Атәым дгьыл ахь ҳақәнаԥсеит: Ерсын Самеихәа иабдуцәа рҭоурых

680
(ирҿыцуп 20:51 16.05.2021)
Ҭырқәтәыла, Инегьиоль ақалақь аҟны инхо, 72 шықәса зхыҵуа ҳџьынџьуаҩ Ерсын Зуҳәҭу-иԥа Самеихәа (Асамаа) иабду иаб Османи, уи иашьцәа Гәыдреи Мусҭафеи, Осман иԥа Ҭалиби амҳаџьырраан Ҵабалынтәи Румелиаҟа иахнагеит. Урҭ ирлахьынҵахаз Ерсын Самеихәа иажәабжь аҿы.

Амҳаџьырра аамҭақәа раан Ҵабалынтәи ихҵәаз аԥсуаа даара ирацәаҩын. Урҭ рхыԥхьаӡараҿы иҟан Самеихәаа рҭаацәарагьы. 188 шықәса раԥхьа хҩык аишьцәа Османи, Мусҭафеи, Гәыдреи, Осман иԥа Ҭалиби Румелиаҟа иахнагеит. 12 шықәса атәым дгьыл аҟны акыр ауадаҩрақәа ириааины, ахацәа рхы рбон.

Саида Жьиԥҳа, Sputnik

Османтәи аимпериаҟны амаҵура дуқәа ныҟәызгоз аԥсуаа рхаҭарнакцәагьы шыҟаз анраҳа, аишьцәа Османи, Мусҭафеи, Гәыдреи Ҭырқәтәылаҟа иааит гәыӷрак рыманы, Аԥсны усгьы зегьы ндырҵәеит ҳәа уахь ихьамԥшкәа. Самеихәаа Инегьиоль ақалақь азааигәара, Мезыҭ ақыҭаҟны анхара иалагеит.

© Foto / предоставила Саида Жиба
Ерсын Самеихәа

"Сеиҳабцәа рҟынтә исаҳахьан, Аԥсны, Ҵабал иаҵанакуаз Мазыҭҟәа ҳәа изышьҭаз ақыҭаҟнытә иқәҵыз роуп ҳәа сабдуцәа. Убри аҟнытә Ҭырқәтәыла нхарҭас ишьҭырхыз аҭыԥгьы уи еиԥшны иахьӡыртәит. Араҟа аамҭала аԥсуа ҭаацәарақәа 120 инареиҳаны инхон. Иуԥылоз ажәлақәа иреиуан Бгаа, Бганаа, Аграа, Ахәсаа, Мқьелиаа уҳәа. Аԥсуа қыҭақәа Аԥснытәиқәа акырӡа иреиԥшын, абнара аман", - иабдуцәа рынхарҭа далацәажәоит Ерсын Самеихәа.

Аишьцәа Ҭырқәтәылаҟа нхара ианаа, Осман иԥа Ҭалиб уажәшьҭа иқәра шәхьан. Хара имгакәа аҭаацәарагьы далалоит, арԥыс динасыԥхоит рқыҭа иатәыз аԥҳәызба Шьаҳа Бгааԥҳа. Дара ԥак дырхылҵит.

© Foto / предоставила Саида Жиба
Ерсын Самеихәа

"Ҭалиб сара сабду иоуп. Иара 38 шықәса ракәын ихыҵуаз Османтәи аимпериа имҩаԥнагоз аибашьрақәа руак аҟны Чанаккале данҭахоз. Ирхыргаз арыцҳарақәа рзымхошәа шәҩыла аԥсуаа аҭырқәа идгьыл рыхьчар акәхеит. Усҟантәи атәыла анапхгара санду Шьаҳа лыԥшәма дҭахеит ҳәа ацхыраара лырҭон лыҷкәын иааӡараҿы. Лара аҟәырҟан ибзианы илдыруан, аныҳәарақәа раан илыԥхьалон, аҵаҩцәагьы лыдылкылон", - ажәабжь иациҵоит амаҭа.

Атәым дгьыл ахь инанагаз Осман иашьцәа руаӡәы Мусҭафа ҩыџьа аԥҳацәа ихшеит, егьи аиашьа Гәыдра дҭаацәарамызт.

Осман иҟынтә иахьа Ҭырқәтәыла Самеихәаа афбатәи рабиԥара еиҵагылеит (Осман – Ҭалиб – Зуҳәҭу – Ерсын – Савашь – Озер). Ерсын дазгәдууны иҳәоит уажәраанӡа аԥсуа шьа еиламгакәа ишааиуа. Ахатәы бызшәа акәзар, Ерсын иҭаацәараҟны иԥеи иԥҳаи ирҳәоит, аха амаҭацәа ирцәыуадаҩхеит.

© Foto / предоставила Саида Жиба
Ерсын Самеихәа

"Атәым дгьыл аҟны даара иуадаҩуп ахатәы бызшәа аиқәырхара. Ҳара ҳхаан ақыҭа еиҳа ҳадҳәалан, уаҟа иҳазҳаит. Иҟан ажәытәуаа рахьтә аԥсшәа ада даҽа бызшәак ззымдыруазгьы. Иахьатәи ҳаамҭазы аҿар ақалақьқәа рахь еихеит, аҵара ашьҭахь аусура иалагеит, анаҩс уаҟа рынхара еиҿыркааит, ҳаҷкәынцәа аҭырқәа ҭыԥҳацәа аазгаз ҟалеит, ҳаӡӷабцәа аӡәырҩы аҭырқәцәа ирҭацацәахеит. Абарҭ амзызқәа ирхырҟьаны, Ҭырқәтәыла, аԥсуаа мацара роуп инхо ҳәа ҳазхыҽхәаауаз ақыҭақәагьы ҭацәуа иалагеит", - игәы иалоу далацәажәоит ҳџьынџьуаҩ.

Ерсын Самеихәа раԥхьаӡакәны Аԥсныҟа дааит ԥшьышықәса раԥхьа. Иара иҳәеит жәамш ирылагӡаны иҭоурыхтә дгьыл аҟны акырӡа дшеимдаз. Иахьагьы иԥсадгьыл гәакьа даналацәажәо, уи аԥшӡареи, аҳауа зҩыдеи, ауаа гәыразқәеи ибла ихгылоуп.

"Адунеи иалаԥсоу аԥсуаа рџьынџьдгьыл еиднакылар сҭахуп, рбызшәеи рлеишәеи еимадазар сҭахуп. Ҳара милаҭк аҳасабалагьы ҳхымҩаԥгашьа алоуп ҳшырдыруа. Анцәа сиҳәоит ҳаԥсуара мыӡырц. Ҳарҭ адуцәа аамҭа ҳацәцеит, аха абиԥара ҿа Аԥсныҟа ихынҳәыртә еиԥш агәаԥхара ҳазшаз ириҭааит", - иҳәоит абырг.

Ерсын иан д-Қапԥҳан, Наиле лыхьӡын. Зуҳәҭуи лареи ҩыџьа аҷкәынцәеи ҩыџьа аӡӷабцәеи рхылҵит.

Ерсын Самеихәеи иԥшәмаԥҳәыс Нурџьиҳа Кәаӡԥҳаи аԥеи аԥҳаи рааӡеит, урҭгьы ҭаацәароуп, анцәа ишиҳәара иҟоуп. Андуи абдуи ргәы рыладууп изызҳауа фҩык рмаҭацәа.

680

Ахәышҭаарамца ахьеиқәу: Ҭырқәтәылатәи аԥсуа қыҭа Калдахәара абзазара иазкны

374
(ирҿыцуп 13:29 24.05.2021)
Ҭырқәтәылатәи аԥсуа қыҭа Калдахәара абзазара шеиҿкаау атәы Sputnik ажурналист Саида Жьиԥҳа илзеиҭеиҳәеит ақыҭа аиҳабы Ерџьаи Бичкәыриа.

Амҳаџьырра ашықәсқәа раан Аԥснынтәи ихырҵәаз ҳауаажәлар раӷьырак Ҭырқәтәылаҟа иахнагеит. Усҟан дара нхарҭас иалырхуа иалагеит рыԥсадгьыл аҿы ианыҟаз иахьынхоз ақыҭақәа ԥсабарала, шәаԥыџьаԥла иреиԥшыз. Убас тәарҭас ишьҭырхыз ҭыԥхеит Калдахәара ҳәа зыхьӡырҵаз ақыҭа. Уи иахьагьы иҟоуп, аԥсуа ҭаацәарақәа рхәышҭаарамца еиқәуп. Ҭырқәтәылатәи аԥсуа қыҭа Калдахәара абзазара шеиҿкаау атәы Sputnik ажурналист Саида Жьиԥҳа илзеиҭеиҳәеит ақыҭа аиҳабы Ерџьаи Бичкәыриа.

Саида Жьиԥҳа, Sputnik

Ерџьаи Бичкәыриа уажәшьҭа ҩынтәны Калдахәара ақыҭа ахадас далырхуеит. Иара излеиҭеиҳәаз ала, Калдахәара Ҭаҳир иқыҭеи Кадыр иқыҭеи ҳәа аҽеиҩнашоит.

© Foto / Саида Жиба
Ҭырқәтәылатәи аԥсуа қыҭа Калдахәара аиҳабы Ерџьаи Бичкәыриа.

"Анкьа ҳабдуцәа ари аҭыԥ ахь иааргеит Ҭаҳир Лакрбеи Кадыр Иналиԥеи. Дара рыуаажәлар нхарҭас ирзалырхыз ақыҭа Калдахәара ҳәа ишьақәгылеит, аха уеизгьы жәытәла Ҭаҳир иқыҭеи Кадыр иқыҭеи ҳәа иҟаз аҭыԥхьыӡқәа нхеит, ҳаблала нырцәи-аарцәи ҳәа еиҩшоуп", - иҳәоит Калдахәара ақыҭа аиҳабы Ерџьаи Бичкәыриа.

Иахьазы Калдахәара 180 ҭӡы нхоит, урҭ рахьтә 170 гәараҭа аԥсыуаауп. Хыԥхьаӡарала иуҳәозар, еиԥмырҟьаӡакәа инхо хәыҷи дуи 800-ҩык ыҟоуп. Ақыҭа аиҳабы иажәақәа рыла, ирацәаҩуп ақалақь дуқәа рахь нхара ицазгьы.

Калдахәара инхо ауаажәлар аиҳарак ақыҭанхамҩа рнапы алакуп. Ирааӡоит арахә, аԥсаса, иаадрыхуеит аџьықәреи, ачарыц, аҟаб. Иҟоуп абизнес знапы алаку, ақыҭа анҭыҵ афабрикақәеи адәқьанқәеи змоу.

Ерџьаи Бичкәыриа иазгәеиҭеит аҳәынҭқар изымԥшкәа Калдахәараа рқыҭа ацхыраара шарҭо. Иаҳҳәап, Сҭампыл абатә фабрика змоу абизнесуаҩ Ведаҭ Ажьиба ахәыҷқәа рзы идгьыл аҿы ашьапылампылтә дәы иргылеит.

© Foto / Саида Жиба
Сҭампыл абатә фабрика змоу абизнесуаҩ Ведаҭ Ажьиба ахәыҷқәа рзы иқыҭа Калдахәара иргылаз ашьапылампылтә дәы.

Аишьцәа Ҷықьиԥацәа, Базаа, Гәынаа, Цәышаа ақыҭа аиҳабы ивагылоуп афымцатәи аӡымҩангагатәи цәаҳәақәа, амҩақәа уҳәа реиҭашьақәыргылараҿы. Апандемиа аамҭазы авагылара рырҭоит абыргцәа, фатәылеи, жәтәылеи, хәшәылеи еиқәдыршәоит.

"Афинанстә цхыраара аарԥшра зылшо рыдагьы иара ақыҭауаа зегьы гәыла исыдгылоуп, махәҿала исыцхраауеит", - инаҵишьит иара.

Ерџьаи Бичкәыриа Калдахәара инхо ажәлақәа иреиуоуп иҳәеит Арӡынаа, Базаа, Цәышаа, Бганаа, Цыгәаа, Бичкәыриаа, Араԥаа, Лакраа, Аргәынаа, Кәаӡаа, Оҭраа, Аҭрышаа, Ҳалуашьаа, Ҭохсуаа, Гәынаа, Ажьиаа, Озганаа, Чкокаа, Саӡаа, Папаа, Ҵыҵаа, Хәаҷаа, Аҩӡаа, Хышаа, Гәохәуаа, Уарданиаа, Аграа, Махариаа, Ҳәатышьаа, Наԥҳаа, Аиқәысаа, Занҭариаа, Зарданиаа, Кәрыбзаа, Хагәшьаа, Ҷыҷылаа, Аҭраа уҳәа.

"Ақыҭауаа ҳаҭырла ҳаизыҟоуп, ҳацәгьеи ҳабзиеи акоуп. Аҭаацәарақәа жәпакы аиуара рыбжьоуп. Агәылацәа еибагаӡом, егьырҭ аԥсуа қыҭақәа ирылҵыз рахь ауп иахьхьаԥшуа", - иажәа иациҵоит Ерџьаи Бичкәыриа.

Ақыҭаҟны аилабжьаратә ҵакы змоу аизарақәа мҩаԥыслоит. Егьараан ачарақәа рҿы арыцҳарақәа зхылҿиаауаз, кьарахәла ахысрақәа аҭыԥантәи абыргцәа ражәала иаанкылан. Араҟа иҟоуп аԥсуа Дернеқь, иара убри ахыбраҟноуп ақыҭа аиҳабгьы дахьтәоу.

© Foto / Саида Жиба
Калдахәара иҟоу Аԥсуа дернеқь.

1992 шықәсазы Ҭырқәтәылатәи аԥсуа қыҭа Калдахәара даҭаахьан Владислав Арӡынбагьы. Уи амш иахьагьы аиҳабыратәи абиԥара рахьтә изгәаламшәо дыҟам.

"Амҩа хада аҟынтәи ақыҭа уахьналало уи аҽны ажәлар еизеит. Усҟантәи аамҭазы аиҭенаиаарақәа мариамызт, Аԥсны иҟоу ҳашьцәеи ҳареи ҳаибабарақәа ауадаҩрақәа рыцын. Убри аҟнытә Владислав Арӡынба даауеит ҳәа адырра аныҟала, Калдахәараа ракәым, Ҭырқәтәыла изаҳаз аԥсуаа ԥыҭҩык арахь иааит. Владислав Арӡынба иуаажәлар аниба, амашьына дҭыҵын, "сашьцәа срыцны сцоит" иҳәан, ихы-иҿы ихаччо, ауаа гәыдкыло шьапыла ақыҭа далсит. Ари амш иухашҭуа акы акәым, ҳгәаҵаҿы иԥхаӡа иҭоуп", - еиҭеиҳәоит Ерџьаи Бичкәыриа.

© Foto / Ҭырқәтәылатәи аԥсуа қыҭа Калдахәара аиҳабы иархив аҟнытә
1992 шықәсазы Ҭырқәтәылатәи аԥсуа қыҭа Калдахәара Владислав Арӡынба даҭааны даныҟаз

Ерџьаи Бичкәыриа ихаҭа раԥхьаӡакәны Аԥсныҟа дааит 2015 шықәсазы, Адаԥазар ақалақь еиҿкааз акәашаратә ансамбль "Аԥсынра" аиҳабыра азызуаз дрыхәҭакны. Убасҟангьы игәаҵаҟны иҿыхеит ҵҩа змам агәыбылра. Уинахыс Ерџьаи лассы-лассы иџьынџьдгьыл даҭаауа далагеит.

"Раԥхьаӡа сыԥсадгьыл сшьапы анықәсыргыла, исҳәо сҿамшәо, сгәы хыҭхыҭуа саанхеит. Сабдуцәа рыдгьыл снапқәа ақәшауазҭгьы, игәыдыскылон, убриаҟара сцәаныррақәа ҿыхеит", - иҳәоит ҳџьынџьуаҩ.

Ҭырқәтәылатәи аԥсуа қыҭа Калдахәара аиҳабы Ерџьаи Бичкәыриа иазгәеиҭеит, Аԥсны Аҳәынҭқарра Ахада Аслан Гьаргь-иԥа Бжьаниа, Владислав Арӡынба иеиԥш дырҭаартә алшара ҟалозар, уи насыԥны ишырԥхьаӡо.

Иара убас шәаԥхьар ҟалоит:

374

Ҳақан Папба: сыԥсадгьыл аҿоуп сыԥсы ахьҭоу, суаҩынаӡаны схы ахьызбо

48
Ҳџьынџьуаҩ Ҳақан Папба иҭоурыхтə ԥсадгьыл ахь ихынҳəреи игəҭахəыцрақəеи ирызку анҵамҭа ажурналист Сырма Ашəԥҳа ланҵамҭаҿы.

Сырма Ашәԥҳа, Sputnik

Ҭырқəтəыла, Белеџьықь иаҵанакуа Сарынч ақыҭаҿы инхон забдуцəа рџьынџь ахь ихынҳəыз Ҳақан Папба иеиҳабацəа. Ҳақан иабшьҭра Ҭырқəтəыла даара зыхьӡ нагаз уаан. Дара усҟантəи аамҭазы Ҭырқəтəылатəи аҳəынҭқарра напхгара азҭоз Қьемал-Мысҭафа Аҭаҭиурк идгылаҩцəан, ихьӡ зху амедалқəагьы ранашьан, ражəа акрыԥхылнадон, иуаа нагақəан.

© Foto / Ҳақан Папба иархив
Ҳақан Папба иабду Мураҭ Папба

"Сара сабдуцəа Аԥсны Ҵабал иҭыҵқəаз иреиуоуп. Изларҳəо ала, Аԥснынтə усҟан Папбақəа Ҭырқəтəылаҟа ирыцыхҵəаз аԥсуаа рхыԥхьаӡара 500-ҩык инареиҳауп. Усҟан ақыҭа ахьӡ азҭазгьы ишьақəзыргылазгьы сара сабду иаб иоуп. Иара Сулеиман ихьӡын, 123 шықəса ниҵит, даара дшəарыцаҩ бзиан, зхымҭа камшəақəоз дреиуан", - ҳəа ажəабжьҳəара дналагеит Ҳақан Папба.

Ҳақан Папба ихаҭа диит Анкара ақалақь аҿы. Иаб Гази Папба иусура аганахьала иқыҭа ааныжьны уахь диасыр акəхеит. Ҳақан иан Арӡынԥҳауп, Леман лыхьӡуп, лыԥшəмеи лареи аҵарадырра ҳаракы змоу ахшара рацəа рааӡеит.

© Foto / Ҳақан Папба иархив
Ҳақан Папба иаб Гази Папба

"Ҳара ҳҭаацəара дууп, фҩык аишьцəеи хҩык аиҳəшьцəеи ҳаҟоуп, хашьцəа руаӡəк дҳаԥхахьеит. Ҳани ҳаби аҵарақəа ҳдырҵеит, еиуеиԥшым азаанаҭқəа ҳнапы рылакуп, иҟоуп азиндырратə усбарҭаҿы аус зуа, аҳақьым изаанаҭ змоу, аекономика аус иаҿу уҳəа. Саҳəшьцəа руаӡəк Англиа дынхоит, уаҟа аҭаацəара далоуп, лыԥшəма дҟабардоуп. Саб иԥсҭазаара далҵхьеит, сан лыԥсы ҭоуп, лықəрагьы такəы инаскьахьеит", - дҳацəажəон ҳџьынџьуаҩ.

Ҳақан Папба занааҭла механик-нџьныруп, абар уажəшьҭа шықəсқəак инарзынаԥшуеит Очамчыра ақалақь арацəа аус ахьадыруло афирмаҿы аус иуеижьҭеи.

"Сара зныкгьы сгəы меиҭасӡац Аԥсныҟа сахьааз. Сыззыԥшыз ари ахҭыс ҟалеит 2013 шықəса рзы. Ҩыџьа арԥарцəа сымоуп, руаӡəк Аҟəатəи аҩбатəи ашкол далгахьеит, Аԥснытəи аҳəынҭқарратə университет жəларбжьаратəи аизыҟазаашьақəа рҿы аҵара иҵоит, аиҵбы макьана ашкол дҭоуп, аабатəи акласс аҿы аҵара иҵоит. Аолимпиадақəа рҿы изныкымкəа аԥхьахəқəа игахьеит сԥа еиҳабы, даара сгəы еизнарҳауеит уи", - ҳəа азгəеиҭоит Ҳақан Папба.

Ҳақан Папба иԥшəмаԥҳəыс Ҟрымтəуп, ҭаҭар ҭыԥҳауп, аԥсуара аҵасқəа бзиа ибаны издызкылаз ԥҳəызбоуп, ԥсыуа ҭацак ишлықəнаго еиԥш лхы мҩаԥылгоит. Лысасдкылара зеиԥшраз иаразнак избарҭахеит уи аҽны дара ахьынхоз Маҷара аҳабла санаҭаа, лхы-лҿы еихаччо лчеиџьыка лнапы иқəыргыланы данысԥыла.

© Foto / Ҳақан Папба иархив
Ҳақан Папба иабдуи иашьцәеи: Мураҭ, Шьуаԥ, Еҭым Папаа

"Сара шьала-дала сшаԥсыуаз еиҳагьы агəра згеит сыԥсадгьыл ахь санаа амш инаркны. Саб иан Фаҳриа лыхьӡын, Беиаԥҳан. Сан лан Кəыџԥҳан, Хьымараса лыхьӡын. Урҭ рхаан иҟаз аамҭа даҽа аамҭан, хааралеи бзиабаралеи еибаркын, ргəы-рыԥсы иахылҵуаз раԥсшəа агьама хазын, урҭ аамҭақəа цəгьа ихьаазгоит. Ихьаазгоит иара убас сгəы ишаҭаху еиԥш аԥсышəала сахьзымцəажəо, избанзар ақалақь ду аҿы исызҳауан, рацəак аԥсшəа ахьумаҳауаз", - иҳəеит Ҳақан Папба.

Ҳџьынџьуаҩ Ҳақан Папба акыр дазгəыдуны иазгəеиҭеит ишьыжьшара Аԥсынтəыла иахьалаго, ихəларагьы убас. Адоуҳамч ду инаҭоит Ҵабал ашьхақəа дырҿаԥшуа дахьынхо.

"Сыԥсадгьыл аҿоуп сыԥсы ахьҭоу, суаҩынаӡаны схы ахьызбо. Сара сусура аганахьала атəым тəылақəа рҿы аус зухьеит, атəым милаҭ срыланхахьеит. Узбекисҭан 23 шықəса сыҟан, убас еиԥш Ҟазахсҭангьы. Ашьыжьтəи аҳауа араҟа даҽакуп. Хəыцрашəкы санеимарымкуа ыҟаӡам. Зны-зынла сыхшыҩ аҟны иааиуа асахьақəа лабҿабоушəа исыдыскылоит. Издыруада сандуцəа сабдуцəа абни аҭыԥ аҿы инхозҭгьы, издыруада урҭ рыҽқəа ирықəтəаны абнаҟа имҩасуазҭгьы, издыруада рмаҵураҭаҭыԥ абнаҟа иҟазҭгьы, рылҩаҵə уантəи иҩеиуазҭгьы, издыруада?.." - игəҭахəыцрақəа ҳацеиҩишон Ҳақан Папба.

Иара зегь раԥхьа иргыланы иҭахуп ихшара ԥсыуа ҵасла иааӡазарц, рхатəы бызшəа рдыруазарц, араҟа рышьаҭа еиздырҳарц. Убри аҟынтə иазиӡбеит наӡаӡа иԥсадгьыл ахь иҭаацəа иманы даарц, иагьыҟаиҵеит. Дынхоит Гəылрыԥшь араион Маҷара аҳаблан, ҳҳəынҭқарра ахарџь ала ҷыдала ҳџьынџьуаа рзы идыргылаз анхарҭаҩнқəа руак аҿы.

Ҳазҭагылоу аамҭазы Гəылрыԥшь араион аҿы иҟоуп ф-ҳаблак ҳџьынџьуаа хьынхо, иааидкыланы дара 360 ҭӡы ыҟоуп. Маҷара аҳаблан акəзар, иҟоу аҩнқəа инарҷыданы, даҽа хыҩнык рыргылара иаҿуп, 150-ҭӡы ҳџьынџьуаа ахьынхаша. Уажəазы Маҷара иҟоу анхарҭа ҩнқəа рҿы 55 ҭӡы ыҟоуп.

"Сашьцəеи сареи ҳаибадырит, аибабара ҳабжьоуп. Ҳабдуцəа ирыхҭысыз шьарда ыҟоуп, иаҳдыруа аасҭа иаҳзымдыруа еиҳауп. Аҭоурых дыртəуп, иҭҵаалатəуп, уи уаҵəтəи ҳара ҳԥеиԥш ауп", - ҳəа азгəеиҭеит Ҳақан Папба ҳаиҿцəажəараҟны.

Аҳəаанырцə инхо ҳџьынџьуаа рзы Ҳақан Папба ииҳəо акоуп - зегь раԥхьаӡа иргыланы ирымазароуп агəаԥхара, анаҩс ицəырҵуа азҵаарақəа рыӡбара еиҳа имариоуп. Аԥсныдгьыл знык зшьапы ықəзыргылаз, знык араҟа аӡы иаҿыхəаз наӡаӡа датəнатəуеит, уи ус шакəу агəра игоит ҳџьынџьуаҩ Ҳақан Папба.

48
В Сухуме загорелось здание бывшей кондитерской фабрики

Аҟәа иҟалаз абылра ахәҭак ырцәоуп

3
(ирҿыцуп 13:29 13.06.2021)
Аҟәа ақалақь Ешба имҩаҿы игылоу уаанӡатәи акондитертә фабрика ахыбраҿы абылра ҟалеит амҽыша рашәара 13 рзы аҽнышьыбжьон.

АҞӘА, рашәара 13 – Sputnik, Бадри Есиава. Аҟәа ақалақь Ешба имҩаҿы игылоу амца зкыз уаанӡатәи акондитертә фабрика ахыбра ахәҭак ырцәоуп ҳәа аҭыԥ аҟынтәи иааицҳауеит Sputnik акорреспондент Аԥсны Аҭагылазаашьа ҷыдақәа рзы аминистр Лев Кәыҵниа иажәақәа ааго.

Аусбарҭа аиҳабы иажәақәа рыла, ахыбра еилаҳауеит ҳәа ашәарҭара ыҟам.

Амцарцәара иаҿын Аҟәеи, Аҟәа араиони, Гәылрыԥшь араиони рымцарцәаратә гәыԥқәа, иара убас аруаа.

Амца дырцәоит ахыбра мрагыларатәи мраҭашәаратәи аганқәа рыла еицҿакны. Амцарцәаҩцәа амардуанқәа рыла ахыб ахьгьы ихалеит.

Кәыҵниа ишиҳәаз ала, амца акит зықь ԥшьыркца метра инареиҳаны аҵакыра. Абылра акатегориақәа быжьба рҟынтәи ахәбатәи акатегориа иаҵадыркит.

3