АҞӘА, ԥхынҷкәын 23 — Sputnik, Асҭанда Арӡынԥҳа. Урыстәылатәи Афедерациеи Аԥсны Аҳәынҭқарреи рыбжьара иааиԥмырҟьаӡакәа Аԥсны инхо Урыстәыла атәылауаа ртәанчахәытә еиқәыршәараз Аиқәшаҳаҭра еицҿакрыла аратификациа азыруит Урыстәылатәи Афедерациа Аҳәынҭқарратә Дума адепутатцәа.
Урыстәылатәи Афедерациеи Аԥсны Аҳәынҭқарреи рыбжьара иааиԥмырҟьаӡакәа Аԥсны инхо Урыстәыла атәылауаа ртәанчахәытә еиқәыршәараз Аиқәшаҳаҭра асоциалтә политика аусхк аҟны еиԥш аҳәынҭқаррақәа русеицураҟынгьы аҵак ду аманы иҟоуп, ҳәа азгәеиҭеит евразиатәи аинтеграциаз Аилак аиҳабы ИАР атәылақәа рзы Урыстәылатәи Афедерациа Аҳәынҭқарратә Дума Аилак аиҳабы Леонид Слуцки.
"Аиқәшаҳаҭра асоциалтә политика аусхк аҟны еиԥш ҳҳәынҭқаррақәа русеицураҟынгьы аҵак ду аманы иҟоуп. Аҵак ду аманы иҟоуп зажәра Аԥсны изхызгарц зҭахны иҟоу ауаа рзы", — иҳәеит Слуцки.
Иара убасгьы инаҵшьны иазгәеиҭеит Аиқәшаҳаҭра еицҿакрыла аратификациа азыруит Урыстәылатәи Афедерациа Аҳәынҭқарратә Дума адепутатцәа зегьы ҳәа. Иара иажәақәа рыла Аԥсни Урыстәылеи реизыҟазаашьақәа еиҳа-еиҳа еизҳауеит, рыҽдырҭбаауеит.
"Ҳара ҳусеицура ԥхьаҟа ицоит, еизҳауеит. Аусхкқәа зегь рҟны ҳаиныруеит. Иахьеиԥш иааиуа 2016 шықәса рзгьы ҳусқәа аманшәалара рыцлап ҳәа сгәыӷуеит. Аԥсны инхо урыстәылауааи иҳазгәакьоу аԥсуа жәлари ирыдысныҳәалоит ҳазҭало ашықәс ҿыц", ҳәа азгәеиҭеит иара.
Урыстәылатәи Афедерациеи Аԥсны Аҳәынҭқарреи рыбжьара иааиԥмырҟьаӡакәа Аԥсны инхо Урыстәыла атәылауаа ртәанчахәытә еиқәыршәараз Аиқәшаҳаҭра 2015 шықәса мшаԥымзазы рнапы аҵарҩит Аԥсны аџьеи, аусураиуреи, асоциалтә еиқәыршәареи рминистр Сурен Кереселиани Урыстәыла аџьеи асоциалтә еиқәыршәареи рминистр Максим Топилини.
Иара инақәыршәаны ҳтәылауаа ртәанчахәы Урыстәыла Аладатәи афедералтә округ аҟны бжьаратәла ироуа 10 179,65 мааҭ иашьашәалан ишьақәгылароуп.
Ареспубликаҟны инхоит 30 000-ҩык атәанчахәы зоураны иҟоу Урыстәыла атәылауаа. Иахьазы урҭ ртәанчахәы бжьаратәла 6 000 мааҭ инаӡоит.
