АҞӘА, лаҵара 4— Sputnik. Урыстәыла Ахада Владимир Путин лаҵара 3 рзы Шәача ақалақь аҟны имҩаԥигеит ашьапылампыл азы адунеи ачемпионат аиҿкааратә хеилак аилатәара ҳәа аанацҳауеит Р-Спорт Урыстәыла Ахада Владимир Путин ипресс-маӡаныҟәгаҩ Дмитри Песков иажәақәа ҵаҵӷәыс иганы.
Аилатәараҟны ирылацәажәан астадионқәа разырхиара, аинфраструктура ашьақәыргылара, атранспорттә, амедицинатә, аинформациатә еиқәыршәара. Владимир Путин иазгәеиҭеит ашьапылампыл азы адунеи ачемпионат Урыстәыла азыхианы иҟоуп, гха-ԥхақәак ыҟазаргьы урҭгьы иаарласны рҭыԥ иқәҵахоит ҳәа.
"Иаарласны Урыстәыла имҩаԥысраны иҟоу ашьапылампыл азы адунеи ачемпионат Урыстәыла азыхианы иҟоуп, гха-ԥхақәак ыҟазаргьы урҭгьы иаарласны рҭыԥ иқәҵахоит. Иҟаҵоу акыр ирацәоуп. Уажәы зегьы еиуршәаны русура амҩаԥгара аҭахоит", — иҳәеит Владимир Путин ашьапылампыл азы адунеи ачемпионат аиҿкааратә хеилак аилатәараҿ.
Урыстәыла иахьаҵанакуа раԥхьатәи ашьапылампыл азы адунеи ачемпионат мҩаԥысуеит Урыстәыла ақалақьқәа 11 –Москва, Санкт-Петербург, Самара, Саранск, Ростове-на-Дону, Шәача, Казань, Калининград, Волгоград, Новгород, Екатеринбург рҟны.
