭыԥқəа санырҭаауа ыҟоуп, срыҿцəажəоит аиҳабацəа, иара убас рыхшара. Уимоу, иҟоуп ахəыҷқəа рҭаацəа аҭырџьманра анырзыруа, уи сусура акыр иацхраауеит.

Убас еиԥш, ааигəа ссасны сызҭаз Аграа рҭаацəара рыхшара акыр иҿырԥшыгоуп, акыр сыхнахит раԥсшəаҳəашьа, рхымҩаԥгара. Раб сиҿцəажəонаҵы, ҿымҭкəа иҳадтəаланы иаҳзыӡырҩруан, аиҭагара аганахьала џьара ак ҳҭаххар, иҳацхраауан. Аиҳəшьцəа реиҳабы Аисель лакəзар, зегьы азҿлымҳара рылҭон, лхаҭа дызхасазҵаауаз рацəан, лыԥси-лыԥси еихьымӡо дгəырӷьаҵəа иазгəалҭон Аԥсныҟа лҭаацəа дрыцны нхара ҳəа раара залыршамхар, Шьамтəыла лыԥсҭазаара лхаҿы ишылзаамгоз. Лхəыцрақəа дыргəыларԥшуа лҿанаалха, ҳаҭыр зқəу аԥхьаҩцəа, шəара шəҿынӡагьы лыбзарӡы назгарц сҭаххеит.

"Сара аашықəса ракəын исхыҵуаз Аԥсныҟа санааз. Аԥсшəагьы аурысшəагьы ак сыздыруамызт, араб бызшəа ада. "Иҭабуп", "Аԥсны", "аԥсуа" - абас еиԥш иҟаз аԥсышəала имариаз ажəақəа сҳəон, избанзар саб Шьамтəыла ҳанынхоз исирҵахьан. Ҳара ҭаацəала Аԥсныҟа ҳанааз, ӡынран, ҳаԥсадгьыл аԥшӡара атəы зҳəоз асахьақəеи ажəабжьқəеи саб иеиҭаҳəамҭақəа рыла иаҳдыруан, схəыҷын, аха агəра ганы сыҟан ишысгəаԥхоз", - абасала ҳаиҿцəажəара ҳацҳаркит Аисели сареи.

Аисель Агрԥҳа Баграт Шьынқəба ихьӡ зху Аҟəатəи актəи абжьаратə школ аҟны аҵара лҵон, ахəбатəи акласс аҿы ддыртəеит. Лара излалҳəо ала, даара илцəыуадаҩын аҽаршьцылара, уаҩ длыздыруамызт, абызшəа лызҳəомызт, аха аамҭа цацыԥхьаӡа иубарҭан аҭагылазаашьа абзиара аганахьала аҽшаԥсахуаз.

"Сҩызцəа зегьы сџьашьаны исыхəаԥшуан, дареи сареи бызшəала ҳахьзеилыбамкаауаз ҳаицəыхаразшəа сзааиуан. Хəыҷы-ҳəыҷла абызшəақəа рҵара салагеит, анаҩс избарҭахеит сҩызцəеи сареи аԥхарра шҳабжьалаз, агəрагьы згеит, сҿаԥхьагьы ахықəкы ықəсыргылеит абызшəа адырра шхымԥадатəиу. Аурысшəа еиҳа имарианы исыцааиуан, аԥсуа бызшəа аҵаразы иҷыдоу акурсқəа сырхысуан, Анцəа иџьшьаны, қəҿиарала 11-тəи акласс асыркит", - ҳəа азгəалҭеит Аисель Агрԥҳа.

Аисель иаҳəшьаки иашьаки лымоуп. Урҭгьы лара дызҭаз ашкол аҿы аҵара рҵон. Лаҳəшьа хəыҷы ҿыц ашкол ахь данца, даара ахаҵгылара лырҭон, лурокқəа рыҟаҵара илыцхраауан, џьара аӡəы диргəаар руӡомызт, абаагəареиԥш илыдгылан.

"Сашьа ажəбатəи акласс даналга ашьҭахь, асахьаркыратə ҵараиурҭа дҭалеит, қəҿиаралагьы далгеит. Сара афилологиатə факультет алысхит, Аԥснытəи аҳəынҭқарратə университет аҿы аҵара сҵоит. Даара сҩызцəеи сареи ҳаинаалоит. Аиаша шəасҳəоит, Аԥсны сара сзы ихазыноуп, убас еиԥшҵəҟьа сырзыҟоуп аԥсуаа. Шьамтəыла ҳаныҟаз саб иаҳзеиҭаиҳəалоз ажəабжьқəа лабҿаба ҳрықəшəаҵəҟьама ҳəа агəра анысзымго ыҟоуп", - лгәы хыҭхыҭуа дҳацәажәон Аисель Агрԥҳа.

© Foto / Сырма Ашуба
Аисель Агрԥҳа лҭаацәеи лареи

Ауаҩытəыҩса иԥсҭазаара аԥхыӡ еиԥш ианымҩасуа ыҟоуп. Аисель лҿырԥшала иубарҭоуп, агəрагьы угоит угəыӷрақəа анынаӡо еиҳау насыԥ шыҟам.

"Сара саб Аԥсадгьыл ахьчара дахьалахəыз сгəы дууп. Урҭ ртəы зҳəо асахьақəеи ианашьоу аҳəынҭқарратə ҳамҭақəеи лассы-лассы ицəырганы ҳрыхəаԥшуеит, ҳаҟара ҳацнаҵоит. Сабгьы игəы иахəоит ус ҳхы анымҩаԥааго. Сан дарабуп, аха саб иалихыз амҩа дацəхьамҵӡеит, лхы анрааланы, дарӷьажəҩаны дивагылоуп. Маҷара ҳахьынхо ҳгəылацəеи ҳареи ҳаизыразуп. Сан араб чысқəа рыҟаҵара бзиа илбоит, ҳгəылацəа еснагь агьама дҳарбоит, даргьы бысҭак рур, ҳхəы аарҭиуеит. Аԥсуа чысқəа рыҟаҵашьа аҵара саҿуп, ҭаацəала бзиа иаҳбоит", - лҳəеит Аисель Агрԥҳа.

Аисель Агрԥҳа излалҳəо ала, лыжəлантəқəеи дареи аимадара рыбжьоуп, аҵара ахьылҵо ауниверситет аҿы еиҳагьы еибаԥшааит, лассы-лассы еибабоит. Аисель ҟазшьала даара еилыҷҷоу, зегьы рдырра иашьҭоу аӡə лоуп. Ауаа рацəажəара, рабадырра бзиа илбоит.

"Ауаҩытəыҩса шаҟа гəыла-ԥсыла бзиа дубо, убриаҟара уаргьы ҩнуҵҟала улашоит. Дара рызегьы еиуеиԥшым - дыҟоуп аӡəы хьаала иҭəу, дыҟоуп гəырӷьарыла имҩасуа. Убарҭ зегьы рҭагылазаашьа еилкааны уанрывагылоу, ухаҭа уамеигəырӷьарц залшом", - ҳəа азгəалҭоит Аисель Агрԥҳа.

Аисель Агрԥҳа, Аԥсныдгьыл лара лҭоурыхтə ԥсадгьылны илыԥхьаӡоит, Шьамтəыла акəзаргьы, зымҩа инлыжьуам, избанзар уаҟа диит, лхəыҷра ашықəсқəа уаҟа илхылгеит.

"Сара сабдуцəа рабдуцəа араҟа анышə иамадоуп. Сара урҭ ирхылҵыз аӡə сакəны Аԥсны сынхартə сахьыҟалаз Анцəа ҭабуп ҳəа иасҳəоит. Убас еиԥш, сан, ҳара ҳаԥсадгьыл Аԥсны шакəыз еилкааны, адгылара ахьҳалҭаз лҿаԥхьа схырхəоит. Сан лҭаацəара дууп, дара ԥшьҩык аишьцəеи, ԥшьҩык аиҳəшьцəеи ыҟоуп. Ианыгəхьаалго, аҭел ала драцəажəоит, аха иҟоуп аимадара аныбзиамгьы. Сан ахаан лылахь еиҵымхкəа дҳамбац, еснагь деихаччоит, уи ҳара даара ҳгəы ҭнагоит", - лҳəеит Аисель Агрԥҳа.

Аисель илыбзоураны, Шьамтəыла инхо лҩызцəа Аԥсны аӡбахə рдыруеит, асахьақəа рзылышьҭуеит, агəаҳəара рымоуп Аԥсныҟа аара. Аԥхьаҟа лгəы иҭоуп Аԥсны иазку авидеонҵамҭақəа ҭыхны аинтернет аҭаҵара.

Аисель Агрԥҳа Аԥсны имҩаԥысуа аҿар злахəу аусмҩаԥгатəқəа дрылахəуп. Гəаҭала дшыԥшӡоу еиԥш, дыԥшӡоуп ҭеиҭыԥшлагьы. Аҭыԥҳацəа ԥшӡақəа реицлабра "Королева Абхазии" далахəын, " авице-королева" (раԥхьатəи) ҳəа ахьӡ даԥсахеит.

© Foto / предоставлено Аисель Агрба
Аисель Агрба

Убри инаҷыданы, Аисель Агрԥҳа Аԥсны имҩаԥысуа асериалқəа рҭыхрахь ааԥхьара лырҭоит, иара убас амодақəа рырбарахь. Ажəакала, лыԥсҭазаара шəыга ԥшӡала еиларсуп.

Иара убас шәаԥхьар ҟалоит:

111

Sputnik апресс-центр аҟны еиҭарҳәоит аԥсуаа рҿы аӡахәааӡара аҭоурых

10
(ирҿыцуп 20:21 01.10.2020)
Жьҭаара 2 асааҭ 14:00 рзы Sputnik Аԥсны амультимедиатә пресс-центр аҿы имҩаԥгахоит Фарид Кәабахьиеи Николаи Ачбеи рышәҟәы "Ажәытәан аԥсуаа рҟны аӡахәааӡареи аҩыҟаҵареи" иазку апресс-конференциа.

Апресс-конференциа иалахәуп:

  • Фарид Кәабахьиа – аҭоурыхдырыҩ, Аԥсуаҭҵааратә институт анаукатә усзуҩ;
  • Николаи Ачба – "Аԥсны аҩқәеи аӡқәеи" адиректор хада.

Амассатә-информациатә хархәагақәа рхаҭарнакцәа ааҳаԥхьоит апресс–конференциахь (аҭыӡҭыԥ: ақ. Аҟәа, Пушкин имҩ. 16, абизнес-центр "Гәдоу Плаза", 5-тәи аихагыла).

Аккредитациа ҟалоит абри аҭел ала: +7(940) 926 00 00

Азыҳәа анашьҭразы аелектронтә ҭыӡҭыԥ: info.abk@sputniknews.com

Иара убасгьы шәара ишәылшоит апресс-конференциа алахәылацәа зинтерес шәымоу азҵаарақәа рышәҭарц Sputnik Аԥсны асоциалтә ҳа Facebook аҿтәи адаҟьаҿы мамзаргьы аелектронтә ԥошьҭахь инашьҭны: info.abk@sputniknews.com

10