АҞӘА, рашәара 11 – Sputnik. ConIFA аверсиала Лондон имҩаԥысуаз ашьапылампыл азы адунеи ачемпионат аҟны Аԥснытәи акоманда абас аҭагылазаашьа ахьаиуз мзызк алкаан иамам — иҳәеит арадио Sputnik аинтервиу азҭаз, Аԥсны еизгоу амилаҭтә команда азыҟаҵаҩ хада Беслан Аџьынџьал.
"Ҳара агәыԥ ӷәӷәа ҳақәшәеит. Ҳгәыԥ аҟынтәи акомандақәа ҩба афинал ахь инеиит. Ҳара иҳалымшеит ишахәҭаз еиԥш инҭкааны ахаарԥшра. Ҳара ԥхьаҟа амилаҭтә команда архиара системала аус адааулалароуп. Уажә уи ҳагхеит, уиоуп иҳахьыз" — иҳәеит азыҟаҵаҩ.
Сынтәа акоманда 12 мшы рыла еидкылан. Ирацәан аиҿкаара аганахь ала апроблемақәа иҳәеит Аџьынџьал.
Иара иажәақәа рыла, ашьапылампыласыҩцәа атурнир амҩаԥысраан ауп рҽеидыркыло ианалага.
"Атурнир аҩбатәи ахәҭаҿы еиҳа ҳаиӷьны ҳхы ааҳарԥшит аԥхьа аасҭа" — иҳәеит иара.
Азыҟаҵаҩ иажәақәа рыла, аԥсуа диаспора иҟанаҵоз адгылара акыр игәыҭгаган.
"Ҳара урҭ иҳарҭоз адгылара акыр иаҳныруан. Лондон иҟоу аԥсуа диаспора есыҽны иаҳзаауан, иҳавагылан. Ҭабуп ҳәа раҳҳәароуп. Аҩны ҳаҟазшәа ҳхы аабон" ҳәа иҳәоит Беслан Аџьынџьал.
Аԥснытәи акоманда ачемпионат иалахәын чемпионцәақәак раҳасабала.
9-16 аҭыԥқәа рзы ахәмаррақәа рзы Аԥснытәи акомандеи Тамил-Илама акомандеи рыхәмарраан аиааира ргеит 6:0 ҳәа, иапониатәи кореиааи дареи реицыхәмарраан — 2:0 ҳәа.
Ачемпионат мҩаԥыргоит ес-ҩышықәса рахь знык. Ихьыԥшым ашьапылампылтә ассоциациақәа Рконфедерациа ConIFA шьаҭаркын рашәара 7, 2013 шықәса рзы. Иара еиднакылоит 40 инареиҳаны акомандақәа.
