АҞӘА, жәабран 24, Sputnik. Быжь-тәылак, Урыстәыла, Молдова, Украина, Аԥсны, Беларуссиа, Киргизиа, Аахыҵ Уаԥстәыла рхаҭарнакцәа аамҭакала азыҳәақәа нарышьҭит МИА "Россия сегодня" имҩаԥнагараны иҟоу арадиомҩаԥгаҩцәа рконкурс рҽалархәразы. Алахәылацәа еицырдыруа ажурналистцәа инадыркны ҿыц зыҽԥызшәо рҟынӡа аҵанакуеит.
"Иҟоуп Левитан иҽиеиԥштәра иашьҭоу, иҟоуп зхатәы хаҿы арбара зҭаху. Иџьоушьартә иҟоуп материалк заҟа хкрыла ацәыргара алшо. Уажәнатә иубарҭоуп ажиури рҿаԥхьа аус рацәа, аус уадаҩ шышьҭоу", ҳәа азгәеиҭеит аконкурс аексперт гәыԥ ахантәаҩы, Жәларбжьаратәи Аинформациатә маҵзура "Россия сегодня" аурыс редакциа анапхгаҩы Алексеи Орлов.
Аконкурс иахықәкуп арадиожурналистцәа ҿарацәа адгылара рыҭара, апрофессионалтә кадырқәа реиҵааӡара.
"Аконкурс даара иаҭахны иҟоуп. Ииашоу алитературатә ажәа, атембр ԥшӡа, изҳәо иинтонациа, адәахьтәи ахаҿԥшра – абарҭ зегьы еицны иҟазароуп. Адиктор аудиториа бзиа дырбозароуп", лҳәеит аконкурс ажиури алахәыла Ирина Герасимова.
Аконкурс алахәразы ааԥхьара рымоуп Урыстәылеи, ИАРи, Балтиеи ртәылақәа рҟны аус зуа арадиоканалқәа ркорреспондентцәеи ррадиомҩаԥгаҩцәеи. Аҽалархәразы азыҳәа харҭәаатәуп, Иури Левитан итекстқәа руак иаԥхьатәуп. Иара нашьҭтәуп Аиҿкааратә еилакы ахьӡала, levitan@rian.ru ҳәа, мшаԥымза 15 рҟынӡа.
Алауреатцәа алыркаауеит рашәарамза 5, 2016 шықәса рзы.
Аконкурс ахәҭакхоит Совинформбиуро ашықәсхыҵра иазку аныҳәатә уснагӡатәқәа. Имҩаԥгахараны иҟоу ауснагӡатәқәа реилкаара алшоит РИА Новости асаит, "75 лет. История начинается с новости" аҟәшаҟны.
Жәларбжьаратәи Аинформациатә маҵзура "Россия сегодня" — дунеижәларбжьаратә медиагәыԥуп, адунеи аҟны иҟало ахҭысқәа аанарԥшуеит. Иарахьы иаҵанакуеит агентрақәа: РИА Новости, Р-Спорт, РИА Недвижимость, РИА Рейтинг, ИноСМИ.
