АҞӘА, лаҵара 13 - Sputnik. Шереметьево, аҳаирплан Sukhoi Superjet 100 аҟны иҭахаз рыԥсыбаҩқәа рхаҭарақәа шьақәыргылоуп ҳәа аанацҳауеит РИА Новости.
"Амолекулиар-генетикатә идентификациа аганахь ала аусурақәа хыркәшоуп. Sukhoi Superjet 100 аҟны иҭахаз рыԥсыбаҩқәа рхаҭарақәа шьақәыргылоуп", - ҳәа аҳәоит адырраҭараҿы.
Ҳаџьымба Шереметьево иҟалаз арыцҳара инамаданы Путин дидышшылеит
Шереметьево апассаџьыртә ҳаирплан Sukhoi Superjet 100 Москва - Мурманск амца акит лаҵара 5 рзы. Уи 28 минуҭ аҳауа ишалаз, иаалырҟьаны иахьынтәишьҭыԥрааз аҳаирбаӷәаза "Шереметьево" ахь ихынҳәыр акәхеит. Аҳауатә ҭагылазаашьа иахҟьаны, ҩынтә атәарҭа иахыԥраауан. Иантәоз аҳаирплан ашассиқәа ԥҵәеит, аусаругақәа амца рыцралеит.
Аҵыхәтәантәи адыррақәа рыла, 78-ҩык апассаџьырцәа рахьтә 41 ҭахеит, 37-ҩык еиқәхеит.
Иҟалаз ахҭыс инамаданы ҩыџьа ма инареиҳаны ауааԥсыра рыԥсҭазаара ралҵра зыхҟьаз аҳаиртә транспорт ашәарҭадара аԥҟарақәа реилагаразы ашьаусҭҵаара хацыркуп.
