Шәышықәса ирҭысхьоу: зықәра иахамшшаауа абырг лыԥсҭазаашьа

56
(ирҿыцуп 13:32 20.02.2020)
Гал дынхоит ақәра ду иҭагылоу абырг Зинаида Шамугьиаԥҳа. Ҵыԥх лара илхыҵит 111 шықәса. Ишәыдаагалоит уи илызку авидеонҵамҭа.

Гал инхо Зинаида Шамугьиа диит 1908 шықәсазы Барӷьаԥ ақыҭан. Зинаида дшыхәыҷыз лани лаби лыԥхеит, лашьеи, лаҳәшьеи, лареи зааӡаз лаб иашьа иоуп.

Ахәыҷқәа рҭынхацәа анхамҩаҿы даара ирыцхраауан. 20 шықәса анылхыҵуаз Зинаида аҭаацәара далалеит, лыԥсҭазаара змалдаз 70 шықәса ихыҵуан. Лара лажәақәа рыла, аӡәгьы мчыла қәрала акыр илеиҳабыз ахаҵа длиимҭеит.

"Сара схала сгәы даҭаххеит. Иара дуаҩ бзиан, пату сықәиҵон, сгәы нирхаӡомызт. Аурыс бызшәа бзианы идыруан, далгахьан Харковтәи апартиатә школ, 10 қыҭак рҟны аобком ахантәаҩыс дыҟан. Аԥарагьы иман", - лҳәеит лара.

Зинаида лхала дынхоит лыуацәақәак рыҩнаҟны, лыԥшәма иԥсҭазаара далҵижьҭеи акыр шықәса ҵуеит, лԥазаҵәи лмаҭеи лыԥхахьеит. Илхылаԥшуеит лыуацәеи лгәылацәеи.

111 шықәса шылхыҵуагьы, анду Зина ҭыԥк аҿы дызтәом. Лара анхамҩа хәыҷ лымоуп, ауҭраҭыхи ашәыри аалрыхуеит, араса лыҟәшәоит.

56