АҞӘА, ажьырныҳәа 21 — Sputnik. Германиа аиҳабыра азиншьаҭа рымам агазмҩангагатә проект "Северный поток- 2" аргылара аԥырхагахаразы ҳәа иҳәеит иқәгылараан Германиа аекономика аминистр Петер Альтмаиер. Абри атәы аанацҳауеит РИА Новости, агазеҭ Handelsblatt адыррақәа ҵаҵӷәыс иганы.
Иара иазгәеиҭеит атрубақәа амшын аҵа ишыҵгоу, уи ишыҟанамҵо ахалагаларазы аҭагылазаашьа.
Апроект "Северный поток-2" иазыԥхьагәанаҭоит 55 миллиард кубометр агаз Урыстәылантәи Балтиатәи амшын аҵала Европаҟа ииазго агазмҩангагақәа ҩба рышьҭаҵара.
Агазмҩангага ашьҭаҵара хыркәшахоит 2019 шықәса анҵәамҭазы. Агазмҩангага ашьҭаҵара азин ҟарҵахьеит: Германиа, Финляндиа, Швециа.
Иара иаҿагылоит Америкеи Украинеи. Апроект аполитикатә ҟазшьа амоуп ҳәа иахцәажәоит Латвиа, Польша, Литва.
Москва изныкымкәа иазгәанаҭахьеит агазмҩангага нырратә хархәаганы ишшьатәым. Германиа аиҳабыра ракәзаргьы "Северный поток - 2" економикатә проектны иахәаԥшуеит.
