Аԥснытәи атаибоксиорцәа араӡны медалқәа ҩбеи аџьаз медали ргеит

19
(ирҿыцуп 14:43 08.02.2019)
Жәабран 7 рзы Курск имҩаԥысуан Урыстәыла Агәҭатәии Аҩада-мраҭашәаратәии аокругқәа рҿы таитәи абокс азы ачемпионат.

АҞӘА, жәабран 8– Sputnik, Асмаҭ Ҵәыџьԥҳа. Суламита Цкәуаԥҳаи, Давид Амҷбеи, Леон Амҷбеи Курск имҩаԥысуаз таитәи абокс азы ачемпионат аԥхьахәқәа ргеит ҳәа Sputnik иазеиҭеиҳәеит таитәи абокс азы Аԥсны Афедерациа аиҳабы Ҭеимураз Гергьедаа.

Ачемпионат афинал аҿы Давиди Леони Амҷааа аҩбатәи аҭыԥқәа ргеит, Суламита Цкәуаԥҳа аџьаз амедал ланашьахеит. Аԥыжәаратә ҭыԥқәа иалдыршоит атаибоксиорцәа Урыстәыла Ачемпионати Аԥхьахәгареи рылахәхара. Иара мҩаԥысуеит Пермь, хәажжәкыра 27-31 рзы.

"Уи адагьы Суламита Цкәуаԥҳа аспорт азҟазаразы акандидат ҳәа ахьӡ лхырҵеит. Лара ҩынтә дықәгылеит. Аиааира лгазҭгьы таитәи абокс азы Урыстәыла аспорт азҟаза ҳәа ахьӡ лыхҵахон. Уажәы аԥкаанҵақәа ҳарзыԥшуп", - ҳәа еиҭеиҳәоит таитәи абокс азы Аԥсны Афедерациа аиҳабы Ҭеимураз Гергьедаа.

Гергьедаа иажәақәа рыла, аспортсменцәа рыпланқәа рҿы иҟоуп Урыстәыла Ачемпионати Аԥхьахәгареи рылахәхара. Аха уаанӡа аспортсменцәа Краснодартәи атәылаҿацә ачемпионат аҟны рхы бзианы иаадырԥшыроуп.

19