Государственная Дума РФ

Аҳәынҭдумаҿы ан лмал зауа реиқәыԥхьаӡа арҭбаара рыгәҭакуп

11
Адепутатцәа ргәаанагарала ари аӡбамҭа иалнаршоит ипроблемоу арегионқәа рҟны ахшараиура аизырҳара, ахшара рацәа змоу рыԥсҭазаара аиӷьтәра.

АҞӘА, жәабран 15 - Sputnik. ЛДПР аҟынтәи адепутатцәа Адумахь ажәадгала ҟарҵеит ахԥатәии анаҩстәии ахшара зауа ан лмал роура иалагарц ахшара маҷны иахьроуа арегионқәа рҿы аҭаацәара уи уаанӡа рхы иадмырхәацзар. Абри атәы аанацҳауеит РИА Новости, апроект авторцәа ируаӡәку Иарослав Нилов иажәақәа шьаҭас иааганы.

"Адемографиатә политика аиӷьтәра хықәкыс иҟаҵаны азакәан апроект иаднагалоит Афедералтә закәан "Ахшара змоу аҭаацәарақәа аҳәынҭқарратә дгылара цҵа рыҭаразы" аԥсахрақәа ралагалара: Урыстәылатәи Афедерациа аиҳабыра ахшараиура еиҳа илаҟәуп ҳәа иазырыԥхьаӡо атәыла асубиектқәа рҟны 2022 шықәса ажьырныҳәа 1 ашьҭахь ахԥатәи ма ицнеиуа ахшара дзоуз аҳәса уаанӡа аҳәынҭқарратә цхыраара цҵа рхы иадмырхәацзар ирзыҟаҵахарц азы", - ҳәа аҳәоит аилыркаагатә шәҟәы.

Уи адагьы ари ауснагӡатә иаҵанакыроуп ахԥатәи ахәыҷи уи ишьҭанеиуеи ԥас ма ԥҳас иҟазҵаз, уаанӡа аҳәынҭқарратә цхыраара цҵа рхы иадмырхәацзар, ахәыҷы ԥас ма ԥҳас иҟаҵараз аӡбарҭа аӡбамҭа азинмч аиузар 2022 шықәса ажьырныҳәа 1 ашьҭахь.

Авторцәа ирҳәоит Урыстәыла асубиектқәа жәпакы, ахшара рира ахьмаҷу рхатә цхыраагӡатә уснагӡатәқәа шьақәдыргылеит ахԥатәии инаҩстәии ахшара иираан аԥарашәарала ҳәа.

Аха арегионалтә ҭаацәаратә мал лаҟәуп, 100-150 нызқьмааҭ роуп иартәо. Уи ахшараиура уҭаххартә ирзыҟаҵом.

Адепутатцәа ргәаанагарала ари аӡбамҭа иалнаршоит ипроблемоу арегионқәа рҟны ахшараиура аизырҳара, ахшара рацәа змоу рыԥсҭазаара аиӷьтәра.

11

Амедиагәыԥ "Россия сегодня" ажурналистцәеи аблогерцәеи рыбжьара аицлабра рыланаҳәеит

18
Амедиагәыԥ "Россия сегодня" ирыланаҳәаз ари аицлабра еицырдыруа адиктор Иури Левитан ихьӡ ахуп.

АҞӘА, хәажәкыра 4 - Sputnik. Амедиагәыԥ "Россия сегодня" еицырдыруа адиктор Иури Левитан ихьӡ зху аицлабра "Ҳаамҭа афырхаҵа" шхацнаркуа рыланаҳәеит.

Ажурналистцәеи аблогерцәеи ԥшь-номинациак: автортә телехәаԥшратә программа, автортә радиопрограмма, аудиоподкаст, авидеоблог рахь инарышьҭыр рылшоит русумҭақәа. Арзаҳалқәа рыдыркылоит 2021 шықәса лаҵара 5 рҟынӡа апроект адаҟьаҿы – асаит ria.ru.

Аицлабра ажиури иалахәуп еицырдыруа ажурналистцәа, ателе, арадиомҩаԥгаҩцәа, амедиаекспертцәа.

Ашорт-лист ркьыԥхьуеит рашәара 15 рзы апроект адаҟьаҿы. Иаиааиз рыхьӡқәа рылаҳәахоит 2021 шықәса рашәара 24 рзы онлаин-форматла.

Номинациацыԥхьаӡа аԥхьахә иартәоит 80 000 мааҭ. Иаиааиз иранашьахоит аԥаратә аԥхьахә, адиплом. 2, 3 аҭыԥ аанызкыло агәаларшәагатә дипломқәа роуеит.

"Аицлабра, зеиԥш дыҟамыз адиктор Иури Борис-иԥа Левитан ихьӡ зху, хацыркхеит "Совинформбюро" 80 шықәса ахыҵра аламҭалаз. Ҳара ҳзы апроект – аҽазныкгьы ҳаамҭа афырхацәа рыӡбахә алацәажәара алнаршоит. Иаҳҭахуп ажурналистцәеи аблогерцәеи рҟыбаҩ аарԥшра рылҳаршарц", - иҳәеит "Россия сегодня" адиректор хада Дмитри Киселев.

Аицлабра алахәылацәа русумҭақәа автортә стиль рымазароуп, аидеиа аоригиналра аҵазароуп, аҟазареи аҟыбаҩи рыдагьы азыӡырҩи ахәаԥшҩи ргәаҵанӡа инеиуазароуп.

Аицлабра хацыркхеит "Совинформбюро" 80 шықәса ахыҵра аламҭалаз. Аџьынџьтәылатә еибашьра аҩбатәи амш азы зшьапы зкыз "Совинформбюро" хыҵхырҭаны ироуит иналукааша жәларбжьаратәи ажәабжьтә маҵзурақәа: Акьыԥхьтә маҵзура "Новости", РИА Новости, Жәларбжьаратәи амедиагәыԥ "Россия сегодня".

Жәларбжьаратәи Аинформациатә маҵзура "Россия сегодня" — жәларбжьаратә медиагәыԥуп. Адунеи аҟны имҩаԥысуа ахҭысқәа зегьы инарҭбааны, оперативла, ишәаны-изаны иазнеины иаанарԥшуеит. Иарахьы аҳәаанырцә иаҵанакуеит: амаҵзуреи арадиои Sputnik, Урыстәыла аҩныҵҟа – РИА Новости, Прайм, ИноСМИ, Украина.ру, Baltnews, ТОК. Амаҵзура иара убасгьы аԥыжәара амоуп урыстәылатәи асоциалтә ҳақәеи аблогқәеи рҟны аиҭаҳәарала. "России сегодня" ажәабжьқәа рзыӡырыҩрра алшоит ателеграм-канал апресс-маҵзураҿы - "Зубовский, 4".

18

Урыстәыла шықәсык аҩнуҵҟа 45 криминал авторитет аҭакԥхықәра иаҵадыргылеит

3
(ирҿыцуп 16:06 04.03.2021)
Ииасыз ашықәс азы Урыстәыла аполициа иаԥдырҟәҟәааит еиҿкаау абандгәыԥқәа рлахәылацәа жәанызқьҩык рҟынӡа рыцәгьоурақәа.

АҞӘА, хәажәкыра 4 - Sputnik. Урыстәыла 2020 шықәса аҩныҵҟа 45 криминал авторитет аҭакԥхықәра иаҵадыргылеит ҳәа аанацҳауеит РИА Новости, Урыстәыла ААР аиҳабы Владимир Колокольцев иҳәамҭа ҵаҵӷәыс иҟаҵаны.

"Ашьауӷатә ҭакԥхықәра иреиҳау ацәгьоуратә ерархиа иатәу 45 хаҿ аҵаркуп. Урҭ рҟынтәи ааҩык Урыстәыла аҵакыра иалцоуп", - иҳәеит Колокольцев 2020 шықәсазтәи аҳасабырбатә еилатәараҿы.

Ахәҭаҷ 210.1 "Иреиҳау ацәгьоуратә ерархиа иатәу " Урыстәыла АЗ аҟны ицәырҵит 2019 шықәсазы. Иара убри ашықәс азы Томск абри ахәҭаҷ даҵаркын аҭыԥантәи акриминалтә авторитет.

Иреиҳау ацәгьоуратә ерархиа иатәу ахаҿы 8-15 шықәса ихақәиҭра далхәыдатәхар ҟалоит, хә-миллион мааҭ ахараԥса ацҵаны. Аҭакԥхықәра иаҵугар рылшоит уаанӡатәи ацәгьоуцәа, аусҭҵаара ацхыраара азҭаз.

3

Барганџьиа: атәылаҿы иҟоу атехника зегьы ацәаӷәара аамҭазы еиқәыршәахоит

0
(ирҿыцуп 09:56 05.03.2021)
Ацәаӷәаразы араионқәа рҿы амашьынатә-трактортә станциақәа ахьынӡазыхиоу атәы арадио Sputnik аефир аҿы еиҭеиҳәеит, ақыҭанхамҩа аминистрра агрономиа аҟәша аиҳабы Едуард Барганџьиа.
Хра злоу ахҭысқәа: Барганџьиа араионқәа ацәаӷәара разырхиара иазкны

"Ацәаӷәара аамҭа макьана имааицт, аха уи азы иҳамоу атехника архиаразы аусура мҩаԥысуеит. Ақыҭанхамҩа аминистрраҿы иаԥҵан акомиссиа, араионқәа рахь иныҟәон, игәарҭон атехниказы аҭагылазашьаа зеиԥшроу атәы. Уажәнатә иуҳәар ҟалоит атәылаҿы иҟоу атехника зегьы еиқәыршәахоит ҳәа, иагыз ҟаҵахоит. Ацәаӷәара зҭаху иҟаиҵоит аҳәара, анаҩс инеины ирцәаӷәоит. Ҳара иҳамоу атехникала ҵыԥх аасҭа сынтәа аиҳа ҩынтә еиҳаны иаҳцәаӷәарҭә алшара ҳамоуп, аха ацәаӷәара аамҭа анааилак, иаразанак зегьы рҿы иузыцәаӷәаӡом, амшцәгьагьы уи аус еиԥнарҟьоит. Астанциа ақалақь аҿоуп иахьыҟоу, атехника ақыҭақәа рахь ицароуп, уигьы аамҭа агоит. Знык дахьцо даҽа ҩынтә-хынтә ацара иқәшәоит, избанзар, зегьы аԥара еицрымам", - ҳәа еиҭеиҳәеит Барганџьиа.

Иаҳа инеиҵыху аиҿцәажәара шәазыӡырҩыр шәылшоит аудио аҿы.

Иара убас шәаԥхьар ҟалоит:

0