Стенин ихьӡ зху аиндаҭлараҿ онлаин-бжьыҭирала иаиааиз ихьӡ ҳәоуп

5
(ирҿыцуп 13:05 04.08.2020)
Цәыббрамзазы Андреи Стенин ихьӡ зху аиндаҭлара асаит stenincontest.ru | stenincontest.com аҟны ирыланаҳәараны иҟоуп иаиааиз рыхьӡқәа. Аиндаҭлара иара убасгьы ихацнаркуеит ашықәс нҵәаанӡа адунеи ақалақьқәа рҿы аиааирагаҩцәа рыбжьара ароуд-шоу амҩаԥгара.

АҞӘА, нанҳәа 4 - Sputnik. Андреи Стенин ихьӡ зху жәларбжьаратәи аиндаҭлараҿ аинтернет-хархәаҩцәа ргәаанагарала иреиӷьуп ҳәа иалкаауп Примориатәи ажурналист Иури Смитиук ифотосахьа "Врангель идгьылбжьаха". Асахьаҿ дарбоуп аҳәырԥсарра аусзуҩ, аинспектор Павел Кулемеев.

Врангель идгьылбжьаха — урыстәылатәи Арктикаҿ иҩадатәиӡоу ҳәырԥсарратә дгьылбжьахоуп. Аҵааршәыратә океан адгьылбжьаха еиҩнашоит 180-тәи америдиан ала, апланета Мрагылареи Мраҭашәареи ахәҭақәа инарықәыршәаны. Аҳәырԥсарра "Врангель идгьылбжьаха" аҭаара ԥкуп.

Аԥхыни ҭагалани аус руеит жәа-туристтә маршрутк. Атуристцәа рыҟазаарагьы алшоит ареинџьерцәа рыцны мацара. Дара урҭ ршәарҭадара иахылаԥшуеит.

Жәларбжьаратәи аинформациатә маҵзура "Россия сегодня" еиҿнакааз Андреи Стенин ихьӡ зху афотожурналистика жәларбжьаратәи аконкурс хықәкны иамоуп ҳаамҭазтәи афотожурналистика ауаажәларра разхьарԥшра. Аконкурс – жәларбжьаратәи афотоеилазаара афотожурналистикаҟны ахьыӡ ҿыцқәа ахьаадырԥшуа, астандартқәа ахьдырҿио, иахьышьақәдыргыло ҭыԥ заҵәыкны иҟоуп. Иара рхы аладырхәуеит 18 - 33 шықәса зхыҵуа. 2020 шықәса рзы аиндаҭларахь икылган 5 000 усумҭа 75 тәыла рҟынтәи.

2014 шықәса раахыс аиндаҭлара аусумҭақәа цәырыргахьеит: Москва, Кеиптаун, Будапешт, Мадрид, Ниу-Дели, Милан, Ниу-Иорк, Анкара, Буенос-Аирес уҳәа адунеи ақалақь дуқәа рҿы. Арзаҳалқәа рыдкылара есышықәса иалагоит ԥхынҷкәын 22 рзы ЖәАА "Россия сегодня" афотокорреспондент Андреи Стенин имшира аҽны.

Аиндаҭлара жәларбжьаратә информациатә партнерцәаны иҟоуп: аинформациатә маҵзуреи арадиои Sputnik, аинформациатә маҵзура Askanews, амедиахолдинг Independent Media, аинформациатә маҵзура Notimex, ажәабжьтә маҵзура ANA, ателеканали апортали RTShanghai United Media Group (SUMG), аинтернет-портал China Daily, аинтернет-портал The Paper, амедиа-ҳа Al Mayadeen, аинформациатә маҵзура Prensa Latina, аинформациатә маҵзура News1, аинтернет-портал DBW, ажәабжьтә портал Brasil247, ажурнал "National Geographic Россия", апортал Russian Photo, апортал Photo-study.ru, афотошкола "Академия фотографии", аинформациатә портал YOung JOurnalists, ажурнал Fotoargenta, Ниу-Дели афотожурналистика аклуб, ажурнал Enfoque Visual, ажурнал LF Magazine, жәларбжьаратәи афестиваль PhotON.

5

Аԥсны Адәныҟатәи аусқәа рминистрра Ашьха Ҟарабах иҟоу аҭагылазаашьазы ааԥхьара ҟанаҵеит

6
(ирҿыцуп 18:43 27.09.2020)
Аерман-азербаиџьантә конфликт ҩаԥхьа аҽарҿыцит амҽыша ашьыжь. Ермантәылеи Ашьха Ҟарабахи аибашьратә ҭагылазаашьеи азеиԥш мобилизациеи рылаҳәоуп.

АҞӘА, цәыббра 27 - Sputnik. Аԥсны Адәныҟатәи аусқәа рминистрра аерман-азербаиџьантә конфликт ҩаԥхьа аҽахьарҿыцыз агәҭынчымра шазцәырнаго азы аҳәамҭа ҟанаҵеит.

"Аԥсны Адәныҟатәи аусқәа рминистрра адунеижәларбжьарахь ааԥхьара ҟанаҵоит Ареспублика Арцах (ашьха Ҟарабах – аред.) иаҿагыланы имҩаԥысуа агрессиа аанкылазарц, арегион аҟны бџьаршьҭыхлатәи аиҿагылара иахьынӡауа иаԥдырҟәҟәаарц", - ҳәа азгәаҭоуп аминистрра асаит аҟны икьыԥхьу аҳәамҭаҿы.

 

Адәныҟатәи аусқәа рминистрраҿы агәрагара аадырԥшит уажәазы иҟоу, жәларбжьаратәи азхаҵара змоу амеханизм – ОБСЕ иатәу Минсктәи агәыԥ ала аконфликт аҭышәныртәалара альтернатива шамам.

Цәыббра 27 ашьыжь Азербаиџьан Атәылахьчара аминистрра аҳәамҭа ҟанаҵеит Ермантәыла Арбџьармчқәа Ҟарабх аинырратә цәаҳәала иҟоу анхарҭақәа ирылахысит ҳәа. Дара урҭ адыррақәа рыла, атәылауаа рыбжьара иҭахаз ыҟоуп. Ермантәыла Арбџьармчқәа ишырҳәаз ала, Ҟарабах "аҳауантәи аракетақәа рылеи иажәлеит". Ереван ирҳәеит Бақәа "ҳажәло иалагеит" ҳәа, ҟарабахтәи ахырхарҭала. Иазхаҵам Ашьха-Ҟарабахтәи Ареспубликаҿы адырра ҟарҵеит, артиллериала ишреихсыз аҭынч уааԥсыра рынхарҭақәа, аҳҭнықалақь Степанакертгьы уахь иналаҵаны. Аиҳабыра ауааԥсыра рахь ааԥхьара ҟанаҵеит рҽыԥхьаркырц, уи ашьҭахь Ҟарабах аибашьратә ҭагылазаашьеи амобилизациеи рыларҳәеит. Аибашьратә ҭагылазаашьеи амобилизациеи рыларҳәеит иара убас Ермантәылагьы. Бақәа акәзар, амобилизациа аҭахны иҟам рҳәеит, ҳар зегь рыла еиқәшәоуп ҳәа. Аҳәынҭқаррақәа жәпакы, Урыстәылеи Франциеи назлоу, аганқәа рыҽныркыларц абжьгара ҟарҵоит.

6

Аԥснытәи адизаинер Рим имҩаԥысуа амода амчыбжь Altaroma далахәуп

4
(ирҿыцуп 16:56 27.09.2020)
Altaroma захьӡу римтәи амода амчыбжь ахь инарыԥхьоит даҽакы иеиԥшым амаҭәеи аксессуарқәеи аԥызҵо адизаинер қәыԥшцәа. Ари аусмҩаԥгатә аҳәаақәа ирҭагӡаны ицәырырго аекспонатқәа зегьы Италиа иҟаҵоу роуп.

АҞӘА, цәыббра 27 – Sputnik, Асмаҭ Ҵәыџьԥҳа. Аԥснытәи адизаинер Магда Қаџьаиаԥҳа иаԥылҵаз аксессуарқәа рколлекциа цәырылгеит римтәи амода амчыбжь Altaroma аҟны. Абри атәы Sputnik иазаалыцҳаит адизаинер лхаҭа.

Лара лажәақәа рыла, аколлекциа цәырган зхы иақәиҭу адизаинер қәыԥшцәа ирызкыз аҭыԥ ҷыда Showcase аҟны.

"Сара ари аусмҩаԥгатә аиҿкааҩцәа рҟынтә ааԥхьара соуит, избан акәзар сыбренд Италиа иҟоуп. Сгәы иахәоит аиҿкааҩцәа сколлекциа ауникалра ахьазгәарҭаз", - лҳәеит лара.

Адизаинер далгахьеит аинтериертә дизаин азы Европатәи аинститут IED Milano, Милантәи астудиақәа руак аҿы лзанааҭдырра ҳаралкхьеит. Аҭыԥҳа амодахь аинтерес лызцәырҵит аинститут аҿы лҵара анхлыркәша ашьҭахь.

"Аԥхынтәи аԥсшьарамшқәа раан сазхәыцит аҳәса рзы аклатчқәа аԥысҵарц. Аидеиа шсоуз еиԥшҵәҟьа 3D амодельқәа ҭысхуа слагеит, урҭ ахьыҭсыжьшагьы сашьҭалеит. Сдебиуттә коллекциа ӡырызгеит парижтәи амода амчыбжь аҟны", - ҳәа еиҭалҳәеит адизаинер қәыԥш.

Аԥсуа дизаинер илнапкымҭоу аксессуарқәа ныҟәыргоит ауарҳалмҩа иқәсуа италиатәи актрисацәеи, амода иацклаԥшуа аҳәсеи, иара убас ицәырҵуеит амода иазку ажурналқәа VOGUE, L`officiel, Vanity Fair уҳәа рдаҟьақәа рҟны.

Қаџьаиаԥҳа иазгәалҭеит лгәы ишҭоу аколлекциа ҿыцқәа рцәыргақәҵа аиҿкаара, лара аксессуарқәа мацара ракәӡам лнапы злаку. Аҭыԥҳа убасгьы аҩнымаҭәеи аинтериери рдизаин даҿуп.

4

Даҽа 46-ҩык Аԥсны атәылауаа акоронавирус рыдбалоуп

1
(ирҿыцуп 19:25 27.09.2020)
Иахьазы Аԥсны иахьаҵанакуа иаарԥшу акоронавирустә хҭысқәа рхыԥхьаӡара 1332 ыҟоуп. Ргәы бзиахахьеит 400-ҩык, жәҩык рыԥсҭазаара иалҵит.

АҞӘА, цәыббра 27 – Sputnik. Аԥсны иҳаҩсыз уахыки-ҽнаки рыла акоронавирус зыхьуа рхыԥхьаӡара даҽа 46-ҩык рыла еиҳахеит ҳәа аанацҳауеит Ауааԥсыра акоронавирус рацәыхьчаразы аоперативтә штаб.

"Иҳаҩсыз уахыки-ҽнаки рыла акоронавирустә инфекциа амазааразы игәаҭан 160-ҩык атәылауаа, урҭ рахьтә адиагноз COVID-19 рзышьақәыргылан 46-ҩык", - ҳәа аанацҳауеит аоперштаб.

Абыржәтәи аамҭазы Гәдоуҭатәи араионтә хәышәтәырҭа хадаҿы ишьҭоуп 120-а апациентцәа, урҭ рахьтә COVID-19 адиагноз рзышьақәырӷәӷәоуп 117-ҩык, рҭагылазаашьа хьанҭоуп 14-ҩык, ибжьаратәуп 27-ҩык.

Ауааԥсыра COVID-19 рацәыхьчаразы аоперативтә штаб ажәлар рахь ааԥхьара ҟанаҵоит ачымазара ҿкы рымкырц азы иахәҭоу аԥҟарақәа зегьы ирықәныҟәаларц.

Акоронавирус иазку ажәабжьқәа шәрыԥхьар ҟалоит абра>>

1
Атемақәа:
Ачымазара ҿкы – акоронавирус Аԥсни адунеи аҿи: иалкаау