АҞӘА, жьҭаара 24 – Sputnik. Адунеизегьтәи абанк Doing Business ареитинг ала Урыстәыла 31-тәи аҭыԥ аҟынтәи 28-тәи аҭыԥ ахь ихалеит ҳәа аанацҳауеит РИА Новости.
Урыстәыла ареитинг ашьҭыҵра анырра арҭеит атәылаҿ 2018 шықәса рзы иалагалаз ареформақәа хԥа: ашәахтәшәарақәа рықәныҟәара армариара, анаплакқәа афымцалашарала реиқәыршәара апроцесс арццакра, аминоритартә инвесторцәа адгылара рыҭара.
2012 шықәсазтәи ақәҵарақәа рҿы Урыстәыла ахада Владимир Путин адҵа ықәиргылахьан 2018 шықәса рзы Doing Business ареитинг ала 20–тәи ацәаҳәаҟынӡа анеиразы. Асеиԥш алҵшәақәа алмыршахеит, аха аҵыхәтәантәи бжьышықәса рыҩнуҵҟа Урыстәыла 120-тәи аҭыԥ аҟынтәи 28–тәи аҟынӡа инеит.
Ииасыз ашықәс аан еиԥш, сынтәагьы абизнес азы аҭагылазаашьа маншәалақәа раԥҵаразы аԥхьагылара амоуп Зеландиа ҿыц. Аҩбатәи аҭыԥ - Сингапур, ахԥатәи - Гонконг, аԥшьбатәи – Даниа.
