"Аиааира Ахраҿаз": самбо азы XVII Жәларбжьаратәи атурнир Афон ҿыц имҩаԥгахоит

11
(ирҿыцуп 09:34 24.09.2020)
Аицлабрақәа ирылахәхоит 2004-2009 шықәсқәа рзы ииз арԥарцәеи 2006-2008 шықәсқәа рзы ииз аҭыԥҳацәеи.

АҞӘА, цәыббра 24 – Sputnik, Бадраҟ Аҩӡба. Самбо азы XVII Жәларбжьаратәи атурнир "Аиааира Ахраҿа", аибашьцәа-аинтернационалистцәа ргәалашәара иазку, цәыббра 27-29 рзы Афон ҿыц имҩаԥысраны иҟоуп ҳәа иҳәеит Самбои дзиудои рзы ареспублика афедерациа ахантәаҩы Михаил Пиканин Sputnik аҿы имҩаԥысыз апресс-конференциаҿ.

"Есшықәса атурнир агеографиа аҽарҭбаауеит. Иаҳа-иаҳа иаҳҭаауа аспортсменцәа рхыԥхьаӡара иацлоит. Ҳара ҳзы акраҵанакуеит атурнир зҽалазырхәуа рыҩаӡара есааира иахьеизҳауа.  Аԥхьанатә атурнир иалахәыз аспортсменцәа ҿыц аҽазыҟаҵара иалагаз ракәзар, уажәы – аспорт азҟазарахь акандидатцәеи аспорт азҟазацәеи роуп", - ҳәа иҳәеит иара.

Самбои дзиудои рзы ареспублика афедерациа ахантәаҩы ихаҭыԥуаҩ Роберт Новоиан иҳәеит иахьазы аицлабра аҽалархәра шырҭаху аԥснытәии урыстәылатәии акомандақәа 22.

"Традициак аҳасабала Лада Урыстәыла, Нхыҵ Кавказ, Урыстәыла агәы, Москва, Санкт-Петербург рҟынтәи ауп асасцәа шаҳзаауа. Сынтәа атурнир алахәхаразы агәаҳәара аадырԥшит Мрагылара Хара - Алада-Сахалинск, Благовешьченск, Иакутиа, Амуртәи аобласт, Камчаткатәи атәылаҿацә", - иҳәеит Новоиан.

Иара иажәақәа рыла, атурнир иалахәхар рылшоит 400-ҩык аспортсменцәа.

"Аиҳарак атурнир Аҟәа акәын иахьымҩаԥысуаз. Уажәы раԥхьаӡа акәны Афон ҿыц имҩаԥгахоит. Аратәи азал ауснагӡатә амҩаԥгара еиҳа ианаалоит. Аҟәа иҟоу азалқәа ҩба роуп – Курченко лпарк аҿи "Спартаки". "Спартак" азал маҷуп, Курченко лпарк аҿы азал дууп, аха атрибунақәа маҷуп", - ҳәа иҳәоит Роберт Новоиан.

Аицлабрақәа раан ашәарҭадара азҵаара далацәажәо Самбои дзиудои рзы ареспублика афедерациа ахантәаҩы ихаҭыԥуаҩ Андреи Погосов иҳәеит акомандақәа ргәырҽанҵан аспортсменцәа ргәабзиаразы аршаҳаҭгақәа рымазарц ҳәа.

"Агәабзиарахьчара аминистрра адырра раҳҭеит атурнир шымҩаԥааго азы. Ҳгәыӷуеит ацхыраара ҟарҵап ҳәа", - иҳәеит иара.

Погосов еиҭеиҳәеит  атурнир "Аиааира Ахраҿа" ишалахәхо Аԥсны арегионқәа зегьы. Ареспублика ахьӡала иқәгылоит 82-ҩык аспортсменцәа.

"Атурнир ахь иаауа акомандақәа акыр иӷәӷәоуп. Еснагь акоманда ӷәӷәақәа ааргоит Адыгеиантә, иара убас Ингушетиатәи акоманда, Краснодартәи атәылаҿацә акоманда, Москвеи Санкт-Петербурги ркомандақәа аԥыжәара змоу командақәоуп", - ҳәа азгәеиҭеит Погосов.

Самбои дзиудои рзы ареспублика афедерациа ахантәаҩы Михаил Чалмаз аспонсорцәа дрылацәажәеит.

"17 шықәса раахыс сынтәа раԥхьаӡа акәны атурнир Аҳәынҭеилакы аламырхәыкәа имҩаԥаагоит. Ҳҩызцәа ари аспортхк аларҵәара иҳацхраауеит. Уажәгьы ацхыраара ҳарҭеит аилахәырақәа "Премиум", "Аԥсны аҩқәеи аӡқәеи", "Фара", "Кәыдры", Афонҿыцтәи аҳаԥы. Атурнир зегьы ҳзы иныҳәоуп. "Аиааира Ахраҿа" – самбо азы иналукааша турнируп", - ҳәа иҳәеит Чалмаз.

Атурнир аиҿкааҩцәа – Самбо азы Аԥсны афедерациа, Аҟәа ақалақь ахадара аҿари аспорти рзы Адепартаменти Афон ҿыц ахадареи алархәны.

11

Аҟәатәи "Нарҭ" ашьапылампыл азы Аԥсны иачемпионхеит

68
(ирҿыцуп 19:25 25.10.2020)
Амҽыша, жьҭаара 25 рзы акомандақәа "Нарҭи" (Аҟәа) "Афони" (Афон Ҿыц) реиԥыларала имҩаԥысит ашьапылампыл азы Аԥсны ачемпионат аҵыхәтәантәи ахәмарра.

АҞӘА, жьҭаара 25 - Sputnik, Асмаҭ Ҵәыџьԥҳа. Аҟәатәи "Нарҭ" ашьапылампыл азы Аԥсны иачемпионхеит, ашьапылампылтә клуб "Афон" ианаиааи ашьҭахь ҳәа Sputnik иазеиҭеиҳәеит Аԥсны ашьапылампылазы Афедерациа ахада Витали Федоренко.

Аҟәатәи аклуб Афонҿыцтәи акоманда иаԥнагеит 3:0 ҳәа ашьапылампыл азы Ачемпионат аҵыхәтәантәи атур аҿы.

"Нарҭ" хымԥада аиааира аиур акәын, избанзар еиҭахарыла ма аҵахарыла ихәмарыр актәи аҭыԥ зауаз гәдоуҭатәи "Риҵа" акәхон. Убри азы акоманда аханатә аиааира ахы ақәкны иҟан", - ҳәа азгәеиҭеит Федоренко.

Актәи атаим 1:0 ҳәа "Нарҭ" аиааирала инҵәеит. Ахәмарра ахәбатәи аминуҭ аан ампыл амба иҭаиршәит Ҭемыр Агрба, иара аҽазныкгьы,  60-тәи аминуҭ азы ампыл ҭаиршәит. 71-тәи аминуҭ азы ахԥатәи ампыл амба иҭаиршәит Алан Кәыҵниа.

Аҩбатәи атаим аан аӡбаҩ аҟәатәи акоманда ахәмарыҩ Асҭамыр Џьынџьал далицеит. Абри ашьҭахь "Нарҭ" жәаҩыкны ихәмаруан.

"Ус шакәызгьы акоманда "Афон" иаԥнагеит, ҩ-мпылк амба иҭаршәын", - ҳәа иҳәеит Федоренко.

© Sputnik / Томас Тхайцук
Финал чемпионата Абхазии по футболу

Ачемпионат аихшьаалақәа рыла "араӡны" аиуит гәдоуҭатәи "Риҵа", ахԥатәи аҭыԥ ннакылеит аҟәатәи акоманда "Динамо".

68

Аԥсуа шахматасыҩцәа онлаин-хәмарраҿы Ҭаҭарсҭан акоманда ириааит

7
(ирҿыцуп 17:16 08.10.2020)
Онлаин-турнир аҿы ихәмаруаз Аԥснытәи акоманда иалахәын жәаҩык ашахматасыҩцәа, аԥышәа змоу риеԥш аҿаргьы.

АҞӘА, жьҭаара 8 – Sputnik, Асмаҭ Ҵәыџьԥҳа. Аԥснытәи ашахматасыҩцәа ркоманда Ҭаҭарсҭанаа ркоманда ириааит онлаин-турнир аҿы. Атурнир еиҿкаан Россотрудничество ацхыраарала ҳәа Sputnik иазеиҭеиҳәеит атурнир администратор Алмас Багаҭелиа.

Иара иажәақәа рыла, сынтәа иӡбан ачемпионат онлаин формат ала имҩаԥгазарц.

Онлаин-турнир аҿы ихәмаруаз Аԥснытәи акоманда иалахәын жәаҩык ашахматасыҩцәа, аԥышәа змоу риеԥш аҿаргьы. Акоманда иалахәын Аԥсны ашахмат азы Афедерациа ахада Константин Ҭыжәба, Россотрудничество ахаҭарнак Борис Наҟоԥиа, ашахматасыҩцәа Артиом Табариани Ҭемыр Лакербаиеи, аҿар: Нестор Багаҭелиеи Сарида Лакәатааԥҳаи.

Аиааиҩы далкаан азеиԥш балл ахыԥхьаӡарала. Аԥснытәи акоманда аиааира агеит 14:6 ҳәа.

"Ахәмарыҩцәа ҩба-ҩба партиа ихәмаруан – аиқәаҵәақәеи ашкәакәақәеи рыла. Ҭаҭарсҭан акоманда алахәылацәа акыр аԥышәа рымоуп, иҟоуп аспорт азҟазаразы акандидатцәагьы. Ҳара ҳахәмарыҩцәа уажәшьҭа онлаин-формат иашьцылеит", - ҳәа иҳәеит Багаҭелиа.

Багаҭелиа иажәақәа рыла, иазыԥхьагәаҭоуп онлаин турнир ҿыцқәа рымҩаԥгара Россотрудничествои ареспублика Ашахматтә федерациеи рыцхыраарала.

7

Уахыки-ҽнаки рыла 106-ҩык акоронавирус шрылаз аадырԥшит Аԥсны

9
Аепидемиа иалагеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 4058-ҩык ыҟоуп. Урҭ рахьтә ргәы бзиахеит 2071-ҩык, рыԥсҭазаара иалҵит 36-ҩык.

АҞӘА, жьҭаара 28 - Sputnik. Иҳаҩсыз уахыки-ҽнаки рыла COVID-19 зцәа иалоу реилкааразы атестқәа 458 ҟаҵан, урҭ рахьтә акоронавирус аарԥшын 106 тест рҟны ҳәа аанацҳауеит Ауааԥсыра COVID-19 рацәыхьчаразы аоперативтә штаб.

Абыржәтәи аамҭазы Гәдоуҭатәи араионтә хәышәтәырҭа хадаҿы ишьҭоуп 137-ҩык ауааԥсыра, урҭ рахьтә 118-ҩык акоронавирус адиагноз рзышьақәырӷәӷәоуп, рҭагылазаашьа бааԥсуп 26-ҩык, ибжьаратәуп - 40-ҩык, илҩаауп 15-ҩык апациентцәа. Гәдоуҭатәи агоспиталь иҭашәеит жәҩык ачымазцәа.

Аҟәа асасааирҭа "Аиҭар" ашҭаҿы иаадыртыз амобилтә госпиталь аҟны ишьҭоуп акоронавирус зыдбалоу 51-ҩык апациентцәа. 47-ҩык рҭагылазаашьа бжьаратәуп ҳәа иԥхьаӡоуп, ԥшьҩык рҭагылазаашьа бааԥсуп. Амобилтә госпиталь аҟынтәи илҩаауп быжьҩык.

Ауааԥсыра COVID-19 рацәыхьчаразы аоперативтә штаб ажәлар рахь ааԥхьара ҟанаҵоит ачымазара ҿкы рымкырц азы иахәҭоу аԥҟарақәа зегьы ирықәныҟәаларц.

Акоронавирус иазку ажәабжьқәа зегьы шәрыԥхьар ҟалоит абра>>

9
Атемақәа:
Ачымазара ҿкы – акоронавирус Аԥсни адунеи аҿи: иалкаау