АҞӘА, рашәара 13 – Sputnik. Иорданиеи Ливани рҟынтәи ахҵәацәа рыԥсадгьыл ахь ихынҳәит. Аушьҭырҭатә ҭыԥқәа "Джеидет-Иабус", "Телль-Калах", "Насиб" ирхысит 350-ҩык Ливанынтәи, 780-ҩык Иорданиантәи ҳәа аанацҳауеит РИА Новости.
"Ииасыз уахи-ҽни ирылагӡаны Шьамтәылатәи арабтә республикахь аҳәаанырцәтәи аҳәынҭқаррақәа рҟынтәи ихынҳәит 1 122 -ҩык ахҵәацәа, Ливанынтәи – 327-ҩык (98-ҩык аҳәса, 167-ҩык ахәыҷқәа), Иорданиантәи аушьҭырҭатә ҭыԥ "Насиб" иахысит 711-ҩык (213-ҩык аҳәса, 363-ҩык ахәыҷқәа)", - ҳәа аҳәоит адырраҭараҿы.
Иара убасгьы иазгәаҭоуп Дамаск апровинциа Кабр-Ес-Сит аҟны урыстәылатәи аган агуманитартә акциа шымҩаԥнагаз, еиҳа зылшара ԥку аҭаацәарақәа 2 018 тонна афатә-ажәтә шрыҭаз.
Шьамтәыла анџьныртә ар ҟәшақәа аҵыхәтәантәи аамҭазы аминақәа рҟынтәи рхы иақәиҭыртәит апровинциа Дераа иатәу аиланхарҭа Џьасим, Ель-Харра (апровинциа Дераа), Дума (апровинциа Дамаск) аҿы 2,8 гектарк адгьыл.
Ииасыз амш иалагӡаны Шьамтәылаҟа ихынҳәит зықьҩык инарзынаԥшуа ахҵәацәа>>
Шьамтәыла, бџьаршьҭыхлатәи аиҿагылара мҩаԥысуеит 2011 шықәса раахыс 2017 шықәса анҵәамҭазы ирылаҳәан атеррористтә гәыԥ ИГИЛ* ишаиааиз азы.
Иахьатәи аамҭазы аполитикатә ҭышәынтәалара, атәыла аиҭашьақәыргылара, ахҵәацәа рырхынҳәра иаҿуп.
*Урыстәыла изакәантәым ҳәа иԥхьаӡоу атеррористтә еиҿкаара.
