Аҵарауаа алаҵа зызуу рзы COVID бразилиатәи аштамм зеиԥшроу атәы рҳәоит

10
(ирҿыцуп 12:27 26.07.2021)
Франциеи Гвианеи рҵарауаа алкаа ҟарҵеит COVID-19 аҟәынтәи алаҵа змоу рзы гамма-вариант аҿкра 60% ишыҟоу.

АҞӘА, ԥхынгәы 26 - Sputnik. Иахьазы бразилиатәи аштамм гамма-вариант азы идыру маҷуп лкаак ииашаны аҟаҵаразы ҳәа рҳәеит урыстәылатәи аҟазауаа РБК аҿы.

2021 шықәса лаҵарамзазы ахьы ахьыҵырхуа Гвианатәи ашахтаҿ акоронавирустә инфекциа мҽхакы ҭбаала азгәаҭан. Аҟазауаа 44-ҩык аусуҩцәа ҭырҵааит, урҭ рҟынтәи 25-ҩык COVID-19 аҟынтә алаҵа Pfizer-BioNTech рзыҟаҵан. Гамма-штамм SARS-CoV-2 ркит 15-ҩык 25-ҩык алаҵа ззыҟаҵаз рахьтә.

Иарбанзаалак авирус аиммуннтә система иаиааиуеит ҳәа лҳәеит НИУ ВШЕ адиректор Лариса Попович. Убри аан иазгәалҭеит алаҵа ззыҟаҵоу авирус даиааир алшоит, иҟалоит авирус илаларгьы. Аха убри аан еиҳа имариахоит иҭагылазаашьа.

Аҟазауаҩ лажәақәа рыла, бразилиатәи аштамм еиҳа иҿкуп, аха аԥсҭбара еиҳа еиҵоуп дельта-вариант (индиатәи аштамм) аан аасҭа.

Авирусолог, абиологиатә ҭҵаарадыррақәа рдоктор Алексеи Аграновски иазгәеиҭеит авирус аҽеиҭакра ҿыцқәа аамҭа-аамҭала ишцәырҵуа.

Гамма-вариант рдыруеижьҭеи акыр ҵуеит. Иара Бразилиа 2020 шықәса абҵарамзазы иазгәаҭан. 2021 шықәса мшаԥымзазы адунеи зегьы аҿы иалаҵәо иалагеит. Лаҵарамзазы Урыстәылагь иазгәарҭеит.

Агәабзиарахьчараз адунеизегьтәи аиҿкаара SARS-CoV-2 аштаммқәа ԥшьба шәарҭоуп ҳәа ашәҟәы иҭанагалахьеит: альфа (британиатәи), бета (аладаафрикатәи), гамма (бразилиатәи), дельта (индиатәи). Аҵыхәтәантәи иццакны иалаҵәоит аԥхьанатәтә ухантәи аасҭа. Убри аан авирус аҽеиҭакра иаҿуп.

10
Атемақәа:
Аҿкычымазара – акоронавирус Аԥсни адунеи аҿи: иалкаау (1455)

Алхрақәа рылҵшәақәа рыла Аҳәынҭқарратә Думаҿ амандатқәа еихшоуп

9
(ирҿыцуп 16:28 24.09.2021)
Аҳәынҭқарратә Думахь абжьыҭара мҩаԥысуан цәыббра 17-19 рзы. Зыбжьы азҭаз рхыԥхьаӡара 51 процент ыҟан. Аамҭак ала имҩаԥган арегионалтәи амуниципалтәи алхрақәа.

АҞӘА, цәыббра 24 - Sputnik. Урыстәыла Алхратә комиссиа хада ахантәаҩы Елла Памфилова алаҳәара ҟалҵеит алхрақәа рылҵшәақәа рыла Аҳәынҭқарратә Думаҿ амандатқәа шеихшоу азы, абри атәы аанацҳауеит РИА Новости.

Апартиа "Иаку Урыстәыла" 324 мандат аиуит, КПРФ – 57, апартиа "Ииашоу Урыстәыла – аиашаразы" -27, ЛДПР – 21, "Иҿыцу ауаа-13", - ҳәа лҳәеит Памфилова.

Ҭыԥк-ҭыԥк роуит "Аԥсадгьыл", "Аграждантә платформа", "Партиа Роста".

Мандатк змоу алхырҭатә ҭыԥқәа рҿы зхала зхы ықәзыргылаз рҟынтәи иалхуп: Москва (аԥшаара-еиқәырхаратә отриад "Лиза Алерт" акоординатор Олег Леонов, ателемҩаԥгаҩы Анатоли Вассерман, актиор Дмитри Певцов), Адыгеиа (Владислав Резник), Ҟрым (Леонид Бабашов).

Аҳәынҭқарратә Думахь абжьыҭара мҩаԥысуан цәыббра 17-19 рзы. Зыбжьы азҭаз рхыԥхьаӡара 51%  ыҟан.

Алхрақәа ирылахәын Урыстәыла атәылауаҩра змоу 14,5 нызқь-ҩык Аԥсны ауааԥсыреи жәеизанызқь-ҩык Аахыҵ Уаԥстәыла ауааԥсыреи.

9

Амааҭ адунеи аҿы еиҳа ахархәара зырҭо авалиутақәа ирыҵанакуеит

6
Фышықәса раԥхьа Урыстәылатәи амааҭ адунеи аҿы еиҳа ахархәара зырҭо авалиутақәа 20 рхыԥхьаӡараҟны иҟан, аха 2015 шықәсазы аҭыԥ аннажьит.

АҞӘА, цәыббра 24- Sputnik. Амааҭ адунеи аҿы еиҳа ахархәара зырҭо авалиутақәа 20 ирыҵанакуеит аҵыхәтәантәи ҩымз рыҩныҵҟа жәларбжьаратәи ԥарашәараҿы 0,18% аманы. Абри атәы аанацҳауеит РИА Новости абанкбжьаратә ԥареиҭарсра асистема SWIFT адыррақәа шьаҭас иганы.

Ареитинг аҿы урыстәылатәи аԥара аҟазаара Урыстәыла Абанк азыԥҵәа иахьацлаз ауп ҳәа ишьоит НРА ареитингтә маҵзура адиректор Сергеи Гришунин.

"Атранзакциақәа carry trade рыла аԥара зырҳар зҭаху жәларбжьаратәи аԥареиҭарсыҩцәа рзы ишьақәтәоу амааҭ акраҵанакуаны иҟоуп. Амааҭ акаҳара иалагар, усеиԥш ҟалар алшоит аӡынразы, анефҭ ахә лаҟәуа иалагар, амааҭгьы ирҭаххо валиутахаӡом. Еиҭахгьы ахархәара зырҭо авалиуҭақәа 20 рыбжьара иалҵыр акәхоит". - ҳәа иҳәеит аексперт.

Аҩбатәи амзыз акәны иазгәеиҭеит, атәыла аиҳабыра аилахәаахәҭраан ахәԥсашәаратә валиутаны амааҭ ахархәара иахьалагаз.

Нанҳәамзазтәи арбагақәа рыла актәи аҭыԥ ннакылоит адоллар - 40,04%. Аҩбатәи аҭыԥ евро -37,95%. Ахԥатәи аҭыԥ фунт стерлинг - 5,72%.

Аԥхьатәиқәа хәба ирыҵанакит иапониатәи аиена -2,73%, китаитәи иуань - 2,15%.

6

Гал араион ахада: Егры аҳәаа ахысра аԥҟарақәа рырӷәӷәара аҭахӡам

1
(ирҿыцуп 09:47 25.09.2021)
Уаанӡа Гал араион асанитартә ҳақьым хада инапынҵақәа назыгӡо Георги Қобалиа Sputnik аинтервиу анеиҭоз иҳәеит Аԥсни Қырҭтәылеи рҳәаа ахысра аԥҟарақәа рӷәӷәатәуп ҳәа.

АҞӘА, цәыббра 25 – Sputnik. Қырҭтәылеи Аԥсни рҳәаа ахысра аԥҟарақәа рырӷәӷәара аҭахӡам ҳәа иҳәеит арадио Sputnik аинтервиу азҭаз Гал араион ахада Константин Ԥлиа.

"Қырҭтәылеи ҳареи ҳҳәааҟны игылоуп ҳмедицинатә пункт, есҽны уа ашьыжь асааҭ быжьба инаркны ахәылбыҽха асааҭ быжьбанӡа, аҳәаа ахьынӡаарту, амедицинатә усзуҩцәа ҷаԥшьоит. Аҳәаа иахысуа ирымырхуеит алаҵа шыҟарҵахьоу азы аилыркаага, мамзаргьы 72 сааҭ еиҳаны изхымлахьоу ПЦР-тест азы ашәҟәы, ма ацәеижьҿагылақәа шрылоу зҳәо ашәҟәы", – ҳәа инаҵишьит иара.

Акоронавирустә инфекциа ҿыц азы аҭагылазаашьа цәгьоуп ҳәа ахимҳәааит Ԥлиа. Гал араион аҿы иахьазы 34-ҩык рҽырхәышәтәуеит ахәышәтәырҭа иҭамлаӡакәа, школк аамҭала иаркын, аха уигьы уажәшьҭа аусура иалагахьеит иҳәеит иара.

"Ҳсанитартә ҳақьым ишиҳәо еиԥшҵәҟьа аҭагылазашьа бааԥсым. Сара еилыскаауеит, асанитартә ҳақьымцәа аԥҟарақәа рӷәӷәазар еиҳа еиӷьаршьоит, ачымазарагьы усҟак иҿиаӡом, аха аԥсҭазаара ԥсҭазаароуп, ауаа аус нхароуп, аус руроуп, иҿиароуп. Ашәарҭара уеизгьы есымша иҟазаауеит", - ҳәа азгәеиҭеит Ԥлиа.

Уаанӡа Гал араион асанитартә ҳақьым хада инапынҵақәа назыгӡо Георги Қобалиа Sputnik аинтервиу анеиҭоз иҳәиҳәеит Аԥсни Қырҭтәылеи рҳәаа ахысра аԥҟарақәа рӷәӷәатәуп ҳәа. Иара иажәақәа рыла, Гал араион иқәынхо ауааԥсыра лассы-лассы аҳәаа иаԥну Жәыргьыҭ араион иаҭаауеит, уа мышкала 200-300-ҩык акоронавирус рыдырбалоит, ПЦР-тестқәа ракәзар, актәи ма аҩбатәи амш азы авирус рзаарԥшӡом.

1