Урыстәыла, Ермантәыла, Азербаиџьан еиқәшаҳаҭхеит аибашьра аанкыларазы

21
(ирҿыцуп 11:52 10.11.2020)
Аганқәа рыбжьаратәи аиқәшаҳаҭра инақәыршәаны ахымца аанкылахоит абҵара 10 инаркны.

АҞӘА, абҵара 10 - Sputnik. Урыстәыла, Ермантәыла, Азербаиџьан еиқәшаҳаҭхеит Ашьха Ҟарабах аибашьра аанкыларазы ҳәа аҳәамҭа ҷыда ҟаиҵеит Владимир Путин.

Аҳәамҭа атекст Sputnik Армения иакьыԥхьит:

  • Аибашьра аанкылахоит абҵара 10 аҵх агәы инаркны. Азербаиџьани Ермантәылеи рыруаа иахьгылоу иаангылоит;
  • Аганқәа атҟәацәа еимырдоит;
  • Ереван абҵара 15 рҟынӡа Бақәа иазнаргьыжьуеит Кельбаџьартәи араион, ԥхынҷкәын 1 аҟынӡа – Лачиатәи араион, иара ахархәара анаҭалоит хә-километрак аҭбаара змоу Лачатәи акоридор – Ашьха Ҟарабахи Ермантәылеи реимадаразы. Убри аан ақалақь Шуша ари апункт иаҵанакуам. Уи адагьы абҵара 20 рҟынӡа Ермантәыла Агдамтәи араиони Газахтәи араион ахәҭеи Азербаиџьан иазнархынҳәуеит;
  • Лачатәи акоридор иахьаԥнуи Ашьха Ҟарабах аинырратә цәаҳәаҿи иргылахоит урыстәылатәи аҭынчреиҿкааҩцәа рконтингент 1960-ҩык абџьар зку аруаа рыла ишьақәгыло, 90 кәылӡтәы транспортер, 380 ак автомобилтәи атехника ҷыдеи;
  • Аҭынчреиҿкааҩцәа дыргылоит Ермантәыла ар шалыргалак. Дара уа рыҟазаара хә-шықәса ҿҳәараны иаҭоуп, аганқәа руак ари аиқәшаҳаҭра мап ацәнакаанӡа иааиуа егьырҭ ахәышықәсақәагьы рыҿҳәара иацҵахо;
  • Аиқәшаҳаҭра анагӡара ахылаԥшразы иаартхоит аҭынчреиҿкааратә центр;
  • Иааиуа ахышықәса рыҩныҵҟа иҳәаақәҵахоит Лачатәи акоридор ала амаршрут ҿыц амҩангара – Степанакерти Ермантәылеи реимадаразы. Иалкаахоит урыстәылатәи аҭынчреиҿкааҩцәа рконтингент амаршрут ахьчаразы. Азербаиџьан хәдықәҵара ауеит Лачатәи акоридор ала аныҟәара ашәарҭадара аиҿкааразы;
  • Ихҵәази иқәҵызи ахаҿқәа Ашьха Ҟарабахи иаԥну араионқәеи рахь ихынҳәуеит ахҵәацәа рзы ООН Иреиҳаӡоу Акомиссариат анапхгараҭара ахылаԥшрала;
  • Арегион аҿы аекономикатәии атранспорттәи еимадарақәа аарттәуп, убри аан Ермантәыла ахахьы иагоит Азербаиџьан мраҭашәаратәи араионқәеи Нахичевантәи автономиеи рыбжьара атранспорттә еимадара аиҿкаара. Аимадара хылаԥшра арҭоит урыстәылатәи аҳәаахьчаҩцәа. Уи адагьы иазыԥхьагәаҭоуп атранспорт коммуникациа ҿыцқәа, Азербаиџьани Нахичевантәи автономиеи еимаздо рыргылара.

Ермантәыла аԥыза-министр Никол Пашиниан ари аиқәшаҳаҭра акырӡа иара изы ихьанҭоу еиқәшаҳаҭраны далацәажәахьан, аха аҽа мҩак ыҟаны ишимбо иҳәеит. Азербаиџьан ахада Ильхам Алиев иҳәеит ари аиқәшаҳаҭра 1988 шықәса раахыс иҟоу аимак аҟны акәаԥ шаргыло.

Абҵара 9 рзы азербаиџьантәи ПВО урыстәылатәи аверталиот карыжьит Ермантәыла аҵакыраҿы. Ҩыџьа ҭахеит, аӡәы ахәра ӷәӷәақәа иоуит. Алиев Путин аҭел дизасны аҭамзаара шьҭеиҵеит. Иара иҳәеит ари машәырны ишыҟалаз, акомпенсациа ашәарагьы дадгылеит.

Аиқәшаҳаҭра ашьҭахь

Урыстәыла, Ермантәыла, Азербаиџьан рыбжьара аиқәшаҳаҭра анапаҵаҩра анымҩаԥыс ашьҭахь Ереван аҿагыларақәа мҩаԥыргеит.

Аинышәара аҟазшьақәа згәамԥхаз атәыла аиҳабыреи апарламенти рхыбрақәа ирыҩналаны Аминистрцәа реилазаара ҿыц еиҿкаазарци Ермантәыла Ҟарабах аганахь ала аиқәшаҳаҭрақәа ирылҵырци адҵа ҟарҵеит. Ермантәыла апарламент аиҳабы дрыԥҟеит.

Аоппозициатә депутатцәа ирҳәеит аиҳабыра ԥхьатәара рышьҭреи аиқәшаҳаҭра мап ацәкреи рзы аӡбрақәа рымҩаԥгара рыҽшазыршәо.

Пашиниан Facebook аҿы ишиашоу ицо аефир ала аҳәамҭа ҟаиҵеит афронт аҿы иҟоу аҭагылазаашьа иаҿырԥшны шакәу аиқәшаҳаҭра инапы шаҵеиҩыз. Иара идгылаҩцәа рмитинг амҩаԥгара игәҭакуп.

Ермантәыла ахада Армен Саркисиан иҳәеит аиқәшаҳаҭра анапаҵаҩра атәы АИХқәа рыла шакәу ишидырыз.

21
Вывеска компании Tesla

Илон Маск афымцамобильқәа Tesla абиткоин азы рыҭира деиҭалагар шыҟало иҳәеит

6
(ирҿыцуп 13:43 22.07.2021)
Tesla абиткоинқәа рзы афымцамобильқәа рыҭира даҟәыҵит 2021 шықәса лаҵарамзазы, акриптовалиута арҳаразы адгьыл аҵатә былтәы, ҷыдала арацәа рхы иахьадырхәо азы.

АҞӘА, ԥхынгәы 22 - Sputnik. Амиллиардер Илон Маск напхгара зиҭо аилахәыра Tesla аҟны азин ҟаиҵеит абиткоинқәа хәшәагак аиԥш ирыдыркылаларц, амала акриптовалиута еиҳа аекологиатә ҟазшьа анаиулак. Абри атәы аанацҳауеит РИА Новости.

"Еиҭахарҿиаау афымцамч ахархәарахь маҷ-маҷ ииасуеит абиткоин", - иҳәеит иара.

Tesla абиткоинқәа рзы афымцамобильқәа рыҭира даҟәыҵит 2021 шықәса лаҵарамзазы, акриптовалиута арҳаразы адгьыл аҵатә былтәы, ҷыдала арацәа рхы иахьадырхәо азы.

Уи адагьы амиллиардер иҳәеит напхгара зиҭо аилахәырақәа Tesla, SpaceX уаанӡа иаархәахьаз абиткоинқәа рҭиуам ҳәа.

"Ҳара (Tesla - аред.) хаҭала сареи напхгара зысҭо аилахәырақәа Tesla, SpaceX уаанӡа иааҳхәахьаз абиткоинқәа ҳҭиуам. SpaceX, Tesla сара абиткоинқәа ҳамоуп", - иҳәеит Маск "The B Word" аконференциаҿ.

Маск иҳәеит егьырҭ акриптовалиутақәа – Ethereum, Dogecoin шимоу.

6

Адунеизегьтәи атуристтә еиҿкаара: аусхк арекордтә кризис иҭагылоуп

5
(ирҿыцуп 11:26 22.07.2021)
Аекспертцәа ргәаанагарала адунеитә туризм апандемиа инадҳәаланы иаиуз ацәыӡқәа рышьҭахь иамаз аҩаӡара 2023 шықәсанӡа иазышьақәнамыргылар ҟалоит.

АҞӘА, ԥхынгәы 22 - Sputnik. Сынтәа ажьырныҳәа инаркны лаҵарамзанӡа атуризм 85% илаҟәит 2019 шықәса абри аамҭа иаҿырԥшны ҳәа аанацҳауеит Адунеизегьтәи атуристтә еиҿкаара (UNWTO).

"Атуризм аҭоурых аҿы иреиҳау акризис ҩышықәсоуп имҩаԥысуеижьҭеи. UNWTO адыррақәа рыла, сынтәа ажьырныҳәа инаркны лаҵарамзанӡа атуризм 85% илаҟәит 2019 шықәса абри аамҭа иаҿырԥшны (65% 2020 шықәса иаҿырԥшны)", - ҳәа аҳәоит Адунеизегьтәи атуристтә еиҿкаара.

COVID-19 аштамм ҿыцқәа рцәырҵра иалнаршоит аҩнуҵҟатә туризм ахь еиҳа иласны ахынҳәра жәларбжьаратәи аныҟәарақәа раасҭа ҳәа рҳәоит аиҿкаараҿы.

Сынтәа раԥхьатәи хәымз рзы адунеи аҿы ашәҟәы иҭагалан 147 миллион рыла еиҵаны жәларбжьаратә ныҟәарақәа 2020 шықәса иаҿырԥшны, 460 миллион 2019 шықәса иаҿырԥшны. Аԥкрақәа андырԥшқа, лаҵарамзазы уи маҷк еиҳахеит.

UNWTO 2020 шықәса аҭоурых аҿы иреицәоу шықәсны иазгәанаҭеит. 2019 шықәса иаҿырԥшны ҵыԥх миллиард ныҟәара рыла еиҳа еиҵахеит.

Убри аан Аԥсны атуризм аминистр ишиҳәо ала, сынтәа 30 шықәсатәи арекорд шьақәыргылоуп.

Иара убас шәаԥхьар ҟалоит:

5

Аԥсны акоронавирус 145-ҩык ишрылаз аадырԥшит иҳаҩсыз уахыки-ҽнаки рыла

9
(ирҿыцуп 23:42 23.07.2021)
Аепидемиа иалагеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 20925-ҩык ыҟоуп, ргәы бзиахеит 16750-ҩык, рыԥсҭазаара иалҵит 285-ҩык.

АҞӘА, ԥхынгәы 23 – Sputnik. Иҳаҩсыз уахыки-ҽнаки рыла COVID-19 рылоу ирыламу аилкааразы 550-ҩык атестқәа рзыҟаҵан, урҭ рахьтә 145-ҩык рцәа акоронавирус шалаз аадырԥшит, абри атәы аанацҳауеит Ауааԥсыра COVID-19 рацәыхьчаразы аоперативтә штаб.

Абыржәтәи аамҭазы Гәдоуҭатәи араионтә хәшәтәырҭа хадаҿы ишьҭоуп 192-ҩык, рҭагылазаашьа бааԥсуп 63-ҩык, ибжьаратәуп - 54-ҩык.

Аҟәатәи аинфекциатә хәшәтәырҭаҿы ирхәшәтәуеит акоронавирус зцәа иалоу 41-ы пациент, урҭ рахьтә 17-ҩык рҭагылазаашьа уадаҩуп. Очамчыра ирхәшәтәуеит 23-ҩык, рҭагылазаашьа уадаҩуп- ааҩык. Гагратәи ахәшәтәырҭаҿы - 45-ҩык, урҭ рахьтә жәаҩык рҭагылазаашьа уадаҩуп. Тҟәарчалтәи ахәшәтәырҭаҿы - 15-ҩык апациентцәа.

Акоронавирус иазку ажәабжьқәа зегьы шәрыԥхьар ҟалоит абра>>

9
Атемақәа:
Аҿкычымазара – акоронавирус Аԥсни адунеи аҿи: иалкаау