Аԥсуа Агара

Нырцә дыгә-дыгә, аарцә дыгә-дыгә: Зарина Коӷониа агаразы лгәаанагара

1109
(ирҿыцуп 13:32 03.03.2018)
Абиԥарак зааӡахьоу агара еиҭашьақәыргыланы, ҳҿатә аамҭа иашьашәало иҟаҵаны змоҭа хәыҷы дгаразҵо, Гагра ақалақьуаҩ Зарина Сыҷынааԥҳа-Коӷониа асаби иааӡараҿы агара инанагӡо ароль атәы лзеиҭалҳәеит ажурналист Саида Жьиԥҳа.

Саида Жьиԥҳа, Sputnik 

Жәытәнатә аахыс аԥсуа ибзазара иузаҟәымҭхуа иадҳәалаз агара иахьатәи ҳҭоурых аҟны аҭыԥ ацәмаҷхеит. 50 шықәса ирҭысхьоу, абиԥарак зааӡахьоу агара еиҭашьақәыргыланы, ҳҿатә аамҭа иашьашәало иҟаҵаны змоҭа хәыҷы дгаразҵо, Гагра ақалақьуаҩ Зарина Сыҷынааԥҳа-Коӷониа иаҳзеиҭалҳәеит асаби иааӡараҿы агара инанагӡо ароль атәы. Зарина лхаҭа агара дааӡахьан, иара убас лыхшарагьы.

Ақалақьқәа рҟны агара ианакәызаалак уамак хшыҩзышьҭра арҭомызт, аха ақыҭақәа рҿы ахәыҷы иааӡара аҭаацәа рхахьы ирзаагомызт иара ада. Ақыҭанхамҩа ишаҳдыруа еиԥш аџьабаа ацын.

Ахәыҷы ибара анаҩс, ан аҭаацәа ныҟәылгар акәын, рыфатә-рыжәтә ҟаҵатәын, аҩны-аҩнуҵҟа еилыргатәын, ашҭа ԥссатәын. Абарҭқәа зегьы амш иалагӡаны дрыхьӡон, лысаби агара дгаран азы.

Агараҿы ҩба-хԥа сааҭ ахәыҷы игәы раҳаҭны дыцәоит. Дцәырҳаны дааԥшып, ихыза иқәҵып, дкаҳап, инапы ма ишьапы дацәшәап уҳәом. Агараҟны ахәыҷы иҿаҳәарагьы ахатәы ҷыдарақәа амоуп. Раԥхьа инапқәа дырххоит, нас ишьапқәа, хахьла ахчы хәыҷы нақәҵаны, анаҩс агарарҟәҟәақәа ҿарҳәоит. Агара, ахәыҷы наҟ-наҟ игылашьеи иныҟәашьеи арԥшӡоит ҳәа иԥхьаӡан. Иара агәабан иҭаԥсоу ашыцгьы шаҟа ихәарҭази. Ахәыҷы ицәеижь артаруан, аԥхӡы илҵыр, иаразнак иалабон.

Аҭаацәараҟны анду даныҟоу, аҟәардә днықәтәаны, агарашәа ҳәауа амаалықь длырҵасуан, дааԥшыргьы инапқәа наиҭаны, хаала диацәажәон, длыргәабзыӷуан. Абас агәыбылрагьы рыбжьалон.

Аҵыхәтәантәи 25 шықәса, инҭкааны иаҳҳәозар, Аԥсны Аџьынџьтәылатә еибашьра ашьҭахь, агара зхы иазырхәо аҭаацәарақәа зынӡа имаҷхеит, хаҭала сара аӡәык-ҩыџьак роуп издыруа. Аԥсуа гара згәы азыбылуа Зарина Коӷониа, ахәыҷы иааӡараҿы иара аасҭа иманшәалоу акагьы ыҟам лҳәоит.

"Иахьа агара ажәытәра иагеит ҳәа анырҳәо, даара сгәы сыхьуеит. Агара ҳара иаҳџьынџьуп, иааӡагоуп, еиқәырхагоуп", — лҳәоит лара.

Зарина лмоҭа Ҭаир хәыҷы дании, агара дгаразарц лҭаххеит. Аха аибашьра ашьҭахь дара рҭаацәаратә гара ааха аиут, убри аҟнытә лыуа-лҭынха рыбжьара адырра ҟалҵеит – агара дшашьҭоу. Ус, хара имгакәа, Зарина лан Алла Џьниаԥҳа, ирзааигәаӡаз рыуацәа рҟны 50 шықәса ирҭысхьоу агара лыԥшааит.

"Сан агара анылԥшаа сгәырӷьара ҵҩа амамызт. Аиашазы, иара маҷк аԥштәы аԥсаххьан, ажәра аҽазнакхьан. Сара саалаган, ибзианы исрыцқьеит, анаҩс алак ала исшәит. Сан иҵәахны, еиқәырханы илыман ҳара ҳазлалааӡахьаз агәабан. Уи иҭаз ашыц амра иалҭеит, ибзиаӡаны илырҩеит. Анаҩс агәабанҭра ҿыц ӡахны, ашыц уахь иҭалыԥсеит. Снапала агара иатәыз амаҭәа: агаракәырша, агарахарԥа, анапҿаҳәагақәа, ашьапҿаҳәагақәа, аҵаршәқәа уҳәа сӡахит, ахчы хәыҷи, акалами ҟасҵеит, ажәакала, смоҭа игара еибысҭеит", — еиҭалҳәоит анду.

Аԥсуа Агара
© Фото : Саида Жиба
Аԥсуа Агара

Ҭаир хәыҷы иан даԥсыуаӡам, аха ланхәа илырхиаз агара патула дазнеит. Иахьа ларгьы уи ада дхәарҭам.

Аҭаца даара аҟазшьа бзиа лымоуп. Лара аԥсуа ҭаацәара данрылагыла лхы рнааланы, аҵасқәеи, ақьабзқәеи лыдылкылеит. Иахьатәи ҳаамҭазы аԥсуа ҭыԥҳацәа зыгәҭасуа, лара ишьҭылхит.

"Хымԥада, раԥхьанатә сара сакәын ахәыҷы агара дгаразҵоз. Аамҭа анҵы, сҭацагьы илҵеит. Уимоу, лҭаацәа рахь мышқәак сасра данцо, Ҭаир агара дашьцылоуп, ибыманы бааи – ҳәа лан илзаалыцҳауеит", — ҳәа азгәалҭоит Зарина.

Аԥсуаа жәытә аахыс агара амшьҭа бзиоуп ҳәа ирԥхьаӡон, пату ақәырҵон. Гарак мацара абиԥара дук ааӡон. Ахәыҷы ианизҳауа, дызларааӡаз агара ирзааигәаз шьоукы ирҭаххар – ирзырышьҭуан, мамзар иахьԥхасҭамхоз аҭыԥ аҟны, аҭуан ахь ихагаланы ирҵәахуан.

Агара изакәым иазнеиуамызт. Аԥша аналадыршәшәоз, мамзар амра ианарҭоз, ҵасым ҳәа ашәхымс иацәыхараны идыргыломызт, аҩсҭаа илаԥш иҵашәар ҳәа ишәон. Иара убас ахәыҷы алаԥш цәгьа имаахарц азы, алаԥш ҭәҳәа аба иҭаӡахны, агараҟны икнарҳауан. Агара иацҟаҵоу зегьы хкык-хкык ирызкыуп. Иаҳҳәап, агара ахыи-аҵыхәи амҿтәы мацәазқәа иадҿаҳәалоу, агара анурҵысуа идырго ахьархьарбжьы ахәыҷы дшазыӡырҩуа иаразнак дарцәоит. Џьоукы-џьоукы изларҳәо ала, агра еиҳарак абҳәасаҵла иалырхуан, иҟан амжәеи, аҳаи, акакан ҵлақәеи рхы ианадырхәоз.

"Иахьа асаби иааӡаразы ицәырҵыз абзазаратә маҭәашьарқәа, еиҳараӡак апамперсқәа, агәабзиара иазеицәоуп ҳәа исыԥхьаӡоит. Избанзар, дара аҳауа рнырӡом, асаби ицәеижь есқьынагьы ицәаакыуп. Изысымҳәари, ԥхьаҟа ахшара рмоуа аҟынӡа инеингьы алшоит. Агарала ирааӡо, дбааӡап, ахьҭа илалап уҳәом. Акалам имоуп, ацрыӡқәа агара иаҵагылоу абанкахь ицоит", — лҳәоит гарала змоҭа дзааӡо Зарина.

Ҭаир хәыҷы ианду Зарина Коӷониа агәаҳәара лымоуп, аԥсуаа зегьы ржәытә бзазара иагәҭамсырц, ирхынҳәны, еихаҳаны ԥхьаҟа иргарц.

"Ҳарҭ аԥсуаа, аԥсабарагьы иҳаҵанаҳәоит ҳҵасқәеи ҳқьабзқәеи ҳарзыхынҳәырц. Шәнаԥшы-ааԥшишь, ижәбоу шаҟа ҭаацәара еиԥҟьо, згәабзиара уашәшәыру ахәыҷқәа шииуа. Ажәытәан аҭаца дырныҳәон, асаби иакәзаргьы убас. Иахьа зегьы ҳарҟәаҵит. Ҳмилаҭтә ҵасқәа аԥсуаа ҳзы адоуҳатә мчы рымамызҭгьы, аӡәгьы иаԥшьеигомызт. Аамҭала аԥсуа сабицәа ргәабзиара зарӷәӷәоз, агәабан зларчаԥоз ашыц иахьыз жәбоу… Ахархәашьа ҳанақәамшәа, ахәаҷа иқәнахит. Ҳарҭгьы ҩаԥхьа аԥсы ахалар ҳәа ҳшәозшәа, ихҵәаны, иахьрызҳауаз аҭыԥқәа рҟны асасааирҭкәа ҳаргылоит. Уи аума ҳара ҳаиқәзырхо?! Шәааи, ҳхаҿы ҳахшыҩ ааганы, ҳмилаҭ ахаҿра аиқәырхара ҳашьҭалап" — ҳәа абжьгара ҟалҵоит анду.

Зарина Коӷониа иахьа аҿырԥштәы бзиа длырбоит аԥсуа ҭаацәарақәа. Аамҭала абиԥарак зааӡаз, иахьа Ҭаир хәыҷы игара амышьҭа шыбзиоу ҳаргьы агәра ҳгеит. Сынтәа Коӷониаа рҭаацәараҟны аизҳара иазыԥшуп.

1109
Алабашьа.

"Ажәлар рыбз хәшәуп": аԥсуаа аусеилыргара шымҩаԥыргоз

34
(ирҿыцуп 13:56 31.10.2020)
Аԥсуаа ражәаҳәаратә ҟазареи русеилыргареи рзы згәаҭарақәак ҳадылгалоит Аԥсуаҭҵааратә институт афольклортә лабораториа аусзуҩ, аколумнист Сусанна Ҭаниаԥҳа.

Сусанна Ҭаниаԥҳа, Sputnik

Ажәлар рыҩнуҵҟа наџьнатә аахыс ахьӡ-аԥша рыман ҟазарыла, ажәа сахьаркны, ажәаԥҟақәа нагәыларгыло, еихышәшәа ацәажәара зылшоз.

© Foto / Марина Барцыц

Ажәаҳәаратә ҟазара иаԥышәарҭаны иҟан жәлар реизарақәеи аԥсуа ҵасла аусеилыргарақәеи. Уимоу, аԥсуа жәлар ажәаҳәаратә ҟазара иарҭоз аҳаҭыр, аҵак ду иарҿиеит уҳәар алшоит абас еиԥш иҟоу ажәаԥҟа шьахәқәа: "Ажәа зҿоу – ацуҭа итәуп", "Абыз зҿоу аҳәаццышә иҭахӡам", "Ажәа ҩынтә иуҳәар афҩы гоит", "Ажәлар рыбз хәшәуп".

Аԥсҭазаараҿы, ишаԥу еиԥш, абзиарагьы ыҟоуп, ацәгьарагьы. "Абзиа ахала аҽарҽеиуеит, ацәгьоуп ирҽеитәу" рҳәон ажәлар. Аԥсуаа ҳҟны ицәгьараны, ихьымӡӷы бааԥсны иԥхьаӡан: Аныхақәа ишакәым рызныҟәара, рыцәҳара, аиашьара, аҭаацәара иреиуоу аӡә ишьра, ахьымӡӷ дыргара, аԥсадгьыл аԥсахра, аӷьычра, уҳәа убас иҵегьы.

Ахьӡи ахьымӡӷи Аԥсуараҿы еснагь еивагылан, урҭ еихылҿиаауан. Аха "ажәлар рыбз хәшәуп" рҳәон, урҭ рыбз ахәшәра ахьааԥшуаз аимак-аиҿак аҿы акәын. Ажәлар рыбз ахәшәра еиқәнархон аиӷара зыбжьалаз.

Аҵарауаҩ Иура Аргәын иусумҭақәа руак аҿы иазгәеиҭон: "Ауаажәларратә ҵакы змаз аусқәа реилыргаразы ажәлар реизараҿы иалырхуан аӡбаҩцәа. Урҭ "аныха зфаз" ҳәа ирышьҭан, избанзар ажәлар рҿаԥхьеиԥш, аныхаҿ инеины ҭоуба руан, аусеилыргара аан аиаша ишадгылоз ала. Ӡбаҩцәас иалырхуан аԥышәа ду змаз, ацәажәашьа иақәшәоз, дипломатиала ахымҩаԥгашьа здыруаз ихатәраз ахацәа. Знык иалырхыз ауаа ражәра рыхьӡаны аҩны итәаанӡа ӡбаҩцәас иҟазар алшон".

Аусеилыргаразы хазы хыбра ҳәа акагьы алхны иҟамызт. Амш анбзиаз, аизарақәа ахьымҩаԥыргоз ҵлак ашәшьыраҿы еизон.

Ацәгьа, ацәгьоурақәа еиԥшымызт, еиԥшымызт урҭ рахьырхәшьагьы. Ауаҩы гәаӷшақә дызшьыз иҭахаз иашьцәа ишьа руан. Ажәлар рҿы уи закәанын, иақәыӡбомызт. Ус акәымкәа, машәырла ауаҩы диамхашьыр, ауаа ҟәышқәа рыбжьаҟазаны еиндыршәон.

Иҟалон убри аҩыза ахҭысгьы ауаҩы машәырла дызшьыз иҭаацәа аалаганы иршьыз ихәыҷы дымҵарсны дганы драаӡон. Данарԥысхалак, ачара изуны ауаа ицҵаны иабраа дганы дрырҭон, ауаҩшьра зыбжьалаз еиуацәахон. Ауаҩшьра зыбжьалаз реиныршәараҿы иҟан даҽа формакгьы – ашьаԥса ашәара: хыԥхьаӡара рацәала арахәҭиаа рырҭон, уи ала иагьеинышәон.

Аԥсуара азышәаҳәаҩ, ашәҟәыҩҩы Никәала Ҳашыг ишәҟәы "Аԥсуара ашьаҭақәа" аҿы далацәажәоит абас иҟаз ажәытә ҵас: "Машәырла ауаҩы дҭахеит. Амашәыр шыҟалаз еилкааны аҭыԥ иқәырҵеит: амашәыр зымшала иҟалаз, иахьыҟалаз рганахьала азин рыҭаны аԥсрахьы иаарышьҭуан. Аха уигьы азмырхакәа, амашәыр зымпыҵаҟалаз аԥсы даниџьабоз ыҟан. Иара аԥсра иақәшәаз рыҩнаҭа днеины ишьапы хтны шықәсык рымаҵ иуан, дџьабон. Шықәсык ашьҭахь аԥсаҭатә иманы, ауаа хатәрақәа шьҭыхны, аҳәса хазы ачыс ҟаҵаны аԥсхәраҟны инеиуан. Убри ашьҭахь иџьабара ааникылон. Уи инаркны урҭ аиуацәа-еигәыцхәцәа реиԥш, еибабон-еибаҳауан, рыцәгьеи рыбзиеи рҿы еилахәын".

Аԥсуараҿы зегь реиҳа иԥхашьароуп амаҳагьара. Амаҳагьа зыжәлантә, ма уарала изааигәоу ахьымӡӷ зиргаз аиашьареи ақыҭеи дрылырцон. Ақыҭан иуацәа-иҭынхацәа, дыздыруаз мап ицәыркуан, иацәажәомызт. Ажәытәан зыжәла иалырцаз данԥслакгьы, уаҩҵас дыржуамызт, дырџьабомызт уаҩы иахьиҿахырсҭамыз абнаҿы дыржуан, ирласынгьы дырхадыршҭуан.

Абасала, шәҟәы-быӷьшәы ианымыз рхатәы кодекс рыман аԥсуаа. Уи ашәҟәы иану аҵкыс амч аман, ламыслагьы имҩаԥыргон ахьы быргцәа рҳәатәхаҵарала.

Ауаажәларратә ҵакы змоу атрадициатә ҵасқәеи ақьабзқәеи иахьагьы заманала иубарҭоуп ауаа рацәа иахьреизарҭоу ацәгьеи абзиеи рымҩаԥгараҿы. Иаагозар, аԥсра ахьыҟалаз аԥсыжраҽны ауаа рацәа еизоит, агәылацәа, ауацәа, аҭынхацәа, урҭ рнаҩсангьы еизоит зыдунеи зыԥсахыз иҩызцәа-иқәлацәа, иус ицызуаз уҳәа. Аԥсы ихцәажәаны, иԥсы анҭаз абзиара иҟаиҵаз ҳәаны аҵыхәтәантәи имҩахь днаскьаргоит. Идырцәажәо – иқыҭантәик иԥсыз ибзианы дыздыруа, ажәагьы зҿоу ахаҵа бырг иоуп.

34

"Мышцәгьамзар аӡы зҭамло": Ӡыдаҟәара амаӡақәа

136
(ирҿыцуп 17:22 25.10.2020)
Отҳара ақыҭа иагәылсуа Ӡыдаҟәара иадҳәалоу ажәабжьқәа дырзааҭгылоит Sputnik аколумнист, афольклорист Есма Ҭодуаԥҳа.

Есма Ҭодуа, Sputnik

Аԥсны аԥсабара беиоуп аӡқәа, аӡиасқәа рыла. Урҭ рхыԥхьаӡараҿы иҟоуп ахьы ҭызго аӡқәа, егьырҭ аинерттә материалқәа ахьыҵухыр алшо, иара убас иуникалтәу аӡқәа: иаҳҳәозар, "зышьҭрахь игьежьуа аӡы" – аҵарауаа аԥсуа еставелла ҳәа изышьҭоу амшын иалало аӡы еснагь ҭыԥк аҿы шьҭахьҟа ихынҳәуа. Убри инаҷыдангьы иҟоуп зынӡаск аӡы зҭам аҟәарақәа. Урҭ иреиуоуп Оҭҳара ақыҭа еиҩызшо Ӡыдаҟәара. Иара амш цәгьа аныҟоу заҵәык ауп аӡы анҭало.

Аӡиасқәа
© Sputnik / Томас Тхайцук

"Ӡыдаҟәара ҳәа изышьҭоу – ари жәытә ӡиас ҭыԥуп. Ари аҟәара мышцәгьамзар аӡы зҭамло, аӡы ахьҭам азоуп Ӡыдаҟәара ҳәа изашьҭоу. Амш аныцәгьахо аӡы ҭалоит, амш аныбзиоу иҭабаны иҟоуп. Иара агеи-ашьхеи ашьапаҿынтәи аҩ-бахә рыбжьара иҟәрыԥшны иаауеит, Мҷышь аҭыԥ аҿынӡа иҩеиуеит", – ҳәа еиҭалҳәоит Оҭҳара инхо Ира Қапба–Аиба.

Ӡыдаҟәара аӡы ахьҭамло адагьы, ари аҭыԥ ашанақәа адырбалоит. Ишеиҭарҳәо ала, иара ахаҿы ахәаҟны ижуп хҩык аиҳәшьцәа, урҭ ҭынха ҳәа аӡәгьы дахьрымамыз аҟынтәи анышәынҭрагьы ҟаҵам, дара ҟәырҭлаххан, убра ииасуа ауаа ирԥырхагахоит. Урҭ рнеҩсангьы араҟа лассы-лассы Ӡызлан дырбалоит. Ус еиԥш ахҭыс ҟалеит уажә ааигәагьы.

© Foto / предоставила Есма Ҭодуаԥҳа
Ира Каԥба- Аиба

"Абасоуми "N" дзибаз. Абри ацҳаҿ дааиуан, Ӡыдаҟәара абра ацҳа ахьху, абас дџыхӡа даацәырҵит, имҩа кны дылмышьҭуа далагеит, иара дшәан, дыҳәҳәо дыҩуа дшаауаз абра Мирабраа рашҭа дҭалеит. Уи нас ԥсыуаҵас аҭәҳәа ҟарҵеит, аҵыблаа ҟарҵеит. Дшәеит даара, игәы еиҭаԥеит, аха аҵыблаа аныҟарҵа, нас дыбзиахеит. Иара ацҳа ахаҿы, ахәаҿы Папцавақәак убра, хҩык аҳәсақәа аҟан, иԥсит, аӡәгьы дрымамызт, ахәы рмоузт, егьи рмоузт, иҟәырҭлаххеит дара. Убарҭгьы ауаҩԥсы убра данынабжьалалак иҩуа ишьҭалон. Нас абри иублыр бзиоуп рҳәан, аҭәа амца ацраҵаны ирблит, нас уаҳа ирымбо иалагеит", – ҳәа еиҭалҳәоит ақыҭанхаҩ.

Оҭҳара инхо узазҵаалак, ахәыҷы инаиркны иззымдыруа дыҟам Ӡыдаҟәара иамоу ашанақәа. Урҭ уи адырра адагьы агәра ргоит аилашәшәымҭаз уаҟа аиасра шыбзиам.

"Сабхәа дибахьан, лыхьӡ сҳәар сҭахым, Ӡызлан дкацәааит. Абас иааилашәшәуа џьара дыҟан даауан, аҟәара, ани ацҳа ахьыҟоу дҭаланы дзааиуаз аӡәы дџыхӡа иаԥхьа абас днагылеит. Нас иара инапы иҟьо, ишьапы иҟьо, дшәеит, аха анс ҟаиҵацыԥхьаӡа иара, дыҩны иаԥхьаҟа диасны дкәаҩӡа дгылон, ыыт ҳәа саныҳәҳәалак сашьҭахьҟа дгылон иҳәеит. Нас абас ҳзеикәагьежьуаз  мацара, ахәы сҩыхәнеит иҳәеит, ари закәызеи, баасышьҭымҵуеи ҳәа, абрагь сҩыхәнеит, ларгьы дсышьҭыҵит иҳәеит. Ашьҭахь абри ахаҵа дҟәашӡа абра дааит избаз ҳәа. Аҭыԥ бзиаӡам, уахынла акәым, иара ҽынлагьы убра сиасыр сҭахӡам сара, абас сакәшан сцоит, убри ацҳа ақәлара бзиа избаӡом", – ҳәа ҳалҳәеит Ира Қапба-Аиба.

© Foto / предоставила Есма Ҭодуа
Ӡыдаҟәара иху ацҳа

Ӡыдаҟәара анашанара ари ала инҵәаӡом. Иара иаҿагылоу абахәраҿы ахаҳәқәа ирыбжьысны аӡы цқьа анлеиуа ыҟоуп, аӡрыжәтә ҳасабала. Аха уи аӡы цқьагьы есымша иаауам. Убри анаауа иақәшәаз ашықәсан дманшәалахоит, акгьы иԥырхагахом ҳәа иԥхьаӡоуп.

Анашанара ҳацәхьаҵуазар, аиашазы Аԥсны иамоу аӡы цқьақәа аӡрыжәтә ҳасабала рхархәара акыр ишхәарҭоу азгәарҭахьеит аҵарауаа, дара Аԥсны иқәынхо рзын мацара моу анҭыҵгьы аҭирҭақәа рахь инауго иҟауҵар ауеит. Аха иахьазы аӡымҩангагақәа рыҟамзаара иахҟьаны ақыҭақәа реиҳарак Ӡыдаҟәара иаҩызоуп – аӡы иаҿықәынхо, аха зыҩнаҭақәа рҟны аӡы змам – инашанаӡами ари?

 

136

Аԥсны даҽа 73-ҩык акоронавирус рыдырбалеит, ҩыџьа рыԥсҭазаара иалҵит

4
(ирҿыцуп 21:13 31.10.2020)
Аепидемиа иалагеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 4233-ҩык ыҟоуп. Урҭ рахьтә ргәы бзиахеит 2267-ҩык, рыԥсҭазаара иалҵит 42-ҩык.

АҞӘА, жьҭаара 31 - Sputnik. Иҳаҩсыз уахыки-ҽнаки рыла COVID-19 зцәа иалоу реилкааразы атестқәа 367 ҟаҵан, урҭ рахьтә акоронавирус аарԥшын 73 тест рҟны ҳәа аанацҳауеит Аԥсны ауааԥсыра COVID-19 рацәыхьчаразы аоперативтә штаб.

Абыржәтәи аамҭазы Гәдоуҭатәи араионтә хәышәтәырҭа хадаҿы ишьҭоуп 132-ҩык ауааԥсыра, урҭ рахьтә 114-ҩык акоронавирус адиагноз рзышьақәырӷәӷәоуп, рҭагылазаашьа бааԥсуп 23-ҩык, ибжьаратәуп - 27-ҩык, илҩаауп жәаҩык апациентцәа. Аҟәа асасааирҭа "Аиҭар" ашҭаҿы иаадыртыз амобилтә госпиталь аҟны ишьҭоуп акоронавирус зыдбалоу 60-ҩык апациентцәа. 57-ҩык рҭагылазаашьа бжьаратәуп ҳәа иԥхьаӡоуп, хҩык рҭагылазаашьа бааԥсуп.

Аоперштаб иара убас иаанацҳаит жьҭаара 31 рзы Аҟәа асасааирҭа "Аиҭар" аҟны иаарту урыстәылатәи хырхарҭарацәалатәи агоспиталь аҟны акоронавирус злаз ҩыџьа рыԥсҭазаара ишалҵыз.

Иԥсҭазаара далҵит COVID-19 ззышьақәырӷәӷәаз 1934 шықәса рзы ииз апациент. Иара ҩганктәи аполисегментартә гәыҵәкра ӷәӷәала илаҽны дыҟан. Иҭагылазаашьа акыр ибааԥсын. Жьҭаара 31 ашьыжь иара иԥсҭазаара далҵит игәы-шьадатәи иԥсыԥлагаҩагаратәи зымхара иахҟьаны.

1942 шықәсазы ииз COVID-19 ззышьақәырӷәӷәаз апациенткагьы жьҭаара 31 рзы лыԥсҭазаара далҵит. Лара ахәышәтәырҭанҭыҵтәи ҩганктәи асубтоталтә полисегментартә гәыҵәкра лыман, иара убас егьырҭ асоматикатә чымазарақәагьы лцәа иалан.

Ауааԥсыра COVID-19 рацәыхьчаразы аоперативтә штаб ажәлар рахь ааԥхьара ҟанаҵоит ачымазара ҿкы рымкырц азы иахәҭоу аԥҟарақәа зегьы ирықәныҟәаларц.

  • Акоронавирус иазку ажәабжьқәа зегьы шәрыԥхьар ҟалоит абра>>
4
Атемақәа:
Ачымазара ҿкы – акоронавирус Аԥсни адунеи аҿи: иалкаау