Ажьаҳара аныҳәара ажәытә амҩаҧгашьеи иахьа ишыҟарҵои

"Дҧариуа, дыҧҳариуа": Ажьаҳара аныҳәара амҩаԥгара иазкны

218
(ирҿыцуп 10:27 02.10.2018)
Аҧсуаа рдунеихәаҧшышьа иарҿиаз аизҳазыӷьара Анцәахәы – Ажьаҳара аныҳәара зымҩаԥырго атәы дазааҭгылоит Нарҭдырреи адәынтәи афольклорҭҵаареи рцентр аҭҵаарадырратә усзуҩы Есма Ҭодуаҧҳа.

Sputnik, Есма Ҭодуаԥҳа

Ҭагалан ачарақәа ираамҭан иахьыҟоу уамашәа ибатәӡам. Ачара зҽазыҟазҵо ауаҩы изы ари иреиӷьу аамҭоуп: аҽаҩра ҭагалан ианалго, рҩы анҭарҭәо, шәырла ианеиқәшәоу, арахә ракәзар реиҳа иҧсылан ианыҟоу шьхалбаан азы – знапала иаарыхуа ауаҩы, хымҧада, арҭ акәамаҵамақәа дрызхәыцуеит. Аха ҳаамҭазы знапала иҭазгало раасҭа, иаахәан изфо шеиҳау ала, урҭгьы ари аамҭа еиҳа ирзыманшәалоуп ахәҧса аганахьала (иаҳҳәап, аӡын зыҧшаара иаҳа иуадаҩхо ахә еиҳа еиҳахоит).

Жәлар разгәаҭарақәа рыла аҭаацәара алаларазы иаҳа ибзиоу мзаны иҧхьаӡоуп ноиабр. Ари аамҭазы аҭаацәара аҧызҵо аилибакаара бзиеи аҭышәынтәалареи рыцзаауеит.

Адәныҟа ҳәа ахәыҷы иныҳәара
© Фото : предоставлено Ланой Цаава

Иара убас зегь раасҭа иманшәалоу аамҭоуп рҳәоит амшаҧы ашьҭахь иааиуа раҧхьатәи амҽышаз аҭаацәара аҧызҵо рзы. Ааҧын шышәҭуеиҧш еиднагалаз рыбзиабара есааира ишәҭлоит, ааҧын иацу аҿиара еиҧш, аизҳазыӷьара рымазаауеит. Ари аҵыхәтәантәи аҧсуа изы (иара ауаҩытәыҩса изы) крызҵазкуа акәны иҟоуп.

Аҧсуа ҩнаҭа аҭаца раҧхьаӡа лшьапы аналалыргыла нахыс уи "дҧариуа, дыҧҳариуа" ҳәа лықәныҳәара иалагоит. Аизҳара ихадароу аҭыҧ ааннакылоит аҭаацәараҿы. Уи инамаданы аҧсуаа рдунеихәаҧшышьа иарҿиеит аизҳазыӷьара Анцәахәы – уи Ажьаҳара ахьӡуп. Ари анцәахәы иазкны аныҳәара мҩаҧыргоит аҭаца лыҩнра данамардо.

Аныҳәаҩ Таиса Ласариаҧҳа "Заҟаҩ сныҳәахьо рхыҧхьаӡарагь сыздыруам, — лҳәоит. – Маҷыҩ сныҳәахьома аа-шықәса раахыс, аа-шықәса ҵуеит салагеижьҭеи. Сыҧшәма данҭаха ашьҭахь, акыр шықәса ҵхьаны, бара быҧҳәыс цқьоуп, балаҳхыр ҳҭахуп, бгәыразуп, баргьы баҳзыразуп рҳәан, исыдырҵеит."

Ажьаҳара аныҳәара ажәытә амҩаҧгашьеи иахьа ишыҟарҵои аиҭакрақәа рныҧшуеит. Урҭ аҧсахрақәа зыдҳәалоу дара ажәлар рыбзазара, рынхамҩа аҽыҧсахроуп. Аха ажьаҳара аҵакы шамац иаанхоит, уи ихадоу афункциа аҿиара иазкны аҭаца лныҳәара ауп.

"Ажьаҳара аҿиара, азҳара иатәуп. Аҭаца данааугалакь, дызҳауа-дзыӷьо ҳәа убас дырныҳәоит. Ашәахьеи аҧшьашеи ауп ажьаҳара ҳәа аныҳәара аныҟарҵо. Ажьаҳара ҳәа сахьныҳәо акәты ажә сшьуеит, дахьио, дахьтәо, дахьгыло лаҧшхаала дыихылаҧшуа ҳәа убра ауадаҿы дныҳәаны, лхы хынтә инакәыхшаны исшьуеит. Ачашә ҟаҳҵоит, ачаҿаа (амзаҿа асахьа змоу). Абысҭа ууеит, аҩнатә кәтаӷьқәа хҧа агәылаҵаны. Зегь анҳармазеилак аҭаца луадаҿ ихагалан даҳныҳәоит. Ацәымза снапала иҟасҵоит, убригь хынтә лхы инакәыхшаны убра ауадаҿы икыдысҵоит. Ажьаҳара дуӡӡа алыҧха лыман, агәыҧха лыман, дахьааиз лыҩнра дахажәаауа, агәараҭа лыхьӡала иҧшӡахо, дахьио, дахьгыло дахыбаамкәа, лаҧш хаала дылхылаҧшуа ҳәа."

Ари аныҳәараҿы символра зуа ракәны иҟоуп акәтаӷьқәеи акәти – "акәты акәу, акәтаӷь акәу?" рҳәалоит жәаҧҵәаны (раҧхьа иҿиаз атәы аҳәара цәгьоуп аха…). Ажәа "ажьаҳара" аӡәырҩы аетнографцәа ишазгәарҭахьоу ала "ажьы азҳара" аанагоит. Аныҳәараҿгьы иҿиои изырҿиои (акәти акәтаӷьи) ихадараны изалаҳкаауа убри азоуп. Аҭаца ихымҧадатәны акәты агәыи агәаҵәеи, иара убас акәтаӷьқәа рыхҧеи лфароуп данырныҳәалак ашьҭахь.

Отдел этнографии абхазского государственного музея
© Sputnik Томас Тхайцук

"Ажьаҳара иахылаҧшу ҳәа иҟоу дыҧҳәысуп рҳәоит. Агәараҭаҿы уҿыцны уаннанаго аҧсы лаҧш уҧырхагахар ҟалоит, абза лаҧш уҧырхагахар ҟалоит, абри азы ажьаҳара духылаҧшуазароуп, атәым ҩнаҿы уаннеиуа убри иуҧырхагамхаразы оуп, убри ажьаҳара ҳәа ззырҳәо убри аҟынтәи дахьчоит, — ҳәа ажьаҳара аҵакы даҳзалацәажәеит аныҳәаҩ Таиса Ласариаԥҳа.

Ажәытәан ари аныҳәара ахьымҩаҧыргоз ахәышҭаара аҧхьа акәын. Аҭаца ахнышьра хынтә дакәдыршон. Шьалуа Инал-иҧа ишазгәеиҭоз ала, аҭаца ҿыц ахәышҭаараҿы лнагара, ахәышҭаара лакәыршара, уа ажьаҳара ахьӡала аныҳәара иаанагазгьы, дызланагалаз ажәлантә рынцәахәқәа ӷас дымҧхьаӡакәа, рылҧха лаурц акәын изызкыз. Иахьа ахәышҭаара, ахнышьыр змоу маҷуп ақалақь аҟны инхо ракәым, иара ақыҭаҿгьы. Убри аҟынтә Таиса Ласариаԥҳа данныҳәо аҭаца аҩны агәаҿы (акрахьырфо, иахьтәо, иахьгыло ауадаҿы) дылныҳәоит. Хазы аҭаца луадаҟны аныҳәарагьы ажьаҳара иацәтәымны иҟаӡам, ажәытәангьы уи ахәышҭаараҿы адагьы егьырҭ ауадақәа рҟынгьы дырныҳәон, уимоу абоура, акәытҵара уҳәа рҟынгьы днаганы ажьаҳаразы иныҳәон.

"Аныҳәаҩ данныҳәо амин зҳәо хҩык ауаагьы (аҳәса. — Е. Ҭ.) лыдгылазароуп. Нас ҳныҳәаны ҳаналгалакь, ачаӷьа иҟоу ааидкыланы аџьыкхыш лақәырҳәҳәаны, аҵәца азна аҩы лақәҭәаны, адәахьыҟа џьара инықәысҵоит Ачбеи Чачбеи абри иҟьҟьа-иҵәҵәа ирымҵасҵаанӡа шәиҧхьыӡ анцәа иаҳзааумган ҳәа", — лҳәоит аныҳәаҩ.

Иџьашьатәӡам аныҳәаҩ лажәа иахьалоу Ачбеи Чачбеи ртәы. Ажьаҳаразы иныҳәоз аҭаца лаб иҩнаҭаҿгьы лара лхәышҭаара даҿыҵны данцоз, иара убас хшара змоуаз аҧҳәыс ажьираҿы днаганы дырныҳәон.

Иазгәаҭатәуп, ари аныҳәараҿ иалахәу аҳәса заҵәык роуп, ахацәа уахь уыс рымаӡам, аҩны идәылҵны ицоит. Аҭаца хшара данлоулак ашьҭахьгьы лхәыҷи лареи еидкыланы ажьаҳара ахьӡала деиҭарныҳәоит, ари мҩаҧыргоит иара ахәыҷы иныҳәараан. Араҟагьы ихадароу ани ахәыҷи роуп ("акәти акәтаӷьи" шырҳәо еиҧш). Аб ари аныҳәара иадкылара иашам, — иахьа уи цәырҵуа џьара-џьара иаҳбоит. Агәыӷра ҳамоуп уи амдырра рҽеихап ҳәа жәлар рдоуҳа иазку адыррақәа раларҵәара иабзоураны.

218
Алабашьа.

Аԥсуаа ратрибут хадақәа: алабашьеи "алабашьа абызшәеи"

89
(ирҿыцуп 18:25 09.08.2020)
Аԥсуа лабашьа аҵаки ахархәашьеи ртәы дазааҭгылоит Нарҭдырреи адәынтәи афольклорҭҵаареи рцентр аҭҵаарадырратә усзуҩы Есма Ҭодуаԥҳа.

Есма Ҭодуа, Sputnik

Алабашьа

Аханатә ажәытәӡатәи аԥсуаа рабџьарқәа иреиуан иҵарыз анҵәамҭа змаз алаба. Ашьҭахь, аиха анцәырҵ инаркны аихатә ҵаргәа аҭаны аҟаҵара иалагеит – алабашьа ҳәа ззаҳҳәо.

Алабашьа ашьха ихалоз хархәагас ирыман, уи ашәарыцацәеи ахьчацәеи рыԥсҭазаара иузаҟәымҭхоз мҩанызан. Ашьха ианаҿысуаз ицхыраагӡан иахьрымаз адагьы абџьарсгьы рхы иадырхәон. Уи инаҷыдангьы, алабашьа ахаҿы ашәақь нықәҵаны ахысразы рхы иадырхәон, ҵаргәас ирыман. Ҳәамҭак ишаҳәо ала, ашьха абнаршәырақәа рҿы иҟьалаз илабашьа иаԥхьа инарсны даназҵаа имҩа абаирхара ҳәа, илабашьа абна дызлалҵыша аганахь инкашәеит, убри алагьы абна дылнагеит.

Алабашьа абызшәа

Алабашьа абыргцәа, ахатәрақәа ҳәа ззырҳәо, зажәа ԥхылнадо ратрибут хадақәа иреиуоуп. Еиуеиԥшым аусқәа реилыргараан, аӡбарақәа раан, аизарақәа рҿы илабашьа адгьыл иныҵарсны иаарылагылаз зегьы ҿымҭкәа изыӡырҩуан иажәа далгаанӡа. Ари аганахьала акыр иҟазшьарбагоуп Миха Лакрба иновеллақәа руак: аизараҿы аҭаҳмада илабашьа нарсны ацәажәараз дахьыҩагылаз, илабашьа аҵарыра иган аҿы игылаз арԥыск ишьапы иалалазаап, аха "ҟыт" имыргакәа иажәа далгаанӡа дагьымҵысит, ишьапы ашьа алыжж ацара ишаҿызгьы.

Алабашьа.
© Sputnik / Томас Тхайцук
Алабашьа.

Аԥсуаа ирҳәоит алабашьа "абызшәа" амоуп ҳәа. Уи знапы иаку ишыҵаирсуа, иахьынаирҳәуа-иахьааирҳәуа ала иара аԥшәма иҟазшьеи игәҭаки аанарԥшуеит. Ииашахәҵәаӡа адгьыл иҵарсны иргылоу алабашьа асемантикатә ҵакыла адунеи аиҿкаара алагамҭа аанарԥшуеит. Ҩ-жәлантәык реинраалараан аиҳабы илабашьа ажәада ицәажәон: иаҳҳәап, уи ашьшьыҳәа, дмыццакыкәа адгьыл иныҵаирсзар, "аццакра аҭахӡам, иазхәыцтәуп" ҳәа ҵакыс иаман. Ус акәымкәа, алабашьа аҵарыра, инарнааны аганахь ирхазар, "ари хыда цәажәароуп шәызҿу, баша сшәырааԥсоит" ҳәа аҳәон. Иара убас алабашьа ахаҿы имашьхәылҵ нықәҵаны днагылар, иҵаргәаны иҟаиҵар – аригьы "аамҭа агара шәаҿуп, аус ырццактәуп шьҭа" ҳәа игәы иҭаз ааирԥшуан, убри алагьы аицәажәара иалахәыз дырныӡбон, рус ацашьа шигәамԥхоз ааирԥшуан. Алабашьа аҿы адәылҵырҭа аганахь ахы ирхар, "ҳус ҟаҵоуп, шьҭа ҳдәықәышәҵа" ҳәа аҳәон алабашьа абызшәа.

Ҳаамҭазгьы имаҷым алабашьа ныҟәызго, забацәа ирҭынханы измоу, аха иахьа уи иаҳа аԥсуа еибыҭашьа иацу аелементқәа ируакуп, рԥшӡагас иҟоуп, иара аҵакы ацәымӡыцкәа, зегьы еилыркаауа ишыҟоугьы.

Иара убас шәаԥхьар ҟалоит:

89
Застолье

Аҩыжәра, аашьара, акаҷбеира: ашьцылара бааԥсқәа ирызку згәаҭарақәак

145
Ауаҩытәыҩса иԥсҭазаараҿы изцәырҵырц зылшо шьцыларақәак, грақәак ирызкны лгәаанагара ҳацеиҩылшоит Sputnik аколумнист Сусанна Ҭаниаԥҳа.

Сусанна Ҭаниаԥҳа, Sputnik

Игәашәҭахьазар, аԥсуаа ҳажәаҳәаҿы инарҭбаан ахархәара раҳҭоит ажәеицааирақәа "уи зегь шьцылароуп", "узышьцылаз узаҟәыҵуам", иара убас иахәҭоу аҭагылазаашьаҿы ахархәара азыруеит ажәаԥҟақәа "Ашьцылара бааԥс идыршо ашаха иаҩызоуп, есымша иацлоит", "Ашьцыларақәа раԥхьа иласуп, ианулаҽ – ихьанҭахоит".

Аиашаз, ауадаҩрақәа зцу ауаҩытәыҩса иԥсҭазаараҿы изцәырҵырц алшоит ԥыла-ԥгала имоуа дымҩахызҟьарц зылшо ашьцыларақәа, аграқәа.

Грак, шьцыларак зыцрамсыц ауаҩы иԥшаара уадаҩуп, аха зегь реиҳа ихадароу аԥырхага узҭо ашьцылара шҵоурам дырны аҿагылароуп.

Наџьнатә аахыс аԥсҭазаара иацыз шьцылара бааԥсқәоуп уҳәар алшоит: инамыцхәу арыжәтә, аашьара, аҭаҭын ахара, акаҷбеира уҳәа.

Зыхьӡ ҳҳәаз ашьцыларақәа рықәыӡбара, рҵәылхра зныԥшуа аԥсуа жәлар рҿаԥыцтә рҿиамҭақәа уԥымлар залшомызт. Ԥҳьаҟа урҭ ҳрызхьаԥшып.

Аашьацәа ахьынтәааз

Аашьара зегь реиҳа ижәытәу шьцылара бааԥсуп. Аашьароуп егьырҭ иацааиуа ашьцыларақәагьы зырҿио. Аашьаҩ дахьугалакгьы, аус ихы злахигаша дашьҭоуп, иара изы зны мышныҳәоуп, зны мышӷьарсуп. Арахь аҽхәарагьы илоуп, цқьа изыҟамҵо, иҟаимҵарц ииҭаху акы иахароушәа уирбоит, даҽазных даҽа ҿыҵгак иԥшаауеит. Аашьара иазку ажәаԥҟақәас иалукаарц алшоит: "Аашьаҩ иныҳәақәа рацәоуп", "Аашьареи ахәышҭаареи еишьцәоуп", "Аашьаҩ иҿырҳасрала дудыруеит", "Аашьаҩ ақалмышь аниба - дадтәалт, ачашә аниба - дадиалт", "Аашьаҩ нхан дымҵызар иҭахуп, крыфан – ддаузар", "Аашьаҩ иҿаҵа зегьы иреиҳауп".

Иҟоуп аԥсуа жәлар рҳәамҭа цҳафырк ари ашьцылара бааԥс ҟалашьас иаиуз ҳзеиҭазҳәо. Ҳазааҭгылап уи:

Иҟан хҩык аишьцәа. Даара иаашьон, иахьтәоугьы изгыломызт. Иагьарааны иубаргьы аҳа ашьапы иҵаианы ицәан.

Ус ишыҟаз, ҽнак зны руаӡәк дахьышьҭаз ииулак илақәа аахитын аҳа дҩаҵаԥшит:

– Шьири, цәгьала иҳа бзиазаап! – иҳәеит.

– Шьири, иааганы иҳамандаз! – иҳәеит аҩбатәи.

– Ҳаи, аҳәара злашәылшозеи! – иҳәахт ахԥатәи.

Ус ишааиуаз, аашьара икны иагоз аишьцәа рыҩны амца акит. Ҩыџьа уа илалаблы ицеит. Аӡәы даанхеит. Убри ихылҵыз роуп иахьатәи аашьацәа зегьы рҳәоит.

Арыжәтә шыҟалаз

Ажь ааӡареи аҩыҟаҵареи аԥсуа иԥсҭазаара иахәҭакуижьҭеи акрааҵуеит. Уимоу, ачеиџьыка иузаҟәыҭхом арыжәтә. Аныҳәарақәа, ачара, аԥсра-абзара ухаҿы иузаагом зегьы ирыцку арыжәтә ада.

Аԥсуаа ҳкультуратә ҭынха иагәылҷчаауа Нарҭаа ирызку аепос уаназхьаԥшуа, аҳәамҭақәа рҟнытә еилыхха иубоит Нарҭаа даара аӡахәа иахӡыӡаауа ишырааӡоз, рбаҳча шырацәаз, аҩгьы меигӡарахда ишҭарҭәоз. Нарҭаа рахьтә аҩыҟаҵара дазҟазан Нарҭ Хнышь. Ҩымаҭәас Нарҭаа иныҟәыргоз ҳаԥшьан. Нарҭаа рҳаԥшьақәа рацәан, аҩгьы рҭабзиахон. Урҭ аҳаԥшьақәа ирыман рхатәы хьыӡқәа: Ҩаӡамакьаҭ, Аҩаӡакьаҭ, Агӡакьаҭ, Хьамхәа уҳәа убас егьырҭгьы. Арҭ аҳаԥшьақәа зегьы иреиҳан Ҩаӡамакьаҭ. Иара Нарҭаа рӡаагага ԥҳалқәа фышә акуан. Ҩаӡамакьаҭ инахагыланы иқәыз ииҳәаз наигӡар акәын.

Аха ишааиуаз акәымкәа, аишьцәа утәы-стәы нарыбжьалан, аҳаԥшьа рзеимакырахеит. Аимак-аиҿак згәы кыднахыз Нарҭ Сасрыҟәа "ҳаимак зхароу уара уоуп, уҟамзар, еимактәы ҳауамызт" иҳәан, Ҩаӡамакьаҭ анышә иҩыҵхны ианиршә, ашьхақәа ирхыууаан Аԥсны агәаны икаҳаит. Ҩаӡамакьат ахьынкаҳаз иԥыххаа ицеит. Аҳаԥшьа агәаӷьқәа ҭан. Аҳаԥшьа анԥҽы, ажьгәаӷьқәа бӷьыжәаан, Аԥсны иахьабалак иқәԥсеит. Агәаӷьқәа ахькаԥсаз аӡахәа рхылҵт. Урҭ ирҿалаз ажь Нарҭ рыжь ҳәа иашьҭалт, аха нас, Нарҭаа репос аҿы ишаҳәо ала, уи ажәла ыӡт, ианыӡааит.

Аԥсуа изы аҩы ус баша ақьафҟаҵара иатәымызт, уи, жәаҳәарада, иҷыдоу культуран. Аԥсуаа реилкаараҿы "арыжәтә ужәыроуп, иара уамжәроуп". Арыжәтә мыцхәы зҽадызцалоз ауаҩы еснагь пату иқәмызт. Арыжәтә аҟазшьа аазырԥшуа ажәаԥҟақәоуп: "Арыжәтә ахьыҩналаз амаӡа дәылҵуеит", "Арыжәтә гра хтыгоуп", "Арыжәтә амаӡа азыҵәахуам", "Арыжәтә мыцхәы зжәыз иажәа нҵәара ақәым", "Арыжәтә мыцхәы зжәыз ибз мыцхәы аҳәоит", "Арыжәтә ркәашагоуп, амцхә – блаҟьагоуп".

Акаҷбеира иахҟьаз

Ауаҩы илоу аҟазшьақәа зегьы реиҳа иҿаасҭоуп акаҷбеира. Акаҷбеира зцәа иалалаз, кажьшьа имаӡам – шьцылара бааԥсык иаҩызоуп. "Акаҷбеи агәыр ахьалеиҵо аиха алихуеит", "Акаҷбеи игәыла ичарагь дахыбаауеит", "Акаҷбеи ухы аҟара урбаны, ула аҟара уиҭоит", "Акаҷбеира ауаҩы иԥсы арцәгьоит" - акаҷбеи адунеи зегьы иара ихифауашәа, дзырҭәыша шыҟамло ауп иҳарҳәогьы арҭ ажәаԥҟақәа.

Акаҷбеира иахҟьаз ахҭыс аанарԥшуеит Очамчыра араион, Гәыԥ ақыҭан, Аџьамҽыӷра аҳаблан иҟоу аӡиа Папанҵҟәыр иахҳәаау алегенда. Папанҵҟәыр ҳәа изышьҭоу аӡиа ахьыҟоу ажәытәан нхарҭа ҭыԥны иҟан. Уа амал рацәаны измаз апап ԥсыцәгьак иҭаацәеи иареи нхон.

Ҽнак амхырашәаразы ауааҳә иун, ицхыраацәа рацәаҩны еизигеит. Ашьыбжьон акрырҿаҵара аамҭа анааи, аҳәа ырҟааны ала рзишьит.

Ауааҳәцәа апап имаҳәгьы дрылазаарын (вариантқәак рҟны иуԥылоит иԥҳа бзиа илбоз, мамзаргьы дҳәаны дзызтәаз арԥыс дрылан ҳәа). Шьыбжьон аишәа инадтәаланы акрыфара рнапы надыркуан еиԥш, апап иӡӷаб ачамгәыр ианҵаны ашәаҳәара далагеит "аҳәа ырҟааны, ала зшьыз" ҳәа. Ари змааназ еилызкааз амаҳәи ауааҳәцәеи аишәа иахыҵны идәықәлеит. Ауааҳәцәа ашҭагь инҭыҵит, адгьыл ааимыҩрын, апап инхарҭа, иҩны, иашҭа-игәара зегьы ҩҭабга ицеит.

Апап иԥҳа лхаҵа дишьҭалан, дыҩны ддәықәлазаап сихьӡоит ҳәа, данихьӡа аамҭазы лхаҵеи лареи рыбжьара адгьыл еиҩԥан, ларгьы дагеит, иара дынхеит. Аха иҟоуп амаҳә иԥҳәысгьы далигеит ҳәа ҳазҳәо алегенда авариантқәа.

Абас акаҷбеира иахҟьаны апап дшынҭаацәаныз, инхарҭагьы иаргьы нҭабга ицеит.

Арҭ аҳәамҭақәа шаҳаҭра руеит ауаҩытәыҩса адунеи дықәнаҵы цәаҩас илоу ашьцылара бааԥсқәа иԥсҭазаара ԥырхага арҭар шрылшо, урҭ аҽрыдцалара мап шацәктәу, риааира шаҭаху.

145

Кәыҵниа ашәарыцаратә сезон ахацыркразы: ашәарыцаҩцәа рыламыс ҳақәгәыӷуеит

0
(ирҿыцуп 19:24 15.08.2020)
Нанҳәа 15 рзы Аԥсны иаатуеит ашәарыцаратә сезон. Уи злалаго, насгьы ашәарыцара аԥҟарақәа ртәы арадио Sputnik аефир аҿы еиҭеиҳәеит ашәарыцаҩцәеи аԥсыӡкыҩцәеи реидгыла ахантәаҩы Ҳаџьараҭ Кәыҵниа.
Кәыҵниа ашәарыцаратә сезон ахацыркразы: ашәарыцаҩцәа рыламыс ҳақәгәыӷуеит

"Асезон аатуеит ачала, уи адагьы акгьы уазышәарыцар ҟалаӡом. Ашәарах жьҭаара 1 инаркны иалагоит. Зныктәи ашәарыцараан ача ҩажәа еиҳаны иушьыр ҟалаӡом. Раԥхьа ача цәырцуеит Цандрыԥшь, Маҳадыр ҳәа иахьашьҭоу аҭыԥ аҿы, уаҟа ирацәаны иубар улшоит, нас цәыббрамзазы Очамчыра араион ахь иаауеит. Ашәарыцаҩ данҭыҵуа имазароуп хышәҟәык: ашәарыцаратә билеҭ, ашәақь аныҟәгаразы аршаҳаҭга, иара убас алицензиа. Ашәарыцара аԥҟарақәа рықәныҟәаразы ахылаԥшра зду аекологиа аусзуҩцәа роуп. Аха еиҳарак ҳара ҳақәгәыӷуеит ашәарыцаҩцәа рыламыс. Ашәарацыҩ аԥсабара даԥырхагахар иҭахызар уи азы еснагь имоуп алшара, аха ҳара ҳзықәгәыӷуа еиҳарак иламысоуп, мамзар, акы икәа иҭаиҵап егьы - иӡап, еснагь уи узишьҭалом. Иҟоуп есышықәса аԥҟарақәа еилазго, урҭ иаҳа-иаҳа шьҭахьҟа ицоит, аха сынтәа ҳақәгәыӷуеит, аекологцәа рус иаҳа идырџьбарап ҳәа избанзар, хаала измаҳауа ыҟоуп", - еиҭеиҳәеит Кәыҵниа.

Иаҳа инеиҵыху аиҿцәажәара шәазыӡырҩыр шәылшоит арадио Sputnik Аԥсны аефир аҿы.

Иара убас шәаԥхьар ҟалоит:

0