Ҟәланырхәатәи ақәԥаҩцәа қәыԥшқәа Ставрополь аицлабраҿы амедалқәа ранашьахеит

44
(ирҿыцуп 14:58 08.09.2021)
Зых иақәиҭу ақәԥаразы Жәларбжьаратәи атурнир мҩаԥысуан Ставрополь, Урыстәыла арегионқәеи Аԥсни рҟынтәи 152-ҩык аспортсменцәа алахәны.

АҞӘА, цәыббра 8 – Sputnik, Бадри Есиава. Ҟәланырхәатәи ақәԥаҩцәа қәыԥшцәа Ставрополь имҩаԥысуаз зых иақәиҭу ақәԥаразы аицлабраҿы амедалқәа хԥа раҭәашьахеит ҳәа Sputnik иазеиҭеиҳәеит азыҟаҵаҩ Аинар Мархолиа.

Ахьтәы медал игеит Омар Ҳашыг, 50 кьыла иҟаз рыбжьара, араӡны медал – Леон Малиа, 54 кьыла иҟаз рыбжьара, аџьаз медал иоуит Леон Агрба, 58 кьыла иҟаз рыбжьара.

Мархолиа иара убасгьы иҳәеит атурнир ишалахәыз 152-ҩык аспортсменцәа: Ставропольи Ставропольтәи атәылаҿацәи, Чечнеи, Ингушетиеи, Даӷьсҭани, Ҟабарда-Балкариеи, Нхыҵ Уаԥстәылеи рҟынтәи.

"Цәыббра анҵәамҭазы Шәача имҩаԥысуа жәларбжьаратәи атурнир алахәхара ҳагәҭакуп. Аха уа еиҳа еиҵыбцәоу ҳааӡамҭацәа роуп иқәгылараны иҟоу. Алҵшәа бзиақәа аазырԥшуа ҩыџьа аспортсменцәа қәыԥшцәа сымоуп", - ҳәа иҳәеит азыҟаҵаҩ.

Ставропольҟа рцареи уа рынхареи ахә ахыршәааит Гәдоуҭа абизнес маҷ ахаҭарнакцәа.

Нанҳәа алагамҭазы азыҟаҵаҩцәа Аинар Мархолиеи, Адам Цәеибеи, Џьон Партанаӡеи рааӡамҭацәа Алан Цыгәба, Леон Малиа, Леон Агрба Ставрополь имҩаԥысуаз аицлабраҿы раӡны медалки аџьаз медалқәа хԥеи ргеит.

44

Ачемпионат ConIFA Африка Занзибар имҩаԥгахоит

5
(ирҿыцуп 14:25 23.09.2021)
Ихьыԥшым ашьапылампылтә командақәа р-Конфедерациа еиҿкаан 2013 шықәсазы. ConIFA еиднакылоит FIFA иалам 25 команда.

АҞӘА, цәыббра 23 - Sputnik. ConIFA Africa аҳәаақәа ирҭагӡаны ашьапылампыл ачемпионат абҵара 13- 25 рзы Занзибар имҩаԥысраны иҟоуп, ҳәа аанацҳауеит аиҿкаара Twitter аҿтәи адаҟьаҿы.

Ихьыԥшым ашьапылампылтә командақәа р-Конфедерациа еиҿкаан 2013 шықәсазы. ConIFA еиднакылоит FIFA иалам 25 команда. Аамҭақәак раԥхьа аҽа хырхарҭакгьы аусура иалагеит – Африкатәи аконтинент аҿы ачемпионат амҩаԥгара.

Уаанӡа аԥхынразы ачемпионат азыԥхьагәаҭан аха акоронавирус иахырҟьаны аамҭа еиҭакын.

Рашәарамзазы ашьапылампыл азы Европа ачемпионат ConIFA-2021, Франциатәи ақалақь Ницца имҩаԥысраны иҟаз ахыган атурнир, аепидемиологиатә ҭагылазаашьа Франциа иахьыуадаҩуи анапхгара ауснагӡатә ашәарҭадара иахьзадымгылои азы. Ашьапылампыл азы Аԥсны еизгоу акоманда ConIFA-2021 Европа ачемпионат иалахәхараны иҟан.

2016 шықәсазы ашьапылампыл азы Европа ачемпионат ConIFA Аԥсны имҩаԥысуан. Аԥснытәи акоманда аиааира агеит.

5

Путин Перм ауаа иреихсуаз даанызкылаз аполициа аусзуҩцәа аҳамҭа ранеишьеит

2
(ирҿыцуп 14:33 23.09.2021)
Цәыббра 20 азы Пермтәи амилаҭтә ҭҵаарадырратә университет аҵакыраҿы астудент аҵаратә корпус аҿы ахысра далагеит. Ф-ҩык ҭахеит 42-ҩык аахақәа роуеит.

АҞӘА, цәыббра 23 - Sputnik. Урыстәыла ахада Владимир Путин Агәымшәараз амедал ианеишьеит Перм ауаа ҭазырхаз ауаҩы даанызкылаз аполициа аусзуҩ, аполициа алеитенант еиҵбы Константин Калинин ҳәа аанацҳауеит РИА Новости.

Алеитенант еиҳабы Владимир Макаров ианашьоуп амедал "Ауаажәларратә еиҿкаара ахьчараҿы аҽалкааразы". Макаров ауаа аҵараиурҭа ахыбра рдәылгара еиҿикааит.

Ахада иусдҵа атекст аҿы иарбоуп арҭ рҩыџьагьы фырхаҵарыла рхы мҩаԥыргеит ҳәа.

Урыстәыла ААР ахада Владимир Колокольцев Калинин изаамҭанытәиу ачын " аполициа алеитенант " ииҭеит,  Макаров — "аполициа акапитан ".

Цәыббра 20 азы Пермтәи амилаҭтә ҭҵаарадырратә университет аҵакыраҿы ауниверситет астудент аҵаратә корпус аҿы ахысра далагеит. Ф-ҩык ҭахеит 42-ҩык аахақәа роуит.

Аусбарҭа адыррақәа рыла, ахҭыс ахьыҟалаз раԥхьа инеиз иреиуоуп  аполициа алеитенант аиҳабы Владимир Макарови аполициа алеитенант еиҵбы Константин Калинини. Макаров аҭыԥ аҟынтәи ауаа рықәгара далагеит, Калинин аҵараиурҭахь дыҩналеит. Уа дибеит абџьар зкыз ауаҩы. Аиҿахысра ашьҭахь ацәгьоуҩы дихәит, анаҩс иабџьар ихихит, раԥхьатәи ацхыраарагьы изыҟаиҵеит.

Анаҩс ахәшәтәырҭахь днаргеит. Ашьаус абри ахҭыс аганахь ала ихацыркуп. Ацәгьоуҩы аашықәса инаркны ҩажәашықәсанӡа иқәырҵар ҟалоит мамзаргьы иԥсы ахьынӡаҭоу ҭакрала ахыгара иқәырҵар ҟалоит.

2