Президентский дворец с флагштоком в Тбилиси

Литва Адәныҟатәи аусқәа рминистр: Қырҭтәыла НАТО иалалоит ианазыхиахалак

6
НАТО амаӡаныҟәгаҩ хада Иенс Столтенберг уаанӡа аҳәамҭа ҟаиҵахьан Қырҭтәыла ԥхьаҟазы алианс иалахәылахоит ҳәа. Уи еиҭашьақәирӷәӷәеит Бриуссель ԥхынгәы 11-12 рзы имҩаԥысуаз асаммит аҿы.

АҞӘА, нанҳәа 7 — Sputnik. Қырҭтәыла лассы НАТО алалара азҵаара рацәа цәырнагоит иҳәеит арадиостанциа Žinių radijas аефир аҿы Литва Адәныҟатәи аусқәа рминистр Линас Линкиавичиус. Абри атәы аанацҳауеит РИА Новости.

"Қырҭтәыла НАТО алалара макьана иалымшар ҟалап, аха ҳара Қырҭтәыла ареформақәа ирыцнаҵаларц, астандартқәа аҽрықәнаршәаларц абжьаагоит. Уи зегьы уаҵәтәи амш ауп… Қырҭтәыла НАТО иалахәылахоит изну амҩа ианымҵыр", — иҳәеит Адәныҟатәи аусқәа рминистр Линас Линкиавичиус.

Иара уажәы официалтә визитла Қарҭ дыҟоуп.

Уаанӡа Урыстәыла аиҳабыра рхада Дмитри Медведев иҳәеит дышгәыӷуа НАТО аҿы еилыркаауеит ҳәа Қырҭтәыла алианс алалара ахылҿиаақәа. Урыстәыла Аԥсни Аахыҵ Уаԥстәылеи ахьазханаҵо иаҿырԥшны аимак аҭыԥ аиур ҟалоит ҳәа агәаанагара имоуп Медведев.

Медведев иазиԥхьаӡоит НАТО аҽырҭбаара Урыстәыла ашәарҭадара ҵнашәаауеит ҳәа.

"Ари аимак ду ахь ҳкылнагар алшоит. Урыстәыла Аԥсни Аахыҵ Уаԥстәылеи ахьазханаҵо иаҿырԥшны аимак аҭыԥ аиур ҟалоит. Аԥсни Аахыҵ Уаԥстәылеи ҳарратә базақәа гылоуп", — ҳәа иҳәеит иара "Коммерсант" аинтервиу анеиҭоз.

Қырҭтәылеи НАТО русеицура хацыркхеит 1994 шықәса рзы, Қырҭтәыла апрограмма "Партнерство ради мира" ианалала ашьҭахь. 2008 шықәса рзы Бухарест НАТО асаммит аҿы иазгәаҭан Қырҭтәыла НАТО иалалар шалшо атәы.

Нанҳәа 8 2008 шықәса рзы Қырҭтәыла Аахыҵ Уаԥстәыла иақәлеит анапахьы аагаразы. Урыстәыла ар аланагалеит. Нанҳәа 26 2008 шықәса рзы Аԥсныи аахыҵ Уаԥстәылеи рхьыԥшымра азханаҵеит.

6