Россотрудничество ахада ҿыц иҳәеит амаҵзура аиҭакра дуқәа азыԥшуп ҳәа

13
(ирҿыцуп 10:26 26.06.2020)
Евгени Примаков Россотрудничество ахадас иҟаҵаразы Урыстәыла ахада аусдҵа инапы аҵаиҩит рашәара 25 рзы.

АҞӘА, рашәара 26 - Sputnik, Мариа Науменко. Россотрудничество ахада ҿыц Евгени Примаков Sputnik акорреспондент илзеиҭеиҳәеит амаҵзура аиҭакрақәа ахҭысраны иҟоуп ҳәа.

"Амаҵзураҿы иҟоу апроблемақәа ртәы зегьы ирдыруеит. Сара ари аҭыԥ ахагылара сақәшаҳаҭхеит, избанзар ибзианы издыруеит иҟаҵатәу. Ҳәарада, апланқәа сымоуп. Россотрудничество аиҭакрақәа ақәшәоит, аха урҭ макьаназы рӡыргара сҭахым", - иҳәеит Евгени Примаков.

Примаков иара убасгьы иҳәеит ԥхьаҟатәи иусуразы еилацәажәараны ишыҟоу Урыстәыла Адәныҟатәи аусқәа рминистр Сергеи Лаврови иареи. Дара еиқәшәараны иҟоуп рашәара 26 рзы.

Примаков Евгени Александр-иԥа Россотрудничество анапхгаҩыс дҟаҵазааит ҳәа аҳәоит Владимир Путин инапы зҵаиҩыз аусдҵа. Евгени Примаков жәларбжьаратәи азҵаарақәеи агуманитартә проектқәеи рзы Аҳәынқарратә дума ахантәаҩы иабжьгаҩыс дыҟан. Иара урыстәылатәи адипломат, уаанӡа Урыстәыла Адәныҟатәи аусқәа рминистрс иҟаз Евгени Примаков димоҭоуп.

Евгени Примаков – жәларбжьаратәи журналиступ, Евгени Сандро ҳәа апсевдоним иманы дыҩуан. 2018 шықәсазтәи алхрақәа раан Владимир Путин игәрагаратә хаҿны дықәгылан.

Аҳәаанырцә инхо ҳџьынџьуааи агуманитартә усеицуреи Ихьыԥшым атәылақәа Реидгыла аусқәеи рзы Афедералтә маҵзура (Россотрудничество) адунеи атәылақәа 80 рҿы 97 хаҭарнакра амоуп. Уаанӡа иара напхгара алҭон Елеонора Митрофанова.

13

Лукашенко Белоруссиа ахада инапынҵақәа рынагӡара далагеит

1
(ирҿыцуп 16:22 23.09.2020)
Александр Лукашенко иҭоубашьҭаҵара ацеремониа акыр ирмаӡан. Асасцәа наԥхьан иара аламҭалаз.

АҞӘА, цәыббра 23 – Sputnik. Александр Лукашенко Белоруссиа ахадас аҭоубашьҭаҵара мҩаԥигеит ҳәа аанацҳауеит Sputnik Беларусь.

Лукашено, атәыла Аконституциа инақәыршәаны, белорус бызшәала аҭоуба шьҭеиҵеит, "Ареспублика Белорусь ажәлар рымаҵ шиуа, ауаҩытәыҩса изинқәеи ихақәиҭрақәеи шихьчало, ламысцқьала инап ианҵоу аҭакԥхықәра дшаҵагыло" атәы иҳәеит ҳәа аанацҳауеит амаҵзура.

Ахада иалхрақәа мҩаԥысуан нанҳәа 9 рзы. Аофициалтә дыррақәа рыла, Лукашенко изы рыбжьы арҭеит  80,1% алхыҩцәа. Азеиԥш бжьыҭара 84,28% артәеит, заанаҵы рыбжьы рҭиит 40% абжьыҭара азин змаз ауааԥсыра.

Алхрақәа рылкаақәа анрыларҳәа ашьҭахь Белоруссиа урҭ ирықәшаҳаҭмыз ақәгыларатә акциақәа рымҩаԥгара иалагеит.

Европа атәылақәак рҿы Александр Лукашенко Белоруссиа ахадас иҟалара ашьҭахь дшазхарымҵо азы аҳәамҭақәа ҟарҵеит ҳәа аанацҳауеит РИА Новости. Абри аҩыза аҳәамҭақәа ҟарҵеит Прибалтика атәылақәа, Словакиа, Германиа.

Нанҳәа 9 рзы имҩаԥгаз алхрақәа рышьҭахь Лукашенко идныҳәалеит Урыстәыла ахада Владимир Путин, иара убас Азербаиџьан, Ермантәыла, Виетнам, Казахстан, Китаи, Таџьикистан, Ҭырқәтәыла рхадацәа.

Иара убас шәаԥхьар ҟалоит:

1

COVID-19 аҟынтәи алаҵа уаанӡатәи СССР атәылақәа рахь анашьҭра азҵаара иалацәажәеит

10
(ирҿыцуп 15:36 23.09.2020)
Гамалеиа ихьӡ зху Аҭҵааратә центр аҿы аус зыдулоу акоронавирус аҟынтәи алаҵа "Спутник V" агәаҭаратә партиақәа Урыстәыла арегионқәа зегьы ироуит.

АҞӘА, цәыббра 23 – Sputnik, Лев Рыжков. Гамалеиа ихьӡ зху аепидемиологиеи амикробиологиеи рмилаҭтә ҭҵааратә центр адиректор Александр Гинцбург иазиԥхьаӡоит Урыстәыла алшарақәа шаԥшаауа акоронавирус COVID-19 аҟынтәи алаҵа "Спутник V" уаанӡатәи СССР атәылақәа рзынашьҭразы. Убри аан массала алаҵа рзынашьҭуам, избанзар зназы иарала урыстәылатәи ауааԥсыра еиқәыршәатәуп.

Аха Урыстәыла азыхиоуп алаҵа атехнологиа рыҭара. Убри азы изауа атәыла ааглыхратә мчрақәа иахәҭаны иамазароуп.

Адиректор Гинцбург игәаанагарала, Урыстәыла ауааԥсыра лаҵала реиқәыршәаразы 9-12 мзы аамҭа аҭахуп.

"Гамалеиа ихьӡ зху аинститут аҵакыраҿ иҟоу анаплакы х-сменакны аус ауеит, аха ҳтәыла ауааԥсыра зегьы лаҵала реиқәыршәаразы алшара амам, - ҳәа иҳәеит Александр Гинцбург. – Иахьазы атехнологиақәа рытрансфер 3-4 ааглыхратә плошьчадка рымоуп. Иҟалап абҵарамзазы арҭ аплошьчадкақәа рҿы 5-6 миллион доза ҭрыжьуа иҟаларгьы. Уи иалнаршон 9-12 мзы рыла алаҵа аҭыжьра 70-80% рҟынӡа анагара".

Аҵарауаҩ иажәақәа рыла, алаҵа аҭыжьразы иаҭахуп атехнологиа ҷыдақәа.

"Сара сгәы иаанагом уа (СССР атәылақәа) атехнологиатә плошьчадкақәа хиоуп ҳәа. Дара рҽаздырхиар, атрансфер Анцәагь дахәон. Аха уаҟагь Белоруссиатәи аҭагылазаашьа акәхап иҟоу. Асеиԥш аан ҳара иҳалшо ацхыраароуп. Уажәы ицоит аицәажәарақәа ареспубликақәа (уаанӡатәи СССР ареспубликақәа) реинырразы".

Массала алаҵа алагалара зыҟалом ҳәа иҳәеит Гинцбург. Аха анаплак дуқәа ахьыҟоу атәылақәа рҿы аҭыжьра еиҿкаахар алшоит. Иаҳҳәап, Индиа.

Александр Гинцбург иажәақәа рыла, Урыстәыла инхо аҳәаанырцәуаагьы ирылшоит алаҵа аԥышәара рхы аладырхәыр.

"Ҳлабораториаҿ аԥкырақәа ыҟам. Азакәанԥҵара адискриминациа аныԥшуам", - ҳәа Sputnik иазеиҭеиҳәеит Александр Гинцбург.

Иара убас шәаԥхьар ҟалоит:

 

10
Атемақәа:
Ачымазара ҿкы – акоронавирус Аԥсни адунеи аҿи: иалкаау

Ҭыҩԥҳа еиҭалҳәеит аҿкы чымазаразы Тҟәарчал аҭагылазаашьа зеиԥшроу

0
(ирҿыцуп 19:29 23.09.2020)
Тҟәарчалтәи араионтә хәышәтәырҭа аҿктәы ҟәша амедеиҳәшьа еиҳабы Емма Ҭыҩԥҳа арадио Sputnik арубрика "Раионк аԥсҭазаараҟынтә" аҿы еиҭалҳәеит COVID-19 зманы ирыдҵаалаз шаҟаҩы ыҟоу, урҭ рҭагылазаашьа зеиԥшроу.
Раионк аԥсҭазаараҟынтә: Ҭыҩԥҳа Тҟәарчал COVID-19 аганахьала аҭагылазаашьа зеиԥшроу атәы

"Ачымазара зыхьыз 17-ҩык ыҟоуп, зҭакқәа аахьоу. Аҩны рҽырхәышәтәуеит 12-ҩык, Гәдоуҭатәи агоспиталь ахь ирышьҭхьоу хәҩык рҟынтәи ҩыџьа ргәы бзиахахьеит. Ачымазцәа рааигәа иҟаз ҳәа 14-ҩык алкаауп, аҩны рҽыԥхьакны иҟоуп 20-ҩык. Абас иҟоуп иахьазы Тҟәарчал ҳҭагылазаашьа", - лҳәеит Ҭыҩԥҳа.

Иаҳа инеиҵыху аиҿцәажәара шәазыӡырҩыр шәылшоит арадио Sputnik Аԥсны аефир аҿы.

Акоронавирус иазку ажәабжьқәа шәрыԥхьар ҟалоит абра>>

0
Атемақәа:
Ачымазара ҿкы – акоронавирус Аԥсни адунеи аҿи: иалкаау